傳道書 第 4 章

1

(THR) Góa koh o̍at-tńg khòaⁿ, tī jı̍t-kng ê ē-bīn só͘ kiâⁿ it-chhè ê ap-pek, khòaⁿ ah, siū ap-pek-ê lâu ba̍k-sái, koh bô lâng an-ùi; ap-pek in ê sè-le̍k, iā bô lâng an-ùi in.

(BCL) 我閣越轉看，佇日光的下面所行一切的壓迫。看啊，受壓迫的流目屎，閣無人安慰；壓迫的勢力，也無人安慰。

2

(THR) In-ūi án-ni góa o-ló hiah-ê í-keng sí ê sí-lâng, iâⁿ-kè hiah-ê iáu o̍ah--teh ê o̍ah-lâng.

(BCL) 因為按呢，我謳咾許個已經死的死人，贏過許個猶活的活人。

3

(THR) Koh hit ê iáu-bē chhut-sì ê, chiū-sī bē khòaⁿ-kìⁿ jı̍t-kng ê ē-bīn só͘ chòe ê pháiⁿ-tāi--ê, góa khòaⁿ i, pí chit nn̄g téng-hō iáu khah-hó.

(BCL) 閣彼個猶未出世的，就是未看見日光的下面所做的歹代的，我看伊比此二等號猶卡好。

4

(THR) Góa koh khòaⁿ-kìⁿ lâng ūi-tio̍h it-chhè ê tio̍h-bôa, kap ta̍k-iūⁿ kî-khiáu ê kang, chiū hō͘ chhù-piⁿ òan-tò͘; che iā sī khang-hu, iā sī lia̍h-hong.

(BCL) 我閣看見人為著一切的著磨及逐樣奇巧的工就互厝邊怨妒。這也是空虛，也是掠風。

5

(THR) Gû-gōng ê lâng chhiú phah-chha, chia̍h ka-kī ê bah.

(BCL) 愚戇的人手拍叉，食家己的肉。

6

(THR) Chı̍t chhiú móa-móa iā ū pêng-an, iâⁿ-kè nn̄g-chhiú móa-móa lâi lô-lo̍k lia̍h-hong.

(BCL) 一手滿滿，也有平安，贏過二手滿滿，來勞碌掠風。

7

(THR) Góa koh o̍at-tńg khòaⁿ tī jı̍t-kng ê ē-bīn ū khang-hu ê sū.

(BCL) 我閣越轉，看佇日光的下面有空虛的事：

8

(THR) Ū lâng ko͘-toaⁿ bô nn̄g-ê, bô kiáⁿ iā bô hiaⁿ-tī, kéng-jiân lô-lo̍k bô-soah, i ê ba̍k-chiu bô khòaⁿ chîⁿ-châi chòe kàu-gia̍h. I kóng, Góa lô-lo̍k khek-khó͘ ka-kī, bô hióng-hok, tàu-tí ūi chī-chūi ah? Che iā sī khang-hu, iā sī ke̍k-tāng ê lô-khó͘.

(BCL) 有人孤單無二個，無子也無兄弟，竟然勞碌無息，伊的目睭無看錢財做夠額。伊講：「我勞碌，刻苦家己，無享福，到底為是誰啊？」這也是空虛，也是極重的勞苦。

9

(THR) Nn̄g lâng chóng pí chı̍t-lâng khah-hó, in-ūi in saⁿ-kap tio̍h-bôa tit-tio̍h hó ê hāu-kó.

(BCL) 二人總比一人卡好，因為相及著磨得著好的效果。

10

(THR) Nā-sī po̍ah-tó, chit-lâng thang hû i ê tâng-phōaⁿ khí-lâi; nā-sī toaⁿ-sin lâi po̍ah-tó, bô pa̍t-lâng hû i khí-lâi, chit-lâng chiū ū chai-ē.

(BCL) 若是跋倒，此人通扶伊的同伴起來；若是單身來跋倒，無別人扶伊起來，此人就有災禍。

11

(THR) Koh, nn̄g lâng saⁿ-kap khùn, chiū ōe sio-lō; nā ka-kī chı̍t-lâng, thái-thó ōe sio ah?

(BCL) 閣，二人相及睏就會燒烙，若家己一人豈可會燒啊？

12

(THR) Toaⁿ-toaⁿ chı̍t-lâng chiū lâng ōe phah-iâⁿ i, nā ū nn̄g lâng chiū ōe tí-tng i; saⁿ-kó͘ ê soh bô khòai-khòai tn̄g.

(BCL) 單單一人就人會拍贏伊，若有二人就會抵當伊；三股的索無快快斷。

13

(THR) Sòng-hiong koh ū tì-hūi ê siàu-liân lâng, iâⁿ-kè nî-lāu m̄-khéng siū kàn-chèng gōng ê ông.

(BCL) 喪鄉閣有智慧的少年人贏過年老呣肯受諫諍戇的王。

14

(THR) Chit ê lâng sī tùi kaⁿ-lāi chhut-lâi chòe ông; tī i ê kok-lāi, chhut-sì sī sòng-hiong lâng,

(BCL) 此個人是對監內出來做王，佇伊的國內，出世是喪鄉人。

15

(THR) Góa khòaⁿ tī jı̍t-kng ê ē-bīn teh-kiâⁿ ê o̍ah-lâng, lóng thàn hit ê siàu-liân lâng, chiū-sī tē-jī-ê, sòa-chiap i ê ūi--ê.

(BCL) 我看佇日光的下面行的活人攏趁彼個少年人就是第二個，續接伊的位者。

16

(THR) I só͘ kóan ê peh-sìⁿ chōe-chōe, bōe-sǹg--tit; āu-lâi ê lâng bô ūi-tio̍h i lâi hoaⁿ-hí. Che iā sī khang-hu, iā sī lia̍h-hong.

(BCL) 伊所管的百姓多多，算得；後來的人無為著伊來歡喜。這也是空虛，也是掠風。

Bible Color Mark

• 台語漢字羅馬本
• 巴克禮全羅