但以理書 第 7 章

1

(THR) Tng Pa-pí-lûn ông Pek-sa-sat gôan--nî, Tān-í-lí tī chhn̂g--nih ū bāng-kìⁿ, sim-lāi khòaⁿ-kìⁿ īⁿ-siōng; i chiū siá hit ê bāng, kóng-khí kî-tiong ê tāi-ì.

(BCL) 當巴比倫王伯沙撒元年，但以理佇床裡有夢見，心內看見異象，伊就寫彼個夢，講起其中的大意。

2

(THR) Tān-í-lí kóng, Góa mî--sî khòaⁿ-kìⁿ īⁿ-siōng; khòaⁿ ah, thiⁿ--nih sì-bīn ê hong hut-jiân khí, chhe tī tōa-hái ê téng-bīn.

(BCL) 但以理講：我暝時看見異象，看啊，天裡四面的風忽然起，吹佇大海的頂面。

3

(THR) Ū sì chiah siù, chin tōa-chiah, tùi hái--nih khí--lâi, khóan-sit kok bô saⁿ-tâng.

(BCL) 有四隻獸真大隻對海裡起來，款式各無相同：

4

(THR) Thâu-chı̍t-chiah chhin-chhiūⁿ sai, ū eng-chiáu ê sı̍t; góa khòaⁿ-kìⁿ kàu i ê sı̍t siū pu̍ih--khí-lâi, koh tī tōe-chiūⁿ tit-tio̍h hû--khí-lâi hō͘ i nn̄g ki kha khiā--khí-lâi chhin-chhiūⁿ lâng chı̍t-iūⁿ, iā hō͘ i ū lâng ê sim.

(BCL) 頭一隻親像獅，有鷹鳥的翅；我看見到伊的翅受拔起來，閣佇地上得著扶起來，互伊二支腳徛起來，親像人一樣，也互伊有人的心。

5

(THR) Khòaⁿ ah, koh chı̍t chiah siù sī tē-jī-chiah, chhin-chhiūⁿ hîm, théng-khí i sin-thé ê chı̍t-pêng, i ê chhùi-lāi ū saⁿ ki hia̍p-kut, kâm tī chhùi-khí-tiong; in kā i kóng, Khí-lâi, thun-chia̍h chōe-chōe bah.

(BCL) 看啊，閣一隻獸是第二隻，親像熊，挺起伊身體的一旁，伊的嘴內有三支脅骨含佇嘴齒中。給伊講：「起來，吞食多多肉。」

6

(THR) Āu-lâi góa koh khòaⁿ, khòaⁿ ah, koh ū chı̍t chiah siù, khóan-sit chhin-chhiūⁿ pà, ka-chiah ū sì ê sı̍t chhin-chhiūⁿ chiáu; chit chiah siù ū sì ê thâu-khak, koh ū kôan-pèng hō͘ i.

(BCL) 後來我閣看，看啊，閣有一隻獸款式親像豹，尻脊有四個翅親像鳥；此隻獸有四個頭殼，閣有權柄互伊。

7

(THR) Āu-lâi góa tī mî--sî ê īⁿ-siōng-tiong teh khòaⁿ, khòaⁿ ah, ū tē-sì-chiah ê siù, thang kiaⁿ thang lún, iā sī put-chí kiông; ū tōa-ki ê thih-khí, i thun-kā thiah-chhùi, só͘-chhun--ê ēng kha ta̍h i; kap í-chêng hiah ê siù koh-iūⁿ; koh hoat cha̍p ki kak.

(BCL) 後來我佇暝時的異象中看，看啊，有第四隻的獸，通驚通，也是不止強，有大支的鐵齒，伊吞咬拆碎，所剩的用腳踏伊。及以前許個獸各樣，閣發十支角。

8

(THR) Góa teh khòaⁿ hiah ê kak, khòaⁿ ah, hit tiong-kan ū lēng-gōa hoat chı̍t-ki sòe-ki-kak; chiông-chiân hiah ê kak ê tiong-kan ū saⁿ ki kak hâm kun pu̍ih--khí-lâi tī sòe ki kak ê thâu-chêng; khòaⁿ ah, chit ki kak ū ba̍k-chiu chhin-chhiūⁿ lâng ê ba̍k-chiu, koh ū chhùi teh kóng tōa-ōe.

(BCL) 我看許個角，看啊，彼中間有另外發一支細支角；從前許個角的中間有三支角，含根拔起來佇細支角的頭前。看啊，此支角有目睭，親像人的目睭，閣有嘴講大話。

9

(THR) Góa koh khòaⁿ kàu hiah ê chō-ūi pâi-lia̍t, ū chı̍t-ê tùi kó͘-chá chiū ū-ê chē--teh; i ê i-ho̍k pe̍h chhin-chhiūⁿ seh, i ê thâu-mn̂g chhin-chhiūⁿ chin chheng-khì ê iûⁿ-mn̂g; i ê pó-chō chiū-sī hé-iām, i ê lûn chhin-chhiūⁿ hé teh to̍h.

(BCL) 我閣看到許個座位排列，有一個對古早就有的坐。伊的衣服白親像雪，伊的頭毛親像真清氣的羊毛。伊的寶座就是火焰，伊的輪親像火。

10

(THR) Ū hé chhin-chhiūⁿ khoe hoat-chhut lâu tī i ê bīn-chêng; ho̍k-sāi i-ê ū chheng-chheng, kun-sûi tī i ê bīn-chêng-ê ū bān-bān; sím-phòaⁿ ê sū lóng piān, chheh lóng hian-khui.

(BCL) 有火親像溪發出，流佇伊的面前；服事伊的有千千，跟隨佇伊的面前的有萬萬；審判的事攏便，冊攏掀開。

11

(THR) Hit-sî góa in-ūi hit ki kak só͘ kóng tōa-ōe ê siaⁿ chiū khòaⁿ i; khòaⁿ kàu hit chiah siù siū-thâi, i ê sin-thé siū húi-hōai, hiat tī hé--nih sio.

(BCL) 彼時我因為彼支角所講大話的聲就看伊，看到彼隻獸受，伊的身體受毀壞，佇火裡燒。

12

(THR) Lūn-kàu kî-û chiah ê siù, i ê kôan lóng sit-lo̍h, chóng-sī in ê sìⁿ-miā iáu lâu--teh kàu tī tiāⁿ-tio̍h ê sî tiāⁿ-tio̍h ê jı̍t-kî.

(BCL) 論到其餘諸個獸，伊的權攏失落，總是的生命猶留，到佇定著的時定著的日期。

13

(THR) Góa tī mî--sî ê īⁿ-siōng-tiong teh khòaⁿ, khòaⁿ ah, ū chı̍t-ê chhin-chhiūⁿ lâng ê khóan chē thiⁿ-téng ê hûn lâi kàu tī hit ê tùi kó͘-chá chiū ū-ê, in chiū chhōa i kàu i ê bīn-chêng.

(BCL) 我佇暝時的異象中看，看啊，有一個親像人的款，坐天頂的雲來到佇彼個對古早就有者，就導伊到伊的面前。

14

(THR) Chiū siúⁿ-sù i ū kôan-pèng, êng-kng, kok-ūi, hō͘ bān peh-sìⁿ, bān-kok, bān khiuⁿ-kháu ê lâng lóng ho̍k-sāi i; i ê kôan-pèng sī éng-óan ê kôan-pèng, bōe-ōe bô--khì, i ê kok-ūi tek-khak bô hòe-bô.

(BCL) 就賞賜伊有權柄、榮光、國位，互萬百姓、萬國、萬腔口的人攏服事伊。伊的權柄是永遠的權柄，會無去；伊的國位的確無廢無。

15

(THR) Góa Tān-í-lí sim-sîn tī góa ê lāi-bīn iu-būn, sim-lāi ê īⁿ-siōng hō͘ góa peh-pak.

(BCL) 我──但以理，心神佇我的內面憂悶，心內的異象互我迫腹，

16

(THR) Góa chiū khì chhē hiah ê khiā tī piⁿ--á ê chı̍t-ê, mn̄g i chiah ê sū ê sı̍t-chāi. I chiū tùi góa kóng, iā kóe-bêng hiah ê sū hō͘ góa chai.

(BCL) 我就去尋許個徛佇邊仔的一個，問伊諸個事的實在。伊就對我講，也解明許個事互我知：

17

(THR) Hí(**Hit) sì-chiah tōa-siù sī sì ê ông, beh tùi tōe-chiūⁿ heng-khí.

(BCL) 彼四隻大獸是四個王欲對地上興起。

18

(THR) Chóng-sī Chì-kôaiⁿ-ê sèng ê peh-sìⁿ beh tit-tio̍h kok-ūi, tn̂g-tn̂g chiáng-lí kok-kôan, éng-óan bô soah.

(BCL) 總是，至高者聖的百姓欲得著國位，長長掌理國權永遠無息。

19

(THR) Hit-sî góa ài chai tē-sì-chiah siù ê sı̍t-chāi, i kap in hiah ê siù koh-iūⁿ, put-chí thang kiaⁿ, i ê chhùi-khí sī thih-ê, i ê jiáu sī tâng-ê; i thun-kā thiah-chhùi, só͘ chhun-ê ēng kha ta̍h i;

(BCL) 彼時我愛知第四隻獸的實在，伊及許個獸各樣，不止通驚，伊的嘴齒是鐵的，伊的爪是銅的，伊吞咬拆碎，所剩的用腳踏伊；

20

(THR) koh ài chai i thâu-khak só͘ hoat cha̍p ki kak ê sı̍t-chāi, kap hit-ki lēng-gōa hoat ê kak, hō͘ saⁿ ki kak lak-lo̍h tī i ê thâu-chêng, chiū-sī ū ba̍k-chiu, ū chhùi kóng tōa-ōe ê kak, i ê khóan-sit khah kiông-béng i ê tâng-lūi.

(BCL) 閣愛知伊頭殼所發十支角的實在及彼支另外發的角，互三支角落落佇伊的頭前。就是有目睭，有嘴講大話的角，伊的款式卡強猛伊的同類。

21

(THR) Góa khòaⁿ-kìⁿ chit ki kak kap sèng ê peh-sìⁿ kau-chiàn, lâi khah-iâⁿ in;

(BCL) 我看見此支角及聖的百姓交戰，來卡贏。

22

(THR) tı̍t-kàu hit ê tùi kó͘-chá chiū ū-ê lâi; kā Chì-kôaiⁿ-ê sèng ê peh-sìⁿ phòaⁿ-tòan, kàu sèng-tô͘ tit-tio̍h kok-ūi ê jı̍t-kî kàu.

(BCL) 直到彼個對古早就有者來給至高者聖的百姓判斷，到聖徒得著國位的日期到。

23

(THR) I án-ni kóng, Tē-sì-chiah siù beh chòe tōe-chiūⁿ ê tē sì kok, i kap lóng-chóng ê kok bô tâng; koh beh thun-kā chôan-tōe, beh thún-ta̍h i, thiah-chhùi i.

(BCL) 伊按呢講：第四隻獸欲做地上的第四國，伊及攏總的國無同，閣欲吞咬全地，欲睭踏伊、拆碎伊。

24

(THR) Lūn-kàu hí(**hit) cha̍p ki kak, chiū-sī tùi hit ê kok-lāi beh heng-khí cha̍p ê ông; āu-lâi lēng-gōa ū chı̍t ê ông heng-khí, kap chêng hiah-ê bô tâng, i beh hō͘ saⁿ ê ông hâng-ho̍k i.

(BCL) 論到彼十支角，就是對彼個國內欲興起十個王，後來另外有一個王興起，及前許個無同；伊欲互三個王降服伊。

25

(THR) I beh kóng-ōe ngó͘-ge̍k Chì-kôaiⁿ-ê, iā beh khó͘-chhó͘ Chì-kôaiⁿ ê sèng ê peh-sìⁿ; iā siūⁿ beh kóe-ōaⁿ choeh-kî, lu̍t-hoat; in beh kau-tài i ê chhiú, le̍k-kè chı̍t-sî, koh nn̄g-sî, koh pòaⁿ-sî.

(BCL) 伊欲講話忤逆至高者，也欲苦楚至高者聖的百姓，也想欲改換節期律法。欲交代伊的手歷過一時、閣二時、閣半時。

26

(THR) Sím-phòaⁿ-si beh chē-ūi, in beh chhiúⁿ-to̍at ông ê kôan, húi-hōai i, bia̍t-bô i kàu thiat-tí.

(BCL) 審判司欲坐位；欲搶奪王的權，毀壞伊、滅無伊，到徹底。

27

(THR) Phó͘-thiⁿ-ē ê kok-ūi, kôan-pèng, kap lia̍t-kok ê ui-kôan lóng kau-hō͘ Chì-kôaiⁿ-ê sèng ê peh-sìⁿ; I ê kok sī éng-óan ê kok, kìⁿ-nā ū-kôan-ê lóng beh ho̍k-sāi sūn-thàn I.

(BCL) 普天下的國位、權柄、及列國的威權攏交互至高者聖的百姓。伊的國是永遠的國；見若有權者攏欲服事，順趁伊。

28

(THR) Chit ê tāi-chì kàu-chia kiat-kio̍k; góa Tān-í-lí sim-lāi siūⁿ-liáu peh-pak, bīn iā piàn-sek; chóng-sī góa ēng chit ê sū khǹg tī sim-lāi.

(BCL) 此個代誌到遮結局。我──但以理，心內想了迫腹，面也變色，總是我用此個事囥佇心內。

Bible Color Mark

• 台語漢字羅馬本
• 巴克禮全羅