希伯來書 第 9 章

1

(THR) Taⁿ hit ê chêng ê iok ia̍h ū ho̍k-sāi ê lé-gî, kap sio̍k sè-kan ê sèng-tiān.

(BCL) 今彼個前的約亦有服事的禮儀及屬世間的聖殿。

2

(THR) In-ūi ū pī-pān hōe-bō͘, thâu-chêng keng kiò-chòe Sèng-só͘; hit lāi-bīn ū teng-tâi, kap kí-toh, kap pâi-lia̍t ê piáⁿ.

(BCL) 因為有備辦會幕，頭前間叫做聖所，彼內面有燈台，及几桌，及排列的餅。

3

(THR) Tē jī ê tiùⁿ-lî āu koh ū hōe-bō͘, kiò chòe Chì-sèng-só͘;

(BCL) 第二個帳簾後閣有會幕，叫做至聖所，

4

(THR) hia ū kim hiuⁿ-tôaⁿ, kap ka-nn̂g ê pau-kim ê iok-kūi, lāi-bīn ū khǹg má-ná ê kim-ô͘, A-lûn puh-gê ê kóaiⁿ-á, kap iok ê chio̍h-pi nn̄g tè;

(BCL) 遐有金香壇，及整個的包金的約櫃，內面有囥嗎哪的金壺，亞倫發芽的枴仔，及約的石碑二塊；

5

(THR) kūi-téng ū êng-kng ê ki-lō͘-peng, jia-khàm si-un-só͘; chit kúi hāng taⁿ chhiáⁿ bián siông-sè kóng.

(BCL) 櫃頂有榮光的兵遮蓋施恩所。此幾項今且免詳細講。

6

(THR) Chiah ê mı̍h í-keng chiâu-pī, chè-si siông-siông jı̍p thâu-chêng keng ê hōe-bō͘, chīn chiah ê ho̍k-sāi ê sū;

(BCL) 諸個物已經齊備，祭司常常入頭前間的會幕，盡諸個服事的事。

7

(THR) nā-sī tē jī keng, chí ū chè-si-thâu ta̍k nî chı̍t pái ka-kī jı̍p khì, bô chı̍t pái bô tòa huih, ūi-tio̍h pún-sin kap peh-sìⁿ ê chhò-gō͘ lâi hiàn;

(BCL) 若是第二間，只有祭司頭逐年一擺家己入去，無一擺無帶血，為著本身及百姓的錯誤來獻。

8

(THR) Sèng Sîn án-ni chí-bêng, chêng ê hōe-bō͘ iáu tī-teh ê sî, jı̍p chiah ê sèng-só͘ ê lō͘ iáu-bē hián-bêng;

(BCL) 聖神按呢指明，前的會幕猶佇的時，入諸個聖所的路猶未顯明。

9

(THR) che sī beh chòe hiān-kim ê phì-jū; chiàu án-ni ū teh hiàn lé-mı̍h chè-sū, chiū-sī bōe-ōe hō͘ ho̍k-sāi ê lâng chiàu liông-sim lâi tit-tio̍h ôan-chôan ê;

(BCL) 這是欲做現今的譬喻，照按呢有獻禮物祭祀，就是會互服事的人照良心，來得著完全的。

10

(THR) in-ūi hiah-ê (í-kı̍p lim-chia̍h kap ta̍k téng-hō ê sóe) put-kò sī chòe jio̍k-thé ê lé-gî, siat-lı̍p lâi thèng-hāu kái-chèng ê sî.

(BCL) 因為許個，以及飲食及逐等號的洗，不過是做肉體的禮儀，設立來聽候改正的時。

11

(THR) Taⁿ Ki-tok í-keng kàu, chòe chiong-lâi chiah ê hó sū ê chè-si-thâu, keng-kè khah tōa khah chiâu-chn̂g ê hōe-bō͘, m̄ sī lâng ê chhiú só͘ khí-chō, chiū-sī bô sio̍k tī chit sè-kan ê,

(BCL) 今基督已經到，做將來諸個好事的祭司頭，經過卡大卡齊全的會幕，呣是人的手所起造，就是無屬佇此世間的；

12

(THR) I ia̍h m̄ sī ēng iûⁿ kap gû-á ê huih, chiū-sī ēng ka-kī ê huih, jı̍p sèng-só͘ chı̍t pái chiū kàu-gia̍h, tit-tio̍h éng-óan ê sio̍k-hôe.

(BCL) 伊亦呣是用羊及牛仔的血，就是用家己的血，入聖所一擺就夠額，得著永遠的贖回。

13

(THR) In-ūi gû iûⁿ ê huih, kap gû-chéng-á ê hu, hiù tī bô chheng-khì ê lâng, siōng-chhiáⁿ ōe hō͘ in chiâⁿ sèng kàu tī jio̍k-thé chheng-khì;

(BCL) 因為牛羊的血，及牛種仔的灰，灑佇無清氣的人，尚且會互成聖，到佇肉體清氣，

14

(THR) hô-hòng Ki-tok tùi éng-óan ê Sîn, hiàn ka-kī bô hâ-chhû hō͘ Siōng-tè, I ê huih kiám bô koh khah ōe chheng-khì lín ê liông-sim, thoat-lī chiah ê sí ê só͘ kiâⁿ, lâi ho̍k-sāi chin-o̍ah ê Siōng-tè ah?

(BCL) 何況基督對永遠的神，獻家己無瑕疵互上帝，伊的血豈無閣卡會清氣恁的良心，脫離諸個死的所行，來服事真活的上帝啊？

15

(THR) In-ūi án-ni, I chòe sin iok ê tiong-pó, ēng sí lâi sio̍k chêng iok ê sî só͘ hōan ê chōe-kòa, sī beh hō͘ siū tiàu ê lâng tit-tio̍h éng-óan ê gia̍p ê èng-ún.

(BCL) 因為按呢，伊做新約的中保，用死來贖前約的時所犯的罪過，是欲互受召的人得著永遠的業的應允。

16

(THR) Hōan-nā ū ûi-bēng, tek-khak tio̍h ū ûi-bēng ê lâng sí ê pîn-kù.

(BCL) 凡若有遺命的確著有遺命的人死的憑據；

17

(THR) In-ūi í-keng sí, chiū ûi-bēng kian-kò͘; ûi-bēng ê lâng iáu o̍ah tī-teh, chiū ûi-bēng beh-thái ū la̍t?

(BCL) 因為已經死，就遺命堅固，遺命的人猶活佇，就遺命欲豈有力？

18

(THR) Só͘-í chêng ê iok ia̍h m̄ sī bô ēng huih lâi siat-lı̍p.

(BCL) 所以，前的約亦呣是無用血來設立；

19

(THR) In-ūi Mô͘-se í-keng chiàu lu̍t-hoat chiong lóng-chóng ê kài-bēng thôan hō͘ chèng peh-sìⁿ, chiū phâng gû-á kap iûⁿ ê huih, í-kı̍p chúi kap chu-âng sek ê mî kap gû-chhek-chháu, lâi hiù hit pún chheh kap chèng peh-sìⁿ, kóng,

(BCL) 因為摩西已經照律法將攏總的誡命傳互眾百姓，就捧牛仔及羊的血，以及水及朱紅色的綿及牛膝草，來灑彼本冊，及眾百姓，講：

20

(THR) Chit-ê chiū-sī Siōng-tè só͘ hoan-hù lín ê iok ê huih.

(BCL) 「此個就是上帝所吩咐恁的約的血。」

21

(THR) Koh ia̍h chiàu án-ni, ēng huih hiù hōe-bō͘ kap só͘ ēng lâi ho̍k-sāi ê khì-kū.

(BCL) 閣亦照按呢用血灑會幕及所用來服事的器具。

22

(THR) Koh chiàu lu̍t-hoat, ta̍k hāng mı̍h chha-put-to lóng sī ēng huih hō͘ i chheng-khì, nā bô lâu huih, chiū bô sià-bián.

(BCL) 閣照律法，逐項物差不多攏是用血互伊清氣；若無流血，就無赦免。

23

(THR) Chiàu thiⁿ-téng ê iūⁿ só͘ chòe chiah ê mı̍h, tek-khak tio̍h ēng chiah-ê hō͘ i chheng-khì; chiū tī thiⁿ-téng ê gôan mı̍h, tio̍h ēng pí che khah hó ê chè hō͘ i chheng-khì.

(BCL) 照天頂的樣所做諸個物，的確著用諸個互伊清氣；就佇天頂的原物，著用比這卡好的祭互伊清氣。

24

(THR) In-ūi Ki-tok m̄ sī jı̍p lâng ê chhiú só͘ chō ê sèng-só͘, chòe chin sèng-só͘ ê iáⁿ-siōng ê; chiū-sī jı̍p tī chin ê thiⁿ, taⁿ ūi-tio̍h lán chiah-ê hián-hiān tī Siōng-tè ê bīn-chêng;

(BCL) 因為基督呣是入人的手所造的聖所（做真聖所的影像的），就是入佇真的天，今為著咱諸個顯現佇上帝的面前；

25

(THR) I ia̍h bián ēng ka-kī ta̍uh-ta̍uh hiàn, chhin-chhiūⁿ hiah ê chè-si-thâu, ta̍k nî ēng gû iûⁿ ê huih, jı̍p chiah ê sèng-só͘;

(BCL) 伊亦免用家己沓沓獻，親像許個祭司頭逐年用牛羊的血入諸個聖所，

26

(THR) nā án-ni, chiū Ki-tok tùi chhòng-chō sè-kan í-lâi, tio̍h ta̍uh-ta̍uh siū khó͘: to̍k-to̍k taⁿ tī chiah ê sè-tāi ê lō͘-bé, I chı̍t pái chhut-hiān, hiàn pún-sin chòe chè, lâi tû-khì chōe.

(BCL) 若按呢，就基督對創造世間以來，著沓沓受苦。獨獨今佇諸個世代的路尾，伊一擺出現，獻本身做祭，來除去罪。

27

(THR) Koh chiàu só͘ chù-tiāⁿ ê, lâng ū chı̍t pái sí, í-āu ū sím-phòaⁿ;

(BCL) 閣照所註定的，人有一擺死，以後有審判。

28

(THR) án-ni, Ki-tok í-keng chı̍t pái tú-tio̍h hiàn, lâi tam-tng chōe-chōe lâng ê chōe-kòa, beh tē jī pái, tùi ǹg-bāng I ê lâng chhut-hiān, lâi kiù in; hit sî chhut-hiān kap chōe bô kan-sia̍p.

(BCL) 按呢，基督已經一擺抵著獻，來擔當多多人的罪過，欲第二擺對向望伊的人出現來救，彼時出現及罪無干涉。

Bible Color Mark

• 台語漢字羅馬本
• 巴克禮全羅