申命記 第 3 章

1

(THR) Lán chiū o̍at-tńg-sin chiūⁿ Pa-san ê lō͘ khì; Pa-san ông kap i ê chèng peh-sìⁿ lóng chhut-lâi tí-te̍k lán, chiū tī Í-tek-lâi kau-chiàn.

(BCL) 「咱就越轉身，上巴珊的路去。巴珊王及伊的眾百姓攏出來抵敵咱，就佇以得來交戰。

2

(THR) Iâ-hô-hoa kā góa kóng, Bo̍h-tit kiaⁿ i, in-ūi Góa í-keng chiong i kap i ê chèng peh-sìⁿ, kap i ê tōe, lóng kau tī lí ê chhiú; lí tio̍h khóan-thāi i chhin-chhiūⁿ khóan-thāi tiàm tī Hi-sı̍t-pún ê A-mô͘-lī ông Se-hông chı̍t-iūⁿ.

(BCL) 耶和華給我講：『莫得驚伊！因為我已經將伊及伊的眾百姓，及伊的地，攏交佇你的手；你著款待伊親像款待踮佇希實本的亞摩利王西宏一樣。』

3

(THR) Tùi hit-tia̍p Iâ-hô-hoa lán ê Siōng-tè iā chiong Pa-san ông Go̍k, kap i ê chèng peh-sìⁿ, lóng kau tī lán ê chhiú; lán chiū phah-sí in, bô lâu chı̍t-ê.

(BCL) 對彼霎耶和華──咱的上帝也將巴珊王噩及伊的眾百姓攏交佇咱的手；咱就拍死，無留一個。

4

(THR) Hit-sî lán chhú i só͘ ū ê siâⁿ, bô chı̍t ê siâⁿ bô hō͘ lán chhú i, kiōng la̍k-cha̍p ê siâⁿ; che sī A-jíⁿ-ko-pek ê chôan-kéng, chiū-sī Go̍k ê kok tī Pa-san ê.

(BCL) 彼時，咱取伊所有的城，無一個城無互咱取伊，共六十個城。這是亞珥歌伯的全境，就是噩的國佇巴珊的。

5

(THR) Chiah-ê lóng sī kian-kò͘ ê siâⁿ, ū kôaiⁿ ê chhiûⁿ, ū mn̂g, ū kông; chiah-ê í-gōa iáu-ū chōe-chōe bô siâⁿ-chhiûⁿ ê po͘-thâu.

(BCL) 諸個攏是堅固的城，有高的牆，有門有楗。諸個以外猶有多多無城牆的埠頭。

6

(THR) Lán it-chīn bia̍t in, chhin-chhiūⁿ chêng khóan-thāi Hi-sı̍t-pún ông Se-hông chı̍t-iūⁿ, bia̍t ū lâng khiā-khí ê siâⁿ, liân hū-jîn-lâng, kap gín-ná;

(BCL) 咱一盡滅，親像前款待希實本王西宏一樣，滅有人徛起的城，連婦仁人及囝仔；

7

(THR) to̍k-to̍k it-chhè ê cheng-siⁿ, kap siâⁿ-tiong ê chong-bu̍t, lán lóng chhú lâi chòe ka-kī ê lō͘-ēng.

(BCL) 獨獨一切的精牲及城中的贓物，咱攏取來做家己的路用。

8

(THR) Hit-sî lán tùi Iok-tàn hit-pêng, nn̄g ê A-mô͘-lī ông ê chhiú, chhiúⁿ i ê tōe, tùi A-lùn ê soaⁿ-kok kàu Hek-bûn soaⁿ.

(BCL) 彼時，咱對約但彼旁二個亞摩利王的手搶伊的地，對亞嫩的山谷到黑門山（

9

(THR) (Chit ê Hek-bûn, Se-tùn lâng chheng i chòe Se-liân; A-mô͘-lī lâng chheng i chòe Sī-nî-jíⁿ.)

(BCL) 此個黑門，西頓人稱伊做西連，亞摩利人稱伊做示尼珥），

10

(THR) Lán chhiúⁿ pîⁿ-iûⁿ ta̍k ê siâⁿ, Ki-lia̍t chôan-tōe, Pa-san chôan-tōe, tı̍t-kàu Sat-ka kap Í-tek-lâi, lóng sī Pa-san ông Go̍k kok-lāi ê siâⁿ.

(BCL) 咱搶平洋逐個城、基列全地、巴珊全地，直到撒迦及以得來，攏是巴珊王噩國內的城。（

11

(THR) (Lī-ho̍at-im lâng só͘ lâu ê, chí-ū chhun Pa-san ông Go̍k; khòaⁿ ah, i ê bîn-chhn̂g sī thih ê bîn-chhn̂g, tn̂g káu-tiú, khoah sì-tiú, lóng sī ēng lâng ê tiú chòe-pān; hiān-kim kiám-m̄-sī tī A-bûn lâng ê la̍h-pa mah?)

(BCL) 利乏音人所留的只有剩巴珊王噩。看啊！伊的眠床是鐵的眠床，長九肘，闊四肘，攏是用人的肘做扮。現今豈呣是佇亞捫人的拉巴嗎？）」

12

(THR) Hit-sî lán tit-tio̍h chit ê tōe; tùi A-lùn soaⁿ-kok piⁿ ê A-lô-jíⁿ khí, í-kı̍p Ki-lia̍t soaⁿ-tōe ê chı̍t-pòaⁿ, kap kî-tiong ê siâⁿ, góa lóng hō͘ Liû-piān lâng kap Ka-tek lâng;

(BCL) 「彼時，咱得著此個地。對亞嫩山谷邊的亞羅珥起，以及基列山地的一半，及其中的城，我攏互流便人及迦得人。

13

(THR) Ki-lia̍t kî-û ê tōe, kap Pa-san chôan-tōe, Go̍k ê kok, góa hō͘ Má-ná-se ê pòaⁿ-chi-phài; A-jíⁿ-ko-pek chôan-tōe, Pa-san chôan-tōe, che kiò-chòe Lī-ho̍at-im lâng ê tōe.

(BCL) 基列其餘的地及巴珊全地，噩的國，我互瑪拿西的半支派。亞珥歌伯全地、巴珊全地；這叫做利乏音人的地。

14

(THR) Má-ná-se ê kiáⁿ Gâi-jíⁿ chiàm A-jíⁿ-ko-pek chôan-kéng, tı̍t-kàu Ki-su̍t lâng kap Má-ka lâng ê kau-kài; chiū chiàu ka-kī ê miâ chheng Pa-san tōe chòe Hap-úi-te̍k-gâi-jíⁿ, kàu kin-á-jı̍t.

(BCL) 瑪拿西的子睚珥佔亞珥歌伯全境，直到基述人及瑪迦人的交界，就照家己的名稱巴珊地做哈倭特睚珥，到今仔日。

15

(THR) Góa koh chiong Ki-lia̍t hō͘ Má-kiat.

(BCL) 我閣將基列互瑪吉。

16

(THR) Tùi Ki-lia̍t kàu A-lùn ê soaⁿ-kok, ēng soaⁿ-kok chòe kài, tı̍t-kàu A-bûn lâng kau-kài ê Ngá-phok hô, góa chiong che hō͘ Liû-piān lâng, kap Ka-tek lâng;

(BCL) 對基列到亞嫩的山谷，用山谷做界，直到亞捫人交界的雅博河，我將這互流便人及迦得人，

17

(THR) koh chiong A-la̍h-pa, kap óa-kūn Iok-tàn hô ê tōe, tùi Ki-nî-lia̍t tı̍t-kàu A-la̍h-pa ê hái, chiū-sī Iâm-hái, í-kı̍p Pí-su-ka soaⁿ-kha tang-piⁿ ê tōe, lóng hō͘ in.

(BCL) 閣將亞拉巴及倚近約但河的地，對基尼烈直到亞拉巴的海，就是鹽海，以及毗斯迦山腳東邊的地，攏互。

18

(THR) Hit-sî góa hoan-hù lín kóng, Iâ-hô-hoa lín ê Siōng-tè í-keng chiong chit ê tōe hō͘ lín chòe-gia̍p, lín tiong-kan ōe kau-chiàn-ê, lóng tio̍h tòa kun-khì, tī lín ê hiaⁿ-tī Í-sek-lia̍t lâng ê bīn-chêng kè-khì.

(BCL) 「彼時，我吩咐恁講：『耶和華──恁的上帝已經將此個地互恁做業；恁中間會交戰的攏著帶軍器，佇恁的兄弟以色列人的面前過去。

19

(THR) Chóng-sī lín ê bó͘, lín ê gín-ná, lín ê cheng-siⁿ, (góa chai lín ê cheng-siⁿ chin chōe,) thang tiàm tī góa só͘ hō͘ lín ta̍k ê siâⁿ,

(BCL) 總是恁的某、恁的囝仔、恁的精牲（我知恁的精牲真多）通踮佇我所互恁逐個城。

20

(THR) kàu Iâ-hô-hoa siúⁿ-sù pêng-an hō͘ lín ê hiaⁿ-tī, chhin-chhiūⁿ í-keng siúⁿ-sù lín chı̍t-iūⁿ, koh in iā tit-tio̍h Iâ-hô-hoa lín ê Siōng-tè, ēng Iok-tàn hit pêng ê tōe siúⁿ-sù in, jiân-āu lín ta̍k-lâng thang tò-lâi góa siúⁿ-sù lín chòe-gia̍p ê tōe.

(BCL) 到耶和華賞賜平安互恁的兄弟，親像已經賞賜恁一樣，閣也得著耶和華──恁的上帝，用約但彼旁的地賞賜，然後恁逐人通倒來我賞賜恁做業的地。』

21

(THR) Hit-sî góa hoan-hù Iok-su-a kóng, Lí chhin-ba̍k khòaⁿ-kìⁿ Iâ-hô-hoa lí ê Siōng-tè tùi chit nn̄g ê ông só͘ kiâⁿ it-chhè ê sū, Iâ-hô-hoa iā beh tùi lín só͘ beh kè-khì ê ta̍k-kok án-ni kiâⁿ.

(BCL) 彼時我吩咐約書亞講：『你親目看見耶和華──你的上帝對此二個王所行一切的事；耶和華也欲對恁所欲過去的逐國按呢行。

22

(THR) Lín bo̍h-tit kiaⁿ in; in-ūi thòe lín kau-chiàn ê, sī Iâ-hô-hoa lín ê Siōng-tè.

(BCL) 恁莫得驚，因為替恁交戰的是耶和華──恁的上帝。』」

23

(THR) Hit-sî góa khún-kiû Iâ-hô-hoa kóng,

(BCL) 「彼時，我懇求耶和華講：

24

(THR) Chú Iâ-hô-hoa ah, Lí í-keng khí-thâu hián-chhut Lí ê tōa ui-giâm, kap Lí ê tōa khùi-la̍t tī Lí ê lô͘-po̍k, in-ūi tī thiⁿ-nı̍h, tī tōe-nı̍h, iáu-ū sím-mı̍h siōng-tè ōe kiâⁿ chhin-chhiūⁿ Lí só͘ kiâⁿ-ê, koh chhin-chhiūⁿ Lí ê tōa kôan-lêng ah?

(BCL) 『主耶和華啊，你已經起頭顯出你的大威嚴及你的大氣力佇你的奴僕。因為佇天裡，佇地裡，猶有甚麼上帝會行親像你所行的、閣親像你的大權能啊？

25

(THR) Kiû Lí iông-ún góa kè-khì, khòaⁿ Iok-tàn hô hit-pêng súi ê tōe, hit-ê súi ê soaⁿ-tōe, kap Lī-pa-lùn.

(BCL) 求你容允我過去，看約但河彼旁娞的地，彼個娞的山地及黎巴嫩。』

26

(THR) Chóng-sī Iâ-hô-hoa, in-ūi lín ê iân-kò͘, siū-khì góa, m̄ thiaⁿ góa; Iâ-hô-hoa tùi góa kóng, Án-ni lí kàu-gia̍h lah, lí bo̍h-tit koh tùi Góa thê-khí chit ê sū.

(BCL) 總是耶和華因為恁的緣故受氣我，呣聽我，耶和華對我講：『按呢你夠額啦！你莫得閣對我提起此個事。

27

(THR) Lí tio̍h chiūⁿ Pí-su-ka ê soaⁿ-téng, kia̍h-ba̍k ǹg-sai, ǹg-pak, ǹg-lâm, ǹg-tang, chhin-ba̍k khòaⁿ; in-ūi lí koat-tòan bōe-ōe kè chit ê Iok-tàn hô.

(BCL) 你著上毗斯迦的山頂，抬目向西、向北、向南、向東親目看，因為你決斷會過此個約但河。

28

(THR) Chóng-sī lí tio̍h hoan-hù Iok-su-a, hō͘ i chòng-táⁿ kian-kò͘; in-ūi i beh tī chit ê peh-sìⁿ ê bīn-chêng kè-khì, hō͘ in sêng-chiap lí só͘ beh khòaⁿ-kìⁿ ê tōe.

(BCL) 總是你著吩咐約書亞，互伊壯膽堅固；因為伊欲佇此個百姓的面前過去，互承接你所欲看見的地。』

29

(THR) Tùi án-ni lán tiàm tī Pek-pí-jíⁿ tùi-bīn ê soaⁿ-kok-tiong.

(BCL) 對按呢咱踮佇伯毗珥對面的山谷中。」

Bible Color Mark

• 台語漢字羅馬本
• 巴克禮全羅