約伯記 第 33 章

1

(THR) Iok-pek ah, taⁿ chhiáⁿ lí thiaⁿ góa ê ōe, Liû-sim thiaⁿ góa it-chhè ê giân-gú.

(BCL) 約伯啊，今請你聽我的話，留心聽我一切的言語。

2

(THR) Khòaⁿ ah, góa taⁿ khui góa ê chhùi, Góa ê chı̍h tī chhùi-lāi teh kóng.

(BCL) 看啊，我今開我的嘴，我的舌佇嘴內講。

3

(THR) Góa ê ōe beh kóng-chhut góa sim-lāi ê chèng-tı̍t, Góa ê chhùi-tûn beh láu-sı̍t kóng-chhut só͘ chai ê.

(BCL) 我的話欲講出我心內的正直；我的嘴唇欲老實講出所知的。

4

(THR) Siōng-tè ê Sîn chhòng-chō góa; Chôan-lêng--ê ê khì hō͘ góa tit-tio̍h o̍ah.

(BCL) 上帝的神創造我；全能者的氣互我得著活。

5

(THR) Lí nā ōe, chiū tio̍h ìn góa, Khí-lâi khiā pâi-lia̍t tī góa ê bīn-chêng.

(BCL) 你若會，就著應我，起來徛排列佇我的面前。

6

(THR) Khòaⁿ ah, góa tī Siōng-tè ê bīn-chêng kap lí chı̍t-iūⁿ, Iā sī ēng thô͘ nı̍h-chiâⁿ-ê.

(BCL) 看啊，我佇上帝的面前及你一樣，也是用土勒成的。

7

(THR) Khòaⁿ ah, góa bô ēng ui-giâm hō͘ lí kiaⁿ, Iā bô ēng góa ê sè-le̍k teh--lí.

(BCL) 看啊，我無用威嚴互你驚，也無用我的勢力壓你。

8

(THR) Lí só͘ kóng-ê, góa sı̍t-chāi ū thiaⁿ-kìⁿ, Iā ū thiaⁿ-kìⁿ lí ê ōe ê siaⁿ, kóng,

(BCL) 你所講的，我實在有聽見，也有聽見你的話的聲，講：

9

(THR) Góa sī chheng-khì, bô kè-sit, Góa sī chheng-pe̍k, tī góa sim-lāi iā bô chōe.

(BCL) 我是清氣，無過失；我是清白，佇我心內也無罪。

10

(THR) Khòaⁿ ah, I chhē khàng-khiah lâi kong-kek góa, Lia̍h góa chòe I ê tùi-te̍k.

(BCL) 看啊，伊尋空隙來攻擊我，掠我做伊的對敵，

11

(THR) I ēng kha-khàu khàu góa ê kha, Tì-ì khòaⁿ góa it-chhè ê lō͘.

(BCL) 伊用腳銬銬我的腳，致意看我一切的路。

12

(THR) Khòaⁿ ah, kóng kàu che, lí sī put-gī, góa beh ìn lí; In-ūi Siōng-tè pí lâng khah-tōa.

(BCL) 看啊，講到這，你是不義，我欲應你，因為上帝比人卡大。

13

(THR) Lí siáⁿ-sū kap I saⁿ-chiⁿ? In-ūi I ê sū I lóng bô kóe-bêng.

(BCL) 你啥事及伊相爭？因為伊的事伊攏無解明？

14

(THR) In-ūi Siōng-tè kóng chı̍t-pái, Iā nn̄g-pái, chóng-sī lâng bô tì-ì.

(BCL) 因為上帝講一擺、也二擺，總是人無致意。

15

(THR) Lâng tó tī bîn-chhn̂g khùn, Kàu i khùn tāng-bîn ê sî, Tī bîn-bāng-tiong, mî--sî ê īⁿ-siōng,

(BCL) 人倒佇眠床睏到伊睏重眠的時，佇眠夢中，暝時的異象，

16

(THR) I khui in ê hī-khang, Khàm-ìn tī in só͘ siū ê kà-sī.

(BCL) 伊開的耳孔，蓋印佇所受的教示，

17

(THR) Beh hō͘ lâng kóe-ōaⁿ só͘ kè-e̍k ê sū, At-chí lâng ê kiau-ngō͘.

(BCL) 欲互人改換所計劃的事，遏止人的驕傲，

18

(THR) Chó͘-chí i ê o̍ah-miā bô lo̍h chhim-khiⁿ, Iā i ê sìⁿ-miā bô tùi to-kiàm lâi sí.

(BCL) 阻止伊的活命無落深坑，也伊的生命無對刀劍來死。

19

(THR) Lâng tī bîn-chhn̂g--nih siū thàng-thiàⁿ ê kéng-kài; Tī i ê kut-lāi chhin-chhiūⁿ kau-chiàn bô soah.

(BCL) 人佇眠床裡受痛疼的境界，佇伊的骨內親像交戰無息，

20

(THR) Tì-kàu i ê o̍ah-miā iàm-chiān chia̍h-mı̍h, I ê sim-sîn iàm-ò͘ⁿ hó-bī.

(BCL) 致到伊的生命厭賤食物，伊的心神厭惡好味。

21

(THR) I ê bah siau-sán, bô thang khòaⁿ-kìⁿ; Pêng-sò͘ bô khòaⁿ-kìⁿ ê kut, taⁿ lóng thóng-chhut.

(BCL) 伊的肉消瘦，無通看見；平素無看見的骨今攏凸出。

22

(THR) I ê sìⁿ-miā kūn tī chhim-khiⁿ; I ê o̍ah-miā kūn tī hiah ê bia̍t-bô sìⁿ-miā ê.

(BCL) 伊的生命近佇深坑；伊的活命近佇許個滅無生命的。

23

(THR) Nā ū chı̍t ê sù-chiá kap i tī-teh, Chiū-sī chı̍t-chheng-tiong ê chı̍t-ê, thòe i kóng-ōe-ê, Chiong lâng só͘ tio̍h-chòe-ê chí-sī i;

(BCL) 若有一個使者及伊佇，就是一千中的一個，替伊講話的，將人所著做的指示伊；

24

(THR) I chiū si-un hō͘ i, kóng, Kiù i bián-tit lo̍h chhim-khiⁿ, Góa í-keng chhē-tio̍h sio̍k-hôe i ê.

(BCL) 伊就施恩互伊，講：救伊免得落深坑；我已經尋著贖回伊的。

25

(THR) I ê bah pí gín-ná ê bah khah iù-nńg; I beh ho̍k-tò siàu-liân ê jı̍t-chí.

(BCL) 伊的肉比囝仔的肉卡幼軟；伊欲復倒少年的日子。

26

(THR) I beh kî-tó Siōng-tè, Siōng-tè hoaⁿ-hí i; Kìⁿ-tio̍h I ê bīn lâi hoaⁿ-hí; I koh sǹg hit-lâng chòe-gī.

(BCL) 伊欲祈禱上帝，上帝歡喜伊，見著伊的面來歡喜；伊閣算彼人做義。

27

(THR) I tī lâng ê bīn-chêng chhiùⁿ-koa kóng, Góa ū hōan-chōe, tian-tò sī-hui, bô lī-ek góa.

(BCL) 伊佇人的面前唱歌講：我有犯罪，顛倒是非，無利益我。

28

(THR) I kiù-sio̍k góa ê sìⁿ-miā, bián-lo̍h chhim-khiⁿ; Góa ê o̍ah-miā iā beh khòaⁿ-kìⁿ kng.

(BCL) 伊救贖我的生命免落深坑；我的活命也欲看見光。

29

(THR) Khòaⁿ ah, chiah ê it-chhè ê sū Siōng-tè kiâⁿ tī lâng, Nn̄g-pái, saⁿ-pái.

(BCL) 看啊，諸個一切的事上帝行佇人二擺、三擺，

30

(THR) Ūi-tio̍h beh tùi chhim-khiⁿ kiù i ê sìⁿ-miā tò-tńg, Hō͘ i tit-tio̍h o̍ah-miā ê kng chiò i.

(BCL) 為著欲對深坑救伊的生命倒轉，互伊得著活命的光照伊。

31

(THR) Iok-pek ah, lí tio̍h àⁿ hī-khang thiaⁿ góa ê ōe, Tio̍h chēng-chēng, góa chiū beh kóng.

(BCL) 約伯啊，你著俯耳孔聽我的話，著靜靜，我就欲講。

32

(THR) Lí nā ū ōe thang kóng, chiū ìn góa; Chòe lí kóng, in-ūi góa ài lia̍h lí chòe gī.

(BCL) 你若有話通講，就應我；做你講，因為我愛掠你做義。

33

(THR) Nā bô, lí tio̍h thiaⁿ góa kóng, lí tio̍h chēng-chēng, Góa beh kà lí tì-hūi.

(BCL) 若無，你著聽我講；你著靜靜，我欲教你智慧。

Bible Color Mark

• 台語漢字羅馬本
• 巴克禮全羅