使徒行傳 第 22 章

1

(THR) Lia̍t-ūi hū-heng ah, góa taⁿ tùi lín ka-kī hun-sò͘; chhiáⁿ lín thiaⁿ.

(BCL) 「列位父兄啊，我今對恁家己分訴，請恁聽。」

2

(THR) In thiaⁿ-kìⁿ i ēng Hi-pek-lâi ê khiuⁿ-kháu tùi in kóng, chiū koh khah an-chēng: Pó-lô kóng,

(BCL) 聽見伊用希伯來的腔口對講，就閣卡安靜。

3

(THR) Góa chiū-sī Iû-thài lâng, chhut-sì tī Ki-lī-ka ê Tāi-sò͘, tióng-sêng tī chit ê siâⁿ chòe Ka-má-lia̍t ê ha̍k-seng, chiàu lán chó͘-chong lu̍t-hoat ê giâm-kín lâi siū kà-sī, ūi-tio̍h Siōng-tè lâi jia̍t-sim, chhin-chhiūⁿ kin-á-jı̍t lín chèng lâng chı̍t iūⁿ.

(BCL) 保羅講：「我就是猶太人，出世佇基利家的大數，長成佇此個城，做迦瑪列的學生，照咱祖宗律法的嚴謹來受教示，為著上帝來熱心，親像今仔日恁眾人一樣。

4

(THR) Góa bat khún-tio̍k thàn chit ê Lō͘ ê lâng hō͘ i sí, bô lūn lâm-lú lóng pa̍k in, sàng lo̍h kaⁿ.

(BCL) 我曾窘逐趁此個路的人，互伊死，無論男女攏縳送落監。

5

(THR) Chè-si-thâu kap tiúⁿ-ló ê chôan-hōe thang chòe góa ê kan-chèng; góa ia̍h tùi in tit-tio̍h kià hō͘ hiaⁿ-tī ê phoe, khì Tāi-má-sek, beh pa̍k tiàm tī hia ê lâng thoa kàu Iâ-lō͘-sat-léng, siū hêng-ho̍at.

(BCL) 祭司頭及長老的全會通做我的干證。我亦對得著寄互兄弟的批，去大馬色，欲縛佇遐的人拖到耶路撒冷，受刑罰。」

6

(THR) Kiâⁿ kūn Tāi-má-sek, hit sî iok-lio̍k jı̍t tiong-tàu, hut-jiân tùi thiⁿ ū tōa kng ûi-lûi chiò góa.

(BCL) 「行近大馬色，彼時約略日中晝，忽然對天有大光圍纍照我。

7

(THR) Góa chiū phak tī tōe-nı̍h, thiaⁿ-kìⁿ ū siaⁿ tùi góa kóng, Sò-lô, Sò-lô, siáⁿ-sū khún-tio̍k góa?

(BCL) 我就仆佇地裡，聽見有聲對我講：『掃羅！掃羅！啥事窘逐我？』

8

(THR) Góa ìn kóng, Chú ah, lí sī chī-chūi? I ìn góa kóng, Góa chiū-sī Ná-sat-le̍k ê Iâ-so͘, lí só͘ khún-tio̍k ê.

(BCL) 我應講：『主啊，你是是誰？』伊應我講：『我就是拿撒勒的耶穌，你所窘逐的。』

9

(THR) Kap góa tī-teh ê lâng khòaⁿ-kìⁿ hit ê kng, bô thiaⁿ-kìⁿ kā góa kóng ê ê siaⁿ.

(BCL) 及我佇的人看見彼個光，無聽見給我講者的聲。

10

(THR) Góa kóng, Chú ah, góa tio̍h cháiⁿ-iūⁿ chòe? Chú kā góa kóng, Khí-lâi, jı̍p Tāi-má-sek; hōan só͘ tiāⁿ-tio̍h lí kiâⁿ ê, tī hia beh kā lí kóng.

(BCL) 我講：『主啊，我著怎樣做？』主給我講：『起來，入大馬色，凡所定著你行的，佇遐欲給你講。』

11

(THR) Góa in-ūi hit ê kng ê chhàn-lān, chiū bōe khòaⁿ-kìⁿ, hō͘ saⁿ-kap tī-teh ê lâng khan jı̍p Tāi-má-sek.

(BCL) 我因為彼個光的燦爛就看見，互相及佇的人牽入大馬色。

12

(THR) Ū chı̍t lâng, miâ kiò A-ná-nî-a, chiàu lu̍t-hoat sī kèng-khiân ê lâng, hō͘ tiàm tī hia ê chèng Iû-thài lâng só͘ o-ló;

(BCL) 有一人，名叫亞拿尼亞，照律法是敬虔的人，互佇遐的眾猶太人所謳咾。

13

(THR) i chiū-kūn góa lâi khiā tī sin-piⁿ, kā góa kóng, Hiaⁿ-tī Sò-lô, lí thang koh khòaⁿ.

(BCL) 伊就近我，來徛佇身邊，給我講：『兄弟掃羅，你通閣看。』

14

(THR) Góa chek-sî kia̍h ba̍k khòaⁿ i. Koh kóng, Lán lia̍t-chó͘ ê Siōng-tè í-keng tiāⁿ-tio̍h lí lâi chai I ê chí-ì, khòaⁿ hit ê Gī-ê, koh thiaⁿ I ê chhùi só͘ chhut ê siaⁿ.

(BCL) 我即時抬目看伊。閣講：『咱列祖的上帝已經定著你來知伊的旨意，看彼個義的，閣聽伊的嘴所出的聲。

15

(THR) In-ūi lí beh chiong só͘ khòaⁿ-kìⁿ só͘ thiaⁿ-kìⁿ ê, ūi-tio̍h I chòe kan-chèng tī chèng lâng.

(BCL) 因為你欲將所看見，所聽見的，為著伊做干證佇眾人。

16

(THR) Taⁿ siáⁿ-sū iân-chhiân ah? khí-lâi, kiû I ê miâ, lâi siū sóe-lé, sóe-tû lí ê chōe.

(BCL) 今啥事延延啊？起來，求伊的名來受洗禮，洗除你的罪。』」

17

(THR) Āu-lâi góa tò-tńg kàu Iâ-lō͘-sat-léng, tī tiān-nı̍h kî-tó ê sî, sîn iû tī siōng-gōa,

(BCL) 「後來，我倒轉到耶路撒冷，佇殿裡祈禱的時，神遊佇象外，

18

(THR) khòaⁿ-kìⁿ I tùi góa kóng, Lí tio̍h kóaⁿ-kín chhut Iâ-lō͘-sat-léng, in-ūi lí ūi-tio̍h góa só͘ kan-chèng ê, hiah ê lâng teh-beh m̄ chiap-la̍p.

(BCL) 看見伊對我講：『你著趕緊出耶路撒冷，因為你為著我所干證的，許個人欲呣接納。』

19

(THR) Góa kóng, Chú ah, in lóng chai góa pêng-sò͘ tī ta̍k ê hōe-tn̂g chiong sìn lí ê lâng koaiⁿ-kaⁿ koh phah in;

(BCL) 我講：『主啊，攏知我平素佇逐個會堂將信你的人關監，閣拍。

20

(THR) koh chòe lí ê kan-chèng ê Sū-thê-hóan lâu huih ê sî, góa ia̍h khiā-óa, tâng hoaⁿ-hí, koh kò͘ hāi-sí i ê lâng ê saⁿ.

(BCL) 閣做你的干證的司提反流血的時，我亦徛倚同歡喜；閣顧害死伊的人的衫。』，

21

(THR) Chú kā góa kóng, Khì ah; góa beh chhe lí khì hn̄g-hn̄g, chiū-kūn gōa-pang lâng.

(BCL) 主給我講：『去啊！我欲差你去遠遠就近外邦人。』」

22

(THR) In thiaⁿ kàu chit kù ōe; chiū tōa siaⁿ kóng, chit hō lâng tio̍h tùi tōe-nı̍h tû-khì, i m̄ eng-kai o̍ah.

(BCL) 聽到此句話，就大聲講：「此號人，著對地裡除去！伊呣應該活。」

23

(THR) Chèng lâng hōa-hōa jióng, thǹg saⁿ, pōaⁿ thô͘-hún tī khong-tiong.

(BCL) 眾人嘩嘩嚷，褪衫，拂土粉佇空中。

24

(THR) Chhian-chóng chiū bēng-lēng tòa Pó-lô jı̍p iâⁿ-pôaⁿ, ēng piⁿ phah lâi sím-mn̄g i, ài chai ūi-tio̍h sím-mı̍h iân-kò͘ chèng lâng án-ni jióng i.

(BCL) 千總就命令帶保羅入營盤，用鞭拍來審問伊，愛知為著甚麼緣故眾人按呢嚷伊。

25

(THR) Tú-á ēng phê-tòa pa̍k i, Pó-lô tùi piⁿ-á teh khiā ê pé-chóng kóng, Chòe Lô-má lâng, bē tēng chōe, lín phah i, thang mah?

(BCL) 抵仔用皮帶縛伊，保羅對邊仔徛的百總講：「做羅馬人，未定罪，恁拍伊，通嗎？」

26

(THR) Pé-chóng thiaⁿ-kìⁿ, chiū khì kā chhian-chóng kóng, Lí beh cháiⁿ-iūⁿ chòe? in-ūi chit ê sī Lô-má lâng.

(BCL) 百總聽見，就去給千總講：「你欲怎樣做？因為此個是羅馬人。」

27

(THR) Chhian-chóng chiū-kūn lâi tùi i kóng, Kā góa kóng, lí sī Lô-má lâng á m̄ sī? I kóng, Sī.

(BCL) 千總就近來對伊講：「給我講，你是羅馬人抑呣是？」伊講：「是。」

28

(THR) Chhian-chóng ìn kóng, Góa ēng chōe-chōe gûn bóe jı̍p chit ê che̍k. Pó-lô kóng, Góa chhut-sì chiū-sī.

(BCL) 千總應講：「我用多多銀買入此個籍。」保羅講：「我出世就是。」

29

(THR) Tùi án-ni beh phah-mn̄g i ê lâng chiū liâm-piⁿ lī-khui i; chhian-chóng kì-jiân chai i sī Lô-má lâng, in-ūi bat pa̍k i, ia̍h chin kiaⁿ.

(BCL) 對按呢欲拍問伊的人就連鞭離開伊。千總既然知伊是羅馬人，因為曾縳伊，亦真驚。

30

(THR) Keh jı̍t, ài chai Pó-lô hō͘ Iû-thài lâng kò ê sı̍t-chêng, chiū kā i tháu khui, bēng-lēng chiah ê chè-si-thâu kap chôan kong-hōe chū-chı̍p; chiū tòa Pó-lô lo̍h-lâi, hō͘ i khiā tī in ê bīn-chêng.

(BCL) 隔日，愛知保羅互猶太人告的實情，就給伊解開，命令諸個祭司頭及全公會聚集，就帶保羅落來，互伊徛佇的面前。

Bible Color Mark

• 台語漢字羅馬本
• 巴克禮全羅