傳道書 第 7 章

1

(THR) Miâ-siaⁿ pí hó ê ko-iû khah-hó; lâng sí ê jı̍t pí chhut-sì ê jı̍t khah-hó.

(BCL) 名聲比好的膏油卡好；人死的日比出世的日卡好。

2

(THR) Khì song-sū ê ke pí khì iàn-lo̍k ê ke khah-hó; in-ūi che sī chèng-lâng ê kiat-kio̍k, o̍ah ê lâng iā beh chiong che sū hē tī sim--nih.

(BCL) 去喪事的家，比去宴樂的家卡好；因為這是眾人的結局，活的人也欲將這事下佇心裡。

3

(THR) Iu-būn pí chhiò khah-hó; in-ūi bīn tài-iu-iông, sī hō͘ sim khòai-lo̍k.

(BCL) 憂悶比笑卡好；因為面帶憂容，是互心快樂。

4

(THR) Tì-hūi ê lâng ê sim tī song-sū ê ke; gû-gōng ê lâng ê sim tī khòai-lo̍k ê ke.

(BCL) 智慧的人的心佇喪事的家；愚戇的人的心佇快樂的家。

5

(THR) Thiaⁿ tì-hūi ê lâng ê chek-pī, pí thiaⁿ gû-gōng lâng ê chhiùⁿ-khek khah-hó.

(BCL) 聽智慧的人的責備，比聽愚戇人的唱曲卡好。

6

(THR) Gōng-lâng ê chhiò chhin-chhiūⁿ tiáⁿ-ē sio chhì-á ê siaⁿ; che iā sī khang-hu.

(BCL) 戇人的笑，親像鼎下燒茦仔的聲；這也是空虛。

7

(THR) le̍k-sek ōe hō͘ tì-hūi ê lâng piàn-chòe gōng; pò͘-lō͘ ōe pāi-hōai lâng ê sim-su̍t.

(BCL) 勒索會互智慧的人變做戇；賄賂會敗壞人的心術。

8

(THR) Tāi-chì ê kiat-kio̍k iâⁿ-kè tāi-chì ê khí-thâu; sim thun-lún iâⁿ-kè sim kiau-ngō͘.

(BCL) 代誌的結局贏過代誌的起頭；心吞，贏過心驕傲。

9

(THR) Lí ê sim bo̍h-tit sò-kip lâi siū-khì; in-ūi siū-khì chûn tī gōng-lâng ê sim-hôai.

(BCL) 你的心莫得躁急來受氣，因為受氣存佇戇人的心懷。

10

(THR) Lí m̄-thang kóng, Àn-cháiⁿ-iūⁿ chêng ê jı̍t iâⁿ-kè hiān-kim ê jı̍t? in-ūi lí án-ni mn̄g m̄-sī chhut tī tì-hūi.

(BCL) 你呣通講：按怎樣前的日贏過現今的日？因為你按呢問，呣是出佇智慧。

11

(THR) Tì-hūi kap sán-gia̍p pîⁿ-pîⁿ hó; tùi-tī khòaⁿ-kìⁿ jı̍t-kng ê lâng, koh khah ū lī-ek.

(BCL) 智慧及產業平平好，對佇看見日光的人閣卡有利益。

12

(THR) In-ūi tì-hūi ōe tì-ìm lâng, chîⁿ-gûn iā ōe tì-ìm lâng; to̍k-to̍k tì-hūi ōe pó-chôan i pún-lâng ê o̍ah-miā; che chiū-sī chai-bat te̍k-sek ê lī-ek.

(BCL) 因為智慧會致蔭人，錢銀也會致蔭人。獨獨智慧會保全伊本人的活命。這就是知識特色的利益。

13

(THR) Lí tio̍h siūⁿ Siōng-tè só͘ chòe, in-ūi I hō͘ i oan--ê, chī-chūi ōe hō͘ i tı̍t?

(BCL) 你著想上帝所做；因為伊互伊彎的，是誰會互伊直？

14

(THR) Heng-thong ê jı̍t, lí tio̍h hoaⁿ-hí, tú-tio̍h hōan-lān ê jı̍t, lí tio̍h siūⁿ; in-ūi Siōng-tè hō͘ nn̄g-hāng pîⁿ-pîⁿ pâi-teh, ūi-tio̍h beh hō͘ lâng chhâ-bōe-chhut sin-āu ū sím-mı̍h sū.

(BCL) 亨通的日你著歡喜；抵著患難的日你著想；因為上帝互二項平平排，為著欲互人查出身後有甚麼事。

15

(THR) Ū gī-lâng kiâⁿ-gī, hóan-tńg bia̍t-bô, ū pháiⁿ-lâng kiâⁿ pháiⁿ, hóan-tńg chia̍h tn̂g hè-siū; góa tī khang-hu ê jı̍t lóng ū khòaⁿ-kìⁿ.

(BCL) 有義人行義，反轉滅無；有歹人行歹，反轉食長歲壽。我佇空虛的日攏有看見。

16

(THR) Bo̍h-tit kiâⁿ-gī siuⁿ-chōe, bo̍h-tit tì-hūi kè-thâu; siáⁿ-sū pāi-hōai ka-kī ah?

(BCL) 莫得行義甚多，莫得智慧過頭，啥事敗壞家己啊？

17

(THR) Bo̍h-tit kiâⁿ-pháiⁿ siuⁿ-chōe, iā bo̍h-tit chòe gōng-lâng; siáⁿ-sū bē kàu-kî lâi sí ah?

(BCL) 莫得行歹甚多，也莫得做戇人，啥事未到期來死啊？

18

(THR) Lí chhî-siú chit-ê sī hó, hit-ê iā m̄-thang pàng chhiú; in-ūi kèng-ùi Siōng-tè ê lâng beh thoat-lī che it-chhè ê sū.

(BCL) 你持守此個是好，彼個也呣通放手；因為敬畏上帝的人，欲脫離這一切的事。

19

(THR) Tì-hūi hō͘ tì-hūi ê lâng ū lêng-le̍k, iâⁿ-kè siâⁿ-lāi cha̍p ê chiáng-kôan-ê.

(BCL) 智慧互智慧的人有能力贏過城內十個掌權的。

20

(THR) Kiâⁿ-hó bô hōan-chōe ê gī-lâng, sè-chiūⁿ sı̍t-chāi bô.

(BCL) 行好無犯罪的義人，世上實在無。

21

(THR) Lâng só͘ kóng ê ōe, m̄-thang lóng-chóng hē tī sim--nih, kiaⁿ-liáu thiaⁿ-kìⁿ lí ê lô͘-po̍k chiù-chó͘ lí.

(BCL) 人所講的話，呣通攏總下佇心裡，驚了聽見你的奴僕咒詛你。

22

(THR) In-ūi lí ê sim ka-kī chai, lí iā bat chōe-chōe pái chiù-chó͘ pa̍t-lâng.

(BCL) 因為你的心家己知，你也曾多多擺咒詛別人。

23

(THR) Góa bat ēng tì-hūi chhì-giām che it-chhè ê sū; góa kóng, Góa beh chòe tì-hūi-ê; chóng-sī che lī-khui góa hn̄g-hn̄g.

(BCL) 我曾用智慧試驗這一切的事；我講，我欲做智慧的，總是這離開我遠遠。

24

(THR) Só͘-ū-ê sī hn̄g koh chhim-chhim; chī-chūi ōe chhek-to̍k ah?

(BCL) 所有的，是遠閣深深，是誰會測　啊？

25

(THR) Góa o̍at-tńg siūⁿ góa choan-sim ài chai, ài chhâ-khó, iā chhē tì-hūi kap bān-sū ê lí-iû; koh ài chai siâ-ok sī gû-gōng, gû-chhún sī tian-kông.

(BCL) 我越轉想，我專心愛知，愛查考，也尋智慧及萬事的理由；閣愛知邪惡是愚戇，愚蠢是癲狂。

26

(THR) Góa koh chhâ-chhut chı̍t-hāng pí sí khah-khó͘; chiū-sī chı̍t téng-hō ê hū-jîn-lâng, i ê sim sī o̍ah-tauh kap lô-bāng, i ê chhiú sī só-liān; hōan-nā tit-tio̍h Siōng-tè hoaⁿ-hí ê lâng tit-tio̍h siám-pī; chóng-sī ū-chōe ê lâng hō͘ i lia̍h--tio̍h.

(BCL) 我閣查出一項比死卡苦，就是一等號的婦仁人：伊的心是活罩及羅網，伊的手是鎖鍊。凡若得著上帝歡喜的人得著閃避；總是有罪的人互伊掠著。

27

(THR) Thôan-tō--ê kóng, Khòaⁿ ah, góa ài chai i ê siàu-gia̍h, chı̍t-hāng chı̍t-hāng pí-kàu i, chiū chhē-tio̍h chit-ê;

(BCL) 傳道者講：「看啊，我愛知伊的數額，一項一項比較伊，就尋著此個，

28

(THR) góa ê sim ài chhē--i iā bōe tit-tio̍h; tī chı̍t-chheng lâng ê tiong-kan góa ōe chhē-tio̍h chı̍t ê ta-po͘-lâng, tī hiah ê lâng ê tiong-kan, góa bô chhē-tio̍h chı̍t ê hū-jîn-lâng.

(BCL) 我的心愛尋伊也得著，佇一千人的中間我會尋著一個查甫人，佇許個人的中間，我無尋著一個婦仁人。」

29

(THR) Khòaⁿ ah, góa chí-ū chhē-tio̍h chit-ê, chiū-sī Siōng-tè chhòng-chō lâng pún sī chèng-tı̍t, chóng-sī in chhē-chhut chōe-chōe kî-khiáu ê kè-bô͘.

(BCL) 看啊，我只有尋著此個，就是上帝創造人本是正直，總是尋出多多奇巧的計謀。

Bible Color Mark

• 台語漢字羅馬本
• 巴克禮全羅