以斯拉記 第 3 章

1

(THR) Kàu tē-chhit ge̍h, Í-sek-lia̍t lâng í-keng khiā-khí in hiah ê siâⁿ, hit-sî peh-sìⁿ chhin-chhiūⁿ chı̍t-lâng chū-chı̍p tī Iâ-lō͘-sat-léng.

(BCL) 到第七月，以色列人已經徛起許個城；彼時百姓親像一人，聚集佇耶路撒冷。

2

(THR) Iok-sat-tap ê kiáⁿ Iâ-su-a, kap i ê hiaⁿ-tī hiah ê chè-si, kap Sat-la̍h-thiat ê kiáⁿ Só͘-lô-pa-pek, kap i ê hiaⁿ-tī, lóng khí-lâi khí Í-sek-lia̍t Siōng-tè ê tôaⁿ, thang hiàn sio-chè tī hí(**hit) téng-bīn, chiàu Siōng-tè ê lô͘-po̍k Mô͘-se lu̍t-hoat ê chheh só͘ kì-chài ê.

(BCL) 約薩達的子耶書亞及伊的兄弟許個祭司，及撒拉鐵的子所羅巴伯及伊的兄弟，攏起來起以色列上帝的壇，通獻燒祭佇彼頂面，照上帝的奴僕摩西律法的冊所記載的。

3

(THR) In khí-tôaⁿ tī pún-kū ê ūi, in-ūi kiaⁿ hiah ê kok ê peh-sìⁿ; koh tī hí(**hit) téng-bīn hiàn sio-chè hō͘ Iâ-hô-hoa, chiū-sī chá-khí ê-hng ê sio-chè.

(BCL) 起壇佇本舊的位，因為驚許個國的百姓，閣佇彼頂面獻燒祭互耶和華，就是早起下昏的燒祭，

4

(THR) Iā siú tah-liâu-á choeh, chiàu só͘ kì-chài ê; koh hiàn ta̍k-jı̍t ê sio-chè, chiàu in ê siàu-gia̍h, chiàu tiāⁿ-tio̍h ê lē, chhin-chhiūⁿ ta̍k-jı̍t só͘ eng-kai-tio̍h ê.

(BCL) 也守搭寮仔節照所記載的，閣獻逐日的燒祭照的數額，照定著的例親像逐日所應該著的；

5

(THR) Jiân-āu hiàn chiàu-siông ê sio-chè, kap múi-ge̍h chhoe-it ê chè, í-kı̍p Iâ-hô-hoa hun-piat chòe-sèng ê choeh-kî ê chè; koh hiàn ta̍k-lâng kam-sim hoaⁿ-hí hiàn ê chè hō͘ Iâ-hô-hoa.

(BCL) 然後獻照常的燒祭，及每月初一的祭以及耶和華分別做聖的節期的祭，閣獻逐人甘心歡喜獻的祭互耶和華。

6

(THR) Tùi chhit-ge̍h chhoe-it khí, in hiàn sio-chè hō͘ Iâ-hô-hoa. Chóng-sī Iâ-hô-hoa tiān ê tōe-ki, iáu-bē hē.

(BCL) 對七月初一起，獻燒祭互耶和華。總是耶和華殿的地基猶未下。

7

(THR) In koh ēng gûn hō͘ chio̍h-chhiūⁿ, ba̍k-chhiūⁿ; ēng lim-chia̍h ê mı̍h, kap iû, hō͘ Se-tùn lâng, Chhui-lô lâng, hō͘ in chiong pek-hiuⁿ-chhiū tùi Lī-pa-lùn ūn kàu hái kàu Iok-phàⁿ; sī chiàu Pho-su ông Kó͘-lia̍t só͘ ún-chún--ê.

(BCL) 閣用銀互石匠、木匠，用飲食的物、及油，互西頓人、推羅人，互將柏香樹對黎巴嫩運到海到約帕，是照波斯王古列所允准的。

8

(THR) In kàu Iâ-lō͘-sat-léng Siōng-tè ê tiān hia, tē-jī nî jī-ge̍h, Sat-la̍h-thiat ê kiáⁿ Só͘-lô-pa-pek, Iok-sat-tap ê kiáⁿ Iâ-su-a, kap kî-û ê hiaⁿ-tī, chiū-sī chè-si, kap Lī-bī lâng, kap it-chhè tùi siū-lia̍h ê tiong-kan tò-lâi Iâ-lō͘-sat-léng ê lâng, lóng khí-chhiú, phài Lī-bī lâng, tùi jī-cha̍p hè í-chiūⁿ, tok-kang khí Iâ-hô-hoa ê tiān.

(BCL) 到耶路撒冷上帝的殿遐。第二年二月，撒拉鐵的子所羅巴伯，約薩達的子耶書亞及其餘的兄弟，就是祭司、及利未人，及一切對受掠的中間倒來耶路撒冷的人，攏起手；派利未人，對二十歲以上，督工起耶和華的殿。

9

(THR) Tùi án-ni Iâ-su-a, kap i ê kiáⁿ kap hiaⁿ-tī, Kah-bia̍t kap i ê kiáⁿ, Iû-tāi ê kiáⁿ-sun, kap Hi-ná-ta̍t ê kiáⁿ, kap in ê kiáⁿ, in ê hiaⁿ-tī Lī-bī lâng, lóng khí-lâi, tok-lí hiah ê tī Siōng-tè ê tiān chòe-kang ê lâng.

(BCL) 對按呢耶書亞及伊的子及兄弟，甲篾及伊的子猶大的子孫，及希拿達的子及的子，的兄弟利未人，攏起來，督理許個佇上帝的殿做工的人。

10

(THR) Khí-chhù sai-hū hē Iâ-hô-hoa tiān ê tōe-ki ê sî, chè-si chhēng lé-ho̍k kia̍h hō-thâu. A-sat ê kiáⁿ-sun Lī-bī lâng the̍h lâ-po̍ah, lóng khiā-teh beh o-ló Iâ-hô-hoa, chiàu Í-sek-lia̍t ông Tāi-pı̍t só͘ tiāⁿ-tio̍h ê lē.

(BCL) 起厝師傅下耶和華殿的地基的時，祭司穿禮服抬號頭，亞薩的子孫利未人提鐃鈸，攏徛欲謳咾耶和華，照以色列王大衛所定著的例。

11

(THR) In ū-ê chhiùⁿ ū-ê hō, o-ló kám-siā Iâ-hô-hoa, kóng, In-ūi I sī hó, I éng-óan si chû-ài hō͘ Í-sek-lia̍t. In o-ló Iâ-hô-hoa ê sî, chèng peh-sìⁿ tōa-siaⁿ hoah, in-ūi Iâ-hô-hoa tiān ê tōe-ki í-keng hē-teh.

(BCL) 有的唱有的和，謳咾感謝耶和華講：因為伊是好，伊永遠施慈愛互以色列。謳咾耶和華的時，眾百姓大聲喝，因為耶和華殿的地基已經下。

12

(THR) Chóng-sī ū chōe-chōe chè-si, Lī-bī lâng, cho̍k-tiong ê lāu-tōa, chiū-sī bat khòaⁿ-kìⁿ chêng ê tiān hiah ê lāu-lâng, taⁿ chhin-ba̍k khòaⁿ-kìⁿ hē chit keng tiān ê tōe-ki, chiū tōa-siaⁿ thî-khàu; iā chōe-chōe lâng ūi-tio̍h hoaⁿ-hí tōa-siaⁿ hoah.

(BCL) 總是有多多祭司、利未人、族中的老大，就是曾看見前的殿許個老人，今親目看見下此間殿的地基，就大聲啼哭，也多多人為著歡喜大聲喝，

13

(THR) Tì-kàu peh-sìⁿ bōe-ōe hun-piat hoaⁿ-hí hoah ê siaⁿ kap peh-sìⁿ thî-khàu ê siaⁿ; in-ūi peh-sìⁿ tōa-siaⁿ hoah ê siaⁿ hō͘ hit ê siaⁿ thiaⁿ kàu chin-hn̄g.

(BCL) 致到百姓會分別歡喜喝的聲及百姓啼哭的聲；因為百姓大聲喝的聲，互彼個聲聽到真遠。

Bible Color Mark

• 台語漢字羅馬本
• 巴克禮全羅