約伯記 第 37 章

1

(THR) In-ūi án-ni góa ê sim pho̍k-pho̍k-chhéng, Iô-tāng lī-khui pún-ūi.

(BCL) 因為按呢我的心噗噗筅，搖動離開本位。

2

(THR) Tio̍h tì-ì thiaⁿ I khū-khū ê siaⁿ, Í-kı̍p I ê chhùi só͘ chhut ōng ê siaⁿ.

(BCL) 著致意聽伊　　的聲以及伊的嘴所出嗡的聲。

3

(THR) I ê siaⁿ hoat-chhut kàu phó͘ thiⁿ-ē, I ê tiān sih kàu tōe-ke̍k.

(BCL) 伊的聲發出到普天下，伊的電閃到地極。

4

(THR) Tè-āu ū siaⁿ khū-khū-háu; I ēng ui-giâm ê siaⁿ hoat lûi; I ê siaⁿ chı̍t-ē thiaⁿ-kìⁿ, I bô thêng-chí in.

(BCL) 隨後有聲　　哮，伊用威嚴的聲發雷，伊的聲一下聽見，伊無停止。

5

(THR) Siōng-tè hoat-chhut lûi ê siaⁿ chin kî-biāu; I kiâⁿ tōa-sū hō͘ lán bōe chhek-to̍k--tit.

(BCL) 上帝發出雷的聲真奇妙；伊行大事，互咱繪測　得。

6

(THR) In-ūi I tùi seh kóng, Tio̍h lo̍h tī tōe-chiūⁿ; Tùi kui-chūn ê hō͘, Kap kui-chūn ê tōa-hō͘, iā sī án-ni kóng.

(BCL) 因為伊對雪講：著落佇地上；對歸陣的雨及歸陣的大雨也是按呢講。

7

(THR) I kìm-chí ta̍k-lâng ê chhiú; Hō͘ só͘ chō ê lâng lóng ōe chai.

(BCL) 伊禁止逐人的手，互所造的人攏會知。

8

(THR) Pah-siù jı̍p hia̍t, Lóng tòa tī in ê tōng.

(BCL) 百獸入穴，攏住佇的洞。

9

(THR) Tōa-hong tùi i ê hú-khò͘ lâi, Kôaⁿ-léng tùi pak-hng chhut.

(BCL) 大風對伊的府庫來；寒冷對北方出。

10

(THR) Tùi Siōng-tè ê pûn-khùi chiū kian-peng, Khoan-khoah ê chúi chiū kiat-tēng.

(BCL) 對上帝的歕氣就堅冰；寬闊的水就結。

11

(THR) I hō͘ sip-khì chek-móa tī ba̍t-hûn, Tián-khui tiān-kng ê hûn;

(BCL) 伊互濕氣積滿佇密雲，展開電光的雲；

12

(THR) Chit-ê sī thàn I ê chí-hui sì-kòe kiâⁿ tńg-se̍h; Tī sè-kài ê tōe-bīn, Kiâⁿ I it-chhè só͘ hoan-hù in ê;

(BCL) 此個是趁伊的指揮四界行轉踅，佇世界的地面行伊一切所吩咐的，

13

(THR) He̍k-sī ūi-tio̍h chek-ho̍at, he̍k-sī ūi-tio̍h lūn-te̍k tōe, He̍k-sī ūi-tio̍h si-hêng chû-ài, chiah hō͘ i lâi.

(BCL) 或是為著責罰，或是為著潤澤地，或是為著施行慈愛才互伊來。

14

(THR) Iok-pek ah, lí tio̍h liû-sim lâi thiaⁿ; Tio̍h khiā-teh lâi siūⁿ Siōng-tè kî-biāu ê sū.

(BCL) 約伯啊，你著留心來聽，著徛來想上帝奇妙的事。

15

(THR) Siōng-tè cháiⁿ-iūⁿ hoan-hù chiah-ê? Cháiⁿ-iūⁿ hō͘ hûn-tiong ê tiān-kng chiò-chhut, lí chai mah?

(BCL) 上帝怎樣吩咐諸個，怎樣互雲中的電光照出，你知嗎？

16

(THR) Hûn cháiⁿ-iūⁿ pho͘-pîⁿ tī khong-tiong; Hit ê tì-sek chiâu-pī--ê kî-biāu ê sū, lí chai mah?

(BCL) 雲怎樣舖平佇空中，彼個智識齊備的奇妙的事，你知嗎？

17

(THR) Thó͘-tōe in-ūi lâm-hong chēng-chēng ê sî, Lí ê i-ho̍k cháiⁿ-iūⁿ sio-lō, lí chai mah?

(BCL) 土地因為南風靜靜的時，你的衣服怎樣燒烙，你知嗎？

18

(THR) Lí kiám ōe kap I saⁿ-kap pho͘ kiong-chhong mah? Chit ê kiong-chhong kian-tēng, chhin-chhiūⁿ chù-chiâⁿ ê kiàⁿ.

(BCL) 你豈會及伊相及舖穹蒼嗎？此個穹蒼堅，親像鑄成的鏡。

19

(THR) Góan in-ūi gû-gōng bōe hiáu tit pâi-lia̍t góan ê ōe; Lí tio̍h kà-sī góan eng-kai tùi lí kóng sím-mı̍h.

(BCL) 阮因為愚戇曉得排列阮的話；你著教示阮應該對你講甚麼。

20

(THR) Kiám tio̍h pò I chai, góa beh kóng mah? Lâng kiám ài siū bia̍t-bô mah?

(BCL) 豈著報伊知：我欲講嗎？人豈愛受滅無嗎？

21

(THR) Taⁿ lâng bô khòaⁿ-kìⁿ kiong-chhong-lāi chhàn-lān ê kng; To̍k-to̍k hong tùi teh kè, chiū hō͘ i chheng-chhái.

(BCL) 今人無看見穹蒼內燦爛的光；獨獨風對過，就互伊清彩。

22

(THR) Kim ê kng tùi pak-hng chhut-lâi; Siōng-tè ū ui-giâm thang kiaⁿ.

(BCL) 金的光對北方出來，上帝有威嚴通驚。

23

(THR) Chôan-lêng--ê, lán bōe-ōe chhek-to̍k I; I ū tōa lêng-le̍k, ū kong-pêng chhiong-móa kong-gī, bô beh khó͘-chhó͘ lâng.

(BCL) 全能者，咱會測　伊；伊有大能力，有公平充滿公義，無欲苦楚人。

24

(THR) Só͘-í lâng kèng-ùi I; I bô khòaⁿ ū tì-hūi ê sim--ê.

(BCL) 所以，人敬畏伊；伊無看有智慧的心者。

Bible Color Mark

• 台語漢字羅馬本
• 巴克禮全羅