利未記 第 12 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Lí tio̍h hoan-hù Í-sek-lia̍t lâng kóng, Nā ū hū-jîn-lâng hôai-īn siⁿ ta-po͘-kiáⁿ, i chiū bô chheng-khì chhit-jı̍t, chhin-chhiūⁿ tī keng-kî-lāi lâ-sâm ê jı̍t bô chheng-khì chı̍t-iūⁿ.

(BCL) 「你著吩咐以色列人講：若有婦仁人懷孕生查甫子，伊就無清氣七日，親像佇經期內垃墋的日無清氣一樣。

3

(THR) Kàu tē-poeh jı̍t hit ê eⁿ-á tio̍h siū kat-lé.

(BCL) 到第八日，彼個嬰仔著受割禮。

4

(THR) Hū-jîn-lâng iáu teh lâu-huih, tio̍h tiàm tī i ê chhù saⁿ-cha̍p-saⁿ jı̍t; chheng-khì ê jı̍t iáu-bē móa, m̄-thang bong sèng ê mı̍h, iā m̄-thang jı̍p sèng ê só͘-chāi.

(BCL) 婦仁人猶流血，著踮佇伊的厝三十三日。清氣的日猶未滿，呣通摸聖的物，也呣通入聖的所在。

5

(THR) I nā siⁿ cha-bó͘-kiáⁿ, chiū bô chheng-khì nn̄g ê chhit jı̍t, chhin-chhiūⁿ tī keng-kî ê sî chı̍t-iūⁿ; nā iáu teh lâu-huih, tio̍h tiàm tī i ê chhù la̍k-cha̍p-la̍k jı̍t, chiah chheng-khì.

(BCL) 伊若生查某子，就無清氣二個七日，親像佇經期的時一樣，若猶流血，著踮佇伊的厝六十六日才清氣。

6

(THR) Tī i chheng-khì ê jı̍t móa, bô-lūn sī ūi ta-po͘-kiáⁿ, á-sī cha-bó͘-kiáⁿ, i tio̍h ēng bē-móa-nî ê iûⁿ-á chòe sio-chè, chı̍t chiah chíⁿ-á-kiáⁿ, á-sī chı̍t chiah ka-chui, chòe sio̍k-chōe-chè, tòa kàu hōe-bō͘ mn̂g-kháu, kau-tài chè-si.

(BCL) 「佇伊清氣的日滿，無論是為查甫子抑是查某子，伊著用未滿年的羊仔做燒祭，一隻鴿仔子抑是一隻鳩鵻做贖罪祭，帶到會幕門口交代祭司。

7

(THR) Chè-si tio̍h hiàn tī Iâ-hô-hoa ê bīn-chêng, ūi i sio̍k-chōe; i ê huih-gôan chiū chheng-khì; che chiū-sī hū-jîn-lâng siⁿ ta-po͘-kiáⁿ á-sī siⁿ cha-bó͘-kiáⁿ ê kui-lē.

(BCL) 祭司著獻佇耶和華的面前，為伊贖罪，伊的血源就清氣。這就是婦仁人生查甫子抑是生查某子的規例。

8

(THR) I ê khùi-la̍t nā bô kàu-gia̍h thang hiàn chı̍t chiah iûⁿ-á, i chiū tio̍h ēng nn̄g-chiah ka-chui, á-sī nn̄g chiah chíⁿ-á-kiáⁿ, chı̍t-chiah chòe sio-chè, chı̍t-chiah chòe sio̍k-chōe-chè; chè-si tio̍h thòe i sio̍k-chōe, i chiū chheng-khì.

(BCL) 伊的氣力若無夠額通獻一隻羊仔，伊就著用二隻鳩鵻抑是二隻鴿仔子，一隻做燒祭，一隻做贖罪祭。祭司著替伊贖罪，伊就清氣。」

Bible Color Mark

• 台語漢字羅馬本
• 巴克禮全羅