以西結書 第 8 章

1

(THR) Tē la̍k-nî la̍k-ge̍h chhoe-gō͘, góa chē tī góa ê chhù-lāi, Iû-tāi chiah ê tióng-ló chē tī góa ê bīn-chêng; tī-hia Chú Iâ-hô-hoa ê chhiú kàu tī góa ê sin-chiūⁿ.

(BCL) 第六年六月初五，我坐佇我的厝內；猶大諸個長老坐佇我的面前。佇遐主耶和華的手到佇我的身上。

2

(THR) Góa koan-khòaⁿ, khòaⁿ-kìⁿ ū hêng-siōng chhin-chhiūⁿ hé ê khóan-sit; tùi i ê io í-ē ê khóan-sit ū hé, tùi i ê io í-chiūⁿ ê kng-kng ê khóan-sit, chhin-chhiūⁿ hó͘-phek ê sek-tì.

(BCL) 我觀看，看見有形像親像火的款式，對伊的腰以下的款式有火，對伊的腰以上的光光的款式，親像琥珀的色緻。

3

(THR) I chhun chhut chhin-chhiūⁿ chı̍t ki chhiú ê khóan, khiú-tiâu góa chı̍t-kó͘ ê thâu-mn̂g; sîn chiū chiong góa kú-khí kàu thiⁿ kap tōe ê tiong-kan, tī Siōng-tè ê īⁿ-siōng-tiong tòa góa kàu Iâ-lō͘-sat-léng, ǹg pak lāi-īⁿ ê mn̂g-kháu; tī-hia ū tò͘-khī ê ngó͘-siōng ê chō-ūi, chiū-sī kek-tōng tò͘-khī-ê.

(BCL) 伊伸出親像一支手的款，住我一股的頭毛，神就將我舉起到天及地的中間，佇上帝的異象中，帶我到耶路撒冷向北內院的門口，佇遐有妒忌的偶像的座位，就是激動妒忌的。

4

(THR) Khòaⁿ ah, tī-hia ū Í-sek-lia̍t Siōng-tè ê êng-kng, khóan-sit kap góa tī pîⁿ-iûⁿ só͘ khòaⁿ-kìⁿ--ê chı̍t-iūⁿ.

(BCL) 看啊，佇遐有以色列上帝的榮光，款式及我佇平洋所看見者一樣。

5

(THR) I tùi góa kóng, Jîn-chú ah, lí kia̍h-ba̍k ǹg pak-hng ê lō͘ koan-khòaⁿ; góa chiū kia̍h-ba̍k ǹg pak-hng ê lō͘ koan-khòaⁿ; khòaⁿ ah, tī chè-tôaⁿ mn̂g ê pak--sì, tī mn̂g-kháu ū chı̍t-ê kek-tōng tò͘-khī ê ngó͘-siōng.

(BCL) 伊對我講：「人子啊，你抬目向北方的路觀看。」我就抬目向北方的路觀看，看啊，佇祭壇門的北勢，佇門口有一個激動妒忌的偶像；

6

(THR) I koh tùi góa kóng, Jîn-chú ah, lí khòaⁿ-kìⁿ in só͘ chòe--ê mah? chiū-sī Í-sek-lia̍t ke tī-chia só͘ kiâⁿ tōa khó-ò͘ⁿ ê sū, hō͘ Góa lī-khui Góa ê sèng-só͘ hn̄g-hn̄g? chóng-sī lí beh koh khòaⁿ, iáu ū koh-khah tōa khó-ò͘ⁿ ê sū.

(BCL) 伊閣對我講：「人子啊，你看見所做的嗎？就是以色列家佇遮所行大可惡的事，互我離開我的聖所遠遠。總是你欲閣看，猶有閣卡大可惡的事。」

7

(THR) I chhōa góa kàu īⁿ ê mn̂g; góa koan-khòaⁿ, khòaⁿ-kìⁿ chhiûⁿ-piah ū chı̍t-khang.

(BCL) 伊導我到院的門。我觀看，看見牆壁有一孔。

8

(THR) I tùi góa kóng, Jîn-chú ah, lí tio̍h iah chhiûⁿ; góa chı̍t-ē iah chhiûⁿ, khòaⁿ-kìⁿ ū chı̍t ê mn̂g.

(BCL) 伊對我講：「人子啊，你著挖牆。」我一下挖牆，看見有一個門。

9

(THR) I kā góa kóng, Lí jı̍p-khì, khòaⁿ in tī chí lāi-bīn só͘ kiâⁿ khó-ò͘ⁿ ê pháiⁿ-tāi.

(BCL) 伊給我講：「你入去，看佇此內面所行可惡的歹代。」

10

(THR) Góa chiū jı̍p-khì khòaⁿ; khòaⁿ ah, tī sì-bīn ê chhiûⁿ-piah, ūi ta̍k-hō ōe sô ê mı̍h, kap khó-ò͘ⁿ ê cháu-siù, kap Í-sek-lia̍t ke it-chhè ê ngó͘-siōng.

(BCL) 我就入去看，看啊，佇四面的牆壁畫逐號會趖的物及可惡的走獸，及以色列家一切的偶像。

11

(THR) Tī chiah ê siōng ê bīn-chêng, ū Í-sek-lia̍t ke chhit-cha̍p ê tióng-ló khiā-teh, Sa-hoan ê kiáⁿ Ngá-sat-nî-a iā khiā tī in tiong-kan; ta̍k-lâng chhiú the̍h hiuⁿ-lô͘, hiuⁿ-ian ê phang-bī chhèng chiūⁿ-kôaiⁿ.

(BCL) 佇諸個像的面前，有以色列家七十個長老徛，沙番的子雅撒尼亞也徛佇中間。逐人手提香爐，香煙的芳味淐上高。

12

(THR) I tùi góa kóng, Jîn-chú ah, Í-sek-lia̍t ke ê tióng-ló, tī àm-tiong, tī in ta̍k-lâng ūi-siōng ê pâng-á-lāi só͘ kiâⁿ--ê, lí khòaⁿ-kìⁿ bô? in-ūi in kóng, Iâ-hô-hoa bô khòaⁿ-kìⁿ góan, Iâ-hô-hoa í-keng lī-khui chit ê tōe.

(BCL) 伊對我講：「人子啊，以色列家的長老佇暗中佇逐人畫像的房仔內所行的，你看見無？因為講：『耶和華無看見阮；耶和華已經離開此個地。』」

13

(THR) I koh tùi góa kóng, Lí beh koh khòaⁿ-kìⁿ in só͘ kiâⁿ, iáu ū koh-khah tōa khó-ò͘ⁿ ê sū.

(BCL) 伊閣對我講：「你欲閣看見所行猶有閣卡大可惡的事。」

14

(THR) I chhōa góa kàu Iâ-hô-hoa ê chhù, ǹg pak ê mn̂g-kháu; khòaⁿ ah, tī-hia ū hū-lú chē--teh, ūi-tio̍h Tah-bô͘-su thî-khàu.

(BCL) 伊導我到耶和華的厝，向北的門口。看啊，佇遐有婦女坐，為著搭模斯啼哭。

15

(THR) I tùi góa kóng, Jîn-chú ah, lí khòaⁿ-kìⁿ bô? lí iáu beh khòaⁿ-kìⁿ pí che koh-khah khó-ò͘ⁿ ê sū.

(BCL) 伊對我講：「人子啊，你看見無？你猶欲看見比這閣卡可惡的事。」

16

(THR) I koh chhōa góa kàu Iâ-hô-hoa chhù ê lāi-īⁿ; khòaⁿ ah, tī Iâ-hô-hoa ê tiān-mn̂g, léng-lông kap chè-tôaⁿ ê tiong-kan, iok-lio̍k ū jī-cha̍p-gō͘ lâng, ka-chiah ǹg Iâ-hô-hoa ê tiān, bīn ǹg-tang; in iā ǹg-tang pài jı̍t-thâu.

(BCL) 伊閣導我到耶和華厝的內院。看啊，佇耶和華的殿門、兩廊及祭壇的中間，約略有二十五人尻脊向耶和華的殿，面向東，也向東拜日頭。

17

(THR) I tùi góa kóng, Jîn-chú ah, lí ū khòaⁿ-kìⁿ bô? Iû-tāi ke tī-chia kiâⁿ chit ê khó-ò͘ⁿ ê sū, iáu sǹg-chòe sió-khóa mah? in tī chit ê só͘-chāi piàn-kiâⁿ kiông-pō, chài-saⁿ kek Góa ê siū-khì; khòaⁿ ah, in kia̍h chhiū-ki hē tī i ê phīⁿ-chêng.

(BCL) 伊對我講：「人子啊，你有看見無？猶大家佇遮行此個可惡的事猶算做小可嗎？佇此個所在遍行強暴，再三激我的受氣，看啊，抬樹枝下佇的鼻前。

18

(THR) In-ūi án-ni, Góa ia̍h beh kiâⁿ Góa ê tōa siū-khì; Góa ê ba̍k-chiu bô beh thiàⁿ-sioh in, Góa iā bô beh khó-lîn in; in sui-jiân ǹg Góa ê hī-khang-tiong tōa-siaⁿ kiû-kiò, Góa iû-gôan m̄-thiaⁿ.

(BCL) 因為按呢，我亦欲行我的大受氣，我的目睭無欲疼惜，我也無欲可憐；雖然向我的耳孔中大聲求叫，我猶原呣聽。」

Bible Color Mark

• 台語漢字羅馬本
• 巴克禮全羅