約伯記 第 3 章

1

(THR) Āu-lâi Iok-pek khui-chhùi, chiù-chó͘ i ê jı̍t.

(BCL) 後來，約伯開嘴咒詛伊的日，

2

(THR) Iok-pek khui-chhùi kóng:

(BCL) 約伯開嘴講：

3

(THR) Góa chhut-sì ê jı̍t, gōan hit ê jı̍t bô--khì; Kóng, ū hôai-īn ta-po͘-kiáⁿ hit-mî, gōan hit ê mî iā bô--khì.

(BCL) 我出世的日，願彼個日無去；講：有懷孕查甫子彼暝，願彼個暝也無去。

4

(THR) Gōan hit ê jı̍t pìⁿ-chòe o͘-àm; Gōan Siōng-tè bô tùi téng-bīn khòaⁿ-kò͘ i, Kng iā bô chiò i.

(BCL) 願彼個日變做黑暗；願上帝無對頂面看顧伊；光也無照伊。

5

(THR) Gōan o͘-àm kap sí-ìm chhim-chhú i; Gōan ba̍t-hûn thêng tī i ê téng-bīn, Gōan hō͘ jı̍t piàn o͘-àm--ê phah-kiaⁿ i.

(BCL) 願黑暗及死蔭侵取伊；願密雲停佇伊的頂面；願互日變黑暗的拍驚伊。

6

(THR) Lūn-kàu hit-mî, gōan o͘-àm chhiúⁿ-khì; Gōan i bô kap nî-tiong hiah ê jı̍t tâng hoaⁿ-hí; Iā bô jı̍p tī hiah ê ge̍h ê siàu-gia̍h.

(BCL) 論到彼暝，願黑暗搶去，願伊無及年中許個日同歡喜，也無入佇許個月的數額。

7

(THR) Ā! Gōan hit-mî bô ū siⁿ-kiáⁿ; In tiong-kan bô hoaⁿ-hí ê siaⁿ.

(BCL) 啊！願彼暝無有生子，中間無歡喜的聲。

8

(THR) Gōan hiah ê chiù-chó͘ jı̍t ê, chiù-chó͘ i; Í-kı̍p hiah-ê ōe kek-tōng lêng ê, chiù-chó͘ i.

(BCL) 願許個咒詛日的咒詛伊以及許個會激動龍的咒詛伊。

9

(THR) Gōan hit-mî thiⁿ-phú-kng ê chhiⁿ pìⁿ o͘-àm; Gōan i ǹg-bāng kng iā bōe tit-tio̍h; Iā bô khòaⁿ-kìⁿ chá-khí-sî thiⁿ thiah-ha̍h;

(BCL) 願彼暝天昲光的星變黑暗，願伊向望光也得著，也無看見早起時天拆合；

10

(THR) In-ūi bô koaiⁿ-ba̍t siⁿ góa ê chú-kiong, Iā bô tùi góa ê ba̍k-chiu jia-khàm hōan-lān.

(BCL) 因為無關密生我的子宮，也無對我的目睭遮蓋患難。

11

(THR) Góa siáⁿ-sū bô tī thai--nih chiū sí? Siáⁿ-sū chhut pak-tó͘, bô sòa tn̄g-khùi?

(BCL) 我啥事無佇胎裡就死？啥事出腹肚無續斷氣？

12

(THR) Siáⁿ-sū ū kha-thâu-u chih góa? Siáⁿ-sū ū ni hō͘ góa suh?

(BCL) 啥事有腳頭窩接我？啥事有奶互我吸？

13

(THR) Nā-bô án-ni, góa í-keng tó-teh lâi an-jiân, Í-keng khùn lâi chēng-chēng;

(BCL) 若無按呢，我已經倒來安然已經睏來靜靜，

14

(THR) Kap tōe-chiūⁿ lia̍t-ông bô͘-sū saⁿ-kap tī-teh, In bat ūi ka-kī khí-chō pha-hng ê só͘-chāi;

(BCL) 及地上列王、謀士相及佇，曾為家己起造拋荒的所在，

15

(THR) Á-sī kap ū kim ê siú-léng tī-teh; In bat ēng gûn chhiong-móa in ê chhù ê.

(BCL) 抑是及有金的首領佇，曾用銀充滿的厝的；

16

(THR) Á-sī chhin-chhiūⁿ ka-la̍uh sin lâi iám-ba̍t ê, góa chiū bô--khì; Chhin-chhiūⁿ bē kìⁿ-tio̍h kng ê eⁿ-á.

(BCL) 抑是親像磕落娠來掩密的，我就無去，親像未見著光的嬰仔。

17

(THR) Tī-hia pháiⁿ-lâng soah i ê kiáu-jiáu; Tī-hia ià-siān-ê tit-tio̍h an-hioh.

(BCL) 佇遐歹人息伊的攪擾，佇遐厭倦者得著安息，

18

(THR) Tī-hia siū-lia̍h ê lâng saⁿ-kap tit-tio̍h an-jiân, Bô thiaⁿ-kìⁿ tok-kang--ê ê siaⁿ.

(BCL) 佇遐受掠者人相及得著安然，無聽見督工者的聲。

19

(THR) Sī-sòe sī-tōa lóng tī-hia; Lô͘-po̍k thoat-lī i ê chú-lâng.

(BCL) 序細序大攏佇遐；奴僕脫離伊的主人。

20

(THR) Siū khó͘-lān ê lâng, siáⁿ-sū hō͘ i ū kng ah? Sim-lāi iu-khó͘ ê lâng, siáⁿ-sū hō͘ i ū o̍ah-miā?

(BCL) 受苦難的人啥事互伊有光啊？心內憂苦的人啥事互伊有活命？

21

(THR) In ǹg-bāng sí, iā bōe tit-tio̍h, Chhē i, pí ku̍t khǹg-ba̍t ê pó-pòe khah chhut-la̍t.

(BCL) 向望死，也得著；尋伊，比掘囥密的寶貝卡出力。

22

(THR) In chhē-tio̍h hûn-bōng chiū khòai-lo̍k; Hoaⁿ-hí kàu bōe-kò͘--tit.

(BCL) 尋著墳墓就快樂，歡喜到顧得。

23

(THR) Lâng ê chiân-tô͘ í-keng àm-bong-bong, Siōng-tè sì-bīn ûi-khùn i, siáⁿ-sū hō͘ i ū kng ah?

(BCL) 人的前途已經暗摸摸，上帝四面圍困伊，啥事互伊有光啊？

24

(THR) In-ūi góa ēng thó͘-khùi thòe chia̍h-mı̍h; Góa tōa-siaⁿ háu, chhin-chhiūⁿ tōa-chúi chhèng-chhut.

(BCL) 因為我用吐氣替食物；我大聲哮親像大水淐出。

25

(THR) In-ūi góa só͘ chin-kiaⁿ-ê lîm-kàu góa; Góa só͘ kiaⁿ-hiâⁿ-ê kàu tī góa.

(BCL) 因為我所真驚的臨到我，我所驚惶的到佇我。

26

(THR) Góa bōe tit-tio̍h an-jiân, bōe tit-tio̍h pêng-chēng, bōe tit-tio̍h an-hioh, Chóng-sī ū hōan-lān lâi.

(BCL) 我得著安然，得著平靜，得著安息，總是有患難來。

Bible Color Mark

• 台語漢字羅馬本
• 巴克禮全羅