利未記 第 22 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Lí tio̍h kā A-lûn kap i hiah ê kiáⁿ kóng, Tio̍h lī-khui Í-sek-lia̍t lâng só͘ hun-piat chòe-sèng kui hō͘ Góa ê sèng-mı̍h, bián-tit siat-to̍k Góa ê sèng-miâ; Góa sī Iâ-hô-hoa.

(BCL) 「你著給亞倫及伊許個子講：著離開以色列人所分別做聖、歸互我的聖物，免得褻瀆我的聖名。我是耶和華。

3

(THR) Tio̍h kā in kóng, Lín tāi-tāi ê hō͘-è, kìⁿ-nā seng-khu ū ù-òe, lâi chhin-kūn Í-sek-lia̍t lâng só͘ hun-piat chòe-sèng, kui hō͘ Iâ-hô-hoa chòe sèng-mı̍h ê, hit-lâng tio̍h tī Góa ê bīn-chêng chián-tû; Góa sī Iâ-hô-hoa.

(BCL) 著給講：恁代代的後裔，見若身軀有污穢、來親近以色列人所分別做聖、歸互耶和華做聖物的，彼人著佇我的面前剪除。我是耶和華。

4

(THR) A-lûn ê hō͘-è, kìⁿ-nā ū thái-ko-ê, á-sī hā-siau-ê, m̄-thang chia̍h sèng-mı̍h, tio̍h thèng-hāu i chheng-khì; bô-lūn sím-mı̍h lâng bong-tio̍h hit ê tùi sí-si bak-tio̍h lâ-sâm ê mı̍h, á-sī tūi-cheng ê lâng;

(BCL) 亞倫的後裔，見若有癩的，抑是下痟的，呣通食聖物，著聽候伊清氣。無論甚麼人摸著彼個對死屍染著垃墋的物，抑是　精的人，

5

(THR) á-sī bong-tio̍h sím-mı̍h bô chheng-khì ōe pê ê mı̍h, á-sī bong-tio̍h hiah ê hō͘ i bô chheng-khì ê lâng, put-kóan hit-lâng ū sím-mı̍h bô chheng-khì;

(BCL) 抑是摸著甚麼無清氣會爬的物，抑是摸著許個互伊無清氣的人（不管彼人有甚麼無清氣），

6

(THR) bong-tio̍h hiah-ê ê lâng, tek-khak bô chheng-khì kàu ê-hng; nā bô ēng chúi sóe seng-khu, chiū m̄-thang chia̍h sèng ê mı̍h.

(BCL) 摸著許個的人，的確無清氣到下昏；若無用水洗身軀，就呣通食聖的物，

7

(THR) Jı̍t-lo̍h ê sî, i chiū chheng-khì; jiân-āu thang chia̍h sèng-mı̍h; in-ūi che sī i ê chia̍h-mı̍h.

(BCL) 日落的時，伊就清氣，然後通食聖物，因為這是伊的食物。

8

(THR) Ka-kī sí-ê, á-sī hō͘ iá-siù thiah-lı̍h-ê, i m̄-thang chia̍h, in-ūi chit-ê phah lâ-sâm ka-kī; Góa sī Iâ-hô-hoa.

(BCL) 家己死的抑是互野獸拆裂的，伊呣通食，因為此個拍垃墋家己。我是耶和華。

9

(THR) Só͘-í in tio̍h siú Góa só͘ kau-tài ê, bián-tit in siat-to̍k i, tùi án-ni tam-tng chōe lâi sí; Góa sī hō͘ in chiâⁿ-sèng ê Iâ-hô-hoa.

(BCL) 所以著守我所交代的，免得褻瀆伊，對按呢擔當罪來死。我是互成聖的耶和華。

10

(THR) It-chhè ê gōa-lâng m̄-thang chia̍h sèng-mı̍h; hioh tī chè-si ê ke-ê, á-sī chòe-kang lâng, lóng m̄-thang chia̍h sèng-mı̍h.

(BCL) 「一切的外人呣通食聖物；歇佇祭司的家者，抑是做工人，攏呣通食聖物；

11

(THR) Siat-sú chè-si bóe lâng, sī i ēng gûn bóe ê, hit-lâng thang chia̍h i; chhut-sì tī i ê ke-ê iā thang chia̍h i ê bí-niû.

(BCL) 設使祭司買人，是伊用銀買的，彼人通食伊；出世佇伊的家者也通食伊的米糧。

12

(THR) Chè-si ê cha-bó͘-kiáⁿ nā kè-chhut gōa-lâng, chiū m̄-thang chia̍h só͘ kú-khí-lâi ê sèng-mı̍h.

(BCL) 祭司的查某子若嫁出外人，就呣通食所舉起來的聖物。

13

(THR) Chóng-sī chè-si ê cha-bó͘-kiáⁿ nā sī kóaⁿ-hū, á-sī siū lî-chhut-ê, bô kiáⁿ-jî, koh tò-lâi lāu-pē ê ke, kap i siàu-liân ê sî chı̍t-iūⁿ, chiū thang chia̍h i ê lāu-pē ê chia̍h-mı̍h; to̍k-to̍k gōa-lâng m̄-thang chia̍h.

(BCL) 總是祭司的查某子若是寡婦，抑是受離出者，無子兒，閣倒來老父的家，及伊少年的時一樣，就通食伊的老父的食物；獨獨外人呣通食。

14

(THR) Nā ū lâng bô tiuⁿ-tî chia̍h sèng-mı̍h, tio̍h chiàu hiah ê sèng-mı̍h ke gō͘-hūn-chı̍t, kau-hō͘ chè-si.

(BCL) 若有人無張持食聖物，著照許個聖物加五份一交互祭司。

15

(THR) M̄-thang siat-to̍k Í-sek-lia̍t lâng só͘ hiàn hō͘ Iâ-hô-hoa ê sèng-mı̍h;

(BCL) 呣通褻瀆以色列人所獻互耶和華的聖物，

16

(THR) bián-tit in tī chia̍h sèng-mı̍h ê sî, tam-tng kè-sit ê chōe-kòa; in-ūi Góa sī hō͘ in chiâⁿ-sèng ê Iâ-hô-hoa.

(BCL) 免得佇食聖物的時擔當過失的罪過，因為我是互成聖的耶和華。」

17

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

18

(THR) Lí tio̍h hoan-hù A-lûn kap i hiah ê kiáⁿ, kap Í-sek-lia̍t ê chèng-lâng, tùi in kóng, Í-sek-lia̍t-ke ê lâng, á-sī tī Í-sek-lia̍t-tiong kià-kha-ê kìⁿ-nā hiàn lé-mı̍h, bô-lūn sī só͘ hē ê gōan, á-sī kam-sim hiàn-ê, chiū-sī hiàn hō͘ Iâ-hô-hoa chòe sio-chè-ê;

(BCL) 「你著吩咐亞倫及伊許個子，及以色列的眾人對講：以色列家的人，抑是佇以色列中寄腳的，見若獻禮物，無論是所下的願，抑是甘心獻的，就是獻互耶和華做燒祭的，

19

(THR) chiū tio̍h hiàn gû, á-sī mî-iûⁿ, á-sī soaⁿ-iûⁿ, lóng tio̍h ēng kang-ê, bô hâ-chhû-ê, chiah ōe tit-tio̍h hoaⁿ-hí chiap-la̍p.

(BCL) 就著獻牛，抑是綿羊，抑是山羊，攏著用公的無瑕疵的，才會得著歡喜接納。

20

(THR) Kìⁿ-nā ū hâ-chhû-ê, lín m̄-thang hiàn; in-ūi che bô beh kā lín chiap-la̍p.

(BCL) 見若有瑕疵的，恁呣通獻，因為這無欲給恁接納。

21

(THR) Kìⁿ-nā tùi gû-kûn, á-sī iûⁿ-kûn tiong, chiong siā-un-chè hiàn hō͘ Iâ-hô-hoa, ūi-tio̍h beh siā te̍k-pia̍t hē ê gōan, á-sī chòe kam-sim hiàn-ê, só͘ hiàn-tio̍h-ê tio̍h sûn-chôan, bô hâ-chhû, chiah ōe tit-tio̍h chiap-la̍p.

(BCL) 見若對牛群抑是羊群中，將謝恩祭獻互耶和華，為著欲謝特別下的願，抑是做甘心獻的，所獻著的著純全無瑕疵才會得著接納。

22

(THR) Chhiⁿ-mî ê, tio̍h-siong-ê, phòa-siùⁿ-ê, siⁿ-liû-ê, siⁿ-chhng-ê, siⁿ-sián-ê, chiah-ê lóng m̄-thang hiàn hō͘ Iâ-hô-hoa; iā m̄-thang tī tôaⁿ-téng hiàn hō͘ Iâ-hô-hoa chòe hé-chè.

(BCL) 睛暝的、著傷的，破相的、生瘤的、生瘡的、生癬的諸個攏呣通獻互耶和華，也呣通佇壇頂獻互耶和華做火祭。

23

(THR) Bô-lūn sī gû-káng á-sī iûⁿ-á, nā sī chi-thé ū ke á-sī ū kiám ê, hit-hō thang chòe kam-sim chè lâi hiàn; chóng-sī ēng i lâi siā-gōan chiū bōe tit-tio̍h chiap-la̍p.

(BCL) 無論是牛抑是羊仔，若是肢體有加，抑是有減的，彼號通做甘心祭來獻；總是用伊來謝願，就得著接納。

24

(THR) Gōa-sin sún-siong-ê, á-sī teh-chhùi-ê, á-sī phòa-lı̍h-ê, á-sī iam-ê, m̄-thang hiàn-hō͘ Iâ-hô-hoa; tī lín ê thó͘-tōe iā m̄-thang án-ni kiâⁿ.

(BCL) 外腎損傷的，抑是壓碎的，抑是破裂的，抑是閹的，呣通獻互耶和華，佇恁的土地也呣通按呢行。

25

(THR) Chit hō ê mı̍h lín iā m̄-thang tùi gōa-kok lâng ê chhiú chiap-siū hiàn-chòe lín Siōng-tè ê chia̍h-mı̍h; in-ūi chit hō mı̍h lóng ū húi-hōai, ū hâ-chhû ê, bōe thang kā lín chiap-la̍p

(BCL) 此號的物，恁也呣通對外國人的手，接受獻做恁上帝的食物；因為此號物攏有毀壞，有瑕疵的，通給恁接納。」

26

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

27

(THR) Gû, á-sī mî-iûⁿ, á-sī soaⁿ-iûⁿ í-keng siⁿ, chhit-jı̍t tè i ê bú, tùi tē-poeh jı̍t í-āu, thang chòe Iâ-hô-hoa hé-chè ê lé-mı̍h, tit-tio̍h chiap-la̍p.

(BCL) 「牛抑是綿羊，抑是山羊已經生，七日隨伊的母；對第八日以後，通做耶和華火祭的禮物，得著接納。

28

(THR) Bô-lūn gû-bú á-sī iûⁿ-bú, lí m̄-thang siâng-jı̍t thâi bú kap kiáⁿ.

(BCL) 無論牛母抑是羊母，你呣通像日母及子。

29

(THR) Lín hiàn siā-un-chè hō͘ Iâ-hô-hoa, tio̍h hiàn thang tit-tio̍h chiap-la̍p ê.

(BCL) 恁獻謝恩祭互耶和華，著獻通得著接納的。

30

(THR) Tio̍h chiū hit-jı̍t chia̍h i, m̄-thang lâu chı̍t-tiám-á kàu keh chá-khí; Góa sī Iâ-hô-hoa.

(BCL) 著就彼日食伊，呣通留一點仔到過早起。我是耶和華。

31

(THR) Só͘-í lín tio̍h siú Góa chiah ê kài-bēng lâi kiâⁿ i; Góa sī Iâ-hô-hoa.

(BCL) 「所以恁著守我諸個誡命來行伊。我是耶和華。

32

(THR) Lín m̄-thang siat-to̍k Góa ê sèng-miâ; in-ūi Góa tī Í-sek-lia̍t lâng ê tiong-kan, beh siū chun lâi chòe-sèng; Góa sī hō͘ lín chiâⁿ-sèng ê Iâ-hô-hoa,

(BCL) 恁呣通褻瀆我的聖名；因為我佇以色列人的中間，欲受尊來做聖。我是互恁成聖的耶和華，

33

(THR) chhōa lín chhut Ai-kı̍p tōe, chòe lín ê Siōng-tè ê; Góa sī Iâ-hô-hoa.

(BCL) 導恁出埃及地，做恁的上帝的。我是耶和華。」

Bible Color Mark

• 台語漢字羅馬本
• 巴克禮全羅