約伯記 第 15 章

1

(THR) Thê-bān lâng Í-lī-hoat ìn kóng,

(BCL) 提幔人以利法應講：

2

(THR) Tì-hūi ê lâng kiám beh ēng khang-hu ê tì-sek lâi ìn, Á-sī ēng tang-hong chhiong-móa i ê pak-tó͘ mah?

(BCL) 智慧的人豈欲用空虛的智識來應，抑是用東風充滿伊的腹肚嗎？

3

(THR) I kiám beh ēng bô lī-ek ê ōe, Kap bô lō͘-ēng ê ōe lâi piān-lūn mah?

(BCL) 伊豈欲用無利益的話及無路用的話來辯論嗎？

4

(THR) Lí sı̍t-chāi hòe-bô kèng-ùi, Tī Siōng-tè ê bīn-chêng chó͘-tòng kèng-khiân ê sim.

(BCL) 你實在廢無敬畏，佇上帝的面前阻擋敬虔的心。

5

(THR) In-ūi lí ê chōe-kòa kà-sī lí ê chhùi, Lí kéng khúi-chà ê lâng ê chı̍h.

(BCL) 因為你的罪過教示你的嘴；你揀詭詐的人的舌。

6

(THR) Tēng lí ê chōe--ê sī lí ê chhùi, m̄-sī góa; Lí ê chhùi-tûn kan-chèng lí ê m̄-tio̍h.

(BCL) 定你的罪的是你的嘴，呣是我；你的嘴唇干證你的呣著。

7

(THR) Lí sī thâu-chı̍t-ê chhut-sì ê lâng mah? Á-sī pí chiah ê soaⁿ khah tāi-seng siū-chō mah?

(BCL) 你是頭一個出世的人嗎？抑是比諸個山卡代先受造嗎？

8

(THR) Siōng-tè pì-ba̍t ê chí-ì, lí bat thiaⁿ-kìⁿ mah? Tì-hūi kiám sī lí to̍k tit mah?

(BCL) 上帝秘密的旨意你曾聽見嗎？智慧豈是你獨得嗎？

9

(THR) Ū sím-mı̍h lí chai, góan m̄-chai mah? Á-sī lí bêng-pe̍k, góan bô bêng-pe̍k ah?

(BCL) 有甚麼你知，阮呣知嗎？抑是你明白，阮無明白啊？

10

(THR) Góan tiong-kan ū thâu-mn̂g pe̍h ê, kap nî-lāu ê, Pí lí ê lāu-pē iáu khah lāu.

(BCL) 阮中間有頭毛白的及年老的，比你的老父猶卡老。

11

(THR) Siōng-tè ê an-ùi, í-kı̍p I un-hô khǹg lí ê ōe, Lí khòaⁿ-chòe sió-khóa mah?

(BCL) 上帝的安慰以及伊溫和勸你的話，你看做小可嗎？

12

(THR) Lí ê sim siáⁿ-sū lia̍h lí khì? Lí ê ba̍k-chiu siáⁿ-sū teh gîn?

(BCL) 你的心啥事掠你去？你的目睭啥事眥，

13

(THR) Chiah hō͘ lí ê sîn hóan-tùi Siōng-tè, Iā hō͘ lí ê chhùi kóng hiah ê ōe.

(BCL) 才互你的神反對上帝，也互你的嘴講許個話？

14

(THR) Sè-kan lâng sī sím-mı̍h, ōe sǹg-chòe chheng-khì ah? Hū-jîn-lâng só͘-siⁿ-ê sī sím-mı̍h, ōe sǹg-chòe kong-gī mah?

(BCL) 世間人是甚麼，會算做清氣啊？婦仁人所生的是甚麼，會算做公義嗎？

15

(THR) Khòaⁿ ah, Siōng-tè bô sìn-jīm I ê sèng-ê; Chiah ê thiⁿ tī I bīn-chêng iā bô chheng-khì.

(BCL) 看啊，上帝無信任伊的聖者；諸個天佇伊面前，也無清氣，

16

(THR) Hô-hòng khó-ò͘ⁿ hú-pāi ê lâng, Lim chōe-ok chhin-chhiūⁿ lim-chúi-ê ah?

(BCL) 何況可惡腐敗的人、飲罪惡親像飲水的啊！

17

(THR) Góa beh chí-sī lí, lí tio̍h thiaⁿ góa; Góa beh kóng-khí só͘ khòaⁿ-kìⁿ ê.

(BCL) 我欲指示你，你著聽我；我欲講起所看見的，

18

(THR) (Chiū-sī tì-hūi ê lâng tùi lia̍t-chó͘ só͘ thôan lâi, Iā bô ún-ba̍t ê.

(BCL) 就是智慧的人對列祖所傳來，也無隱密的。（

19

(THR) Chit ê tōe to̍k-to̍k siúⁿ-sù in; Iā bô gōa-lâng tùi in tiong-kan keng-kè.)

(BCL) 此個地獨獨賞賜，也無外人對中間經過。）

20

(THR) Pháiⁿ-lâng it-seng ê jı̍t-chí sī thòng-khó͘, Chiū-sī ūi kiông-pō ê lâng só͘ tiāⁿ-tio̍h ê nî-gia̍h.

(BCL) 歹人一生的日子是痛苦；就是為強暴的人所定著的年額。

21

(THR) Thang kiaⁿ ê siaⁿ siông-siông tī i hī-khang; Tī pêng-an ê sî, húi-bia̍t--ê beh kàu i hia.

(BCL) 通驚的聲常常佇伊耳孔；佇平安的時，毀滅者欲到伊遐。

22

(THR) I m̄-sìn ōe tùi o͘-àm tńg--lâi; I hō͘ to-kiàm thèng-hāu i.

(BCL) 伊呣信會對黑暗轉來；伊互刀劍聽候伊。

23

(THR) I sì-kòe liû thó chia̍h, kóng, Toh-lo̍h ū ah? I chai ū o͘-àm ê jı̍t piān-piān teh thèng-hāu i.

(BCL) 伊四界流討食，講：叨落有啊？伊知有黑暗的日便便聽候伊。

24

(THR) Hōan-lān khùn-khó͘ hō͘ i kiaⁿ-hiâⁿ, koh iâⁿ i; Chhin-chhiūⁿ kun-ông pī-pān chhut tīn chı̍t-iūⁿ.

(BCL) 患難困苦互伊驚惶，閣贏伊，親像君王備辦出陣一樣。

25

(THR) In-ūi i chhun-chhiú kong-kek Siōng-tè, Ēng kiau-ngō͘ khòng-kū Chôan-lêng--ê.

(BCL) 因為伊伸手攻擊上帝，用驕傲抗拒全能者，

26

(THR) I ēng ngī ê ām-kún, kāu ê tîn-pâi, Cháu-lâi tí-te̍k Chôan-lêng--ê.

(BCL) 伊用硬的頷頸，厚的盾牌走來抵敵全能者；

27

(THR) In-ūi i ê bīn chin pûi, I ê io pûi kàu ū lâ.

(BCL) 因為伊的面真肥，伊的腰肥到有膋。

28

(THR) I khiā-khí tī hong-hòe ê siâⁿ, Bô lâng khiā-khí ê chhù, Chiū-sī tit-beh piàn-chòe thô͘-tui ê.

(BCL) 伊徛起佇荒廢的城，無人徛起的厝，就是得欲變做土堆的。

29

(THR) I bōe tit-tio̍h hó-gia̍h, châi-bu̍t bōe tn̂g-tn̂g tī-teh; In ê thó͘-sán iā bōe siⁿ-thòaⁿ tī tōe--nih.

(BCL) 伊得著好額，財物長長佇，的土產也生湠佇地裡。

30

(THR) I bōe thoat-lī o͘-àm; Hé-iām beh sio-ta i ê ki, I beh tùi Siōng-tè chhùi-lāi ê khì lâi bô--khì.

(BCL) 伊脫離黑暗。火焰欲燒乾伊的枝；伊欲對上帝嘴內的氣，來無去。

31

(THR) I m̄-thang óa-khò hu-ké, lâi ka-kī phiàn; In-ūi hu-ké beh chiâⁿ-chòe i ê pò-èng.

(BCL) 伊呣通倚靠虛假來家己騙，因為虛假欲成做伊的報應。

32

(THR) I ê jı̍t-kî bē kàu ê tāi-seng, chit ê tāi-chì beh chiâⁿ; I ê ki bōe chhiⁿ-chhùi.

(BCL) 伊的日期未到的代先，此個代誌欲成；伊的枝青翠。

33

(THR) I beh chhin-chhiūⁿ phû-tô-chhiū, i ê lia̍p bē se̍k chiū lak, Koh chhin-chhiūⁿ kaⁿ-ná-chhiū lak i ê hoe.

(BCL) 伊欲親像葡萄樹，伊的粒未熟就落，閣親像橄欖樹，落伊的花。

34

(THR) Bô khiân-sêng ê lūi tek-khak bô siⁿ-thòaⁿ, Pò͘-lō͘--ê ê pò͘-pîⁿ, beh hō͘ hé sio--khì.

(BCL) 無虔誠的類的確無生湠；賄賂者的布棚欲互火燒去。

35

(THR) In hôai-īn chân-hāi, siⁿ-chhut chōe-gia̍t, Pak-lāi só͘ pī-pān-ê sī khúi-chà.

(BCL) 懷孕殘害，生出罪孽；腹內所備辦的詭詐。

Bible Color Mark

• 台語漢字羅馬本
• 巴克禮全羅