出埃及記 第 11 章

1

(THR) Iâ-hô-hoa kā Mô͘-se kóng, Góa beh koh hō͘ chı̍t-hāng chai-ē kàu tī Hoat-ló kap Ai-kı̍p, jiân-āu i beh chún lín lī-khui chia; i chún lín khì ê sî beh kóaⁿ lín lóng tùi chia chhut-khì.

(BCL) 耶和華給摩西講：「我欲閣互一項災禍到佇法老及埃及，然後伊欲准恁離開遮。伊准恁去的時，欲趕恁攏對遮出去。

2

(THR) Lí tio̍h thôan hō͘ peh-sìⁿ thiaⁿ, hō͘ in lâm-lú ta̍k-lâng tùi in ê chhù-piⁿ thó kim-khì, gûn-khì.

(BCL) 你著傳互百姓聽，互男女逐人對的厝邊討金器、銀器。」

3

(THR) Iâ-hô-hoa hō͘ peh-sìⁿ tit-tio̍h un-tián tī Ai-kı̍p lâng ê bīn-chêng; koh Mô͘-se chit-lâng tī Ai-kı̍p tōe, tī Hoat-ló jîn-sîn ê ba̍k-chiu-tiong, kap peh-sìⁿ ê ba̍k-chiu-tiong, khòaⁿ-chòe chun-tōa.

(BCL) 耶和華互百姓得著恩典佇埃及人的面前，閣摩西此人佇埃及地、佇法老人臣的目睭中，及百姓的目睭中看做尊大。

4

(THR) Mô͘-se kóng, Iâ-hô-hoa án-ni kóng, Iok-lio̍k pòaⁿ-mî, Góa beh chhut-khì piàn kiâⁿ Ai-kı̍p.

(BCL) 摩西講：「耶和華按呢講：『約略半暝，我欲出去遍行埃及。

5

(THR) Kìⁿ-nā tī Ai-kı̍p tōe ê tōa-kiáⁿ, tùi chē-ūi ê Hoat-ló ê tōa-kiáⁿ, kàu tī oe-bō ê lú-pī ê tōa-kiáⁿ, kap it-chhè ê cheng-siⁿ thâu-chúi-siⁿ-ê, lóng beh sí.

(BCL) 見若佇埃及地的大子，對坐位的法老的大子到佇挨磨的女婢的大子，及一切的精牲頭水生的，攏欲死。

6

(THR) Ai-kı̍p piàn-tōe beh ū tōa thî-khàu ê siaⁿ, chiong-chêng bē bat ū án-ni, āu-lâi iā bô koh án-ni.

(BCL) 埃及遍地欲有大啼哭的聲；從前未曾有按呢，後來也無閣按呢。

7

(THR) Lūn-kàu Í-sek-lia̍t-tiong, bô-lūn sī lâng sī cheng-siⁿ, liân káu iā m̄-káⁿ pūi in; hō͘ lín chai Iâ-hô-hoa tī Ai-kı̍p lâng kap Í-sek-lia̍t lâng ê tiong-kan ū hun-piat in.

(BCL) 論到以色列中，無論是人是精牲，連狗也呣敢吠，互恁知耶和華佇埃及人及以色列人的中間有分別。』

8

(THR) Lí hiah-ê jîn-sîn, lóng beh lo̍h lâi kìⁿ góa, phak tī góa bīn-chêng, kóng, Kiû lí kap kun-tè lí ê peh-sìⁿ lóng chhut-khì; jiân-āu góa beh chhut-khì. Tùi án-ni Mô͘-se tōa siū-khì, lī-khui Hoat-ló chhut-khì.

(BCL) 你許個人臣攏欲落來見我仆佇我面前，講：『求你及跟隨你的百姓攏出去』，然後我欲出去。」對按呢摩西大受氣，離開法老出去。

9

(THR) Iâ-hô-hoa kā Mô͘-se kóng, Hoat-ló bô beh thiaⁿ lín, hō͘ Góa ê kî-sū tī Ai-kı̍p tōe ke-thiⁿ ná chōe.

(BCL) 耶和華給摩西講：「法老無欲聽恁，互我的奇事佇埃及地加添愈多。」

10

(THR) Mô͘-se, A-lûn tī Hoat-ló ê bīn-chêng kiâⁿ che it-chhè ê kî-sū; chóng-sī Iâ-hô-hoa hō͘ Hoat-ló ê sim ngī, m̄-chún Í-sek-lia̍t lâng lī-khui i ê tōe.

(BCL) 摩西、亞倫佇法老的面前行這一切的奇事；總是耶和華互法老的心硬，呣准以色列人離開伊的地。

Bible Color Mark

• 台語漢字羅馬本
• 巴克禮全羅