利未記 第 25 章

1

(THR) Iâ-hô-hoa tī Se-nái soaⁿ hoan-hù Mô͘-se kóng,

(BCL) 耶和華佇西奈山吩咐摩西講：

2

(THR) Lí tio̍h hoan-hù Í-sek-lia̍t lâng kā in kóng, Lín kàu Góa siúⁿ-sù lín hit ê tōe ê sî; tōe chiū tio̍h kā Iâ-hô-hoa siú an-hioh.

(BCL) 「你著吩咐以色列人給講：恁到我賞賜恁彼個地的時，地就著給耶和華守安息。

3

(THR) La̍k-nî tio̍h chèng-choh lí ê chhân-hn̂g, la̍k-nî kú tio̍h san-koah lí ê phû-tô-hn̂g, siu tōe ê chhut-sán.

(BCL) 六年著種作你的田園，六年久著芟割你的葡萄園，收地的出產。

4

(THR) Kàu tē-chhit nî tōe tio̍h siú tōa ê an-hioh, chiū-sī kā Iâ-hô-hoa siú ê an-hioh, m̄-thang chèng-choh lí ê chhân-hn̂g, iā m̄-thang san phû-tô-hn̂g.

(BCL) 到第七年，地著守大的安息，就是給耶和華守的安息，呣通種作你的田園，也呣通芟葡萄園。

5

(THR) Siu-sêng liáu ka-kī hoat ê gō͘-kak, m̄-thang siu-koah, bô kè san-koah ê phû-tô-chhiū, iā m̄-thang bán phû-tô; chit-nî sī tōe ê an-hioh nî.

(BCL) 收成了家己發的五穀呣通收割；無過芟割的葡萄樹也呣通挽葡萄。此年，是地的安息年。

6

(THR) Tōe tī an-hioh nî só͘-chhut-ê beh hō͘ lín chòe chia̍h-mı̍h; i ê chhut-sán lóng beh hō͘ lí kap lí ê lô͘-po̍k, lí ê lú-pī, lí ê chhiàⁿ-kang-lâng, í-kı̍p kià-kha tī lí hia ê gōa-lâng,

(BCL) 地佇安息年所出的欲互恁做食物，伊的出產攏欲互你及你的奴僕、你的女婢、你的倩工人，以及寄腳佇你遐的外人，

7

(THR) kap lí ê cheng-siⁿ, í-kı̍p tī lí ê tōe ê cháu-siù chòe chia̍h-mı̍h.

(BCL) 及你的精牲，以及佇你的地的走獸做食物。」

8

(THR) Lí tio̍h ūi ka-kī sǹg an-hioh-nî chhit-ê, chiū-sī chhit-pái ê chhit-nî; chit chhit-pái ê an-hioh-nî, tùi tī lí sī sì-cha̍p-káu nî.

(BCL) 「你著為家己算安息年七個，就是七擺的七年。此七擺的安息年，對佇你是四十九年。

9

(THR) Hit-nî chhit-ge̍h chhoe-cha̍p jı̍t, lí tio̍h sì-kòe pûn tōa-siaⁿ ê sàu-kak; tī sio̍k-chōe ê jı̍t tio̍h chôan-tōe pûn sàu-kak.

(BCL) 彼年七月初十日，你著四界歕大聲的哨角；佇贖罪的日，著全地歕哨角。

10

(THR) Lín tio̍h ēng tē gō͘-cha̍p nî chòe-sèng, tī piàn-tōe kā it-chhè khiā-khí ê peh-sìⁿ soan-pò͘ chū-iû; chit-nî beh chòe lín ê hi-liân; lín ta̍k lâng tio̍h kui ka-kī ê sán-gia̍p, ta̍k-lâng tio̍h tò-khì i ê pún-ke.

(BCL) 恁著用第五十年，做聖，佇遍地給一切徛起的百姓宣佈自由。此年欲做恁的禧年，恁逐人著歸家己的產業，逐人著倒去伊的本家。

11

(THR) Tē gō͘-cha̍p nî beh chòe lín ê hi-liân, m̄-thang chèng-choh; tōe ka-kī hoat ê, m̄-thang siu-koah; bô-san ê phû-tô-chhiū iā m̄-thang bán i.

(BCL) 第五十年欲做恁的禧年。呣通種作；地家己發的，呣通收割；無芟的葡萄樹也呣通挽伊。

12

(THR) In-ūi che sī hi-liân, lín tio̍h lia̍h i chòe-sèng; lín thang chia̍h tōe-nı̍h ka-kī chhut ê thó͘-sán.

(BCL) 因為這是禧年，恁著掠伊做聖，恁通食地裡家己出的土產。

13

(THR) Chit ê hi-liân, lín ta̍k-lâng tio̍h tò-khì ka-kī ê sán-gia̍p.

(BCL) 「此個禧年，恁逐人著倒去家己的產業。

14

(THR) Lín bōe mı̍h hō͘ chhù-piⁿ, á-sī tùi chhù-piⁿ bóe mı̍h, lín m̄-thang saⁿ khek-khui.

(BCL) 恁賣物互厝邊，抑是對厝邊買物，恁呣通相剋虧。

15

(THR) Lí tio̍h chiàu hi-liân-āu ê nî-hān, tùi chhù-piⁿ bóe, i iā tio̍h chiàu siu-sêng ê nî-hān bōe hō͘ lín.

(BCL) 你著照禧年後的年限對厝邊買；伊也著照收成的年限賣互恁。

16

(THR) Chiàu nî-hān ê chōe, lí tio̍h ke-thiⁿ i ê kè-chîⁿ, chiàu nî-hān ê chió, lí tio̍h kiám-chió i ê kè-chîⁿ; in-ūi i chiàu siu-sêng ê siàu-gia̍h lâi bōe hō͘ lín.

(BCL) 照年限的多，你著加添伊的價錢；照年限的少，你著減少伊的價錢，因為伊照收成的數額來賣互恁。

17

(THR) Lín iā m̄-thang saⁿ khek-khui, to̍k-to̍k tio̍h kèng-ùi lín ê Siōng-tè; in-ūi Góa sī Iâ-hô-hoa lín ê Siōng-tè.

(BCL) 恁也呣通相剋虧，獨獨著敬畏恁的上帝，因為我是耶和華──恁的上帝。」

18

(THR) Só͘-í lín tio̍h kiâⁿ Góa ê lu̍t-lē, siú Góa ê hoat-tō͘ lâi kiâⁿ i; chiū thang tī hit ê tōe an-jiân khiā-khí.

(BCL) 「所以恁著行我的律例，守我的法度來行伊，就通佇彼個地安然徛起。

19

(THR) Tōe iā beh chhut i ê thó͘-sán, lín chiū beh chia̍h-pá, tī hit ê tōe an-jiân khiā-khí.

(BCL) 地也欲出伊的土產，恁就欲食飽，佇彼個地安然徛起。

20

(THR) Lín nā kóng, Khòaⁿ ah, chit ê tē-chhit nî góan bô chèng-choh, iā bô siu-sêng thó͘-sán, beh chia̍h sím-mı̍h ah?

(BCL) 恁若講：『看啊，此個第七年阮無種作，也無收成土產，欲食甚麼啊？』

21

(THR) Góa beh tī tē la̍k-nî bēng-lēng Góa ê hok-khì hō͘ lín, tōe chiū siⁿ saⁿ-nî ê thó͘-sán.

(BCL) 我欲佇第六年命令我的福氣互恁，地就生三年的土產。

22

(THR) Tē-poeh nî lín tio̍h chèng-choh, iā tio̍h chia̍h tōe ê chhut-sán, chiū-sī kū ê bí-niû; thèng-hāu kàu tē-káu nî, hit-nî ê chhut-sán siu-lâi ê sî, lín iáu-kú teh chia̍h kū ê bí-niû.

(BCL) 第八年，恁著種作，也著食地的出產，就是舊的米糧，聽候到第九年彼年的出產收來的時，恁猶久食舊的米糧。」

23

(THR) Tōe m̄-thang éng-óan bōe-tn̄g, in-ūi tōe sī Góa ê; lín tī Góa ê bīn-chêng sī chhut-gōa lâng, sī kià-kha-ê.

(BCL) 「地呣通永遠賣斷，因為地是我的；恁佇我的面前是出外人，是寄腳的。

24

(THR) Lín só͘ tit-tio̍h chòe-gia̍p ê chôan-tōe, tio̍h chún lâng sio̍k-hôe.

(BCL) 恁所得著做業的全地，著准人贖回。

25

(THR) Lí ê hiaⁿ-tī nā pìⁿ-chòe sòng-hiong, bōe i ê gia̍p kúi-nā hūn, i ê chì-chhin tio̍h lâi, sio̍k-hôe i ê hiaⁿ-tī só͘ bōe ê.

(BCL) 你的兄弟若變做喪鄉，賣伊的業幾若份，伊的至親著來贖回伊的兄弟所賣的。

26

(THR) Nā bô lâng thang kā i sio̍k-hôe, i pún-sin koh chiâⁿ chòe hó-gia̍h, kàu gia̍h ōe sio̍k-hôe,

(BCL) 若無人通給伊贖回，伊本身閣成做好額，夠額會贖回，

27

(THR) i chiū tio̍h sǹg bōe-chhut tōe ê nî-hān, chiong só͘-chhun-ê hêng hit ê bóe-chú, pún-sin chiū thang ho̍k-tò i ê sán-gia̍p.

(BCL) 伊就著算賣出地的年限，將所剩的還彼個買主，本身就通復倒伊的產業。

28

(THR) Hit ê lâng nā bōe-ōe ūi ka-kī sio̍k-hôe, chiū só͘-bōe ê iû-gôan chûn tī bóe-chú ê chhiú, tı̍t-kàu hi-liân; hi-liân í-keng kàu, sán-gia̍p tio̍h kau-chhut; hit-lâng chiū ho̍k-tò i ê gia̍p.

(BCL) 彼個人若會為家己贖回，就所賣的猶原存佇買主的手直到禧年；禧年已經到，產業著交出，彼人就復倒伊的業。

29

(THR) Lâng nā bōe siâⁿ-lāi ê chhù, bōe liáu-āu chı̍t-nî thang sio̍k-hôe; chı̍t-nî ka-nn̂g iā ū sio̍k-hôe ê kôan.

(BCL) 「人若賣城內的厝，賣了後，一年通贖回；一年足足，也有贖回的權。

30

(THR) Nā chı̍t-nî í-keng móa bô sio̍k-hôe chit ê siâⁿ-lāi ê chhù, chiū tiāⁿ-tio̍h éng-óan kui bóe-chú kàu ta̍k-tāi; tī hi-liân iā bōe-tit kau-chhut.

(BCL) 若一年已經滿無贖回，此個城內的厝就定著永遠歸買主，到逐代；佇禧年也得交出。

31

(THR) To̍k-to̍k chhù tī bô siâⁿ-chhiûⁿ ê hiuⁿ-chng, tio̍h khòaⁿ i chhin-chhiūⁿ hiuⁿ-ē ê chhân chı̍t-iūⁿ, thang sio̍k-hôe; kàu hi-liân, lóng tio̍h kau-chhut.

(BCL) 獨獨厝佇無城牆的鄉村，著看伊親像鄉下的田一樣，通贖回；到禧年，攏著交出。

32

(THR) Chóng-sī Lī-bī lâng ê siâⁿ, chiū-sī in só͘ tit-tio̍h chòe-gia̍p ê siâⁿ hit tiong-kan ê chhù, Lī-bī lâng thang put-kóan-sî lâi sio̍k-hôe.

(BCL) 總是利未人的城，就是所得著做業的城彼中間的厝，利未人通不管時來贖回。

33

(THR) Nā ū lâng tui Lī-bī lâng sio̍k-hôe chhù-the̍h, só͘ bōe ê chhù tī só͘ tit-tio̍h chòe-gia̍p ê siâⁿ, kàu hi-liân chiū tio̍h kau-chhut; in-ūi Lī-bī lâng siâⁿ-lāi ê chhù, sī in tī Í-sek-lia̍t lâng tiong ê sán-gia̍p.

(BCL) 若有人對利未人贖回厝宅，所賣的厝佇所得著做業的城，到禧年就著交出，因為利未人城內的厝是佇以色列人中的產業。

34

(THR) Chóng-sī in ê siâⁿ-gōa kau-iá ê tōe, m̄-thang bōe, in-ūi sī in éng-óan ê sán-gia̍p.

(BCL) 總是的城外郊野的地呣通賣，因為是永遠的產業。」

35

(THR) Lí ê hiaⁿ-tī pìⁿ-chòe sòng-hiong soe-thè tī lí hia, lí tio̍h pó͘-chō͘ i, hō͘ i kap lí saⁿ-kap tòa, chhin-chhiūⁿ gōa-lâng kap kià-kha-ê chı̍t-iūⁿ.

(BCL) 「你的兄弟變做喪鄉衰退佇你遐，你著補助伊，互伊及你相及住，親像外人及寄腳的一樣。

36

(THR) M̄-thang the̍h i ê lī-sek, iā m̄-thang the̍h i khah-ke; to̍k-to̍k tio̍h kèng-ùi lí ê Siōng-tè, hō͘ lí ê hiaⁿ-tī kap lí tòa.

(BCL) 呣通提伊的利息，也呣通提伊卡加；獨獨著敬畏你的上帝，互你的兄弟及你住。

37

(THR) Lí chioh i chîⁿ m̄-thang kā i the̍h lī-sek, lí chioh i bí-niû iā m̄-thang kā i the̍h khah-ke.

(BCL) 你借伊錢，呣通給伊提利息；你借伊米糧，也呣通給伊提卡加。

38

(THR) Góa sī Iâ-hô-hoa lín ê Siōng-tè, bat chhōa lín chhut Ai-kı̍p tōe, ūi-tio̍h beh siúⁿ-sù lín Ka-lâm tōe, iā beh chòe lín ê Siōng-tè.

(BCL) 我是耶和華──恁的上帝，曾導恁出埃及地，為著欲賞賜恁迦南地，也欲做恁的上帝。」

39

(THR) Lí ê hiaⁿ-tī nā pìⁿ sòng-hiong tī lí hia, chiong pún-sin bōe hō͘ lí, m̄-thang hō͘ i chhin-chhiūⁿ lô͘-po̍k ho̍k-sāi lí.

(BCL) 「你的兄弟若變喪鄉佇你遐，將本身賣互你，呣通互伊親像奴僕服事你。

40

(THR) I tio̍h tī lí hia chhin-chhiūⁿ chòe-kang lâng, kap kià-kha-ê chı̍t-iūⁿ; tio̍h ho̍k-sāi lí tı̍t kàu hi-liân.

(BCL) 伊著佇你遐親像做工人及寄腳的一樣，著服事你直到禧年。

41

(THR) Hit-sî i beh lī-khui lí chhut-khì, kap i ê kiáⁿ-jî saⁿ-kap tò-khì i ê pún-ke, ho̍k-tò i chó͘-kong ê gia̍p.

(BCL) 彼時，伊欲離開你出去，及伊的子兒相及倒去伊的本家，復倒伊祖公的業。

42

(THR) In-ūi in sī Góa ê lô͘-po̍k, sī Góa só͘ chhōa-chhut Ai-kı̍p tōe ê; m̄-thang bōe chòe lô͘-po̍k.

(BCL) 因為是我的奴僕，是我所導出埃及地的，呣通賣做奴僕。

43

(THR) M̄-thang giâm-giâm kóan-hat i, to̍k-to̍k tio̍h kèng-ùi lí ê Siōng-tè.

(BCL) 呣通嚴嚴管轄伊，獨獨著敬畏你的上帝。

44

(THR) Lūn-kàu lí só͘ beh ū ê lô͘-po̍k lú-pī, thang tùi sì-ûi ê kok tiong bóe lâi chòe lô͘-po̍k lú-pī.

(BCL) 論到你所欲有的奴僕、女婢，通對四圍的國中買來做奴僕女婢。

45

(THR) Koh hiah ê kià-kha tī lín tiong-kan ê gōa-lâng ê kiáⁿ-jî, í-kı̍p in kap lín tiàm hiah ê ke-kòan, tī lín ê tōe-hng só͘-siⁿ-ê, lín iā thang tùi in tiong-kan bóe lâng; in beh chòe lín ê ke-gia̍p.

(BCL) 閣許個寄腳佇恁中間的外人的子兒以及及恁踮許個家眷，佇恁的地方所生的，恁也通對中間買人；欲做恁的家業。

46

(THR) Lín beh chhú in chòe-gia̍p, lâu hō͘ kiáⁿ-sun chòe ke-gia̍p; lín beh éng-óan tùi in tiong-kan chhú i chòe lô͘-po̍k; to̍k-to̍k lín ê hiaⁿ-tī Í-sek-lia̍t lâng, lín m̄-thang giâm-giâm saⁿ kóan-hat.

(BCL) 恁欲取做業留互子孫做家業，恁欲永遠對中間取伊做奴僕；獨獨恁的兄弟以色列人，恁呣通嚴嚴相管轄。

47

(THR) Tiàm tī lín hia ê gōa-lâng, á-sī kià-kha-ê, nā pìⁿ-chòe hó-gia̍h, lí ê hiaⁿ-tī tī in hia pìⁿ-chòe sòng-hiong, chiong ka-kī bōe hō͘ lín tiong-kan ê gōa-lâng, á-sī kià-kha-ê, á-sī gōa-lâng ê ke-cho̍k.

(BCL) 「踮佇恁遐的外人，抑是寄腳的，若變做好額，你的兄弟佇遐變做喪鄉，將家己賣互恁中間的外人，抑是寄腳的，抑是外人的家族，

48

(THR) Bōe liáu-āu thang sio̍k-hôe i, i ê hiaⁿ-tī ê chı̍t-ê thang sio̍k-hôe i;

(BCL) 賣了後，通贖回伊。伊的兄弟的一個通贖回伊，

49

(THR) peh-chek, á-sī peh-chek ê kiáⁿ thang sio̍k-hôe i, á-sī pún-ke ê chhin-lâng, iā thang sio̍k i; i pún-sin nā chiâⁿ-chòe hó-gia̍h iā thang ka-kī sio̍k.

(BCL) 伯叔、抑是伯叔的子通贖回伊，抑是本家的親人，也通贖伊。伊本身若成做好額，也通家己贖。

50

(THR) I tio̍h kap bóe-chú sǹg-siàu, tùi bōe ka-kī hit-nî khí, sǹg kàu hi-liân, só͘ bōe ê ké-chîⁿ chiàu nî-hān ê chōe-chió, tio̍h chiàu chòe-kang lâng ê nî-hān kap i sǹg.

(BCL) 伊著及買主算數，對賣家己彼年起，算到禧年；所賣的價錢照年限的多少，著照做工人的年限及伊算。

51

(THR) Nā só͘ chhun ê nî iáu-kú chōe, chiū tio̍h chiàu hit ê nî-hān, tùi bóe-i ê kè-chîⁿ, i tio̍h hêng i sio̍k-hôe ê kè-chîⁿ.

(BCL) 若所剩的年猶久多，就著照彼個年限對買伊的價錢，伊著還伊贖回的價錢。

52

(THR) Nā kàu hi-liân chhun bô kúi-nî, tio̍h kap i sǹg; chiàu hit ê nî-hān tio̍h hêng i sio̍k-hôe kè-chîⁿ.

(BCL) 若到禧年剩無幾年，著及伊算，照彼個年限著還伊贖回價錢。

53

(THR) I tio̍h kap i tòa, chhin-chhiūⁿ nî-nî kò͘-chhiàⁿ ê chòe-kang lâng; bóe-chú m̄-thang giâm-giâm kóan-hat i.

(BCL) 伊著及伊住，親像年年雇倩的做工人，買主呣通嚴嚴管轄伊。

54

(THR) Nā bô tī chiah-ê siū-sio̍k, kàu hi-liân i kap i ê kiáⁿ-jî lóng thang chhut-khì chū-iû.

(BCL) 若無佇諸個受贖，到禧年，伊及伊的子兒攏通出去自由。

55

(THR) In-ūi Í-sek-lia̍t lâng sī Góa ê lô͘-po̍k, sī Góa chhōa-chhut Ai-kı̍p tōe ê; Góa sī Iâ-hô-hoa lín ê Siōng-tè.

(BCL) 因為以色列人是我的奴樸僕是我導出埃及地的。我是耶和華──恁的上帝。」

Bible Color Mark

• 台語漢字羅馬本
• 巴克禮全羅