使徒行傳 第 23 章

1

(THR) Pó-lô chù-ba̍k khòaⁿ kong-hōe, kóng, Hiaⁿ-tī ah, góa pêng-sò͘ chòe lâng ǹg Siōng-tè, hōan-sū chûn liông-sim, kàu kin-á-jı̍t.

(BCL) 保羅注目看公會，講：「兄弟啊，我平素做人向上帝凡事存良心，到今仔日。」

2

(THR) Chè-si-thâu A-ná-nî-a bēng-lēng sin-piⁿ teh khiā ê lâng phah i ê chhùi.

(BCL) 祭司頭亞拿尼亞命令身邊徛的人拍伊的嘴。

3

(THR) Pó-lô chiū tùi i kóng, Hún-pe̍h ê chhiûⁿ ah, Siōng-tè beh phah lí; lí chē teh chiàu lu̍t-hoat sím-phòaⁿ góa, kèng-jiân ûi-ke̍h lu̍t-hoat bēng-lēng phah góa mah?

(BCL) 保羅就對伊講：「粉白的牆啊，上帝欲拍你！你坐照律法審判我，竟然違逆律法，命令拍我嗎？」

4

(THR) Sin-piⁿ teh khiā ê lâng kóng, Siōng-tè ê chè-si-thâu, lí mē i mah?

(BCL) 身邊徛的人講：「上帝的祭司頭你罵伊嗎？」

5

(THR) Pó-lô kóng, Hiaⁿ-tī ah, góa m̄ bat i sī chè-si-thâu; in-ūi sèng-keng ū kì, kóng, Bo̍h-tit mē lí ê peh-sìⁿ ê sī-tōa.

(BCL) 保羅講：「兄弟啊，我呣識伊是祭司頭；因為聖經有記講：『莫得罵你的百姓的序大。』」

6

(THR) Nā-sī Pó-lô chai in chı̍t pêng sī Sat-thó͘-kai lâng, chı̍t pêng sī Hoat-lī-sài lâng; chiū tī kong-hōe tiong kiò kóng, Hiaⁿ-tī ah, góa sī Hoat-lī-sài lâng, ia̍h sī Hoat-lī-sài lâng ê kiáⁿ; chit tia̍p siū sím-phòaⁿ chiū-sī in-ūi sí-lâng koh-o̍ah ê ǹg-bāng.

(BCL) 若是保羅知一旁是撒都該人，一旁是法利賽人，就佇公會中叫講：「兄弟啊，我是法利賽人，亦是法利賽人的子。此霎受審判，就是因為死人復活的向望。」

7

(THR) Kóng án-ni, Hoat-lī-sài lâng kap Sat-thó͘-kai lâng saⁿ-chiⁿ; chèng lâng chiū hun-pêng.

(BCL) 講按呢，法利賽人及撒都該人相爭，眾人就分旁。

8

(THR) In-ūi Sat-thó͘-kai lâng kóng bô koh-o̍ah, ia̍h bô thiⁿ-sài, ia̍h bô sîn; nā-sī Hoat-lī-sài lâng chiū jīn nn̄g hāng lóng ū.

(BCL) 因為撒都該人講，無復活，亦無天使亦無神；若是法利賽人就認二項攏有。

9

(THR) Chiū ū tōa soan-jióng; Hoat-lī-sài hit pêng ê keng-ha̍k-sū kúi-nā ê khí-lâi, cheng-piān kóng, Góan khòaⁿ chit lâng lóng bô pháiⁿ; nā beh sī ū sîn, á-sī thiⁿ-sài, kap i kóng ōe nı̍h?

(BCL) 就有大喧嚷。法利賽彼旁的經學士幾若個起來爭辯講：「阮看此人攏無歹，若欲是有神，抑是天使及伊講話呢？」

10

(THR) Hit sî tú-tú tōa saⁿ-chiⁿ; chhian-chóng kiaⁿ-liáu Pó-lô hō͘ in thiah-lı̍h, bēng-lēng peng-teng lo̍h-khì tùi in tiong-kan chhiúⁿ-chhut, chhōa i jı̍p iâⁿ-pôaⁿ.

(BCL) 彼時抵抵大相爭，千總驚了保羅互拆裂，命令兵丁落去，對中間搶出，導伊入營盤。

11

(THR) Hit mî Chú khiā tī Pó-lô ê sin-piⁿ, kóng, Chòng lí ê sim; lí bat tī Iâ-lō͘-sat-léng ūi-tio̍h góa chòe kan-chèng, ia̍h tek-khak án-ni chòe kan-chèng tī Lô-má.

(BCL) 彼暝，主徛佇保羅的身邊，講：「壯你的心！你曾佇耶路撒冷為著我做干證，亦的確按呢做干證佇羅馬。」

12

(THR) Kàu thiⁿ kng, Iû-thài lâng kiat-tóng chiù-chōa, kóng, Nā bô kàu thâi-sí Pó-lô, m̄ lim m̄ chia̍h.

(BCL) 到天光，猶太人結黨咒誓，講：「若無到死保羅呣飲呣食。」

13

(THR) Án-ni tâng sim chiù-chōa ê ū sì-cha̍p gōa lâng.

(BCL) 按呢同心咒誓的有四十外人。

14

(THR) Chiū chiū-kūn chiah ê chè-si-thâu kap tiúⁿ-ló, kóng, Góan chiah-ê í-keng chiù tāng chōa, nā bô kàu thâi-sí Pó-lô, pòaⁿ hāng mı̍h to m̄ chia̍h.

(BCL) 就就近諸個祭司頭及長老，講：「阮諸個已經咒重誓，若無到死保羅半項物都呣食。

15

(THR) Taⁿ lín kap kong-hōe tio̍h kā chhian-chóng kóng, chhiáⁿ i chhōa Pó-lô kàu lín ê bīn-chêng, ná chhin-chhiūⁿ lín beh koh siông-sè chhâ-mn̄g i ê àn-chêng; góan í-keng pī-pān hó lah, tī i bē kūn-óa ê sî lâi thâi i.

(BCL) 今恁及公會著給千總講，請伊導保羅到恁的面前，那親像恁欲閣詳細查問伊的案情；阮已經備辦好啦，佇伊未近倚的時來伊。」

16

(THR) To̍k-to̍k Pó-lô ê gōe-seng thiaⁿ-kìⁿ in beh bâi-ho̍k, chiū khì jı̍p iâⁿ kā Pó-lô kóng.

(BCL) 獨獨保羅的外甥聽見欲埋伏，就去入營給保羅講。

17

(THR) Pó-lô kiò chı̍t ê pé-chóng lâi, kóng, Chhōa chit ê siàu-liân lâng khì kìⁿ chhian-chóng; in-ūi i ū tāi-chì beh pò i chai.

(BCL) 保羅叫一個百總來，講：「導此個少年人去見千總，因為伊有代誌欲報伊知。」

18

(THR) Chiū khan i, chhōa i khì kìⁿ chhian-chóng, kóng, Hit ê siū koaiⁿ ê Pó-lô kiò góa khì, kiû góa chhōa chit ê siàu-liân lâng kìⁿ lí; ū tāi-chì beh kā lí kóng.

(BCL) 就牽伊導伊去見千總，講：「彼個受關的保羅叫我去，求我導此個少年人見你；有代誌欲給你講。」

19

(THR) Chhian-chóng khan i ê chhiú, kàu phian-phiah ê só͘-chāi, mn̄g kóng, Beh pò góa chai sím-mı̍h?

(BCL) 千總牽伊的手，到偏僻的所在，問講：「欲報我知甚麼？」

20

(THR) Kóng, Iû-thài lâng siong iok, kiû lí bîn-á-jı̍t chhōa Pó-lô lo̍h kong-hōe, ná chhin-chhiūⁿ lí beh siông-sè chhâ-mn̄g i ê àn-chêng.

(BCL) 講：「猶太人相約，求你明仔日導保羅落公會，那親像你欲詳細查問伊的案情。

21

(THR) Kiû lí bo̍h-tit thàn i; in-ūi in ū sì-cha̍p gōa lâng bâi-ho̍k teh tng-tán i; in bat chiù-chōa kóng, Nā bô kàu thâi-sí Pó-lô, m̄ lim m̄ chia̍h; taⁿ í-keng pī-pān hó, teh thèng-hāu lí ún-chún nā-tiāⁿ.

(BCL) 求你莫得趁伊；因為有四十外人埋伏當等伊，曾咒誓講，若無到死保羅呣飲呣食。今已經備辦好，聽候你允准若定。」

22

(THR) Chhian-chóng kah siàu-liân lâng khì, hoan-hù i kóng, M̄-thang tùi lâng kóng lí ū chiong chiah ê tāi-chì thong-ti góa.

(BCL) 千總教少年人去，吩咐伊講：「呣通對人講你有將諸個代誌通知我。」

23

(THR) Chiū tiàu pé-chóng nn̄g lâng, kóng, Pī-pān pō͘-peng nn̄g pah, bé-peng chhit-cha̍p, kia̍h chhiuⁿ ê nn̄g pah, kim-mî jī kiⁿ khì Kai-sat-lī-a;

(BCL) 就召百總二人，講：「備辦步兵二百，馬兵七十，抬槍的二百，今暝二更去該撒利亞；

24

(THR) koh pī-pān cheng-siⁿ hō͘ Pó-lô khiâ, pó-hō͘ i kàu chóng-tok Hui-le̍k-sū hia.

(BCL) 閣備辦精牲互保羅騎，保護伊到總督腓力斯遐。」

25

(THR) Chiū siá bûn-su, hit ê tāi-lio̍k sī kóng:

(BCL) 就寫文書，彼個大略是講：

26

(THR) Kek-ló-tiu Lū-se-a chhéng-an chóng-tok Hui-le̍k-sū tāi-jîn.

(BCL) 「克勞丟呂西亞請安總督腓力斯大人。

27

(THR) Chit lâng hō͘ Iû-thài lâng lia̍h; beh thâi i, góa chı̍t-ē chai i sī Lô-má lâng, chiū chhōa peng khì kiù i.

(BCL) 此人互猶太人掠，欲伊，我一下知伊是羅馬人，就導兵去救伊。

28

(THR) Ài chai in kò i ê iân-kò͘, chiū sàng i lo̍h in ê kong-hōe:

(BCL) 愛知告伊的緣故，就送伊落的公會，

29

(THR) chhâ-chhut i siū kò, sī ūi-tio̍h in lu̍t-hoat ê piān-lūn, pēng bô eng-kai sí eng-kai pa̍k ê àn-chêng.

(BCL) 查出伊受告是為著律法的辯論，並無應該死應該縳的案情。

30

(THR) Ū lâng kā góa kóng, teh-beh ū kè-bô͘ hām-hāi chit lâng, góa chek-sî chhe i chiū-kūn lí, ia̍h bēng-lēng kò i ê lâng tī lí ê bīn-chêng kò i.

(BCL) 有人給我講欲有計謀陷害此人，我即時差伊就近你，亦命令告伊的人佇你的面前告伊。」

31

(THR) Peng-teng hōng bēng-lēng, chiong Pó-lô thàu-mî chhōa kàu An-thê-phàⁿ-tí.

(BCL) 兵丁奉命令，將保羅透暝導到安提帕底。

32

(THR) Keh jı̍t hō͘ bé-peng kap i khì, in chiū tò-khì iâⁿ-pôaⁿ.

(BCL) 隔日，互馬兵及伊去，就倒去營盤。

33

(THR) Hiah ê bé-peng jı̍p Kai-sat-lī-a, chiong bûn-su hiàn chóng-tok, chiū hō͘ Pó-lô khiā tī i ê bīn-chêng.

(BCL) 許個馬兵入該撒利亞，將文書獻總督，就互保羅徛佇伊的面前。

34

(THR) Khòaⁿ-liáu, mn̄g i sī sím-mı̍h séng ê lâng; chai i sio̍k Ki-lī-ka.

(BCL) 看了，問伊是甚麼省的人，知伊屬基利家，

35

(THR) Chiū kóng, Kò lí ê lâng nā lâi, góa beh siông-sè thiaⁿ lí ê sū; chiū hoan-hù kò͘-siú i tī Hi-lu̍t ê gê-mn̂g.

(BCL) 就講：「告你的人若來，我欲詳細聽你的事」；就吩咐顧守伊佇希律的衙門。

Bible Color Mark

• 台語漢字羅馬本
• 巴克禮全羅