約伯記 第 9 章

1

(THR) Iok-pek ìn kóng,

(BCL) 約伯應講：

2

(THR) Góa chin-chiàⁿ chai sī án-ni; In-ūi lâng tī Siōng-tè ê bīn-chêng, thái ōe sǹg-chòe-gī ah?

(BCL) 我真正知是按呢；因為人佇上帝的面前豈會算做義啊？

3

(THR) Nā beh kap I piān-lūn, Chheng-hāng iā bōe ìn I chı̍t-hāng.

(BCL) 若欲及伊辯論，千項也應伊一項。

4

(THR) I ê sim sī tì-hūi, I ê la̍t sī tōa; Chī-chūi tí-khòng I, iā tit-tio̍h an-jiân?

(BCL) 伊的心是智慧，伊的力是大。是誰抵抗伊也得著安然？

5

(THR) I î-sóa soaⁿ, soaⁿ iā m̄-chai; I siū-khì tiong, hō͘ soaⁿ pang--lo̍h-khì.

(BCL) 伊移徙山，山也呣知，伊受氣中互山崩落去。

6

(THR) I hō͘ tōe tín-tāng, lī-khui i ê pún-ūi, Tōe ê thiāu chiū iô-choah.

(BCL) 伊互地振動，離開伊的本位，地的柱就搖泏。

7

(THR) I bēng-lēng jı̍t, jı̍t chiū bô chhut; Koh hong-ba̍t chèng chhiⁿ.

(BCL) 伊命令日，日就無出，閣封密眾星。

8

(THR) I ka-kī thí-khui thiⁿ; Koh kiâⁿ-ta̍h tī hái-éng ê téng-bīn.

(BCL) 伊家己展開天，閣行踏佇海湧的頂面。

9

(THR) I chhòng-chō Pak-táu, Chham-chhiⁿ, Báu-chhiⁿ, kap lâm-hng ê bı̍t-kiong.

(BCL) 伊創造北斗、參星、昴星，及南方的密宮；

10

(THR) I kiâⁿ tāi-chì tōa kàu bōe chhek-to̍k-tit, Kiâⁿ kî-sū sǹg-bōe-liáu.

(BCL) 伊行代誌大，到測　得，行奇事，算了。

11

(THR) Khòaⁿ ah, I tùi góa chia keng-kè, góa iā bô khòaⁿ-kìⁿ, I kiâⁿ kè--khì, góa iā m̄-chai.

(BCL) 看啊，伊對我遮經過，我也無看見；伊行過去，我也呣知。

12

(THR) Khòaⁿ ah, I chhiúⁿ-khì, chī-chūi ōe chó͘-tòng I? Chī-chūi káⁿ mn̄g I, Lí chòe sím-mı̍h?

(BCL) 看啊，伊搶去，是誰會阻擋伊？是誰敢問伊：你做甚麼？

13

(THR) Siōng-tè tek-khak bô siu-hôe I ê siū-khì, Hû-chō͘ La̍h-hap-pek ê, khut-lo̍h tī I ê ē-bīn.

(BCL) 上帝的確無收回伊的受氣；扶助拉哈伯的，屈落佇伊的下面。

14

(THR) Hô-hòng góa thái-thó káⁿ ìn I, Á-sī kéng sím-mı̍h ōe lâi kap I piān-lūn?

(BCL) 何況，我豈可敢應伊，抑是揀甚麼話來及伊辯論？

15

(THR) Góa sui-jiân sī kong-gī, iā m̄-káⁿ ìn I; To̍k-to̍k tùi sím-phòaⁿ góa--ê kiû-un.

(BCL) 我雖然是公義，也呣敢應伊，獨獨對審判我者求恩。

16

(THR) Góa nā kiû-kiò I, I nā ìn góa, Góa iā m̄-sìn I ū thiaⁿ góa ê siaⁿ.

(BCL) 我若求叫伊，伊若應我；我也呣信伊有聽我的聲。

17

(THR) In-ūi I ēng tōa-hong phah góa; Bô iân-kò͘ ke-thiⁿ góa ê siong.

(BCL) 因為伊用大風拍我，無緣故加添我的傷。

18

(THR) I m̄ iông-ún góa chhóan chı̍t-ê khùi; To̍k-to̍k ēng khó͘ chhiong-móa góa.

(BCL) 伊呣容允我喘一個氣，獨獨用苦充滿我。

19

(THR) Nā lūn kiông-béng, khòaⁿ ah, I ê la̍t tī-chia, Nā lūn sím-phòaⁿ, chī-chūi ōe kā góa tiāⁿ-tio̍h kî-jı̍t?

(BCL) 若論強猛，看啊，伊的力佇遮！若論審判，是誰會給我定著期日？

20

(THR) Góa sui-jiân chòe-gī, góa ka-kī ê chhùi beh tēng góa ê chōe; Góa sui-jiân ôan-chôan, i beh hián-bêng góa ê hêng-ge̍k.

(BCL) 我雖然做義，我家己的嘴欲定我的罪；我雖然完全，伊欲顯明我的橫逆。

21

(THR) Góa sī ôan-chôan-ê, góa bô kò͘ ka-kī; Góa khòaⁿ-khin góa ê o̍ah-miā.

(BCL) 我是完全的，我無顧家己；我看輕我的活命。

22

(THR) Thong-thong sī chı̍t-iūⁿ, só͘-í góa kóng, Ôan-chôan--ê kap kiâⁿ-pháiⁿ-ê, I lóng châu-bia̍t.

(BCL) 通通是一樣，所以我講，完全者及行歹者，伊攏剿滅。

23

(THR) Chai-ē nā hut-jiân phah-sí lâng, I chiū thí-chhiò bô-chōe ê lâng tú-tio̍h chhì-liān.

(BCL) 災禍若忽然拍死人，伊就恥笑無罪的人抵著試煉，

24

(THR) Sè-kài kau-hù tī pháiⁿ-lâng ê chhiú; I jia-khàm sím-phòaⁿ-si ê bīn; Nā m̄-sī I, sī chī-chūi ah?

(BCL) 世界交付佇歹人的手；伊遮蓋審判司的面，若呣是伊，是是誰啊？

25

(THR) Góa ê jı̍t-chí pí cháu-bûn-su--ê khah-kín, Kín-kín kè--khì, bô khòaⁿ-kìⁿ sím-mı̍h hok-khì.

(BCL) 我的日子比走文書者卡緊，緊緊過去，無看見甚麼福氣。

26

(THR) Kín-kín kè-khì chhin-chhiūⁿ khòai-chûn; Koh chhin-chhiūⁿ eng kín-kín pe--lo̍h-khì la̍k-mı̍h.

(BCL) 緊緊過去親像快船，閣親像鷹緊緊飛落去物。

27

(THR) Góa nā kóng beh bōe-kì-tit góa ê ai-òan, Beh kóe góa ê iu-iông chòe hoaⁿ-hí;

(BCL) 我若講：欲記得我的哀怨，欲解我的憂容，做歡喜；

28

(THR) Góa chiū kiaⁿ góa chiah ê iu-khó͘; In-ūi góa chai Lí tek-khak bô lia̍h góa chòe bô-chōe.

(BCL) 我就驚我諸個憂苦，因為我知你的確無掠我做無罪。

29

(THR) Góa beh siū tēng-chōe, Góa siáⁿ-sū khang-khang tio̍h-bôa ah?

(BCL) 我欲受定罪，我啥事空空著磨啊？

30

(THR) Góa nā ēng seh ê chúi ka-kī sóe, Ēng kiⁿ chheng-khì góa ê chhiú,

(BCL) 我若用雪的水家己洗，用鹼清氣我的手，

31

(THR) Lí beh hiat góa tī kau-á-tóe, Góa ê saⁿ iā beh iàm-ò͘ⁿ góa.

(BCL) 你欲我佇溝仔底，我的衫也欲厭惡我。

32

(THR) In-ūi I m̄-sī sè-kan lâng chhin-chhiūⁿ góa, hō͘ góa thang ìn I, Iā hō͘ góan thang tùi-sìn.

(BCL) 因為伊呣是世間人親像我，互我通應伊，也互阮通對訊。

33

(THR) Góan tiong-kan bô ū phòaⁿ-tòan--ê. Thang hō͘ góan jī-pí hâng-ho̍k i.

(BCL) 阮中間無有判斷者，通互阮二彼降服伊。

34

(THR) Gōan I sóa I ê kóaiⁿ-á lî-khui góa, Bô ēng I ê ui-giâm hō͘ góa kiaⁿ;

(BCL) 願伊徙伊的柺仔離開我，無用伊的威嚴互我驚。

35

(THR) Góa chiū káⁿ kóng, iā bô kiaⁿ I; Chóng-sī góa pún m̄-sī hit-khóan.

(BCL) 我就敢講，也無驚伊，總是我本呣是彼款。

Bible Color Mark

• 台語漢字羅馬本
• 巴克禮全羅