利未記 第 19 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Lí tio̍h hoan-hù Í-sek-lia̍t chôan-hōe tùi in kóng, Lín tio̍h chòe-sèng, in-ūi Góa Iâ-hô-hoa lín ê Siōng-tè sī sèng.

(BCL) 「你著吩咐以色列全會對講：恁著做聖，因為我耶和華──恁的上帝是聖。

3

(THR) Lín ta̍k-lâng lóng tio̍h hàu-kèng i ê lāu-bú, i ê lāu-pē; iā tio̍h siú Góa hiah ê an-hioh; Góa sī Iâ-hô-hoa lín ê Siōng-tè.

(BCL) 恁逐人攏著孝敬伊的老母伊的老父，也著守我許個安息。我是耶和華──恁的上帝。

4

(THR) Lín m̄-thang phian-ǹg ngó͘-siōng, iā m̄-thang ūi ka-kī chù-chō siōng-tè; Góa sī Iâ-hô-hoa lín ê Siōng-tè.

(BCL) 恁呣通偏向偶像，也呣通為家己鑄造上帝。我是耶和華──恁的上帝。

5

(THR) Lín hiàn siā-un-chè hō͘ Iâ-hô-hoa ê sî tio̍h hiàn thang tit-tio̍h chiap-la̍p ê.

(BCL) 恁獻謝恩祭互耶和華的時，著獻通得著接納的。

6

(THR) Tī hiàn ê jı̍t á-sī kè-jı̍t chia̍h i; nā ū chhun kàu tē-saⁿ jı̍t-ê tio̍h ēng hé sio i.

(BCL) 佇獻的日抑是過日食伊，若有剩到第三日的，著用火燒伊。

7

(THR) Tē-saⁿ jı̍t nā koh chia̍h-tio̍h, che sī thang iàm-ò͘ⁿ-ê; bōe tit-tio̍h chiap-la̍p.

(BCL) 第三日若閣食著，這是通厭惡的，得著接納。

8

(THR) Hōan-nā chia̍h i ê lâng, tek-khak tio̍h tam-tng i ê chōe-kòa; in-ūi i siat-to̍k Iâ-hô-hoa ê sèng-mı̍h; hit-lâng tek-khak tùi i ê peh-sìⁿ-tiong siū chián-tû.

(BCL) 凡若食伊的人的確著擔當伊的罪過；因為伊褻瀆耶和華的聖物，彼人的確對伊的百姓中受剪除。

9

(THR) Lín siu-koah chhân ê ngó͘-kok, chhân ê kak-thâu m̄-thang koah kàu chīn, ka-la̍uh-ê iā m̄-thang khioh.

(BCL) 「恁收割田的五穀，田的角頭呣通割到盡，磕落的也呣通拾。

10

(THR) Phû-tô-hn̂g ké-chí m̄-thang bán liáu-liáu, iā m̄-thang khioh phû-tô só͘ lak ê ké-chí; tio̍h lâu hō͘ sòng-hiong lâng kap chhut-gōa ê; Góa sī Iâ-hô-hoa lín ê Siōng-tè.

(BCL) 葡萄園果子呣通挽了了，也呣通拾葡萄所落的果子；著留互喪鄉人及出外的。我是耶和華──恁的上帝。

11

(THR) Lín m̄-thang thau-the̍h; m̄-thang khi-phiàn; tāi-ke m̄-thang kóng pe̍h-chha̍t.

(BCL) 「恁呣通偷提，呣通欺騙，大家呣通講白賊。

12

(THR) Lín m̄-thang kí Góa ê miâ lâm-sám chiù-chōa, lâi siat-to̍k lí ê Siōng-tè ê miâ; Góa chiū-sī Iâ-hô-hoa.

(BCL) 恁呣通指我的名濫糝咒誓，來褻瀆你的上帝的名，我就是耶和華。

13

(THR) M̄-thang khi-hū lí ê chhù-piⁿ, iā m̄-thang chhiúⁿ-the̍h i ê mı̍h; chòe-kang lâng ê kang-chîⁿ m̄-thang lâu tī lí hia kui-mî kàu thiⁿ-kng.

(BCL) 「呣通欺負你的厝邊，也呣通搶提伊的物。做工人的工錢，呣通留佇你遐歸暝到天光。

14

(THR) M̄-thang mē chhàu-hī-lâng-ê, iā m̄-thang hē that-gāi ê mı̍h tī chhiⁿ-mî lâng ê bīn-chêng; tio̍h kèng-ùi lí ê Siōng-tè; Góa chiū-sī Iâ-hô-hoa.

(BCL) 呣通罵臭耳聾的，也呣通下塞礙的物佇睛暝人的面前，著敬畏你的上帝。我就是耶和華。

15

(THR) Lín sím-phòaⁿ m̄-thang bô kong-tō; m̄-thang phian-thán sòng-hiong lâng, iā m̄-thang khòaⁿ-tāng ū sè-le̍k ê lâng; tio̍h chiàu kong-tō sím-phòaⁿ lí ê chhù-piⁿ.

(BCL) 「恁審判，呣通無公道；呣通偏袒喪鄉人，也呣通看重有勢力的人，著照公道審判你的厝邊。

16

(THR) M̄-thang tī lí ê peh-sìⁿ ê tiong-kan sì-kòe kiâⁿ húi-pòng lâng; iā m̄-thang chòe kan-chèng ài hāi-sí lí ê chhù-piⁿ; Góa chiū-sī Iâ-hô-hoa.

(BCL) 呣通佇你的百姓的中間四界行誹謗人，也呣通做干證愛害死你的厝邊。我就是耶和華。

17

(THR) Lí m̄-thang sim-lāi òan-hūn lí ê hiaⁿ-tī; tek-khak tio̍h chek-pī lí ê chhù-piⁿ, bián-tit ūi-tio̍h i tam-tng chōe.

(BCL) 「你呣通心內怨恨你的兄弟；的確著責備你的厝邊，免得為著伊擔當罪。

18

(THR) M̄-thang pò-siû, iā m̄-thang bâi-òan lí pún-kok ê peh-sìⁿ; tio̍h thiàⁿ chhù-piⁿ chhin-chhiūⁿ ka-kī; Góa chiū-sī Iâ-hô-hoa.

(BCL) 呣通報仇，也呣通埋怨你本國的百姓，著疼厝邊親像家己。我就是耶和華。

19

(THR) Lín tio̍h siú Góa ê lu̍t-lē. M̄-thang hō͘ lín ê cheng-siⁿ kap bô tâng-lūi-ê kau-ha̍p; m̄-thang ēng nn̄g-iūⁿ ê chéng-chí chham-chhap iā tī lí ê hn̂g-tōe; m̄-thang ēng nn̄g-iūⁿ ê liāu chham-chhap chòe-saⁿ, chhēng tī lí ê seng-khu.

(BCL) 「恁著守我的律例。呣通互恁的精牲及無同類的交合；呣通用二樣的種子參插撒佇你的園地，呣通用二樣的料參插做衫穿佇你的身軀。

20

(THR) Lú-pī chòe-lâng tiāⁿ-tio̍h, iáu-bē siū-sio̍k, bē tit-tio̍h tháu-pàng, lâng nā kap i kiâⁿ-îm, nn̄g-lâng tio̍h siū hêng-ho̍at; chóng-sī m̄-thang hō͘ i sí, in-ūi lú-pī iáu-bē tit-tio̍h chū-iû.

(BCL) 「女婢做人定著，猶未受贖、未得著解放，人若及伊行淫，二人著受刑罰，總是呣通互伊死，因為女婢猶未得著自由。

21

(THR) Hit ê ta-po͘-lâng tio̍h ēng pó͘-kè-sit ê chè, chiū-sī chı̍t chiah mî-iûⁿ-káng, khan kàu hōe-bō͘ mn̂g-kháu, Iâ-hô-hoa ê bīn-chêng, chòe pó͘-kè-sit-chè ê chè.

(BCL) 彼個查甫人著用補過失的祭，就是一隻綿羊牽到會幕門口、耶和華的面前，做補過失祭的祭。

22

(THR) Chè-si tio̍h ēng pó͘-kè-sit-chè ê iûⁿ-káng, tī Iâ-hô-hoa ê bīn-chêng sio̍k i só͘ hōan ê chōe; i só͘ hōan ê chōe chiū tit-tio̍h sià-bián.

(BCL) 祭司著用補過失祭的羊佇耶和華的面前贖伊所犯的罪，伊所犯的罪就得著赦免。

23

(THR) Lín kàu Ka-lâm tōe ê sî, chai-chèng ta̍k-iūⁿ ōe-chia̍h-tit ê ké-chí-chhiū, lín tio̍h khòaⁿ hit ê ké-chí chòe chhin-chhiūⁿ bē siū kat-lé-ê chı̍t-iūⁿ; saⁿ-nî ê kú, lín tio̍h khòaⁿ hiah-ê chhin-chhiūⁿ bē siū kat-lé-ê, m̄-thang chia̍h in.

(BCL) 「恁到迦南地的時，栽種逐樣會食得的果子樹，恁著看彼個果子做親像未受割禮的一樣。三年的久，恁著看許個親像未受割禮的，呣通食。

24

(THR) Kàu tē-sì nî só͘ kiat ê ké-chí lóng tio̍h chòe sèng, ēng i lâi o-ló Iâ-hô-hoa.

(BCL) 到第四年所結的果子攏著做聖，用伊來謳咾耶和華。

25

(THR) Kàu tē-gō͘ nî lín tio̍h chia̍h i ê ké-chí, thang hō͘ i kā lín kiat khah chōe ké-chí; Góa sī Iâ-hô-hoa lín ê Siōng-tè.

(BCL) 到第五年，恁著食伊的果子，通互伊給恁結卡多果子。我是耶和華──恁的上帝。

26

(THR) Lín m̄-thang chia̍h kâⁿ huih ê mı̍h; m̄-thang ēng hoat-su̍t, iā m̄-thang chiam-pok.

(BCL) 「恁呣通食含血的物；呣通用法術，也呣通占卜。

27

(THR) Thâu-khak ê chiu-ûi m̄-thang thì, chhùi-chhiu ê chiu-ûi iā m̄-thang khun.

(BCL) 頭殼的周圍呣通剃，嘴鬚的周圍也呣通髡。

28

(THR) Lín m̄-thang ūi sí-lâng koah ka-kī ê bah, iā m̄-thang chhiah kì-hō tī seng-khu; Góa sī Iâ-hô-hoa.

(BCL) 恁呣通為死人割家己的肉，也呣通刺記號佇身軀。我是耶和華。

29

(THR) M̄-thang lêng-jio̍k lí ê cha-bó͘-kiáⁿ, hō͘ i chòe chhiong-ki, kiaⁿ-liáu tōe-chiūⁿ choan-choan ǹg îm-lōan, tōe-chiūⁿ móa-móa tōa-pháiⁿ.

(BCL) 「呣通凌辱你的查某子，互伊做娼妓，驚了地上專專向淫亂，地上滿滿大歹。

30

(THR) Lín tio̍h siú Góa hiah ê an-hioh, kèng Góa ê sèng-só͘; Góa sī Iâ-hô-hoa.

(BCL) 恁著守我許個安息，敬我的聖所。我是耶和華。

31

(THR) M̄-thang phian-ǹg hiah ê kúi chiūⁿ-sin ê, kap kiâⁿ siâ-su̍t-ê, iā m̄-thang khì mn̄g in, tì-kàu hō͘ in phah lâ-sâm; Góa sī Iâ-hô-hoa lín ê Siōng-tè.

(BCL) 「呣通偏向許個鬼上身的及行邪術的；也呣通去問，致到互拍垃墋。我是耶和華──恁的上帝。

32

(THR) Tī pe̍h-thâu-mn̂g ê lâng ê bīn-chêng, lí tio̍h khí-lâi khiā; iā tio̍h chun-kèng lāu-lâng ê bīn; koh tio̍h kèng-ùi lí ê Siōng-tè; Góa sī Iâ-hô-hoa.

(BCL) 「佇白頭毛的人的面前，你著起來徛；也著尊敬老人的面，閣著敬畏你的上帝。我是耶和華。

33

(THR) Nā ū chhut-gōa lâng kià-kha tī lín ê tōe-hng, kap lín khiā-khí, chiū m̄-thang khi-hū in.

(BCL) 「若有出外人寄腳佇恁的地方及恁徛起，就呣通欺負。

34

(THR) Kap lín khiā-khí ê chhut-gōa lâng, lín tio̍h khòaⁿ in chhin-chhiūⁿ pún-tōe lâng chı̍t-iūⁿ; iā tio̍h thiàⁿ in chhin-chhiūⁿ pún-sin; in-ūi lín iā bat tī Ai-kı̍p tōe chòe chhut-gōa lâng; Góa sī Iâ-hô-hoa lín ê Siōng-tè.

(BCL) 及恁徛起的出外人，恁著看親像本地人一樣，也著疼親像本身，因為恁也曾佇埃及地做出外人。我是耶和華──恁的上帝。

35

(THR) Lín sím-phòaⁿ m̄-thang bô kong-tō; tī chhioh, tī chhìn, tī táu, lóng tio̍h kong-tō.

(BCL) 「恁審判，呣通無公道；佇尺、佇秤、佇斗、攏著公道。

36

(THR) Tio̍h ēng kong-tō ê phêng, kong-tō ê tô-chí, kong-tō ê i-hoat, kong-tō ê him; Góa sī Iâ-hô-hoa lín ê Siōng-tè, bat chhōa lín chhut Ai-kı̍p tōe ê.

(BCL) 著用公道的秤、公道的鉈子、公道的伊法、公道的欣。我是耶和華──恁的上帝，曾導恁出埃及地的。

37

(THR) Lín tio̍h siú Góa it-chhè ê lu̍t-lē, kap Góa it-chhè ê hoat-tō͘, lâi kiâⁿ i; Góa sī Iâ-hô-hoa.

(BCL) 恁著守我一切的律例及我一切的法度來行伊。我是耶和華。」

Bible Color Mark

• 台語漢字羅馬本
• 巴克禮全羅