約伯記 第 13 章

1

(THR) Khòaⁿ ah, che it-chhè góa ê ba̍k-chiu lóng khòaⁿ-kè, Góa ê hī-khang lóng thiaⁿ-kè, iā bêng-pe̍k.

(BCL) 看啊，這一切我的目睭攏看過；我的耳孔攏聽過，也明白。

2

(THR) Lín só͘ chai-ê, góa iā chai; Góa bô khah-su lín.

(BCL) 恁所知的，我也知，我無卡輸恁。

3

(THR) Góa sı̍t-chāi ài kap Chôan-lêng-ê kóng-ōe; Góa chin ài kap Siōng-tè lí-lūn.

(BCL) 我實在愛及全能者講話；我真愛及上帝理論。

4

(THR) Chóng-sī lín sī liap-chō pe̍h-chha̍t-ōe ê, Lóng sī bô lō͘-ēng ê i-seng.

(BCL) 總是恁是捏造白賊話的，攏是無路用的醫生。

5

(THR) Gōan lín it-khài chēng-chēng, chiah sǹg sī lín ê tì-hūi.

(BCL) 願恁一概靜靜；才算是恁的智慧！

6

(THR) Chhiáⁿ lín thiaⁿ góa ê lí-lūn, Tì-ì thiaⁿ góa ê chhùi ê hun-sò͘.

(BCL) 請恁聽我的理論，致意聽我的嘴的分訴。

7

(THR) Lín beh ūi Siōng-tè lâi kóng put-gī ê ōe mah? Ūi I kóng khúi-chà ê ōe mah?

(BCL) 恁欲為上帝來講不義的話嗎？為伊講詭詐的話嗎？

8

(THR) Lín kiám beh phian-thán I mah? Beh ūi Siōng-tè piān-hō͘ mah?

(BCL) 恁豈欲偏袒伊嗎？欲為上帝辯護嗎？

9

(THR) I nā chhâ-chhut lín, kiám ū hó mah? Lín ōe phiàn I chhin-chhiūⁿ phiàn lâng mah?

(BCL) 伊若查出恁，豈有好嗎？恁會騙伊親像騙人嗎？

10

(THR) Lín nā àm-chīⁿ phian-thán, I tek-khak beh chek-pī lín.

(BCL) 恁若暗靜偏袒，伊的確欲責備恁。

11

(THR) I ê ui-giâm kiám bô hō͘ lí kiaⁿ mah? I ê thang kiaⁿ-ùi, kiám bô lîm-kàu lín mah?

(BCL) 伊的威嚴豈無互你驚嗎？伊的通驚畏豈無臨到恁嗎？

12

(THR) Lín só͘ kì-liām ê chim-giân sī chhin-chhiūⁿ hé-hu; Lín ê iâⁿ-chē sī thô͘-bê ê iâⁿ-chē.

(BCL) 恁所紀念的箴言是親像火灰；恁的營寨是土糜的營寨。

13

(THR) Lín chēng-chēng, bo̍h-tit chhap góa, kù-chāi góa kóng, Chiū bô-lūn sím-mı̍h chòe i lâi.

(BCL) 恁靜靜，莫得插我！據在我講，就無論甚麼做伊來。

14

(THR) Góa siáⁿ-sū chiong góa ê bah kā tī góa ê chhùi-khí, Chiong góa ê sìⁿ-miā hē tī góa ê chhiú ah?

(BCL) 我啥事將我的肉咬佇我的嘴齒，將我的生命下佇我的手啊？

15

(THR) Khòaⁿ ah, I beh thâi-sí góa, góa bô thang ǹg-bāng; Chóng-sī góa beh tī I ê bīn-chêng piáu-pe̍k góa ê só͘ kiâⁿ.

(BCL) 看啊，伊欲死我；我無通向望，總是我欲佇伊的面前表白我的所行。

16

(THR) Che beh chiâⁿ-chòe chín-kiù góa ê; In-ūi bô khiân-sêng ê lâng bōe tit kàu I ê bīn-chêng.

(BCL) 這欲成做拯救我的，因為無虔誠的人得到伊的面前。

17

(THR) Lín tio̍h sòe-jī thiaⁿ góa ê ōe, Hō͘ góa só͘ piān-lūn-ê jı̍p lín ê hī-khang.

(BCL) 恁著細膩聽我的話，互我所辯論的入恁的耳孔。

18

(THR) Khòaⁿ ah, góa ū pâi-lia̍t góa ê àn-kiāⁿ, Góa chai góa beh tit-tio̍h chheng-chòe-gī.

(BCL) 看啊，我有排列我的案件，我知我欲得著稱做義。

19

(THR) Chī-chūi ōe kap góa piān-lūn ah? Ū, góa chiū chēng-chēng lâi tn̄g-khùi.

(BCL) 是誰會及我辯論啊，有，我就靜靜來斷氣。

20

(THR) To̍k-to̍k ū nn̄g-hāng, bo̍h-tit kiâⁿ tī góa, Góa chiū bô siám-pī lī-khui lí ê bīn.

(BCL) 獨獨有二項莫得行佇我，我就無閃避離開你的面：

21

(THR) Chiū-sī Lí ê chhiú kiu tò-tńg, lī-khui góa hn̄g-hn̄g; Koh bô ēng Lí ê ui-giâm hō͘ góa kiaⁿ;

(BCL) 就是你的手勼倒轉，離開我遠遠；閣無用你的威嚴互我驚。

22

(THR) Án-ni, Lí kiò, góa chiū ìn; Á-sī hō͘ góa kóng, Lí ìn góa.

(BCL) 按呢，你叫，我就應；抑是互我講，你應我。

23

(THR) Góa ê chōe-kòa kap kè-sit ū jōa-chōe ah? Kiû Lí hō͘ góa chai góa ê kè-sit, góa ê chōe-kòa.

(BCL) 我的罪過及過失有偌多啊？求你互我知我的過失我的罪過。

24

(THR) Lí siáⁿ-sū ng Lí ê bīn, Lia̍h góa chòe Lí ê tùi-te̍k ah?

(BCL) 你啥事掩你的面、掠我做你的對敵啊？

25

(THR) Lí kiám beh iô-tāng hō͘ hong chhe ê chhiū-hio̍h mah? Tui-jip ko͘-tâ ê chháu mah?

(BCL) 你豈欲搖動互風吹的樹葉嗎？追枯焦的草嗎？

26

(THR) In-ūi Lí kì-chài kan-khó͘ ê sū lâi pān góa; Koh hō͘ góa tam-tng siàu-liân ê sî ê chōe-kòa.

(BCL) 因為你記載艱苦的事來辦我，閣互我擔當少年的時的罪過；

27

(THR) Lí ēng kha-khàu khàu góa ê kha, tì-ì khòaⁿ góa it-chhè ê lō͘; Lí kā góa ê kha-tóe u̍ih-tiāⁿ kài-hān.

(BCL) 你用腳銬銬我的腳，致意看我一切的路，你給我的腳底畫定界限。

28

(THR) Góa beh siū pāi-hōai, chhin-chhiūⁿ chhàu-nōa ê mı̍h, Chhin-chhiūⁿ tio̍h chiù-thâng ê saⁿ.

(BCL) 我欲受敗壞親像臭爛的物，親像著蛀蟲的衫。

Bible Color Mark

• 台語漢字羅馬本
• 巴克禮全羅