加拉太書 第 2 章

1

(THR) Kè cha̍p-sì nî góa kap Pa-ná-pa koh chiūⁿ Iâ-lō͘-sat-léng, iā chhōa Thê-to saⁿ-kap khì.

(BCL) 過十四年，我及巴拿巴閣上耶路撒冷，也導提多相及去。

2

(THR) . Góa sī hōng khé-sī chiah chiūⁿ khì; koh chiong góa tī gōa-pang só͘ thôan ê hok-im tùi in pâi-lia̍t, sī lēng-gōa tùi ū bêng-bōng ê lâng pâi-lia̍t, bián góa hiān-kim á-sī í-chêng só͘ kiâⁿ ê kui tī khang-khang.

(BCL) 我是奉啟示才上去，閣將我佇外邦所傳的福音對排列；是另外對有名望的人排列，免我現今，抑是以前，所行的歸佇空空。

3

(THR) . Kap góa khì ê Thê-to, sī Hi-lī-nî lâng, iā bô hō͘ lâng bián-kióng i siū kat-lé.

(BCL) 及我去的提多，是希利尼人，也無互人勉強伊受割禮；

4

(THR) . Sī ūi-tio̍h ū àm-chīⁿ ín-chìn lâi ké ê hiaⁿ-tī, in àm-chīⁿ jı̍p lâi thau-khòaⁿ góan tiàm-tī Ki-tok Iâ-so͘ só͘ ū ê chū-iû, beh hō͘ góan chiâⁿ-chòe lô͘-po̍k.

(BCL) 是為著有暗靜引進來假的兄弟，暗靜入來偷看阮佇基督耶穌所有的自由，欲互阮成做奴僕。

5

(THR) . Góan bē bat chı̍t sî hâng-ho̍k lâi niū in, sī beh hō͘ hok-im ê chin-lí tn̂g-tn̂g chûn tī lín tiong-kan.

(BCL) 阮未曾一時降服來讓，是欲互福音的真理長長存佇恁中間。

6

(THR) . Tùi tī hiah ê hō chòe ū bêng-bōng ê lâng, (bô lūn in chêng sī sím-mı̍h téng-hō ê lâng, tī góa bô cho̍ah; Siōng-tè bô ēng gōa-māu chhú lâng), kiù-kèng hiah ê ū bêng-bōng ê lâng tī góa bô ke-thiⁿ sím-mı̍h.

(BCL) 對佇許個號做有名望的人，無論前是甚麼等號的人，佇我無差。上帝無用外貌取人。究竟許個有名望的人，佇我無加添甚麼，

7

(THR) . Hóan-tńg sī án-ni, in khòaⁿ-kìⁿ Chú thok-tiōng góa thôan hok-im hō͘ bē siū kat-lé ê, chhin-chhiūⁿ thok-tiōng Pí-tek thôan hok-im hō͘ í-keng siū kat-lé ê,

(BCL) 反轉是按呢，看見主託仗我傳福音互未受割禮的，親像託仗彼得傳福音互已經受割禮的。（

8

(THR) . (in-ūi chhut-la̍t kiâⁿ tī Pí-tek, hō͘ i chòe siū kat-lé ê ê sù-tô͘, iā chhut-la̍t kiâⁿ tī góa, hō͘ góa chòe gōa-pang ê sù-tô͘),

(BCL) 因為出力行佇彼得，互伊做受割禮者的使徒，也出力行佇我，互我做外邦的使徒；）

9

(THR) . koh chai só͘ siúⁿ-sù góa ê un-tián, chiū Ngá-kok, Ki-hoat, Iok-hān, lâng khòaⁿ chòe thiāu-chio̍h ê, chhun chiàⁿ chhiú kap góa chham Pa-ná-pa saⁿ kau-pôe, hō͘ góan khì chiū-kūn gōa-pang lâng, iā in khì chiū-kūn siū kat-lé ê;

(BCL) 閣知所賞賜我的恩典，就雅各、磯法、約翰人看做柱石的，伸正手及我參巴拿巴相交陪，互阮去就近外邦人，也去就近受割禮的。

10

(THR) . to̍k-to̍k ài góan siàu-liām sòng-hiong lâng; che iā sī góa pún tì-ì teh kiâⁿ ê.

(BCL) 獨獨愛阮數念喪鄉人；這也是我本致意行的。

11

(THR) . Nā-sī Ki-hoat kàu An-thê-o ê sî, góa tng-bīn tí-te̍k i, sī i ū hōan-chōe.

(BCL) 若是磯法到安提阿的時；我當面抵敵伊，是伊有犯罪。

12

(THR) . In-ūi ū kúi-nā lâng tùi Ngá-kok hia lâi, iáu-bē kàu ê sî, i kap gōa-pang lâng saⁿ-kap chia̍h; in í-keng kàu, i kiaⁿ siū kat-lé ê lâng, chiū thè-khui lâi ka-kī hun-piat.

(BCL) 因為有幾若人對雅各遐來，猶未到的時，伊及外邦人相及食，已經到，伊驚受割禮的人，就退開來家己分別。

13

(THR) . Kî-û ê Iû-thài lâng iā kap i chng-chòe, tì-kàu liân Pa-ná-pa iā tùi in ê chng-chòe siū ín-iú.

(BCL) 其餘的猶太人也及伊妝做，致到連巴拿巴也對的妝做受引誘。

14

(THR) . Chóng-sī góa khòaⁿ-kìⁿ in bô chiàu-tı̍t kiâⁿ lâi thàn hok-im ê chin-lí, chiū tī chèng lâng ê bīn-chêng kā Ki-hoat kóng, Lí sī Iû-thài lâng, chòe-lâng kì-jiân chhin-chhiūⁿ gōa-pang lâng, bô chhin-chhiūⁿ Iû-thài lâng, siáⁿ-sū teh bián-kióng gōa-pang lâng o̍h Iû-thài lâng ah?

(BCL) 總是我看見無照直行，來趁福音的真理，就佇眾人的面前給磯法講：「你是猶太人，做人既然親像外邦人，無親像猶太人，啥事勉強外邦人學猶太人啊？」

15

(THR) . Lán chhut-sì chòe Iû-thài lâng, m̄ sī gōa-pang ê chōe-jîn.

(BCL) 咱出世做猶太人，呣是外邦的罪人；

16

(THR) . Kì-jiân chai lâng tit-tio̍h chheng-chòe-gī m̄ sī tùi thàn lu̍t-hoat, to̍k-to̍k tùi sìn Iâ-so͘ Ki-tok, lán iā ū sìn-khò Ki-tok Iâ-so͘, hō͘ lán tùi sìn Ki-tok tit-tio̍h chheng-chòe-gī, m̄ sī tùi thàn lu̍t-hoat, in-ūi tùi thàn lu̍t-hoat bô lâng ōe tit-tio̍h chheng-chòe-gī.

(BCL) 既然知人得著稱做義呣是對趁律法，獨獨對信耶穌基督，咱也有信靠基督耶穌，互咱對信基督得著稱做義，呣是對趁律法；因為對趁律法無人會得著稱做義。

17

(THR) . Taⁿ siat-sú lán teh kiû tī Ki-tok tit-tio̍h chheng-chòe-gī, iā ka-kī iáu-kú hián-chhut chòe ū chōe ê lâng, án-ni Ki-tok sī chōe-ok ê chhe-ēng mah? Tòan-tòan m̄ sī;

(BCL) 今設使咱求佇基督得著稱做義，也家己猶久顯出做有罪的人，按呢基督是罪惡的差用嗎？斷斷呣是！

18

(THR) . in-ūi góa nā koh khí góa chêng só͘ húi ê, chiū-sī piáu-bêng ka-kī chòe hōan-hoat ê lâng.

(BCL) 因為我若閣起我前所毀的，就是表明家己做犯法的人。

19

(THR) . In-ūi góa tùi lu̍t-hoat, chiū ǹg lu̍t-hoat í-keng sí, beh hō͘ góa ǹg Siōng-tè lâi o̍ah.

(BCL) 因為我對律法，就向律法已經死，欲互我向上帝來活。

20

(THR) . Góa bat kap Ki-tok tâng tèng sı̍p-jī-kè; góa iáu-kú teh o̍ah, m̄ sī iû-gôan góa, chiū-sī Ki-tok tiàm-tī góa teh o̍ah; koh góa hiān-kim tī jio̍k-thé só͘ ū ê o̍ah, sī chāi-tī sìn Siōng-tè ê Kiáⁿ lâi o̍ah, I bat thiàⁿ góa, thòe góa hiàn ka-kī.

(BCL) 我曾及基督同釘十字架，我猶久活呣是猶原我，就是基督佇我活；閣我現今佇肉體所有的活，是在佇信上帝的子來活；伊曾疼我，替我獻家己。

21

(THR) . Góa bô hòe-bô Siōng-tè ê un-tián; in-ūi tùi lu̍t-hoat nā ōe tit-tio̍h gī, chiū Ki-tok bô in-toaⁿ lâi sí.

(BCL) 我無廢無上帝的恩典；因為對律法若會得著義，就基督無因端來死。

Bible Color Mark

• 台語漢字羅馬本
• 巴克禮全羅