利未記 第 24 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Tio̍h bēng-lēng Í-sek-lia̍t lâng, ēng kaⁿ-ná khoeh-chiâⁿ chheng ê iû, the̍h lâi hō͘ lí, thang tiám-teng hō͘ i siông-siông kng.

(BCL) 「著命令以色列人，用橄欖夾成清的油提來互你，通點燈互伊常常光。

3

(THR) Tī hōe-bō͘-lāi hoat-kūi ê tiùⁿ-lî-gōa, A-lûn tio̍h liāu-lí i, tùi ê-hng kàu chá-khí, siông-siông tī Iâ-hô-hoa ê bīn-chêng; che sī chòe lín tāi-tāi éng-óan ê lē.

(BCL) 佇會幕內法櫃的帳簾外，亞倫著料理伊對下昏到早起常常佇耶和華的面前。這是做恁代代永遠的例。

4

(THR) I tio̍h tī Iâ-hô-hoa ê bīn-chêng, siông-siông liāu-lí chiah ê teng tī chheng-khì ê teng-tâi-téng.

(BCL) 伊著佇耶和華的面前，常常料理諸個燈佇清氣的燈台頂。」

5

(THR) Lí tio̍h the̍h iù ê mī-hún, pek cha̍p-jī tè piáⁿ, múi-tè ēng i-hoat cha̍p-hūn-nn̄g.

(BCL) 「你著提幼的麵粉，十二塊餅，每塊用伊法十分二。

6

(THR) Tio̍h chiong piáⁿ pâi chòe nn̄g-chōa, múi-chōa la̍k-tè tī Iâ-hô-hoa ê bīn-chêng sèng-kiat ê toh-téng.

(BCL) 著將餅排做二　，每　六塊佇耶和華的面前聖潔的桌頂；

7

(THR) Koh tio̍h ēng chheng-khì ê jú-hiuⁿ hē tī ta̍k-chōa, kā piáⁿ chòe kì-hō, chiū-sī chòe hé-chè hiàn hō͘ Iâ-hô-hoa.

(BCL) 閣著用清氣的乳香下佇逐　，給餅做記號，就是做火祭獻互耶和華。

8

(THR) Ta̍k ê an-hioh-jı̍t, i tio̍h siông-siông pâi tī Iâ-hô-hoa ê bīn-chêng; che sī ūi-tio̍h Í-sek-lia̍t lâng chòe éng-óan ê iok.

(BCL) 逐個安息日伊著常常排佇耶和華的面前；這是為著以色列人做永遠的約。

9

(THR) Chiah ê piáⁿ tio̍h kui hō͘ A-lûn kap i ê kiáⁿ-sun, in tio̍h tī sèng ê só͘-chāi chia̍h i; in-ūi tī Iâ-hô-hoa ê hé-chè tiong, chit-ê sī chì-sèng kui tī i, chòe éng-óan ê lē.

(BCL) 諸個餅著歸互亞倫及伊的子孫；著佇聖的所在食伊，因為佇耶和華的火祭中，此個是至聖歸佇伊做永遠的例。」

10

(THR) Ū chı̍t-lâng i ê lāu-bú sī Í-sek-lia̍t lâng; i ê lāu-pē sī Ai-kı̍p lâng, chhut-lâi kiâⁿ tī Í-sek-lia̍t lâng ê tiong-kan; chit ê Í-sek-lia̍t hū-jîn-lâng ê kiáⁿ, kap chı̍t ê Í-sek-lia̍t lâng tī iâⁿ-pôaⁿ-lāi oan-ke.

(BCL) 有一人伊的老母是以色列人，伊的老父是埃及人，出來行佇以色列人的中間。此個以色列婦仁人的子及一個以色列人佇營盤內冤家。

11

(THR) Chit ê Í-sek-lia̍t hū-jîn-lâng ê kiáⁿ siat-to̍k sèng miâ, koh chiù-chó͘; chiū ū lâng chiong i tòa kàu Mô͘-se hia; i ê lāu-bú miâ kiò Sī-lô-bı̍t, sī Tàn ê chi-phài, Tí-pek-lī ê cha-bó͘-kiáⁿ.

(BCL) 此個以色列婦仁人的子褻瀆聖名，閣咒詛，就有人將伊帶到摩西遐。（伊的老母名叫示羅密，是但的支派底伯利的查某子。）

12

(THR) In koaiⁿ i tī khu-liû-só͘, beh thèng-hāu Iâ-hô-hoa chí-sī.

(BCL) 關伊佇拘留所，欲聽候耶和華指示。

13

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

14

(THR) Tio̍h chiong hit ê chiù-chó͘ ê lâng tòa kàu iâⁿ-gōa, hō͘ thiaⁿ-kìⁿ ê lâng hōaⁿ-chhiú tī i ê thâu-khak-téng; chôan-hōe chèng-lâng tio̍h ēng chio̍h-thâu tìm-sí i.

(BCL) 「著將彼個咒詛的人帶到營外。互聽見的人按手佇伊的頭殼頂；全會眾人著用石頭擲死伊。

15

(THR) Lí tio̍h hoan-hù Í-sek-lia̍t lâng kóng, Kìⁿ-nā chiù-chó͘ i ê Siōng-tè ê, tio̍h tam-tng i ê chōe.

(BCL) 你著吩咐以色列人講：見若咒詛伊的上帝的，著擔當伊的罪。

16

(THR) Lâng siat-to̍k Iâ-hô-hoa ê miâ, tio̍h hō͘ i sí; chôan-hōe ê chèng-lâng tio̍h ēng chio̍h-thâu tìm-sí i; put-kóan sī chhut-gōa lâng, á-sī pún-tōe lâng, i siat-to̍k Iâ-hô-hoa ê miâ ê sî, tio̍h hō͘ i sí.

(BCL) 人褻瀆耶和華的名，著互伊死；全會的眾人著用石頭擲死伊。不管是出外人抑是本地人，伊褻瀆耶和華的名的時，著互伊死。

17

(THR) Kìⁿ-nā phah-sí lâng ê, tek-khak tio̍h hō͘ i sí.

(BCL) 見若拍死人的，的確著互伊死；

18

(THR) Phah-sí cheng-siⁿ ê, tio̍h pê i, ēng miā pê miā.

(BCL) 拍死精牲的，著賠伊，用命賠命。

19

(THR) Lâng nā hō͘ i ê chhù-piⁿ siū sún-siong, i án-ni kiâⁿ, iā tio̍h án-ni khóan-thāi i.

(BCL) 人若互伊的厝邊受損傷，伊按呢行，也著按呢款待伊：

20

(THR) Ēng siong pê siong, ēng ba̍k-chiu pê ba̍k-chiu, ēng chhùi-khí pê chhùi-khí, i sún-siong lâng cháiⁿ-iūⁿ, iā tio̍h án-ni pān i.

(BCL) 用傷賠傷，用目睭賠目睭，用嘴齒賠嘴齒。伊損傷人怎樣，也著按呢辦伊。

21

(THR) Phah-sí cheng-siⁿ ê, tio̍h pê i; phah-sí lâng ê, tek-khak tio̍h hō͘ i sí.

(BCL) 拍死精牲的，著賠伊；拍死人的，的確著互伊死。

22

(THR) Put-kóan sī chhut-gōa lâng, á-sī pún-tōe lâng, tâng chı̍t-iūⁿ ê hoat-lu̍t; in-ūi Góa Iâ-hô-hoa sī lín ê Siōng-tè.

(BCL) 不管是出外人抑是本地人，同一樣的法律。因為我耶和華──是恁的上帝。」

23

(THR) Mô͘-se chiū kā Í-sek-lia̍t lâng kóng, in chiū chiong hit ê chiù-chó͘ ê lâng tòa kàu iâⁿ-gōa, ēng chio̍h-thâu tìm-sí; Í-sek-lia̍t lâng chiū chiàu Iâ-hô-hoa só͘ bēng-lēng Mô͘-se ê lâi kiâⁿ.

(BCL) 摩西就給以色列人講，就將彼個咒詛的人帶到營外，用石頭擲死。以色列人就照耶和華所命令摩西的來行。

Bible Color Mark

• 台語漢字羅馬本
• 巴克禮全羅