出埃及記 第 7 章

1

(THR) Iâ-hô-hoa tùi Mô͘-se kóng, Khòaⁿ ah, Góa hō͘ lí tùi-tī Hoat-ló chòe Siōng-tè; lí ê hiaⁿ A-lûn beh chòe lí ê sian-ti.

(BCL) 耶和華對摩西講：「看啊，我互你對佇法老做上帝，你的兄亞倫欲做你的先知。

2

(THR) Kìⁿ-nā Góa só͘ hoan-hù lí-ê, lí lóng tio̍h kóng i; lí ê hiaⁿ A-lûn tio̍h tùi Hoat-ló kóng, hō͘ i chún Í-sek-lia̍t lâng chhut i ê tōe.

(BCL) 見若我所吩咐你的，你攏著講伊。你的兄亞倫著對法老講，互伊准以色列人出伊的地。

3

(THR) Góa beh hō͘ Hoat-ló ê sim ngī, iā beh tī Ai-kı̍p tōe kiâⁿ Góa chōe-chōe ê sîn-jiah kî-sū.

(BCL) 我欲互法老的心硬，也欲佇埃及地行我多多的神蹟奇事。

4

(THR) Chóng-sī Hoat-ló bô beh thiaⁿ lín; Góa beh chhun Góa ê chhiú tī Ai-kı̍p, ēng tōa ê sím-phòaⁿ chhōa Góa ê kun-tūi, Góa ê peh-sìⁿ Í-sek-lia̍t lâng, chhut Ai-kı̍p tōe.

(BCL) 總是法老無欲聽恁；我欲伸我的手佇埃及，用大的審判導我的軍隊，我的百姓以色列人出埃及地。

5

(THR) Góa chhun Góa ê chhiú tī Ai-kı̍p, chhōa Í-sek-lia̍t lâng tùi in tiong-kan chhut-lâi ê sî, Ai-kı̍p lâng chiū chai Góa sī Iâ-hô-hoa.

(BCL) 我伸我的手佇埃及，導以色列人對中間出來的時，埃及人就知我是耶和華。」

6

(THR) Mô͘-se, A-lûn chiū án-ni kiâⁿ; Iâ-hô-hoa cháiⁿ-iūⁿ hoan-hù in, in chiū chiàu án-ni kiâⁿ.

(BCL) 摩西、亞倫就按呢行；耶和華怎樣吩咐，就照按呢行。

7

(THR) In kap Hoat-ló kóng-ōe ê sî, Mô͘-se poeh-cha̍p hè, A-lûn poeh-cha̍p-saⁿ hè.

(BCL) 及法老講話的時，摩西八十歲，亞倫八十三歲。

8

(THR) Iâ-hô-hoa tùi Mô͘-se tùi A-lûn kóng,

(BCL) 耶和華對摩西、對亞倫講：

9

(THR) Hoat-ló nā tùi lín kóng, Lín tio̍h kiâⁿ chı̍t kiāⁿ kî-sū lâi khòaⁿ-māi-cheh; lí tio̍h tùi A-lûn kóng, Kia̍h lí ê kóaiⁿ-á lâi hiat tī Hoat-ló ê bīn-chêng, hō͘ i pìⁿ-chòe chôa.

(BCL) 「法老若對恁講：『恁著行一件奇事來看覓唧！』你著對亞倫講：『抬你的枴仔來佇法老的面前，互伊變做蛇。』」

10

(THR) Mô͘-se, A-lûn jı̍p-khì kìⁿ Hoat-ló, chiū án-ni kiâⁿ, chiàu Iâ-hô-hoa só͘ hoan-hù-ê; A-lûn chiong i ê kóaiⁿ-á hiat tī Hoat-ló kap i ê jîn-sîn ê bīn-chêng, kóaiⁿ-á chiū pìⁿ-chòe chôa.

(BCL) 摩西、亞倫入去見法老，就按呢行照耶和華所吩咐的。亞倫將伊的枴仔佇法老及伊的人臣的面前，枴仔就變做蛇。

11

(THR) Hoat-ló iā tiàu tì-hūi ê lâng kap sai-kong lâi, in sī Ai-kı̍p ê phok-sū, iā ēng in ê siâ-su̍t chiàu án-ni kiâⁿ.

(BCL) 法老也召智慧的人及師公來；是埃及的博士，也用的邪術照按呢行。

12

(THR) In ta̍k-lâng hiat in ê kóaiⁿ-á, lóng pìⁿ-chòe chôa; chóng-sī A-lûn ê kóaiⁿ-á thun in ê kóaiⁿ-á.

(BCL) 逐人的枴仔，攏變做蛇；總是亞倫的枴仔吞的枴仔。

13

(THR) Hoat-ló ê sim ngī, bô beh thiaⁿ in, tú-tú chiàu Iâ-hô-hoa só͘ kóng-ê.

(BCL) 法老的心硬，無欲聽，抵抵照耶和華所講的。

14

(THR) Iâ-hô-hoa tùi Mô͘-se kóng, Hoat-ló ê sim kò͘-chip, i m̄-chún peh-sìⁿ khì.

(BCL) 耶和華對摩西講：「法老的心固執，伊呣准百姓去。

15

(THR) Thiⁿ-kng-chá lí khì kìⁿ Hoat-ló; khòaⁿ ah, i chhut-khì chúi-piⁿ; lí tio̍h khiā tī hô-piⁿ tán-chih i; lí ê chhiú tio̍h kia̍h hit-ki pìⁿ-chôa ê kóaiⁿ-á,

(BCL) 天光早，你去見法老，看啊，伊出去水邊，你著徛佇河邊等接伊，你的手著抬彼支變蛇的枴仔，

16

(THR) tùi i kóng, Iâ-hô-hoa , Hi-pek-lâi lâng ê Siōng-tè, chhe góa lâi kìⁿ lí, kóng, Chún Góa ê peh-sìⁿ khì, thang tī khòng-iá ho̍k-sāi Góa; khòaⁿ ah, kàu-taⁿ lí iáu-bē ū thiaⁿ.

(BCL) 對伊講：『耶和華──希伯來人的上帝差我來見你，講：准我的百姓去，通佇曠野服事我。看啊，到今你猶未有聽。

17

(THR) Iâ-hô-hoa án-ni kóng, Lí beh tùi chit chı̍t-kiāⁿ chai Góa sī Iâ-hô-hoa; khòaⁿ ah, góa beh ēng góa chhiú-nı̍h ê kóaiⁿ-á phah hô-tiong ê chúi, chúi chiū pìⁿ-chòe huih.

(BCL) 耶和華按呢講：你欲對此一件知我是耶和華。看啊，我欲用我手裡的枴仔拍河中的水，水就變做血；

18

(THR) Hô-nı̍h ê hî beh sí, hô iā beh chhàu-bī; Ai-kı̍p lâng iàm-chiān m̄-ài lim hô ê chúi.

(BCL) 河裡的魚欲死，河也欲臭味，埃及人厭賤呣愛飲河的水。』」

19

(THR) Iâ-hô-hoa tùi Mô͘-se kóng, Lí tio̍h kā A-lûn kóng, Kia̍h lí ê kóaiⁿ-á, chhun lí ê chhiú tī Ai-kı̍p chiah-ê chúi ê téng-bīn, chiū-sī tī in ê kang, hô, tî, kap it-chhè ê chúi-khut ê téng-bīn, hō͘ in lóng pìⁿ-chòe huih; tī Ai-kı̍p piàn-tōe, bô-lūn chhâ ê khì-kū, chio̍h ê khì-kū, lóng beh ū huih.

(BCL) 耶和華對摩西講：「你著給亞倫講：『抬你的枴仔伸你的手佇埃及諸個水的頂面，就是佇的江、河、池及一切的水窟的頂面，互攏變做血。佇埃及遍地，無論柴的器具、石的器具，攏欲有血。』」

20

(THR) Mô͘-se, A-lûn chiū án-ni kiâⁿ, chiàu Iâ-hô-hoa só͘ hoan-hù; tī Hoat-ló kap i ê jîn-sîn ê bīn-chêng kia̍h-khí kóaiⁿ-á, phah hô-nı̍h ê chúi; hô-nı̍h ê chúi lóng pìⁿ-chòe huih .

(BCL) 摩西、亞倫就按呢行照耶和華所吩咐。佇法老及伊的人臣的面前抬起枴仔拍河裡的水，河裡的水攏變做血。

21

(THR) Hô-nı̍h ê hî lóng sí; hô iā chhàu-bī; Ai-kı̍p lâng bōe-ōe lim hô-nı̍h ê chúi; Ai-kı̍p piàn-tōe lóng ū huih.

(BCL) 河裡的魚攏死，河也臭味，埃及人會飲河裡的水；埃及遍地攏有血。

22

(THR) Ai-kı̍p ê phok-sū iā ēng in ê siâ-su̍t chiàu án-ni kiâⁿ; Hoat-ló ê sim ngī, m̄-thiaⁿ in; tú-tú chiàu Iâ-hô-hoa só͘ kóng-ê.

(BCL) 埃及的博士，也用的邪術照按呢行。法老的心硬，呣聽，抵抵照耶和華所講的。

23

(THR) Hoat-ló tò-khì i ê kiong-lāi; chit-ê sū i iā bô khòa-sim.

(BCL) 法老倒去伊的宮內，此個事伊也無掛心。

24

(THR) Ai-kı̍p lâng tī hô ê siang-pêng ku̍t tōe, ài tit-tio̍h chúi thang lim; in-ūi hô ê chúi in bōe lim-tit.

(BCL) 埃及人佇河的雙旁掘地，愛得著水通飲，因為河的水飲得。

25

(THR) Iâ-hô-hoa phah hô liáu-āu le̍k-kè chhit-jı̍t.

(BCL) 耶和華拍河了後歷過七日。

Bible Color Mark

• 台語漢字羅馬本
• 巴克禮全羅