出埃及記 第 10 章

1

(THR) Iâ-hô-hoa tùi Mô͘-se kóng, Lí jı̍p-khì kìⁿ Hoat-ló; in-ūi Góa í-keng hō͘ i ê sim, kap i ê jîn-sîn ê sim, kong-ngī, thang hō͘ Góa hián-bêng Góa chiah-ê sîn-jiah tī in tiong-kan;

(BCL) 耶和華對摩西講：「你入去見法老。因為我已經互伊的心及伊的人臣的心剛硬，通互我顯明我諸個神蹟佇中間，

2

(THR) iā beh hō͘ lí chiong Góa só͘ chòe tī Ai-kı̍p ê sū, kap Góa tī in tiong-kan só͘ kiâⁿ chiah-ê sîn-jiah, thôan hō͘ lí ê kiáⁿ kap lí ê sun thiaⁿ, thang hō͘ lín chai Góa sī Iâ-hô-hoa.

(BCL) 也欲互你將我所做佇埃及的事，及我佇中間所行諸個神蹟，傳互你的子及你的孫聽，通互恁知我是耶和華。」

3

(THR) Mô͘-se, A-lûn chiū khì kìⁿ Hoat-ló, kā i kóng, Iâ-hô-hoa, Hi-pek-lâi lâng ê Siōng-tè, án-ni kóng, Lí tī Góa ê bīn-chêng m̄-khéng ka-kī khiam-pi, beh kàu sím-mı̍h sî ah? tio̍h chún Góa ê peh-sìⁿ khì, hō͘ in ho̍k-sāi Góa.

(BCL) 摩西、亞倫就去見法老，給伊講：「耶和華──希伯來人的上帝按呢講：『你佇我的面前呣肯家己謙卑欲到甚麼時啊？著准我的百姓去，互服事我。

4

(THR) Lí nā m̄-khéng hō͘ Góa ê peh-sìⁿ khì, khòaⁿ ah, bîn-á-jı̍t Góa beh hō͘ chháu-meh jı̍p lí ê kéng-lāi;

(BCL) 你若呣肯互我的百姓去，看啊，明仔日我欲互草蜢入你的境內，

5

(THR) in beh jia-khàm tōe-bīn, tì-kàu bōe khòaⁿ-kìⁿ thô͘; koh beh chia̍h hit-ê tùi chai-ē só͘-chhun-ê, chiū-sī pha̍uh só͘ phah bô liáu ê; iā beh chia̍h chhân-nı̍h ūi lín só͘ hoat it-chhè ê chhiū-ba̍k;

(BCL) 欲遮蓋地面，致到看見土，閣欲食彼個對災禍所剩的就是雹所拍無了的，也欲食田裡為恁所發一切的樹木。

6

(THR) chháu-meh beh chhiong-móa lí ê chhù, kap lí ê chèng jîn-sîn ê chhù, í-kı̍p it-chhè Ai-kı̍p lâng ê chhù, tùi lí ê lāu-pē kap lí ê chó͘-kong chhut-sì kàu taⁿ, bē-bat khòaⁿ-kìⁿ án-ni. Mô͘-se chiū o̍at-tńg-sin, lī-khui Hoat-ló chhut-khì.

(BCL) 草蜢欲充滿你的厝及你的眾人臣的厝，以及一切埃及人的厝，對你的老父及你的祖公出世到今，未曾看見按呢。』」摩西就越轉身離開法老出去。

7

(THR) Hoat-ló ê jîn-sîn tùi i kóng, Chit lâng chòe lán ê lô-bāng, beh kàu sím-mı̍h sî ah? tio̍h chún chiah-ê lâng khì ho̍k-sāi Iâ-hô-hoa in ê Siōng-tè; Ai-kı̍p í-keng pāi-hōai, lí kiám m̄-chai mah?

(BCL) 法老的人臣對伊講：「此人做咱的羅網欲到甚麼時啊？著准諸個人去服事耶和華──的上帝！埃及已經敗壞，你豈呣知嗎？」

8

(THR) Tùi án-ni, Mô͘-se, A-lûn siū tiàu tò-tńg-lâi kìⁿ Hoat-ló; Hoat-ló kā in kóng, Lín khì ho̍k-sāi Iâ-hô-hoa lín ê Siōng-tè; to̍k-to̍k hiah-ê beh-khì-ê, sī sím-mı̍h hō lâng ah?

(BCL) 對按呢摩西、亞倫受召倒轉來見法老；法老給講：「恁去服事耶和華──恁的上帝；獨獨許個欲去者是甚麼號人啊？」

9

(THR) Mô͘-se kóng, Góan beh kap góan ê siàu-liân lâng lāu-lâng khì, iā beh tòa góan ê kiáⁿ cha-bó͘-kiáⁿ, kap góan ê iûⁿ-kûn gû-kûn chòe chı̍t-ē khì; in-ūi góan tio̍h siú Iâ-hô-hoa ê choeh.

(BCL) 摩西講：「阮欲及阮的少年人老人去，也欲帶阮的子查某子，及阮的羊群牛群做一下去，因為阮著守耶和華的節。」

10

(THR) Hoat-ló tùi in kóng, Hó-lah, góa chún lín kap lín ê gín-á khì lah, gōan Iâ-hô-hoa kap lín tī-teh; lín tio̍h kín-sīn, chai-ē tī lín ba̍k-chiu-chêng lah;

(BCL) 法老對講：「好啦，我准恁及恁的囝仔去啦！願耶和華及恁佇，恁著謹慎；災禍佇恁目睭前啦！

11

(THR) án-ni bōe-chòe-tit; lín chiah-ê tōa-lâng thang khì ho̍k-sāi Iâ-hô-hoa, in-ūi che sī lín só͘ kiû ê. Chiū tùi Hoat-ló ê bīn-chêng kóaⁿ in chhut-khì.

(BCL) 按呢做得！恁諸個大人通去服事耶和華，因為這是恁所求的。」就對法老的面前趕出去。

12

(THR) Iâ-hô-hoa kā Mô͘-se kóng, Lí chhun-chhiú kí Ai-kı̍p tōe, hō͘ chháu-meh chiūⁿ-lâi Ai-kı̍p tōe, chia̍h tōe-nı̍h it-chhè ê chhài-soe, chiū-sī pha̍uh phah bô liáu ê.

(BCL) 耶和華給摩西講：「你伸手指埃及地，互草蜢上來埃及地，食地裡一切的菜蔬，就是雹拍無了的。」

13

(THR) Mô͘-se chiū chhun i ê kóaiⁿ-á, kí Ai-kı̍p tōe; Iâ-hô-hoa chiū hō͘ tang-hong thong-jı̍t thong-mî chhe tī tōe-nı̍h; kàu bîn-á-chá-khí, tang-hong chiū chiong chháu-meh chhe-lâi.

(BCL) 摩西就伸伊的柺仔指埃及地，耶和華就互東風通日通暝吹佇地裡；到明仔早起，東風就將草蜢吹來。

14

(THR) Chháu-meh chiūⁿ-lâi Ai-kı̍p piàn-tōe, hioh tī Ai-kı̍p ê sì-kéng, lī-hāi kàu-ke̍k; chiông-chêng bô ū án-ni ê chháu-meh, í-āu iā bô beh án-ni;

(BCL) 草蜢上來埃及遍地，歇佇埃及的四境，利害到極；從前無有按呢的草蜢，以後也無欲按呢。

15

(THR) in-ūi in jia-khàm chôan-tōe, tì-kàu tōe lóng o͘-àm; koh chia̍h tōe-chiūⁿ it-chhè ê chhài-soe, kap chhiū-nı̍h ê ké-chí, pha̍uh só͘ phah bô liáu ê. Ai-kı̍p piàn-tōe, bô-lūn chhiū-ba̍k, á-sī chhân-nı̍h ê chhài-soe, bô lâu chı̍t-hāng chhiⁿ-chhùi ê mı̍h.

(BCL) 因為遮蓋全地，致到地攏黑暗，閣食地上一切的菜蔬及樹裡的果子，雹所拍無了的。埃及遍地，無論樹木，抑是田裡的菜蔬，無留一項青翠的物。

16

(THR) Tùi án-ni Hoat-ló kóaⁿ-kín kiò Mô͘-se, A-lûn lâi, kóng, Góa tek-chōe lín ê Siōng-tè Iâ-hô-hoa, iā tek-chōe lín.

(BCL) 對按呢法老趕緊叫摩西、亞倫來，講：「我得罪恁的上帝──耶和華，也得罪恁。

17

(THR) Taⁿ kiû lí, kan-ta chit-chı̍t-pái sià-bián góa ê chōe, kiû lín ê Siōng-tè Iâ-hô-hoa, hō͘ góa thoat-lī chit-chı̍t-pái ê sí-bô.

(BCL) 今求你干單此一擺，赦免我的罪，求恁的上帝──耶和華互我脫離此一擺的死無。」

18

(THR) Mô͘-se chiū lī-khui Hoat-ló, khì kiû Iâ-hô-hoa.

(BCL) 摩西就離開法老去求耶和華。

19

(THR) Iâ-hô-hoa chiū tńg chin-thàu ê sai-hong chiong chháu-meh chhe-khí-lâi, kóaⁿ-jı̍p Âng-hái; tī Ai-kı̍p ê sì-kéng bô lâu chı̍t-chiah chháu-meh.

(BCL) 耶和華就轉真透的西風將草蜢吹起來，趕入紅海；佇埃及的四境無留一隻草蜢。

20

(THR) Chóng-sī Iâ-hô-hoa hō͘ Hoat-ló ê sim ngī, m̄-chún Í-sek-lia̍t lâng khì.

(BCL) 總是耶和華互法老的心硬，呣准以色列人去。

21

(THR) Iâ-hô-hoa kā Mô͘-se kóng, Lí chhun-chhiú ǹg-thiⁿ, hō͘ Ai-kı̍p tōe o͘-àm, chit-ê o͘-àm kàu ōe-bong-tit.

(BCL) 耶和華給摩西講：「你伸手向天，互埃及地黑暗；此個黑暗到會摸得。」

22

(THR) Mô͘-se chiū chhun-chhiú ǹg thiⁿ, Ai-kı̍p piàn-tōe chiū saⁿ-jı̍t kú o͘-o͘ àm-àm;

(BCL) 摩西就伸手向天，埃及遍地就三日久黑黑暗暗。

23

(THR) saⁿ-jı̍t kú lâng bōe khòaⁿ-kìⁿ lâng, iā bô khí-lâi lī-khui i ê só͘-chāi; to̍k-to̍k Í-sek-lia̍t lâng ê chhù lóng ū kng.

(BCL) 三日久，人看見人，也無起來離開伊的所在；獨獨以色列人的厝攏有光。

24

(THR) Hoat-ló chiū kiò Mô͘-se lâi kóng, Lín khì ho̍k-sāi Iâ-hô-hoa, to̍k-to̍k sī lín ê iûⁿ-kûn gû-kûn tio̍h lâu-teh, lín ê gín-á chiū thang kap lín saⁿ-kap khì.

(BCL) 法老就叫摩西來，講：「恁去服事耶和華；獨獨是恁的羊群牛群著留；恁的囝仔就通及恁相及去。」

25

(THR) Mô͘-se kóng, Lí iā tio̍h chiong seng-lé kap sio-chè ê mı̍h kau góan ê chhiú, hō͘ góan thang chè-sū Iâ-hô-hoa góan ê Siōng-tè.

(BCL) 摩西講：「你也著將牲禮及燒祭的物交阮的手，互阮通祭祀耶和華──阮的上帝。

26

(THR) Góan ê cheng-siⁿ iā tio̍h kap góan khì, liân chı̍t-chiah iā m̄ lâu-teh; in-ūi góan tio̍h tùi hit tiong-kan chhú i, lâi ho̍k-sāi Iâ-hô-hoa góan ê Siōng-tè; koh góan iáu-bē kàu hia m̄-chai tio̍h ēng sím-mı̍h ho̍k-sāi Iâ-hô-hoa.

(BCL) 阮的精牲也著及阮去，連一隻也呣留；因為阮著對彼中間取伊，來服事耶和華──阮的上帝。閣阮猶未到遐，呣知著用甚麼服事耶和華。」

27

(THR) Chóng-sī Iâ-hô-hoa hō͘ Hoat-ló ê sim ngī, m̄-khéng hō͘ in khì.

(BCL) 總是耶和華互法老的心硬，呣肯互去。

28

(THR) Hoat-ló kā Mô͘-se kóng, Lí tio̍h lī-khui góa khì; lí tio̍h kín-sīn ka-kī, m̄-thang koh kìⁿ góa ê bīn; in-ūi lí kìⁿ góa ê bīn, hit-jı̍t lí ōe sí.

(BCL) 法老給摩西講：「你著離開我去，你著謹慎家己，呣通閣見我的面！因為你見我的面彼日你會死！」

29

(THR) Mô͘-se kóng, Lí án-ni kóng, hó; góa bô beh koh kìⁿ lí ê bīn lah.

(BCL) 摩西講：「你按呢講好！我無欲閣見你的面啦。」

Bible Color Mark

• 台語漢字羅馬本
• 巴克禮全羅