約伯記 第 16 章

1

(THR) Iok-pek ìn kóng,

(BCL) 約伯應講：

2

(THR) Chit-hō ê ōe, góa ū thiaⁿ-kìⁿ chōe-chōe lah; Lín ê an-ùi lóng sī hō͘ lâng tò kan-khó͘.

(BCL) 此號的話，我有聽見多多啦；恁的安慰，攏是互人倒艱苦。

3

(THR) Chit-hō hong-tông ê ōe, ū kiông-chīn mah? Ū sím-mı̍h kek-tōng lí lâi ìn mah?

(BCL) 此號荒唐的話有窮盡嗎？有甚麼激動你來應嗎？

4

(THR) Góa iā ōe kóng chhin-chhiūⁿ lín chit-hō ê ōe; Lín nā tiàm-tī góa ê kéng-gū, góa iā ōe tàu kui-kōaⁿ ê ōe lâi kong-kek lín; Koh ōe tùi lín iô góa ê thâu.

(BCL) 我也會講親像恁此號的話；恁若踮佇我的境遇，我也會鬥歸涫的話來攻擊恁，閣會對恁搖我的頭。

5

(THR) chóng-sī góa ōe ēng chhùi hō͘ lín kian-kò͘; Ēng chhùi-tûn ê an-ùi hō͘ lín kiám-khin.

(BCL) 總是我會用嘴互恁堅固，用嘴唇的安慰互恁減輕。

6

(THR) Góa nā kóng-ōe, góa ê iu-būn iû-gôan bô kiám-khin; Góa nā chēng-chēng, chiū iu-būn ōe lī-khui góa mah?

(BCL) 我若講話，我的憂悶猶原無減輕；我若靜靜，就憂悶會離開我嗎？

7

(THR) Chóng-sī taⁿ I hō͘ góa khùn-khó͘; Lí hō͘ góa ê tâng-phōaⁿ lī-khui góa.

(BCL) 總是今伊互我困苦，你互我的同伴離開我。

8

(THR) Lí ū lia̍h-tio̍h góa, sī thang chòe kan-chèng, Góa ê siau-sán khí-lâi kong-kek góa; Tng góa ê bīn-chêng chòe kan-chèng.

(BCL) 你有掠著我，是通做干證；我的消瘦起來攻擊我，當我的面前做干證。

9

(THR) I siū-khì, thiah-lı̍h góa, khún-pek góa, I tùi góa kā-khí; Góa ê tùi-te̍k ba̍k-chiu kim-kim gîn góa.

(BCL) 伊受氣拆裂我，窘迫我，伊對我咬齒；我的對敵目睭金金眥我。

10

(THR) In tùi góa khui in ê chhùi, Siàn góa ê chhùi-phóe lâi lêng-jio̍k góa; In chū-chı̍p lâi kong-kek góa.

(BCL) 對我開的嘴，搧我的嘴來凌辱我，聚集來攻擊我。

11

(THR) Siōng-tè chiong góa kau-hō͘ put-gī ê lâng, Chiong góa hiat tī pháiⁿ-lâng ê chhiú.

(BCL) 上帝將我交互不義的人，將我佇歹人的手。

12

(THR) Góa an-jiân ê sî, I kā góa at-chı̍h, Nı̍h góa ê ām-kún, kā góa siak chhùi-chhùi; Koh chhāi góa chòe I ê chìⁿ-pé.

(BCL) 我安然的時，伊給我遏折，勒我的頷頸，給我摔碎碎，閣祀我做伊的箭把。

13

(THR) I ê chìⁿ sì-bīn ûi góa, phòa-lı̍h góa ê chōng-hú; Iā bô khoan-sù, chiong góa ê táⁿ piàⁿ tī tōe--nih.

(BCL) 伊的箭四面圍我；破裂我的臟腑，也無寬恕，將我的膽傾佇地裡。

14

(THR) I phah góa, phah-liáu koh phah; Chhin-chhiūⁿ ióng-sū cháu-lâi kong-kek góa.

(BCL) 伊拍我，拍了閣拍，親像勇士走來攻擊我。

15

(THR) Góa thīⁿ môa-pò͘ tī góa ê phê-hu, Chiong góa ê kak tàm-lo̍h thô͘.

(BCL) 我紩麻布佇我的皮膚，將我的角　落土。

16

(THR) Góa ê bīn in-ūi lâu ba̍k-sái chiū piàn âng; Tī góa ê ba̍k-chiu-phê ū sí ê ìm-ńg.

(BCL) 我的面因為流目屎就變紅，佇我的目睭皮有死的蔭影。

17

(THR) Chóng-sī góa ê chhiú bô pō-gio̍k; Góa ê kî-tó iā sī chheng-khì.

(BCL) 總是我的手無暴虐；我的祈禱也是清氣。

18

(THR) Tōe ah, bo̍h-tit jia-khàm góa ê huih; gōan góa ê âu-kiò bô thêng-hioh ê só͘-chāi.

(BCL) 地啊，莫得遮蓋我的血！願我的喉叫無停歇的所在！

19

(THR) Khòaⁿ ah, taⁿ góa ê kan-chèng tī thiⁿ--nih, Góa ê pó-jīn-ê tī téng-bīn.

(BCL) 看啊，今我的干證佇天裡，我的保認的佇頂面。

20

(THR) Góa ê pêng-iú ki-chhì góa, chóng-sī góa ê ba̍k-chiu ǹg Siōng-tè lâu ba̍k-sái.

(BCL) 我的朋友譏刺我，總是我的目睭向上帝流目屎。

21

(THR) Gōan I ǹg Siōng-tè lâi thòe lâng piān-bêng; Iā thòe lâng ê kiáⁿ tī i ê chhù-piⁿ piān-bêng.

(BCL) 願伊向上帝來替人辯明，也替人的子佇伊的厝邊辯明；

22

(THR) In-ūi koh kè kúi-nā nî, góa beh kiâⁿ hit tiâu khì bô koh tò-tńg ê lō͘.

(BCL) 因為閣過幾若年，我欲行彼條去無閣倒轉的路。

Bible Color Mark

• 台語漢字羅馬本
• 巴克禮全羅