以弗所書 第 3 章

1

(THR) In-ūi án-ni, góa Pó-lô, ūi-tio̍h lín gōa-pang lâng chòe Ki-tok Iâ-so͘ ê siû-hōan,

(BCL) 因為按呢，我──保羅為著恁外邦人做基督耶穌的囚犯。

2

(THR) . lín nā bat thiaⁿ-kìⁿ Siōng-tè ūi-tio̍h lín só͘ siúⁿ-sù góa un-tián ê chit-hūn,

(BCL) 恁若曾聽見上帝，為著恁所賞賜我恩典的職份，

3

(THR) . chiū-sī ēng khé-sī hō͘ góa chai hit ê ò-biāu, chhin-chhiūⁿ góa í-keng ū tāi-lio̍k siá ê,

(BCL) 就是用啟示互我知彼個奧妙，親像我已經有大略寫的。

4

(THR) . lín tha̍k i, chiū ōe hiáu-tit góa chai-iáⁿ Ki-tok ê ò-biāu,

(BCL) 恁讀伊，就會曉得我知影基督的奧妙。

5

(THR) . sī chêng tāi bē bat hō͘ lâng chai ê, bô chhin-chhiūⁿ hiān-kim tī Sèng Sîn khé-sī I chiah ê sèng ê sù-tô͘ sian-ti chı̍t iūⁿ,

(BCL) 是前代未曾互人知的，無親像現今佇聖神啟示伊諸個聖的使徒先知一樣。

6

(THR) . chiū-sī gōa-pang lâng tī Ki-tok Iâ-so͘, tùi hok-im, tâng chòe hō͘-sû, tâng chòe chı̍t ê sin-thé, saⁿ-kap ū hūn tī só͘ èng-ún ê;

(BCL) 就是外邦人佇基督耶穌，對福音，同做後嗣，同做一個身體，相及有份佇所應允的。

7

(THR) . góa chòe chit ê hok-im ê chhe-ēng, chiàu Siōng-tè un-tián ê siúⁿ-sù, chiū-sī chiàu I ê kôan-lêng só͘ ūn-hêng lâi siúⁿ-sù góa ê,

(BCL) 我做此個福音的差用，照上帝恩典的賞賜，就是照伊的權能所運行來賞賜我的。

8

(THR) . Góa sī chèng sèng-tô͘ tiong siōng tē it sòe ê tit-tio̍h chit ê un-tián siúⁿ-sù góa, thang chiong Ki-tok bōe chhek-to̍k-tit ê pù-ū thôan hō͘ gōa-pang,

(BCL) 我是眾聖徒中上第一細的，得著此個恩典賞賜我，通將基督測　得的富有傳互外邦，

9

(THR) . iā hō͘ chèng lâng lóng bêng-pe̍k chit ê ò-biāu sī cháiⁿ-iūⁿ an-pâi, chiū-sī le̍k-tāi í-lâi khǹg-ba̍t tī chō bān mı̍h ê Siōng-tè ê;

(BCL) 也互眾人攏明白，此個奧妙是怎樣安排，就是歷代以來囥密佇造萬物的上帝的，

10

(THR) . taⁿ beh tùi kàu-hōe hō͘ tī thiⁿ-nı̍h chiah ê pān chèng-sū ê, ū kôan-lêng ê, chai Siōng-tè pah-poaⁿ ê tì-hūi,

(BCL) 今欲對教會互佇天裡諸個辦政事的、有權能的，知上帝百般的智慧。

11

(THR) . chiàu I tī lán ê Chú Ki-tok Iâ-so͘ só͘ tiāⁿ-tio̍h bān tāi ê chí-ì;

(BCL) 照伊佇咱的主基督耶穌所定著萬代的旨意。

12

(THR) . tiàm-tī I lán chiah-ê tùi sìn I, ū hó-táⁿ koh hāi-chāi, lâi chhin-kūn Siōng-tè.

(BCL) 佇伊，咱諸個對信伊，有好膽閣嗐哉，來親近上帝。

13

(THR) . Só͘-í kiû lín bo̍h-tit ūi-tio̍h góa thòe lín só͘ siū ê hōan-lān lâi lóe-chì; che sī lín ê êng-kng.

(BCL) 所以，求恁莫得為著我替恁所受的患難來餒志，這是恁的榮光。

14

(THR) . In-ūi án-ni góa kūi-lo̍h tī Pē ê bīn-chêng,

(BCL) 因為按呢，我跪落佇父的面前，（

15

(THR) . chiū-sī tī thiⁿ-téng tōe-chiūⁿ lóng-chóng ê ke tùi I lâi hō miâ ê,

(BCL) 就是佇天頂地上攏總的家，對伊來號名的。）

16

(THR) . kiû I chiàu I êng-kng ê pù-ū, tùi I ê Sîn, ēng kôan-lêng hō͘ lín sim-lāi ióng-kiāⁿ;

(BCL) 求伊照伊榮光的富有，對伊的神，用權能互恁心內勇健，

17

(THR) . hō͘ Ki-tok tùi lín ê sìn lâi khiā-khí tī lín ê sim, hō͘ lín ū tèng kun hē tōe-ki tī jîn-ài,

(BCL) 互基督對恁的信，來徛起佇恁的心，互恁有釘根下地基佇仁愛，

18

(THR) . chiah ōe kap lóng-chóng ê sèng-tô͘ hiáu-ngō͘ hit ê tn̂g, khoah, kôaiⁿ, chhim,

(BCL) 才會及攏總的聖徒曉悟彼個長、闊、高、深，

19

(THR) . iā chai Ki-tok ê thiàⁿ, chiū-sī pôaⁿ-kè tī lâng só͘ ōe chai ê thiàⁿ, hō͘ lín chiàu Siōng-tè chiâu-pī ê chhiong-móa lâi tit-tio̍h chhiong-móa.

(BCL) 也知基督的疼，就是過佇人所會知的疼，互恁照上帝齊備的充滿，來得著充滿。

20

(THR) . Siōng-tè ōe kiâⁿ-chòe pôaⁿ-kè tī lán it-chhè só͘ kiû só͘ siūⁿ ê, chiū-sī chiàu I só͘ ūn-hêng tī lán ê kôan-lêng,

(BCL) 上帝會行做過佇咱一切所求所想的，就是照伊所運行佇咱的權能。

21

(THR) . gōan tī kàu-hōe kap tī Ki-tok Iâ-so͘ êng-kng kui I kàu bān sè, tāi-tāi bô soah. À-bēng.

(BCL) 願佇教會，及佇基督耶穌，榮光歸伊到萬世，代代無息。阿們！

Bible Color Mark

• 台語漢字羅馬本
• 巴克禮全羅