出埃及記 第 28 章

1

(THR) Lí tio̍h tùi Í-sek-lia̍t lâng ê tiong-kan, hō͘ lí ê hiaⁿ A-lûn kap i hiah-ê kiáⁿ, lâi lí chia, thang chòe chè-si, ho̍k-sāi Góa, chiū-sī A-lûn, kap A-lûn ê kiáⁿ Ná-tap, A-pí-hō͘, Í-lī-a-sat, Í-tha-má.

(BCL) 「你著對以色列人的中間，互你的兄亞倫及伊許個子來你遮，通做祭司服事我，就是亞倫及亞倫的子拿答、亞比戶、以利亞撒、以他瑪。

2

(THR) Lí tio̍h kā lí ê hiaⁿ A-lûn chòe sèng ê saⁿ, hō͘ i êng-kng koh súi.

(BCL) 你著給你的兄亞倫做聖的衫，互伊榮光閣娞。

3

(THR) Koh tio̍h hoan-hù it-chhè sim ū tì-hūi-ê, chiū-sī Góa ēng tì-hūi ê sîn só͘ chhiong-móa ê lâng, kā A-lûn chòe saⁿ, hun-piat i chòe-sèng, thang chòe chè-si ho̍k-sāi Góa.

(BCL) 閣著吩咐一切心有智慧者，就是我用智慧的神所充滿的人，給亞倫做衫，分別伊做聖，通做祭司服事我。

4

(THR) In só͘ tio̍h chòe ê saⁿ, chiū-sī pó͘-kòa, í-hut-tek, gōa-phàu, ū-hoe ê lāi-saⁿ, bō, io-tòa. In tio̍h kā lí ê hiaⁿ A-lûn kap i ê kiáⁿ chòe sèng ê saⁿ, hō͘ i chòe chè-si lâi ho̍k-sāi Góa.

(BCL) 所著做的衫就是補、以弗得、外袍、有花的內衫、帽、腰帶，著給你的兄亞倫及伊的子做聖的衫，互伊做祭司來服事我。

5

(THR) In tio̍h ēng kim, kap lâm-sek, chí-sek, chu-âng-sek ê liāu, kap iù-tōe chòe-i.

(BCL) 著用金及藍色、紫色、朱紅色的料，及幼苧做伊。

6

(THR) In tio̍h ēng kim, kap lâm-sek, chí-sek, chu-âng-sek ê liāu, kap kè-pháng ê iù-tōe, ēng kî-khiáu ê kang chòe í-hut-tek.

(BCL) 「著用金及藍色、紫色、朱紅色的料，及過紡的幼苧，用奇巧的工做以弗得。

7

(THR) Tio̍h ū phi-kian nn̄g tè, liân tī siang-pêng, hō͘ i saⁿ-liân.

(BCL) 著有披肩二塊，連佇雙旁，互伊相連。

8

(THR) Í-hut-tek téng-bīn kî-khiáu ê kang só͘ chit-ê tòa, tio̍h kap i tâng chı̍t-iūⁿ ê chòe-hoat; hō͘ i saⁿ-liân chòe chı̍t-ê; ēng kim, kap lâm-sek, chí-sek, chu-âng-sek ê liāu, í-kı̍p kè-pháng ê iù-tōe chòe-ê.

(BCL) 以弗得頂面奇巧的工所織的帶，著及伊同一樣的做法，互伊相連做一個，用金及藍色、紫色、朱紅色的料，以及過紡的幼苧做的。

9

(THR) Tio̍h the̍h nn̄g tè âng-bé-ló, tī téng-bīn khek Í-sek-lia̍t chiah-ê kiáⁿ ê miâ;

(BCL) 著提二塊紅瑪瑙，佇頂面刻以色列諸個子的名：

10

(THR) La̍k ê miâ tī chit-tè pó-chio̍h, kî-û la̍k ê miâ tī hit-tè pó-chio̍h, lóng chiàu in chhut-sì ê chhù-sū.

(BCL) 六個名佇此塊寶石，其餘六個名佇彼塊寶石，攏照出世的次序。

11

(THR) Tio̍h ēng khek pó-chio̍h ê chhiú-kang, chhin-chhiūⁿ khek-ìn, chiàu Í-sek-lia̍t chiah-ê kiáⁿ ê miâ, khek chit nn̄g-tè pó-chio̍h, jı̍p tī kim-chô-nı̍h.

(BCL) 著用刻寶石的手工，親像刻印，照以色列諸個子的名，刻此二塊寶石，入佇金槽裡。

12

(THR) Tio̍h chiong chit nn̄g-tè pó-chio̍h, an tī í-hut-tek ê phi-kian-téng, ūi Í-sek-lia̍t lâng chòe kì-liām-chio̍h. A-lûn tio̍h tī nn̄g ê keng-thâu pē in ê miâ, tī Iâ-hô-hoa ê bīn-chêng, chòe kì-liām.

(BCL) 著將此二塊寶石安佇以弗得的披肩頂，為以色列人做紀念石。亞倫著佇二個肩頭背的名，佇耶和華的面前做紀念。

13

(THR) Tio̍h ēng kim chòe nn̄g tè chô.

(BCL) 著用金做二塊槽，

14

(THR) Koh ēng hó-kim, chhin-chhiūⁿ phah soh-á, lâi chòe nn̄g tiâu liān-á, chiong chiah-ê phah-chiâⁿ ê liān-á, an tī hiah-ê chô-nı̍h.

(BCL) 閣用好金，親像拍索仔，來做二條鍊仔，將諸個拍成的鍊仔，安佇許個槽裡。」

15

(THR) Lí tio̍h ēng kî-khiáu ê kang, chòe chı̍t-ê phòaⁿ-tòan ê pó͘-kòa; tio̍h kap í-hut-tek tâng chı̍t-iūⁿ ê chòe-hoat; ēng kim, kap lâm-sek, chí-sek, chu-âng-sek ê liāu í-kı̍p kè-pháng ê iù-tōe chòe-i.

(BCL) 「你著用奇巧的工做一個判斷的補。著及以弗得同一樣的做法：用金及藍色、紫色、朱紅色的料，以及過紡的幼苧做伊。

16

(THR) Pó͘-kòa tio̍h sù-hong, áu siang-têng; tn̂g chı̍t-lia̍h, khoah chı̍t-lia̍h.

(BCL) 補著四方，拗雙重，長一　，闊一　。

17

(THR) Lí tio̍h jı̍p chiah-ê pó-chio̍h tī i ê téng-bīn, ū pó-chio̍h sì-chōa; chı̍t-chōa sī âng-pó-chio̍h, n̂g-ge̍k, chhiah-ge̍k, che sī tē-it-chōa.

(BCL) 你著入諸個寶石佇伊的頂面，有寶石四鑆：一鑆是紅寶石、黃玉、赤玉，這是第一　；

18

(THR) Tē-jī-chōa sī le̍k-pó-chio̍h, lâm-ge̍k, kim-kong-chio̍h.

(BCL) 第二　是綠寶石、藍玉、金鋼石；

19

(THR) Tē-saⁿ-chōa sī chí-sek ê bé-ló, pe̍h-bé-ló, chí-sek chúi-chiⁿ.

(BCL) 第三　是紫色的瑪瑙、白瑪瑙、紫色水晶；

20

(THR) Tē-sì-chōa sī chhiⁿ-ge̍k, âng-bé-ló, phek-ge̍k; che lóng tio̍h jı̍p tī kim-chô-lāi.

(BCL) 第四　是青玉、紅瑪瑙、碧玉。這攏著入佇金槽內。

21

(THR) Chiah-ê pó-chio̍h chiàu Í-sek-lia̍t ê kiáⁿ ê miâ, kiōng cha̍p-jī tè, chhin-chhiūⁿ khek-ìn, múi-tè khek chı̍t ê miâ, ūi-tio̍h cha̍p-jī chi-phài lâi chòe-i.

(BCL) 諸個寶石照以色列的子的名共十二塊，親像刻印，每塊刻一個名為著十二支派來做伊。

22

(THR) Tio̍h ēng hó-kim phah liān-á, chhin-chhiūⁿ soh-á, an tī pó͘-kòa.

(BCL) 著用好金拍鍊仔親像索仔安佇補。

23

(THR) Tī pó͘-kòa tio̍h chòe nn̄g ê kim-khôan, chiong chit nn̄g ê khôan an tī pó͘-kòa ê siang-thâu.

(BCL) 佇補著做二個金環，將此二個環安佇補的雙頭。

24

(THR) Tio̍h chiong só͘ phah hit nn̄g tiâu kim liān-á, liân tī pó͘-kòa siang-thâu nn̄g ê khôan.

(BCL) 著將所拍彼二條金鍊仔，連佇補雙頭二個環。

25

(THR) Ēng só͘ phah nn̄g tiâu liān-á ê siang-thâu, liân tī nn̄g ê chô, an tī í-hut-tek phi-kian ê thâu-chêng.

(BCL) 用所拍二條鍊仔的雙頭連佇二個槽，安佇以弗得披肩的頭前。

26

(THR) Lí tio̍h chòe nn̄g ê kim-khôan, hē tī pó͘-kòa siang-thâu ê kîⁿ, kūn í-hut-tek ǹg-lāi hit-pêng.

(BCL) 你著做二個金環，下佇補雙頭的墘，近以弗得向內彼旁。

27

(THR) Koh tio̍h chòe nn̄g ê kim-khôan, an tī í-hut-tek phi-kian ē-bīn ê thâu-chêng, óa-kūn saⁿ-liân ê só͘-chāi, tī í-hut-tek kî-khiáu ê kang só͘ chit-ê tòa ê téng-bīn.

(BCL) 閣著做二個金環，安佇以弗得披肩下面的頭前，倚近相連的所在，佇以弗得奇巧的工所織的帶的頂面。

28

(THR) In tio̍h ēng lâm-sek ê iù-tòa, chiong pó͘-kòa ê khôan kap í-hut-tek ê khôan pa̍k saⁿ-liân, hō͘ i liâm tī í-hut-tek kî-khiáu ê kang só͘ chit-ê tòa, hō͘ pó͘-kòa kap í-hut-tek bô lī-phāng.

(BCL) 著用藍色的幼帶將補的環及以弗得的環縛相連，互伊粘佇以弗得奇巧的工所織的帶，互補及以弗得無離縫。

29

(THR) A-lûn jı̍p sèng-só͘ ê sî, tio̍h chiong phòaⁿ-tòan ê pó͘-kòa só͘ khek Í-sek-lia̍t ê kiáⁿ ê miâ, tòa tī i ê heng-chêng, tī Iâ-hô-hoa ê bīn-chêng, siông-siông chòe kì-liām.

(BCL) 亞倫入聖所的時，著將判斷的補，所刻以色列的子的名，帶佇伊的胸前，佇耶和華的面前常常做紀念。

30

(THR) Lí tio̍h chiong Ou-lêng kap Thó͘-bêng, hē tī phòaⁿ-tòan ê pó͘-kòa-lāi; A-lûn kàu Iâ-hô-hoa bīn-chêng ê sî, hiah-ê tio̍h tī i ê heng-chêng. A-lûn tio̍h tī Iâ-hô-hoa ê bīn-chêng siông-siông chiong Í-sek-lia̍t ê phòaⁿ-tòan kòa tī heng-chêng.

(BCL) 你著將烏陵及土明下佇判斷的補內；亞倫到耶和華面前的時，許個著佇伊的胸前，亞倫著佇耶和華的面前常常將以色列的判斷掛佇胸前。」

31

(THR) Lí tio̍h chòe í-hut-tek lāi-bīn ê gōa-phàu, kui-niá sī lâm-sek-ê.

(BCL) 「你著做以弗得內面的外袍，歸領是藍色的。

32

(THR) Phàu téng-bīn ê tùi-tiong, tio̍h ūi-tio̍h thâu-khak lâu chı̍t ê niá-khang; khang ê chiu-ûi chit niá-iān, chhin-chhiūⁿ chiàn-kah ê niá-khang, bián-tit phòa lı̍h.

(BCL) 袍頂面的對中，著為著頭殼留一個領孔，孔的周圍織領緣，親像戰甲的領孔，免得破裂。

33

(THR) Phàu chiu-ûi ê ē-kha-pô͘, tio̍h ēng lâm-sek, chí-sek, chu-âng-sek ê liāu, chòe sia̍h-liû; tī phàu chiu-ûi, sia̍h-liû ê tiong-kan, tio̍h ū kim hâm-lêng.

(BCL) 袍周圍的下腳裒著用藍色、紫色、朱紅色的料做石榴。佇袍周圍，石榴的中間著有金瑊鈴：

34

(THR) Chı̍t-lia̍p kim hâm-lêng, chı̍t-lia̍p sia̍h-liû, tī phàu chiu-ûi ê ē-kha-pô͘.

(BCL) 一粒金瑊鈴一粒石榴，佇袍周圍的下腳裒。

35

(THR) A-lûn ho̍k-sāi ê sî, tio̍h chhēng-i; i jı̍p sèng-só͘ kàu Iâ-hô-hoa bīn-chêng, í-kı̍p chhut-lâi ê sî, ū siaⁿ thang thiaⁿ-kìⁿ, hō͘ i bián sí.

(BCL) 亞倫服事的時著穿伊。伊入聖所到耶和華面前，以及出來的時，有聲通聽見，互伊免死。

36

(THR) Tio̍h ēng hó-kim chòe chı̍t ê pâi, chiàu khek-ìn ê hoat-tō͘, khek tī i ê téng-bīn kóng, CHÒE-SÈNG KUI IÂ-HÔ-HOA.

(BCL) 「著用好金做一個牌，照刻印的法度刻佇伊的頂面講『做聖歸耶和華』。

37

(THR) Tio̍h ēng chı̍t-tiâu lâm-sek ê iù-tòa, chiong i pa̍k tī bō-téng, chiū-sī tī bō ê thâu-chêng.

(BCL) 著用一條藍色的幼帶，將伊縛佇帽頂就是佇帽的頭前。

38

(THR) Chit-ê pâi tio̍h tī A-lûn ê thâu-hia̍h, hō͘ A-lûn tam-tng sèng-mı̍h ê chōe, chiū-sī Í-sek-lia̍t lâng, tī it-chhè sèng ê lé-mı̍h, só͘ hun-piat chòe-sèng-ê; chit-ê pâi tio̍h siông-siông tī i ê thâu-hia̍h, hō͘ in tī Iâ-hô-hoa bīn-chêng tit-tio̍h chiap-la̍p.

(BCL) 此個牌著佇亞倫的頭額，互亞倫擔當聖物的罪；就是以色列人佇一切聖的禮物所分別做聖者。此個牌著常常佇伊的頭額，互佇耶和華面前得著接納。

39

(THR) Tio̍h ēng iù-tōe chit ū-chōa ê lāi-saⁿ; tio̍h ēng iù-tōe-pò͘ chòe-bō; koh ēng siù-hoe ê kang, chòe io-tòa.

(BCL) 著用幼苧織有　的內衫，著用幼苧布做帽，閣用　花的工做腰帶。

40

(THR) Lí tio̍h kā A-lûn chiah-ê kiáⁿ chòe lāi-saⁿ, chòe io-tòa, chòe pau thâu-khak ê kun, hō͘ in êng-kng koh súi.

(BCL) 「你著給亞倫諸個子做內衫、做腰帶、做包頭殼的巾，互榮光閣娞。

41

(THR) Tio̍h chiong chiah-ê kā lí ê hiaⁿ A-lûn kap i ê kiáⁿ chhēng, koh ēng iû boah-in, kiâⁿ siat-lı̍p ê lé, hun-piat in chòe-sèng, hō͘ in chòe chè-si lâi ho̍k-sāi Góa.

(BCL) 著將諸個給你的兄亞倫及伊的子穿，閣用油抹，行設立的禮，分別做聖，互做祭司來服事我。

42

(THR) Tio̍h kā in chòe iù-tōe-pò͘ ê khò͘, jia in ê ē-thé; khò͘ tio̍h tùi io kàu tōa-thúi;

(BCL) 著給做幼苧布的褲，遮的下體；褲著對腰到大腿。

43

(THR) A-lûn kap i ê kiáⁿ jı̍p hōe-bō͘, á-sī chiū-kūn tôaⁿ, beh tī sèng-só͘ ho̍k-sāi ê sî, tio̍h chhēng-i; bián-tit in tam-tng chōe lâi sí; che sī beh kā A-lûn kap i ê hō͘-è chòe éng-óan ê lē.

(BCL) 亞倫及伊的子入會幕，抑是就近壇，欲佇聖所服事的時著穿伊，免得擔當罪來死。這是欲給亞倫及伊的後裔做永遠的例。」

Bible Color Mark

• 台語漢字羅馬本
• 巴克禮全羅