出埃及記 第 13 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Í-sek-lia̍t-tiong, bô-lūn lâng kap cheng-siⁿ, kìⁿ-nā thâu-chiūⁿ ê tōa-kiáⁿ, lóng tio̍h hun-piat chòe-sèng, kui tī Góa; in-ūi pún sī Góa ê.

(BCL) 「以色列中無論人及精牲，見若頭上的大子，攏著分別做聖歸佇我，因為本是我的。」

3

(THR) Mô͘-se kā peh-sìⁿ kóng, Lín tio̍h kì-liām chit-jı̍t, chiū-sī lín tùi Ai-kı̍p tōe, tùi chòe lô͘-châi ê ke, chhut-lâi; in-ūi Iâ-hô-hoa ēng tōa kôan-lêng ê chhiú chhōa lín tùi chia chhut; ū kàⁿ ê piáⁿ lóng m̄-thang chia̍h.

(BCL) 摩西給百姓講：「恁著記念此日，就是恁對埃及地對做奴才的家出來，因為耶和華用大權能的手，導恁對遮出。有酵的餅攏呣通食。

4

(THR) Tī A-pit ge̍h-kan, chit-jı̍t sī lín chhut-lâi ê jı̍t.

(BCL) 佇亞筆月間此日是恁出來的日。

5

(THR) Chiong-lâi Iâ-hô-hoa chhōa lín jı̍p Ka-lâm, Hek, A-mô͘-lī, Hi-bī, Iâ-pò͘-su, hiah-ê cho̍k ê tōe, chiū-sī tùi lí ê chó͘-kong chiù-chōa èng-ún hō͘ lí, hit-ê lâu lin kap bı̍t ê tōe, hit-sî lí tio̍h tī chit-ge̍h-kan siú chit-ê lé.

(BCL) 將來耶和華導恁入迦南、赫、亞摩利、希未、耶布斯許個族的地，就是對你的祖公咒誓應允互你彼個流奶及蜜的地，彼時你著佇此月間守此個禮。

6

(THR) Lí tio̍h chia̍h bô-kàⁿ-piáⁿ chhit-jı̍t; kàu tē-chhit jı̍t chiū-sī Iâ-hô-hoa ê choeh.

(BCL) 你著食無酵餅七日，到第七日就是耶和華的節。

7

(THR) Chit chhit-jı̍t kú tio̍h chia̍h bô-kàⁿ-piáⁿ; tī lí ê sì-kéng lāi, m̄-thang khòaⁿ-kìⁿ lí ū hē-kàⁿ ê piáⁿ, iā m̄-thang khòaⁿ-kìⁿ lí ū kàⁿ-bú.

(BCL) 此七日久，著食無酵餅；佇你的四境內呣通看見你有下酵的餅，也呣通看見你有酵母。

8

(THR) Tng hit-jı̍t, lí tio̍h kā lí ê kiáⁿ kóng, Che sī in-ūi Iâ-hô-hoa, tī góa chhut Ai-kı̍p ê sî, só͘ kā góa kiâⁿ ê sū.

(BCL) 當彼日，你著給你的子講：『這是因為耶和華佇我出埃及的時所給我行的事。

9

(THR) Che beh kā lí chòe kì-hō tī lí ê chhiú, chòe kì-liām tī lí ê thâu-hia̍h; hō͘ Iâ-hô-hoa ê lu̍t-hoat siông-siông tī lí ê chhùi; in-ūi Iâ-hô-hoa bat ēng tōa kôan-lêng ê chhiú chhōa lí chhut Ai-kı̍p;

(BCL) 這欲給你做記號佇你的手，做紀念佇你的頭額，互耶和華的律法常常佇你的嘴，因為耶和華曾用大權能的手導你出埃及。

10

(THR) só͘-í ta̍k-nî kàu-kî lí tio̍h siú chit-ê lē.

(BCL) 所以逐年到期你著守此個例。』」

11

(THR) Chiong-lâi Iâ-hô-hoa beh chiàu I tùi lí kap lí ê chó͘-kong só͘ chiù-chōa ê, chhōa lí jı̍p Ka-lâm lâng ê tōe, chiong chit-ê tōe siúⁿ-sù lí;

(BCL) 「將來耶和華欲照伊對你及你的祖公所咒誓的，導你入迦南人的地，將此個地賞賜你，

12

(THR) hit-sî lí tio̍h chiong it-chhè thâu-thai ê ta-po͘-kiáⁿ kap só͘ ū thâu-chúi kang ê cheng-siⁿ, kui hō͘ Iâ-hô-hoa; chiah-ê lóng sio̍k Iâ-hô-hoa.

(BCL) 彼時你著將一切頭胎的查甫子，及所有頭水公的精牲，歸互耶和華；諸個攏屬耶和華。

13

(THR) Kìⁿ-nā thâu-chúi-siⁿ ê lû, tio̍h ēng iûⁿ-á thòe-sio̍k; nā bô beh thòe-sio̍k, chiū tio̍h kòng-chı̍h i ê ām-kún; kìⁿ-nā lí thâu-chiūⁿ ê ta-po͘-kiáⁿ lóng tio̍h thòe-sio̍k.

(BCL) 見若頭水生的驢，著用羊仔替贖；若無欲替贖，就著摃折伊的頷頸。見若你頭上的查甫子攏著替贖。

14

(THR) Jı̍t-āu lí ê kiáⁿ mn̄g lí kóng, Che sī sím-mı̍h iân-kò͘? lí tio̍h tùi i kóng, Iâ-hô-hoa ēng tōa kôan-lêng ê chhiú, chhōa góan tùi Ai-kı̍p, tùi chòe lô͘-châi ê ke, chhut-lâi.

(BCL) 日後你的子問你講：『這是甚麼緣故？』你著對伊講：『耶和華用大權能的手，導阮對埃及對做奴才的家出來。

15

(THR) Hit-sî Hoat-ló kò͘-chip m̄-chún góan khì, Iâ-hô-hoa chiū chiong Ai-kı̍p tōe só͘-ū thâu-thai-ê, bô-lūn sī lâng ê tōa-kiáⁿ, á-sī cheng-siⁿ ê thâu-chúi-ê, lóng hāi-sí; in-ūi án-ni, góa chiong thâu-chúi ê kang-ê hiàn hō͘ Iâ-hô-hoa chòe-chè; to̍k-to̍k góa ê tōa-kiáⁿ lóng ēng thòe-sio̍k.

(BCL) 彼時法老固執呣准阮去，耶和華就將埃及地所有頭胎的，無論是人的大子抑是精牲的頭水的，攏害死。因為按呢，我將頭水的公的獻互耶和華做祭，獨獨我的大子攏用替贖。

16

(THR) Che beh chòe kì-hō tī lí ê chhiú, chòe kì-liām hâ tī lí ê thâu-hia̍h; in-ūi Iâ-hô-hoa ēng tōa kôan-lêng ê chhiú, chhōa góan tùi Ai-kı̍p chhut-lâi.

(BCL) 這欲做記號佇你的手，做紀念縖佇你的頭額，因為耶和華用大權能的手導阮對埃及出來。』」

17

(THR) Hoat-ló chún peh-sìⁿ khì ê sî, Hui-lī-sū tōe ê lō͘ sui-jiân khah-kūn, chóng-sī Siōng-tè bô chhōa in tùi hia khì; in-ūi Siōng-tè kóng, Kiaⁿ-liáu peh-sìⁿ tú-tio̍h kau-chiàn, chiū thè-hóe, tò-tńg-khì Ai-kı̍p.

(BCL) 法老准百姓去的時，非利士地的路雖然卡近，總是上帝無導對遐去；因為上帝講：「驚了百姓抵著交戰，就退悔倒轉去埃及。」

18

(THR) Só͘-í Siōng-tè chhōa peh-sìⁿ oan tùi Âng-hái khòng-iá hit-tiâu lō͘ khì; Í-sek-lia̍t lâng lóng pâi tūi-ngó͘, tùi Ai-kı̍p tōe chhut-khì.

(BCL) 所以上帝導百姓，彎對紅海曠野彼條路去。以色列人攏排隊伍，對埃及地出去。

19

(THR) Mô͘-se tòa Iok-sek ê kut-thâu kap i khì; in-ūi Iok-sek bat chhiat-chhiat kah Í-sek-lia̍t lâng chiù-chōa, tùi in kóng, Siōng-tè tek-khak kòan-kò͘ lín, lín tio̍h tòa góa ê kut-thâu tùi chia saⁿ-kap khì.

(BCL) 摩西帶約瑟的骨頭及伊去；因為約瑟曾切切教以色列人咒誓，對講：「上帝的確眷顧恁，恁著帶我的骨頭對遮相及去。」

20

(THR) In tùi So͘-kat khí-sin, chat-iâⁿ tī kūn khòng-iá ê Í-thóng.

(BCL) 對疏割起身，紮營佇近曠野的以倘。

21

(THR) Iâ-hô-hoa kiâⁿ tī in ê thâu-chêng, jı̍t-sî tī hûn-thiāu-tiong chhōa in ê lō͘, mî-sî tī hé-thiāu-tiong kng-chiò in; hō͘ in jı̍t-mî lóng thang kiâⁿ.

(BCL) 耶和華行佇的頭前，日時，佇雲柱中導的路；暝時，佇火柱中光照，互日暝攏通行。

22

(THR) Jı̍t-sî ê hûn-thiāu, mî-sî ê hé-thiāu, lóng bô lī-khui peh-sìⁿ ê thâu-chêng.

(BCL) 日時的雲柱，暝時的火柱，攏無離開百姓的頭前。

Bible Color Mark

• 台語漢字羅馬本
• 巴克禮全羅