利未記 第 6 章

1

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

2

(THR) Nā ū lâng hōan-chōe kan-hōan Iâ-hô-hoa, tùi i ê chhù-piⁿ kiâⁿ khúi-chà, he̍k-sī só͘ kau-tài i mı̍h-kiāⁿ, he̍k-sī kau-koan bóe-bōe, he̍k-sī chhiúⁿ lâng ê châi-bu̍t,

(BCL) 「若有人犯罪，干犯耶和華，對伊的厝邊行詭詐，或是所交代伊物件，或是交關買賣，或是搶人的財物，或是欺壓厝邊，

3

(THR) he̍k-sī khi-ap chhù-piⁿ, he̍k-sī khioh-tio̍h sit-lo̍h ê mı̍h, kiâⁿ khúi-chà, pe̍h-chha̍t lâi chiù-chōa; tī lâng só͘ kiâⁿ it-chhè ê sū ê tiong-kan, hōan-tio̍h chı̍t-hāng, lâi ū chōe;

(BCL) 或是拾著失落的物行詭詐，白賊來咒誓，佇人所行一切的事的中間犯著一項來有罪；

4

(THR) i nā hōan-tio̍h tì-kàu ū kè-sit, chiū tio̍h hêng só͘ chhiúⁿ-ê, á-sī in-ūi khi-ap só͘ tit-tio̍h-ê, á-sī só͘ kau-tài i ê mı̍h, á-sī lâng sit-lo̍h hō͘ i só͘ khioh-tio̍h ê mı̍h;

(BCL) 伊若犯著，致到有過失，就著還所搶的，抑是因為欺壓所得著的，抑是所交代伊的物，抑是人失落互伊所拾著的物，

5

(THR) á-sī i in-ūi sím-mı̍h mı̍h pe̍h-chha̍t chiù-chōa, chiū tio̍h chiàu siàu-gia̍h lâi hêng, lēng-gōa ke gō͘-hūn ê chı̍t-hūn; tī chhâ-chhut i ū kè-sit ê jı̍t, tio̍h hêng pún-chú.

(BCL) 抑是伊因為甚麼物白賊咒誓，就著照數額來還，另外加五份的一份，佇查出伊有過失的日著還本主。

6

(THR) Iā tio̍h chiàu lí só͘ kó͘ ê, ēng i pó͘-kè-sit ê chè, chiū-sī iûⁿ-kûn-tiong chı̍t-chiah bô hâ-chhû ê mî-iûⁿ-káng khan kàu Iâ-hô-hoa ê bīn-chêng, kau hō͘ chè-si chòe pó͘-kè-sit ê chè.

(BCL) 也著照你所估的，用伊補過失的祭──就是羊群中一隻無瑕疵的綿羊──牽到耶和華的面前，交互祭司做補過失的祭。

7

(THR) Chè-si tio̍h tī Iâ-hô-hoa ê bīn-chêng, thòe i sio̍k-chōe, i bô-lūn kiâⁿ sím-mı̍h sū, hō͘ i ū chōe, lóng beh tit-tio̍h sià-bián.

(BCL) 祭司著佇耶和華的面前替伊贖罪；伊無論行甚麼事，互伊有罪，攏欲得著赦免。」

8

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

9

(THR) Lí tio̍h bēng-lēng A-lûn kap i ê kiáⁿ-sun kóng, Sio-chè ê lē sī án-ni; sio-chè tio̍h hē tī tôaⁿ ê chhâ-téng, chı̍t-mî kàu kng; tôaⁿ-téng ê hé tio̍h siông-siông to̍h.

(BCL) 「你著命令亞倫及伊的子孫講，燒祭的例是按呢：燒祭著下佇壇的柴頂，一暝到光，壇頂的火著常常。

10

(THR) Chè-si tio̍h chhēng iù-tōe-pò͘ ê i-ho̍k, ē-sin iā tio̍h chhēng iù-tōe-pò͘ ê khò͘, chiong tôaⁿ-téng ê hé só͘ sio chòe sio-chè ê hu siu-khí-lâi, piàⁿ tī tôaⁿ-piⁿ.

(BCL) 祭司著穿幼苧布的衣服，下身也著穿幼苧布的褲，將壇頂的火所燒做燒祭的灰收起來，傾佇壇邊；

11

(THR) Jiân-āu tio̍h thǹg-khì chit ê i-ho̍k, chhēng pa̍t-hō ê i-ho̍k, chiong hé-hu tòa-chhut iâⁿ-gōa kàu chheng-khì ê só͘-chāi.

(BCL) 然後著褪去此個衣服，穿別號的衣服，將火灰帶出營外到清氣的所在。

12

(THR) Tôaⁿ-téng ê hé tio̍h tī téng-bīn siông-siông to̍h, m̄-thang hoa; chè-si tio̍h ta̍k chá-khí tī hitteng2-bīn sio-chhâ, koh chiong sio-chè pâi tī tôaⁿ-téng, tī hí téng-bīn sio siā-un-chè ê iû.

(BCL) 壇頂的火著佇頂面常常，呣通熄。祭司著逐早起佇彼頂面燒柴，閣將燒祭排佇壇頂，佇彼頂面燒謝恩祭的油。

13

(THR) Tī tôaⁿ-téng ê hé tio̍h siông-siông to̍h, m̄-thang hoa.

(BCL) 佇壇頂的火著常常，呣通熄。」

14

(THR) Sò͘-chè ê lē sī án-ni; A-lûn ê kiáⁿ-sun tio̍h tī tôaⁿ-chêng, chiong che hiàn tī Iâ-hô-hoa ê bīn-chêng.

(BCL) 「素祭的例是按呢：亞倫的子孫著佇壇前將這獻佇耶和華的面前。

15

(THR) I tio̍h tùi hit tiong-kan, the̍h-chhut sò͘-chè ê mī-hún chı̍t-pé, kap iû, kap sò͘-chè-tiong só͘ ū ê jú-hiuⁿ, sio tī tôaⁿ-téng, chòe kì-liām, hiàn hō͘ Iâ-hô-hoa chòe phang-bī.

(BCL) 伊著對彼中間，提出素祭的麵粉一把，及油及素祭中所有的乳香，燒佇壇頂，做紀念獻互耶和華做芳味。

16

(THR) Só͘-chhun-ê A-lûn kap i ê kiáⁿ-sun tio̍h chia̍h i; tio̍h tī sèng ê só͘-chāi, m̄-thang chham kàⁿ, lâi chia̍h; tio̍h tī hōe-bō͘ ê īⁿ-lāi chia̍h.

(BCL) 所剩的，亞倫及伊的子孫著食伊，著佇聖的所在呣通參酵來食，著佇會幕的院內食。

17

(THR) M̄-thang chham kàⁿ lâi pek i. Che sī Góa tùi Góa ê hé-chè-tiong, siúⁿ-sù in ê hūn-gia̍h; sī chì-sèng-ê, kap sio̍k-chōe-chè, í-kı̍p pó͘-kè-sit ê chè chı̍t-iūⁿ.

(BCL) 呣通參酵來伊。這是我對我的火祭中賞賜的份額，是至聖的，及贖罪祭以及補過失的祭一樣。

18

(THR) Kìⁿ-nā A-lûn kiáⁿ-sun-tiong ta-po͘-ê, lóng tio̍h chia̍h i, tùi Iâ-hô-hoa ê hé-chè-tiong, chòe éng-óan ê hūn-gia̍h, tı̍t-kàu lín ê bān-tāi; bong chiah ê chè-mı̍h ê, lóng beh chiâⁿ-chòe sèng.

(BCL) 見若亞倫子孫中查甫的攏著食伊，對耶和華的火祭中，做永遠的份額，直到恁的萬代。摸諸個祭物的，攏欲成做聖。」

19

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

20

(THR) A-lûn kap i ê kiáⁿ-sun tī i siū boah-iû ê jı̍t, só͘ tio̍h hiàn hō͘ Iâ-hô-hoa ê lé-mı̍h, chiū-sī iù ê mī-hún i-hoat cha̍p-hūn ê chı̍t-hūn, chòe siông-siông hiàn ê sò͘-chè; chá-khí-sî chı̍t-pòaⁿ, ê-hng-sî chı̍t-pòaⁿ.

(BCL) 「亞倫及伊的子孫佇伊受抹油的日，所著獻互耶和華的禮物，就是幼的麵粉伊法十份的一份，做常常獻的素祭：早起時一半，下昏時一半。

21

(THR) Tio̍h tī chian-pôaⁿ ēng iû lâi chòe; tiau-hô-liáu, lí chiū tio̍h the̍h-jı̍p-lâi; pek hó chı̍t-tè chı̍t-tè, chòe sò͘-chè, hiàn hō͘ Iâ-hô-hoa chòe phang-bī.

(BCL) 著佇煎盤用油來做，調和了，你就著提入來；好一塊一塊，做素祭獻互耶和華做芳味。

22

(THR) I ê kiáⁿ-sun-tiong sòa-chiap i siū boah-iû chòe chè-si, tio̍h hiàn i, tio̍h it-chīn sio hō͘ Iâ-hô-hoa; che sī éng-óan ê lē.

(BCL) 伊的子孫中，續接伊受抹油做祭司，著獻伊，著一盡燒互耶和華。這是永遠的例。

23

(THR) Chè-si ê sò͘-chè tio̍h it-chīn sio, m̄-thang chia̍h i.

(BCL) 祭司的素祭著一盡燒，呣通食伊。」

24

(THR) Iâ-hô-hoa hoan-hù Mô͘-se kóng,

(BCL) 耶和華吩咐摩西講：

25

(THR) Lí tio̍h hoan-hù A-lûn kap i ê kiáⁿ-sun kóng, Sio̍k-chōe-chè ê lē, chiū-sī án-ni; tio̍h tī Iâ-hô-hoa ê bīn-chêng thâi sio-chè ê cheng-siⁿ ê só͘-chāi, lâi thâi sio̍k-chōe-chè ê cheng-siⁿ; che sī chì-sèng ê mı̍h.

(BCL) 「你著吩咐亞倫及伊的子孫講，贖罪祭的例就是按呢：著佇耶和華的面前、燒祭的精牲的所在來贖罪祭的精牲；這是至聖的物。

26

(THR) Ūi sio̍k-chōe hiàn chit ê chè ê chè-si tio̍h chia̍h i; tio̍h tī sèng ê só͘-chāi, chiū-sī tī hōe-bō͘ ê īⁿ-lāi chia̍h i.

(BCL) 為贖罪獻此個祭的祭司著食伊，著佇聖的所在，就是佇會幕的院內食伊。

27

(THR) Kìⁿ-nā bong i ê bah ê, beh chiâⁿ-chòe sèng; i ê huih nā hiù tī sím-mı̍h i-ho̍k ê téng-bīn, só͘ hiù-tio̍h hit-niá, lí tio̍h tī sèng ê só͘-chāi sóe.

(BCL) 見若摸伊的肉的欲成做聖；伊的血若灑佇甚麼衣服的頂面，所灑著彼領你著佇聖的所在洗。

28

(THR) Nā chú tī hûi ê khì-kū, tio̍h kā i kòng-phòa; nā chú tī tâng ê khì-kū, chit ê khì-kū tio̍h kè-bôa, chiah ēng chúi sóe.

(BCL) 若煮佇磁的器具著給伊摃破；若煮佇銅的器具，此個器具著過磨，才用水洗。

29

(THR) Kìⁿ-nā chè-si-tiong ê ta-po͘-teng, lóng tio̍h chia̍h i; che sī chì-sèng ê mı̍h.

(BCL) 見若祭司中的查甫丁攏著食伊，這是至聖的物。

30

(THR) Kìⁿ-nā sio̍k-chōe-chè, i ê huih nā tòa jı̍p hōe-bō͘ tī sèng-só͘ sio̍k-chōe, lóng m̄-thang chia̍h i; tio̍h ēng hé sio i.

(BCL) 見若贖罪祭，伊的血若帶入會幕佇聖所贖罪，攏呣通食伊，著用火燒伊。」

Bible Color Mark

• 台語漢字羅馬本
• 巴克禮全羅