出埃及記 第 12 章

1

(THR) Iâ-hô-hoa tī Ai-kı̍p tōe tùi Mô͘-se, A-lûn kóng,

(BCL) 耶和華佇埃及地對摩西、亞倫講：

2

(THR) Chit ge̍h tio̍h chòe lín ê chiaⁿ-ge̍h, chòe nî-nî ê thâu-chı̍t-ge̍h.

(BCL) 「此月著做恁的正月，做年年的頭一月。

3

(THR) Lín tio̍h tùi Í-sek-lia̍t ê chôan-hōe kóng, Pún-ge̍h chhoe-cha̍p jı̍t, ta̍k-lâng tio̍h chiàu lāu-pē ê ke, chhú iûⁿ-á, chı̍t-ke chı̍t-chiah.

(BCL) 恁著對以色列的全會講：本月初十日，逐人著照老父的家取羊仔，一家一隻。

4

(THR) Nā sī chı̍t-ke ê lâng siuⁿ-chió, chı̍t-chiah iûⁿ-á chia̍h-bōe-liáu, i tio̍h kap keh-piah ê chhù-piⁿ, chiàu lâng-gia̍h, saⁿ-kap chhú chı̍t-chiah; lín pī-pān iûⁿ-á, tio̍h àn-sǹg ta̍k-lâng só͘ ōe chia̍h ê liōng.

(BCL) 若是一家的人甚少，一隻羊仔食了，伊著及隔壁的厝邊照人額相及取一隻。恁備辦羊仔，著按算逐人所會食的量。

5

(THR) Lín ê iûⁿ-á tio̍h bô hâ-chhû ê, bē-móa-nî ê iûⁿ-káng-á; lín tio̍h tùi mî-iûⁿ-tiong, á-sī soaⁿ-iûⁿ-tiong, chhú i, lóng thang;

(BCL) 恁的羊仔著無瑕疵的、未滿年的羊仔，恁著對綿羊中，抑是山羊中取伊，攏通。

6

(THR) lín tio̍h lâu kàu pún-ge̍h cha̍p-sì jı̍t, hông-hun ê sî, Í-sek-lia̍t chôan-hōe ê chèng-lâng tio̍h thâi iûⁿ-á.

(BCL) 恁著留到本月十四日，黃昏的時，以色列全會的眾人著羊仔。

7

(THR) In tio̍h chhú tām-po̍h huih, boah tī chia̍h iûⁿ-á hit keng chhù, siang-pêng ê mn̂g-khiā kap mn̂g-bâi.

(BCL) 著取淡薄血，抹佇食羊仔彼間厝雙旁的門　及門楣。

8

(THR) Hit-mî tio̍h chia̍h iûⁿ-á ê bah, ēng hé pek i, kap bô-kàⁿ-piáⁿ khó͘-chhài chham-teh chia̍h.

(BCL) 彼暝著食羊仔的肉；用火伊，及無酵餅苦菜參食。

9

(THR) M̄-thang chhiⁿ-chhiⁿ chia̍h, koat-tòan m̄-thang ēng chúi chú, tio̍h ēng hé pek; thâu, kha, kap ngó͘-chōng lóng tio̍h chia̍h.

(BCL) 呣通生生食，決斷呣通用水煮，著用火，頭、腳、及五臟，攏著食。

10

(THR) Lóng m̄-thang lâu keh chá-khí, nā lâu kàu keh chá-khí tio̍h ēng hé sio.

(BCL) 攏呣通留過早起；若留到過早起，著用火燒。

11

(THR) Lín tio̍h án-ni chia̍h i; io hâ-tòa, kha chhēng-ôe, chhiú kia̍h kóaiⁿ-á, iā tio̍h kóaⁿ-kín chia̍h; che sī Iâ-hô-hoa ê pôaⁿ-kè-choeh.

(BCL) 恁著按呢食伊，腰縖帶，腳穿鞋，手抬柺仔，也著趕緊食；這是耶和華的過節。

12

(THR) In-ūi hit-mî Góa beh piàn-kiâⁿ Ai-kı̍p tōe, phah-sí Ai-kı̍p tōe it-chhè thâu-chiūⁿ-siⁿ-ê, bô-lūn lâng kap cheng-siⁿ; koh beh sím-phòaⁿ Ai-kı̍p it-chhè ê siōng-tè; Góa chiū-sī Iâ-hô-hoa.

(BCL) 因為彼暝我欲遍行埃及地，拍死埃及地一切頭上生的，無論人及精牲，閣欲審判埃及一切的上帝。我就是耶和華。

13

(THR) Chit-ê huih tī lín só͘ khiā-khí ê chhù, beh chòe lín ê kì-hō; Góa chı̍t-ē khòaⁿ-kìⁿ chit-ê huih, chiū tùi lín pôaⁿ-kè-khì; Góa phah Ai-kı̍p tōe ê sî, chai-ē bô kàu tī lín, lâi bia̍t lín.

(BCL) 此個血佇恁所徛起的厝欲做恁的記號；我一下看見此個血，就對恁過去。我拍埃及地的時，災禍無到佇恁來滅恁。」

14

(THR) Lín tio̍h ēng chit-jı̍t chòe kì-liām, siú i chòe Iâ-hô-hoa ê choeh; lín tio̍h tāi-tāi siú chit-ê choeh, chòe éng-óan ê lē.

(BCL) 「恁著用此日做紀念，守伊做耶和華的節，恁著代代守此個節做永遠的例。

15

(THR) Lín tio̍h chia̍h bô-kàⁿ-piáⁿ chhit-jı̍t kú; thâu-chı̍t-jı̍t tio̍h tùi lín ta̍k keng chhù tû-khì kàⁿ; in-ūi tùi thâu-chı̍t jı̍t kàu tē-chhit jı̍t, hōan-nā chia̍h ū kàⁿ ê, beh tùi Í-sek-lia̍t-tiong tû-khì.

(BCL) 恁著食無酵餅七日久。頭一日著對恁逐間厝除去酵；因為對頭一日，到第七日，凡若食有酵的，欲對以色列中除去。

16

(THR) Thâu-chı̍t jı̍t lín tio̍h ū sèng-hōe, chhit-jı̍t iā tio̍h ū sèng-hōe; chit nn̄g-jı̍t, tû-khì pī-pān ta̍k-lâng só͘ tio̍h chia̍h ê í-gōa, bô-lūn sím-mı̍h kang lóng m̄-thang chòe.

(BCL) 頭一日恁著有聖會，七日也著有聖會。此二日，除去備辦逐人所著食的以外，無論甚麼工攏呣通做。

17

(THR) Lín tio̍h siú bô-kàⁿ-choeh; in-ūi Góa tú-tú tī hit-jı̍t chhōa lín ê kun-tūi tùi Ai-kı̍p tōe chhut-lâi; só͘-í lín tio̍h siú chit-jı̍t, ta̍k sè-tāi chòe éng-óan ê lē.

(BCL) 恁著守無酵節，因為我扺扺佇彼日導恁的軍隊對埃及地出來。所以，恁著守此日，逐世代做永遠的例。

18

(THR) Tùi chiaⁿ-ge̍h cha̍p-sì ê-hng kàu jī-it ê-hng, lín tio̍h chia̍h bô-kàⁿ-piáⁿ.

(BCL) 對正月十四下昏，到二一下昏，恁著食無酵餅。

19

(THR) Tī lín ta̍k keng chhù, chhit-jı̍t-lāi m̄-thang ū kàⁿ; in-ūi kìⁿ-nā chia̍h ū kàⁿ ê mı̍h, bô-lūn sī kià-kha-ê, á-sī pún-tōe-ê, hit-lâng tio̍h tùi Í-sek-lia̍t hōe-tiong tû-khì.

(BCL) 佇恁逐間厝，七日內呣通有酵；因為見若食有酵的物，無論是寄腳的，抑是本地的，彼人著對以色列會中除去。

20

(THR) Ū-kàⁿ ê mı̍h, lín lóng m̄-thang chia̍h; tī lín it-chhè khiā-khí ê só͘-chāi, tio̍h chia̍h bô-kàⁿ-piáⁿ.

(BCL) 有酵的物，恁攏呣通食；佇恁一切徛起的所在著食無酵餅。」

21

(THR) Mô͘-se chiū kiò Í-sek-lia̍t chèng tiúⁿ-ló lâi, kā in kóng, Lín ta̍k-lâng tio̍h chiàu ke-kháu chhú iûⁿ-á, thâi i chòe pôaⁿ-kè-choeh.

(BCL) 摩西就叫以色列眾長老來，給講：「恁逐人著照家口取羊仔，伊做過節。

22

(THR) Lín tio̍h the̍h chı̍t-pé ê gû-chhek-chháu, ùn phûn-lāi ê huih, ēng phûn-lāi ê huih boah mn̂g-bâi, kap siang-pêng ê mn̂g-khiā; lín bô-lūn sím-mı̍h lâng m̄-thang tùi i ê chhù chhut-mn̂g, tı̍t-kàu bîn-á-chá-khí.

(BCL) 恁著提一把的牛膝草，搵盆內的血，用盆內的血抹門楣及雙旁的門豎。恁無論甚麼人呣通對伊的厝出門，直到明仔早起。

23

(THR) In-ūi Iâ-hô-hoa beh piàn-kiâⁿ, phah-sí Ai-kı̍p lâng; I khòaⁿ-kìⁿ huih tī mn̂g-bâi, kap siang-pêng ê mn̂g-khiā, Iâ-hô-hoa chiū beh pôaⁿ-kè hit-ê mn̂g, m̄-chún bia̍t sìⁿ-miā-ê jı̍p lín ê chhù, lâi phah-sí lín.

(BCL) 因為耶和華欲遍行拍死埃及人，伊看見血佇門楣及雙旁的門豎，耶和華就欲過彼個門，呣准滅生命的入恁的厝，來拍死恁。

24

(THR) Chit-ê sū, lín tio̍h siú i, chòe lín kap lín ê kiáⁿ-sun éng-óan ê lē.

(BCL) 此個事，恁著守伊，做恁及恁的子孫永遠的例。

25

(THR) Āu-lâi lín kàu Iâ-hô-hoa chiàu I só͘ èng-ún siúⁿ-sù lín hit-ê tōe, chiū tio̍h siú chit-ê lé.

(BCL) 後來，恁到耶和華照伊所應允賞賜恁彼個地，就著守此個禮。

26

(THR) Lín ê kiáⁿ-jî nā mn̄g lín, Ūi siáⁿ-sū kiâⁿ chit-ê lé?

(BCL) 恁的子兒若問恁：『為啥事行此個禮？』

27

(THR) lín chiū tio̍h kóng, Che sī Iâ-hô-hoa pôaⁿ-kè-choeh ê chè; tng Í-sek-lia̍t lâng tī Ai-kı̍p ê sî, I phah-sí Ai-kı̍p lâng, pôaⁿ-kè Í-sek-lia̍t lâng ê chhù, kiù lán ta̍k-ke. Tùi án-ni peh-sìⁿ àⁿ-thâu kèng-pài.

(BCL) 恁就著講：『這是耶和華過節的祭。當以色列人佇埃及的時，伊拍死埃及人，過以色列人的厝，救咱逐家。』」對按呢百姓俯頭敬拜。

28

(THR) Í-sek-lia̍t lâng chiū khì án-ni kiâⁿ; Iâ-hô-hoa só͘ hoan-hù Mô͘-se, A-lûn-ê, in chiàu án-ni kiâⁿ.

(BCL) 以色列人就去按呢行，耶和華所吩咐摩西、亞倫的照按呢行。

29

(THR) Kàu pòaⁿ-mî Iâ-hô-hoa chiong Ai-kı̍p tōe só͘ ū ê tōa-kiáⁿ, chiū-sī tùi chē-ūi ê Hoat-ló ê tōa-kiáⁿ kàu kaⁿ-hōan ê tōa-kiáⁿ, í-kı̍p thâu-chúi-siⁿ ê cheng-siⁿ, it-chīn thâi-sí.

(BCL) 到半暝，耶和華將埃及地所有的大子，就是對坐位的法老的大子，到監犯的大子，以及頭水生的精牲，一盡死。

30

(THR) Hoat-ló kap it-chhè ê jîn-sîn, kap Ai-kı̍p ê chèng-lâng, mî-sî lóng khí-lâi; tī Ai-kı̍p ū tōa thî-khàu ê siaⁿ, in-ūi bô chı̍t-ke bô sí-lâng.

(BCL) 法老及一切的人臣，及埃及的眾人，暝時攏起來。佇埃及有大啼哭的聲，因為無一家無死人。

31

(THR) Hoat-ló thàu-mî tiàu Mô͘-se, A-lûn kóng, Khí-lâi, kap Í-sek-lia̍t lâng tio̍h tùi góa ê peh-sìⁿ tiong-kan chhut-khì, chiàu lín só͘ kóng ê, khì ho̍k-sāi Iâ-hô-hoa;

(BCL) 法老透暝召摩西、亞倫，講：「起來！及以色列人著對我的百姓中間出去，照恁所講的，去服事耶和華！

32

(THR) iā chiàu lín só͘ kóng ê, liân iûⁿ-kûn gû-kûn tòa-tòa khì; iā tio̍h kā góa chiok-hok.

(BCL) 也照恁所講的，連羊群牛群帶帶去！也著給我祝福。」

33

(THR) Ai-kı̍p lâng pek peh-sìⁿ; kah in kín-kín chhut in ê tōe, kóng, Góan lóng sí-lah.

(BCL) 埃及人迫百姓，教緊緊出的地，講：「阮攏死啦。」

34

(THR) Peh-sìⁿ chiū the̍h bô-kàⁿ ê chhiⁿ-mī, chiong chhiau-mī ê khì-kū pau tī saⁿ-lāi, pē tī keng-thâu-téng.

(BCL) 百姓就提無酵的生麵，將摶麵的器具包佇衫內，背佇肩頭頂。

35

(THR) Í-sek-lia̍t lâng chiàu Mô͘-se ê ōe kiâⁿ, tùi Ai-kı̍p thó gûn-khì kim-khì kap i-chiûⁿ.

(BCL) 以色列人照摩西的話行，對埃及討銀器、金器及衣裳。

36

(THR) Iâ-hô-hoa hō͘ peh-sìⁿ tit-tio̍h un-tián tī Ai-kı̍p lâng ê bīn-chêng, chiàu in só͘-thó-ê hō͘ in; tùi án-ni in chhiúⁿ Ai-kı̍p lâng.

(BCL) 耶和華互百姓得著恩典佇埃及人的面前，照所討的互。對按呢搶埃及人。

37

(THR) Í-sek-lia̍t lâng tùi Lân-sek khì So͘-kat, tû gín-á í-gōa, pō͘-kiâⁿ ê tōa-lâng iok ū la̍k-cha̍p-bān.

(BCL) 以色列人對蘭塞去疏割；除囝仔以外，步行的大人約有六十萬。

38

(THR) Koh ū chōe-chōe cha̍p-cho̍k ê lâng, iā ū iûⁿ-kûn gû-kûn chōe-chōe cheng-siⁿ kap in chiūⁿ-khì.

(BCL) 閣有多多雜族的人，也有羊群牛群多多精牲，及上去。

39

(THR) In ēng Ai-kı̍p tòa-chhut-lâi ê chhiⁿ-mī pek-chòe bô-kàⁿ-piáⁿ; bô hoat-kàⁿ, sī in-ūi siū-pek chhut Ai-kı̍p, bōe-ōe iân-chhiân-tit, iā bô ūi ka-kī pī-pān sím-mı̍h chia̍h-mı̍h.

(BCL) 用埃及帶出來的生麵做無酵餅。無發酵是因為受迫出埃及，會延延得，也無為家己備辦甚麼食物。

40

(THR) Í-sek-lia̍t lâng chhut-gōa tī Ai-kı̍p sì-pah saⁿ-cha̍p nî.

(BCL) 以色列人出外佇埃及四百三十年。

41

(THR) Kàu sì-pah saⁿ-cha̍p nî móa, tú-tú hit-jı̍t, Iâ-hô-hoa ê kun-tūi lóng tùi Ai-kı̍p tōe chhut-lâi.

(BCL) 到四百三十年滿抵抵彼日，耶和華的軍隊攏對埃及地出來。

42

(THR) Chit-mî tio̍h ūi Iâ-hô-hoa siú i, in-ūi I chhōa in chhut Ai-kı̍p tōe; che sī Iâ-hô-hoa ê mî, sī Í-sek-lia̍t chèng lâng tāi-tāi só͘ tio̍h siú-ê.

(BCL) 此暝著為耶和華守伊；因為伊導出埃及地，這是耶和華的暝，是以色列眾人代代所著守的。

43

(THR) Iâ-hô-hoa tùi Mô͘-se, A-lûn kóng, Pôaⁿ-kè-choeh ê lē sī án-ni;

(BCL) 耶和華對摩西、亞倫講：「過節的例是按呢：外邦人攏呣通食伊。

44

(THR) gōa-pang lâng lóng m̄-thang chia̍h i; to̍k-to̍k ta̍k-lâng ēng gûn bóe ê lô͘-po̍k, í-keng kā i kiâⁿ kat-lé, chiū thang chia̍h.

(BCL) 獨獨逐人用銀買的奴僕，已經給伊行割禮就通食。

45

(THR) Kià-kha-ê kap chhiàⁿ-kang lâng lóng m̄-thang chia̍h.

(BCL) 寄腳的及倩工人攏呣通食。

46

(THR) Tio̍h tī chı̍t keng chhù chia̍h i, chı̍t tè bah iā m̄-thang tòa-chhut chhù-gōa; i ê kut chı̍t-ki iā m̄-thang phah-chı̍h.

(BCL) 著佇一間厝食伊；一塊肉也呣通帶出厝外。伊的骨一支也呣通拍折。

47

(THR) Í-sek-lia̍t chôan-hōe lóng tio̍h siú i.

(BCL) 以色列全會攏著守伊。

48

(THR) Nā ū gōa-cho̍k lâng chhut-gōa tī lín tiong-kan, ài siú pôaⁿ-kè-choeh lâi ho̍k-sāi Iâ-hô-hoa, i só͘-ū ê ta-po͘-lâng tio̍h siū kat-lé, jiân-āu i thang lâi siú, chiū kap pún-cho̍k ê lâng bô koh-iūⁿ; chóng-sī bô siū kat-lé ê lâng, lóng m̄-thang chia̍h i.

(BCL) 若有外族人出外佇恁中間，愛守過節來服事耶和華，伊所有的查甫人著受割禮，然後伊通來守，就及本族的人無各樣；總是無受割禮的人，攏呣通食伊。

49

(THR) Pún-cho̍k ê lâng kap gōa-cho̍k ê lâng chhut-gōa tī lín tiong-kan, lóng tâng-chı̍t-iūⁿ ê lē.

(BCL) 本族的人及外族的人出外佇恁中間，攏同一樣的例。」

50

(THR) Í-sek-lia̍t chèng-lâng chiū án-ni kiâⁿ, chiàu Iâ-hô-hoa só͘ hoan-hù Mô͘-se, A-lûn ê khì chòe.

(BCL) 以色列眾人就按呢行，照耶和華所吩咐摩西、亞倫的去做。

51

(THR) Tng hit-jı̍t Iâ-hô-hoa chhōa Í-sek-lia̍t lâng, chiàu in ê kun-tūi, chhut Ai-kı̍p tōe.

(BCL) 當彼日，耶和華導以色列人照的軍隊，出埃及地。

Bible Color Mark

• 台語漢字羅馬本
• 巴克禮全羅