出埃及記 第 2 章

1

(THR) Ū chı̍t ê Lī-bī cho̍k ê lâng, khì chhōa chı̍t ê Lī-bī cho̍k ê cha-bó͘-gín-á.

(BCL) 有一個利未族的人去娶一個利未族的查某囝仔。

2

(THR) Hit-ê hū-jîn-lâng hôai-īn, siⁿ chı̍t ê kiáⁿ; khòaⁿ-kìⁿ i sī chheng-siù ê gín-á, chiū khǹg i saⁿ-ge̍h-jı̍t kú.

(BCL) 彼個婦仁人懷孕，生一個子，看見伊是清秀的囝仔，就囥伊三月日久，

3

(THR) Āu-lâi khòaⁿ bōe koh khǹg-tit, chiū ūi-tio̍h i chhú lô͘-tek-á ê siuⁿ, ēng chio̍h-iû kap le̍k-chhiⁿ kô͘ i; chiong gín-á hē ti7hit lāi-bīn, lok tī hô-piⁿ, lô͘-úi ê tiong-kan.

(BCL) 後來看閣囥得，就為著伊取蘆竹仔的箱，用石油及瀝青糊伊，將囝仔下佇彼內面，橐佇河邊蘆葦的中間。

4

(THR) I ê tōa-chí hn̄g-hn̄g khiā-teh, ài chai i ōe tú-tio̍h cháiⁿ-iūⁿ.

(BCL) 伊的大姐遠遠徛，愛知伊會抵著怎樣。

5

(THR) Hoat-ló ê cha-bó͘-kiáⁿ lo̍h-lâi hô-nı̍h, beh sóe-e̍k; i hiah-ê lú-pī kiâⁿ-iû tī hô-piⁿ; i khòaⁿ-kìⁿ lô͘-úi ê tiong-kan ū siuⁿ, chiū chhe chı̍t ê lú-pī giâ-lâi.

(BCL) 法老的查某子落來河裡欲洗浴，伊許個女婢行遊佇河邊。伊看見蘆葦的中間有箱，就差一個女婢夯來。

6

(THR) Hian-khui khòaⁿ-kìⁿ gín-á; khòaⁿ ah, gín-á teh háu. I chiū lîn-bín i, kóng, Che chiū-sī Hi-pek-lâi lâng ê gín-á.

(BCL) 掀開，看見囝仔。看啊，囝仔哮，伊就憐憫伊，講：「這就是希伯來人的囝仔。」

7

(THR) I ê tōa-chí kā Hoat-ló ê cha-bó͘-kiáⁿ kóng, Góa khì tī Hi-pek-lâi hū-jîn-lâng ê tiong-kan kiò chı̍t ê lin-bú, kā lí io chit-ê gín-á, hó mah?

(BCL) 伊的大姊給法老的查某子講：「我去佇希伯來婦仁人的中間叫一個奶母，給你育此個囝仔，好嗎？」

8

(THR) Hoat-ló ê cha-bó͘-kiáⁿ kā i kóng, Lí thang khì ah. Cha-bó͘-kiáⁿ chiū khì, kiò gín-á ê lāu-bú.

(BCL) 法老的查某子給伊講：「你通去啊！」查某子就去叫囝仔的老母。

9

(THR) Hoat-ló ê cha-bó͘-kiáⁿ kā i kóng, Phō chit-ê gín-á khì, kā góa io i, góa beh hō͘ lí kang-chîⁿ. Hū-jîn-lâng chiū phō gín-á khì io i.

(BCL) 法老的查某子給伊講：「抱此個囝仔去，給我育伊，我欲互你工錢。」婦仁人就抱囝仔去育伊。

10

(THR) Gín-á chiām-chiām tōa, hū-jîn-lâng chiū tòa i kàu Hoat-ló ê cha-bó͘-kiáⁿ hia, chòe i ê kiáⁿ. I kā i hō-miâ kiò Mô͘-se, kóng, In-ūi góa tùi chúi-nı̍h kiù i chhut-lâi.

(BCL) 囝仔漸漸大，婦仁人就帶伊到法老的查某子遐，做伊的子。伊給伊號名叫摩西，講：「因為我對水裡救伊出來。」

11

(THR) Āu-lâi Mô͘-se í-keng tióng-sêng, i chhut-khì kàu i ê hiaⁿ-tī hia, khòaⁿ-kìⁿ in teh taⁿ-teh; khòaⁿ-kìⁿ chı̍t ê Ai-kı̍p lâng phah chı̍t ê Hi-pek-lâi lâng, chiū-sī i ê hiaⁿ-tī.

(BCL) 後來，摩西已經長成，伊出去到伊的兄弟遐，看見擔壓，看見一個埃及人拍一個希伯來人就是伊的兄弟。

12

(THR) I khòaⁿ chó-iū, khòaⁿ bô lâng tī-hia, chiū phah-sí Ai-kı̍p lâng, iám tī soa-nı̍h.

(BCL) 伊看左右，看無人佇遐，就拍死埃及人，掩佇沙裡。

13

(THR) Keh-jı̍t koh chhut-khì, khòaⁿ-kìⁿ ū nn̄g ê Hi-pek-lâi ê lâng saⁿ-phah, chiū tùi hit-ê m̄-tio̍h-ê kóng, Lí siáⁿ-sū phah lí ê tâng-phōaⁿ?

(BCL) 隔日閣出去，看見有二個希伯來的人相拍，就對彼個呣著者講：「你啥事拍你的同伴？」

14

(THR) Hit-ê lâng kóng, Chī-chūi siat-lı̍p lí chòe siú-léng kap sím-phòaⁿ-koaⁿ lâi kóan góan? Lí siūⁿ beh phah-sí góa, chhin-chhiūⁿ phah-sí hit-ê Ai-kı̍p lâng mah? Mô͘-se kiaⁿ kóng, Chit-ê tāi-chì chin-chiàⁿ lō͘-chhut.

(BCL) 彼個人講：「是誰設立你做首領及審判官來管阮？你想欲拍死我，親像拍死彼個埃及人嗎？」摩西驚，講：「此個代誌真正露出。」

15

(THR) Hoat-ló thiaⁿ-kìⁿ chit-ê tāi-chì, chiū siūⁿ beh thâi Mô͘-se. Chóng-sī Mô͘-se siám-pī Hoat-ló, cháu-khì Bí-tiân tōe khiā-khí; chē tī chíⁿ-piⁿ.

(BCL) 法老聽見此個代誌，就想欲　摩西，總是摩西閃避法老，走去米甸地徛起。

16

(THR) Bí-tiân ê chè-si ū chhit-ê cha-bó͘-kiáⁿ; in lâi chhiūⁿ-chúi kàu móa chô, hō͘ lāu-pē ê iûⁿ-kûn lim.

(BCL) 坐佇井邊。米甸的祭司有七個查某子；來汲水，到滿槽，互老父的羊群飲。

17

(THR) Hiah-ê kò͘-iûⁿ-ê kàu, kóaⁿ in; Mô͘-se chiū khí-lâi pang-chān in, hō͘ in ê iûⁿ-kûn lim.

(BCL) 許個顧羊者到，趕，摩西就起來幫助，互的羊群飲。

18

(THR) In lâi kàu lāu-pē, Liû-jíⁿ, hia; i kóng, Kin-á-jı̍t lín cháiⁿ-iūⁿ hiah-kín tò-lâi?

(BCL) 來到老父流珥遐；伊講：「今仔日恁怎樣許緊倒來？」

19

(THR) In kóng, Ū chı̍t ê Ai-kı̍p lâng kiù góan thoat-lī kò͘-iûⁿ ê lâng ê chhiú, koh thòe góan chhut-la̍t chhiūⁿ chúi, hō͘ iûⁿ-kûn lim.

(BCL) 講：「有一個埃及人救阮脫離顧羊的人的手，閣替阮出力汲水互羊群飲。」

20

(THR) I tùi i hiah-ê cha-bó͘-kiáⁿ kóng, Hit-ê lâng tī tah-lo̍h? Lín siáⁿ-sū pàng i tī-hia? tio̍h chhiáⁿ i lâi chia̍h.

(BCL) 伊對伊許個查某子講：「彼個人佇叨落？恁啥事放伊佇遐？著請伊來食。」

21

(THR) Mô͘-se gōan kap hit-lâng tiàm; i chiū chiong i ê cha-bó͘-kiáⁿ Se-pho-la̍h, kè hō͘ Mô͘-se.

(BCL) 摩西願及彼人踮；伊就將伊的查某子西坡拉嫁互摩西。

22

(THR) Siⁿ chı̍t ê kiáⁿ; Mô͘-se kā i hō miâ kiò Kek-sūn; in-ūi kóng, Góa kià-kha tī gōa-pang.

(BCL) 生一個子，摩西給伊號名叫革舜，因為講：「我寄腳佇外邦。」

23

(THR) Le̍k-kè chōe-chōe nî Ai-kı̍p ông sí; Í-sek-lia̍t lâng, in-ūi chòe khó͘-kang, chiū thó͘-khùi âu-kiò; in chòe khó͘-kang âu-kiò ê siaⁿ kàu hō͘ Siōng-tè thiaⁿ-kìⁿ.

(BCL) 歷過多多年，埃及王死。以色列人因為做苦工，就吐氣喉叫，做苦工喉叫的聲到互上帝聽見。

24

(THR) Siōng-tè thiaⁿ-kìⁿ in ê hiⁿ-hiⁿ-chhan; Siōng-tè chiū kì-tit I kap A-pek-la̍h-hán, Í-sat, Ngá-kok só͘ lı̍p ê iok.

(BCL) 上帝聽見的譆譆孱，上帝就記得伊及亞伯拉罕、以撒、雅各所立的約。

25

(THR) Siōng-tè khòaⁿ-kò͘ Í-sek-lia̍t lâng, Siōng-tè iā chai in ê tāi-chì.

(BCL) 上帝看顧以色列人，上帝也知的代誌。

Bible Color Mark

• 台語漢字羅馬本
• 巴克禮全羅