利未記 第 17 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Lí tio̍h hoan-hù A-lûn kap i hiah ê kiáⁿ kap Í-sek-lia̍t ê chèng-lâng kóng, Iâ-hô-hoa só͘ bēng-lēng-ê chiū-sī án-ni kóng.

(BCL) 「你著吩咐亞倫及伊許個子及以色列的眾人講，耶和華所命令的就是按呢講：

3

(THR) Kìⁿ-nā sio̍k Í-sek-lia̍t-ke ê lâng, thâi gû-káng, á-sī mî-iûⁿ-á, á-sī soaⁿ-iûⁿ, bô-lūn thâi tī iâⁿ-lāi á-sī thâi tī iâⁿ-gōa,

(BCL) 見若屬以色列家的人牛，抑是綿羊仔，抑是山羊，無論佇營內抑是佇營外，

4

(THR) nā bô tāi-seng khan kàu hōe-bō͘ mn̂g-kháu, lâi Iâ-hô-hoa ê hōe-bō͘ chêng, hiàn hō͘ Iâ-hô-hoa chòe lé-mı̍h, chhiah-huih ê chōe beh kui tī hit-lâng, i ū chhiah-huih; hit-lâng beh tùi i ê peh-sìⁿ-tiong chián-tû;

(BCL) 若無代先牽到會幕門口、來耶和華的會幕前獻互耶和華做禮物，刺血的罪欲歸佇彼人。伊有刺血，彼人欲對伊的百姓中剪除。

5

(THR) che sī ūi-tio̍h Í-sek-lia̍t lâng chiong in tī chhân-iá só͘ hiàn ê chè, tòa kàu hōe-bō͘ mn̂g-kháu, Iâ-hô-hoa ê bīn-chêng, kau hō͘ chè-si, hiàn hō͘ Iâ-hô-hoa chòe siā-un ê chè.

(BCL) 這是為著以色列人將佇田野所獻的祭帶到會幕門口、耶和華的面前，交互祭司，獻互耶和華做謝恩的祭。

6

(THR) Chè-si tio̍h chiong huih hiù tī hōe-bō͘ mn̂g-kháu Iâ-hô-hoa ê tôaⁿ-téng, chiong iû sio chòe phang-phang ê bī, hiàn hō͘ Iâ-hô-hoa.

(BCL) 祭司著將血灑佇會幕門口、耶和華的壇頂，將油燒做芳芳的味，獻互耶和華。

7

(THR) In m̄-thang koh hiàn-chè tī in kiâⁿ siâ-îm só͘ thàn ê kúi-kòai; che beh chòe in ta̍k sè-tāi éng-óan ê lē.

(BCL) 呣通閣獻祭佇行邪淫所趁的鬼怪；這欲做逐世代永遠的例。

8

(THR) Lí tio̍h tùi in kóng, Kìⁿ-nā sio̍k Í-sek-lia̍t-ke ê lâng, á-sī kià-kha tī in tiong-kan ê gōa-lâng, hiàn sio-chè á-sī chè-mı̍h;

(BCL) 「你著對講：見若屬以色列家的人，抑是寄腳佇中間的外人，獻燒祭抑是祭物，

9

(THR) nā bô tòa kàu hōe-bō͘ mn̂g-kháu, hiàn-hō͘ Iâ-hô-hoa, hit-lâng tio̍h tùi i ê peh-sìⁿ-tiong siū chián-tû.

(BCL) 若無帶到會幕門口獻互耶和華，彼人著對伊的百姓中受剪除。

10

(THR) Kìⁿ-nā sio̍k Í-sek-lia̍t-ke ê lâng, á-sī kià-kha tī in tiong-kan ê gōa-lâng, nā chia̍h sím-mı̍h huih, Góa beh tùi hit ê chia̍h-huih ê lâng pìⁿ-bīn, tùi i ê peh-sìⁿ-tiong chián-tû i.

(BCL) 「見若屬以色列家的人，抑是寄腳佇中間的外人，若食甚麼血，我欲對彼個食血的人變面，對伊的百姓中剪除伊。

11

(THR) In-ūi bah ê o̍ah-miā chāi tī huih, Góa ēng i siúⁿ-sù lín, thang tī tôaⁿ-téng ūi lín ê o̍ah-miā sio̍k-chōe; in-ūi huih-lāi ū o̍ah-miā, só͘-í ōe sio̍k-chōe.

(BCL) 因為肉的活命在佇血。我用伊賞賜恁，通佇壇頂為恁的活命贖罪；因為血內有活命，所以會贖罪。

12

(THR) Só͘-í Góa tùi Í-sek-lia̍t lâng kóng, Lín lóng m̄-thang chia̍h huih; kià-kha tī lín tiong-kan ê gōa-lâng iā m̄-thang chia̍h huih.

(BCL) 所以，我對以色列人講：恁攏呣通食血；寄腳佇恁中間的外人也呣通食血。

13

(THR) Kìⁿ-nā Í-sek-lia̍t lâng, á-sī kià-kha tī in tiong-kan ê gōa-lâng, nā phah-la̍h tit-tio̍h ōe-chia̍h-tit ê khîm-siù, tio̍h chhiah i ê huih chhut-lâi, ēng thô͘ khàm i.

(BCL) 見若以色列人，抑是寄腳佇中間的外人，若拍獵得著會食得的禽獸，著刺伊的血出來，用土蓋伊。

14

(THR) Lūn-kàu it-chhè ū jio̍k-sin ê o̍ah-miā, i ê huih chiū-sī i ê o̍ah-miā; só͘-í Góa tùi Í-sek-lia̍t lâng kóng, Bô-lūn sím-mı̍h jio̍k-sin ê huih lín lóng m̄-thang chia̍h; in-ūi it-chhè jio̍k-sin ê o̍ah-miā chiū-sī i ê huih; kìⁿ-nā chia̍h i ê lâng tek-khak siū chián-tû.

(BCL) 「論到一切有肉身的活命，伊的血就是伊的活命。所以我對以色列人講：無論甚麼肉身的血，恁攏呣通食，因為一切肉身的活命就是伊的血。見若食伊的人，的確受剪除。

15

(THR) Kìⁿ-nā chia̍h ka-kī sí ê mı̍h, á-sī hō͘ iá-siù thiah-lı̍h ê, bô-lūn sī pún-tōe lâng, á-sī gōa-lâng, tek-khak bô chheng-khì kàu ê-hng, lóng tio̍h sóe i ê saⁿ, ēng chúi sóe seng-khu, kàu ê-hng chiah chheng-khì.

(BCL) 見若食家己死的物，抑是互野獸拆裂的，無論是本地人，抑是外人，的確無清氣到下昏，攏著洗伊的衫，用水洗身軀，到下昏才清氣。

16

(THR) Chóng-sī i nā bô sóe-saⁿ, sóe seng-khu, chiū tio̍h tam-tng i ê chōe-kòa.

(BCL) 總是伊若無洗衫，洗身軀，就著擔當伊的罪過。」

Bible Color Mark

• 台語漢字羅馬本
• 巴克禮全羅