約伯記 第 38 章

1

(THR) Hit-sî Iâ-hô-hoa tùi tōa-hong ê tiong-kan ìn Iok-pek kóng,

(BCL) 彼時，耶和華對大風的中間應約伯講：

2

(THR) Taⁿ chı̍t-ê ēng bû-ti ê ōe, hō͘ só͘ gī-lūn-ê bô bêng, Sī chī-chūi ah?

(BCL) 今一個用無知的話，互所議論的無明，是是誰啊？

3

(THR) Lí tio̍h hâ-io chhin-chhiūⁿ tāi-tiōng-hu, Góa mn̄g lí, lí ìn Góa.

(BCL) 你著縖腰親像大丈夫；我問你，你應我。

4

(THR) Góa hē tōe ê tōe-ki, hit-sî lí tī toh-lo̍h? Lí nā chai-iáⁿ chiū kóng i.

(BCL) 我下地的地基，彼時你佇叨落？你若知影，就講伊。

5

(THR) Chī-chūi tiāⁿ-tio̍h i ê chhùn-chhioh, Chī-chūi khan chîn-soh tī i ê téng-bīn, lí chai mah?

(BCL) 是誰定著伊的寸尺？是誰牽繩索佇伊的頂面，你知嗎？

6

(THR) I ê tōe-ki chhāi tī sím-mı̍h ê téng-bīn? Á-sī i kak-thâu ê chio̍h, chī-chūi an-tì ah?

(BCL) 伊的地基祀佇甚麼的頂面？抑是伊角頭的石，是誰安置啊？

7

(THR) Tng hit-sî thiⁿ-kng-chá ê chhiⁿ saⁿ-kap chhiùⁿ-koa; Siōng-tè ê chèng-kiáⁿ iā lóng chhut hoaⁿ-hí ê siaⁿ.

(BCL) 當彼時，天光早的星相及唱歌；上帝的眾子也攏出歡喜的聲。

8

(THR) Tōa-hái chhiong-chhut, chhin-chhiūⁿ tùi thai--nih chhut-lâi, Hit-sî chī-chūi ēng mn̂g koaiⁿ-i?

(BCL) 大海衝出，親像對胎裡出來，彼時是誰用門關伊？

9

(THR) Hit-sî Góa ēng hûn chòe i ê saⁿ, Ēng o͘-àm chòe pò͘ pau i;

(BCL) 彼時我用雲做伊的衫，用黑暗做布包伊，

10

(THR) Kā i tiāⁿ-tio̍h Góa só͘ lı̍p ê kài-hān, Koh kā i siat mn̂g-kông kap mn̂g.

(BCL) 給伊定著我所立的界限，閣給伊設門楗及門，

11

(THR) Kóng, Lí thang kàu chia, m̄-thang pôaⁿ-kè, Lí kiau-ngō͘ ê éng kàu chia ûi-chí.

(BCL) 講：你通到遮，呣通過，你驕傲的湧到遮為止。

12

(THR) Tùi lí chhut-sì ê jı̍t í-lâi, lí bat bēng-lēng chá-khí sî, Hō͘ thiⁿ-kng-chá chai i ê só͘-chāi;

(BCL) 對你出世的日以來，你曾命令早起時，互天光早知伊的所在，

13

(THR) Hō͘ i khiú tōe ê sì-ke̍k, Chiong pháiⁿ-lâng pōaⁿ--chhut-khì?

(BCL) 互伊地的四極，將歹人搬出去？

14

(THR) I chiū piàn-ōaⁿ chhin-chhiūⁿ kè-ìn ê thô͘, In chhut-hiān chhin-chhiūⁿ i-ho̍k.

(BCL) 伊就變換親像過印的土，出現親像衣服。

15

(THR) Pháiⁿ-lâng só͘ sǹg-chòe in ê kng, taⁿ tùi in siu tò-tńg, Kia̍h-kôaiⁿ ê chhiú beh at-chı̍h.

(BCL) 歹人所算做的光，今對收倒轉；抬高的手欲遏折。

16

(THR) Lí bat jı̍p hái ê chúi-gôan mah? Á-sī bat kiâⁿ tī chhim-ian pì-bı̍t ê só͘-chāi mah?

(BCL) 你曾入海的水源嗎？抑是曾行佇深淵秘密的所在嗎？

17

(THR) Sí-bô ê mn̂g ū kā lí khui mah? Sí-ìm ê mn̂g, lí bat khòaⁿ-kìⁿ mah?

(BCL) 死無的門有給你開嗎？死蔭的門你曾看見嗎？

18

(THR) Tōe ê khoah-tōa, lí ū khòaⁿ-thàu bô? Lí nā it-chīn chai, chòe lí kóng.

(BCL) 地的闊大，你有看透無？你若一盡知，做你講！

19

(THR) Kng-bêng khiā-khí ê só͘-chāi, hit tiâu lō͘ tùi toh-lo̍h khì, Koh o͘-àm ê só͘-chāi tī toh-lo̍h;

(BCL) 光明徛起的所在彼條路對叨落去？閣黑暗的所在佇叨落？

20

(THR) Thang hō͘ lí chhōa i tò-khì i ê kéng-kài? Lí ōe chai-iáⁿ thàu kàu i ê chhù ê lō͘ mah?

(BCL) 通互你導伊倒去伊的境界？你會知影透到伊的厝的路嗎？

21

(THR) Lí chai--lah, in-ūi hit-sî lí í-keng chhut-sì, Lí nî-hè ê siàu-gia̍h iā chōe.

(BCL) 你知啦！因為彼時你已經出世，你年歲的數額也多。

22

(THR) Lí bat jı̍p seh ê khò͘-pâng, Á-sī khòaⁿ-kìⁿ pha̍uh ê hú-khò͘,

(BCL) 你曾入雪的庫房，抑是看見雹的府庫？

23

(THR) Chiū-sī Góa só͘ siu-khǹg lâi thèng-hāu hōan-lān ê kî, Thèng-hāu saⁿ-thâi kau-chiàn ê jı̍t mah?

(BCL) 就是我所收囥來聽候患難的期，聽候相交戰的日嗎？

24

(THR) Kng tùi sím-mı̍h lō͘ pun-khui? Tang-hong tùi sím-mı̍h lō͘ sì-kòe chhe tī tōe-chiūⁿ?

(BCL) 光對甚麼路分開？東風對甚麼路四界吹佇地上？

25

(THR) Chī-chūi kā tōa hō͘-chúi khui lō͘; Á-sī pī-pān lûi-tiān ê lō͘;

(BCL) 是誰給大雨水開路？抑是備辦雷電的路？

26

(THR) Lâi lo̍h-hō͘ tī bô lâng ê tōe, Tī bô lâng khiā-khí ê khòng-iá;

(BCL) 來落雨佇無人的地，佇無人徛起的曠野？

27

(THR) Hō͘ pha-hng hong-hòe ê tōe tit-tio̍h kàu-gia̍h, Hō͘ chhiⁿ-chháu hoat-siⁿ.

(BCL) 互拋荒荒廢的地得著夠額，互青草發生？

28

(THR) Hō͘-chúi ū lāu-pē mah? Lō͘-chúi chı̍t-tiám chı̍t-tiám, chī-chūi siⁿ-ê ah?

(BCL) 雨水有老父嗎？露水一點一點是誰生的啊？

29

(THR) Peng tùi sím-mı̍h ê thai chhut? Thiⁿ ê sng, sī chī-chūi siⁿ-ê ah?

(BCL) 冰對甚麼的胎出？天的霜是是誰生的啊？

30

(THR) Chiah ê chúi kian-tēng chhin-chhiūⁿ chio̍h-thâu, Chhim-ian ê bīn kiat kui-tè.

(BCL) 諸個水堅親像石頭；深淵的面結歸塊。

31

(THR) Báu-chhiⁿ kui-chhok, sī lí pa̍k-ê mah? Chham-chhiⁿ ê tòa sī lí tháu-ê mah?

(BCL) 昴星歸簇是你縛的嗎？參星的帶是你解的嗎？

32

(THR) Lí hō͘ cha̍p-jī kiong chiàu i ê sî-hāu chhut lâi? Iā chhōa pak-táu kap i só͘ sio̍k ê chhiⁿ mah?

(BCL) 你互十二宮照伊的時候出來？也導北斗及伊所屬的星嗎？

33

(THR) Lí chai thiⁿ ê tēng-lē mah? Á-sī siat i ê kôan kóan-hat tōe mah?

(BCL) 你知天的定例嗎？抑是設伊的權管轄地嗎？

34

(THR) Lí ōe chhut-siaⁿ kiò hûn, Hō͘ hō͘-chúi chōe-chōe jia-khàm lí mah?

(BCL) 你會出聲叫雲，互雨水多多遮蓋你嗎？

35

(THR) Lí ōe hoat-chhut sih-nà, in chiū khì, tùi lí kóng, Góan tī-chia.

(BCL) 你會發出閃爁，就去，對你講；阮佇遮？

36

(THR) Chī-chūi ēng tì-hūi hē tī lāi-bīn? Chī-chūi siúⁿ-sù chhang-miâ tī sim-lāi?

(BCL) 是誰用智慧下佇內面？是誰賞賜聰明佇心內？

37

(THR) Chī-chūi ōe ēng tì-hūi sǹg hûn ê siàu-gia̍h? Chī-chūi ōe piàⁿ thiⁿ ê phûn;

(BCL) 是誰會用智慧算雲的數額？是誰會傾天的盆？

38

(THR) Hit-sî tîn-ai chiâⁿ-chòe thô͘-bê, Thô͘ chiū kiat kui-thn̂g?

(BCL) 彼時，塵埃成做土糜，土就結歸團？

39

(THR) Lí ū kā bú ê sai la̍k-tio̍h chia̍h-mı̍h? Hō͘ sai-á-thûn chia̍h-pá mah?

(BCL) 你有給母的獅、著食物，互獅仔肫食飽嗎？

40

(THR) Chiū-sī i tī hia̍t-lāi thìⁿ-kha, Tī ún-ba̍t ê só͘-chāi bih-teh ê sî.

(BCL) 就是伊佇穴內撐腳，佇隱密的所在匿的時。

41

(THR) Ou-a-kiáⁿ ǹg Siōng-tè ai-kiû; Bô thang chia̍h pe-lâi pe-khì ê sî, Chī-chūi ūi o͘-a pī-pān chia̍h-mı̍h ah?

(BCL) 烏鴉子向上帝哀求，無通食飛來飛去的時；是誰為烏鴉備辦食物啊？

Bible Color Mark

• 台語漢字羅馬本
• 巴克禮全羅