馬可福音 第 13 章

1

(THR) Iâ-so͘ chhut tiān ê sî ū chı̍t ê ha̍k-seng kā I kóng, Sian-siⁿ, lí khòaⁿ-leh, chit hō chio̍h, chit hō chhù-the̍h!

(BCL) 耶穌出殿的時，有一個學生給伊講：「先生，你看咧，此號石！此號厝宅！」

2

(THR) . Iâ-so͘ kā i kóng, Lí khòaⁿ chiah ê tōa chhù mah? Tī chia beh bô chı̍t tè chio̍h lâu tī chio̍h ê téng-bīn, iā bô chhia-lo̍h-khì.

(BCL) 耶穌給伊講：「你看諸個大厝嗎？佇遮欲無一塊石留佇石的頂面，也無捙落去。」

3

(THR) . Iâ-so͘ tī Kaⁿ-ná soaⁿ chē tī tiān ê tùi-bīn; Pí-tek, Ngá-kok, Iok-hān kap An-tek-lia̍t àm-chīⁿ mn̄g I kóng,

(BCL) 耶穌佇橄欖山坐佇殿的對面。彼得、雅各、約翰，及安得烈暗靜問伊講：

4

(THR) . Chhiáⁿ kā góan kóng, sím-mı̍h sî ū chiah ê sū? Koh chiah ê sū beh chiâⁿ ê sî ū sím-mı̍h tiāu-thâu ah?

(BCL) 「請給阮講，甚麼時有諸個事？閣諸個事欲成的時有甚麼兆頭啊？」

5

(THR) . Iâ-so͘ chiah kā in kóng, Lín tio̍h kín-sīn, bo̍h-tit hō͘ lâng bê-he̍k.

(BCL) 耶穌才給講：「恁著謹慎，莫得互人迷惑。

6

(THR) . Beh ū chōe-chōe lâng thok góa ê miâ lâi kóng, Góa chiū-sī Ki-tok, lâi bê-he̍k chōe-chōe lâng.

(BCL) 欲有多多人託我的名來，講：『我就是基督』，來迷惑多多人。

7

(THR) . Koh lín thiaⁿ-kìⁿ kau-chiàn kap kau-chiàn ê hong-siaⁿ ê sî, bo̍h-tit kiaⁿ; in-ūi chiah ê sū tek-khak ū, chóng-sī bo̍at-kî iáu-bē kàu.

(BCL) 閣恁聽見交戰及交戰的風聲的時，莫得驚。因為諸個事的確有，總是末期猶未到。

8

(THR) . In-ūi peh-sìⁿ beh khí-lâi kong-kek peh-sìⁿ, kok iā beh kong-kek kok; ta̍k só͘-chāi beh ū tōe-tāng, iā beh ū ki-hng; chiah ê sū chiū-sī khó͘-thàng ê khí-thâu.

(BCL) 因為百姓欲起來攻擊百姓，國也欲攻擊國；逐所在欲有地動，也欲有飢荒。諸個事就是苦痛的起頭。

9

(THR) . Nā-sī lín tio̍h ka-kī kín-sīn, in-ūi lâng beh chiong lín sàng-kau kong-hōe, lín beh siū phah tī hōe-tn̂g-nı̍h; iā beh ūi-tio̍h góa ê iân-kò͘ khiā tī koaⁿ-hú kap kun-ông ê bīn-chêng, lâi tùi in chòe kan-chèng.

(BCL) 若是恁著家己謹慎；因為人欲將恁送交公會，恁欲受拍佇會堂裡，也欲為著我的緣故徛佇官府及君王的面前，來對做干證。

10

(THR) . Chóng-sī hok-im tek-khak tāi-seng thôan tī bān pang.

(BCL) 總是，福音的確代先傳佇萬邦。

11

(THR) . Lâng thoa lín, chiong lín sàng-kau ê sî, bo̍h-tit tāi-seng khòa-lū beh cháiⁿ-iūⁿ kóng; tng hit sî só͘ siúⁿ-sù lín kóng ê lín tio̍h kóng i; in-ūi m̄ sī lín ka-kī kóng, chiū-sī Sèng Sîn teh kóng.

(BCL) 人拖恁將恁送交的時，莫得代先掛慮欲怎樣講；當彼時，所賞賜恁講的，恁著講伊；因為呣是恁家己講，就是聖神講。

12

(THR) . Hiaⁿ-tī beh chiong hiaⁿ-tī sàng-kau khì sí; pē khóan-thāi kiáⁿ iā sī án-ni; kiáⁿ-jî beh khí-lâi kong-kek pē-bú hō͘ i sí.

(BCL) 兄弟欲將兄弟送交去死，父款待子也是按呢；子兒欲起來攻擊父母，互伊死；

13

(THR) . Iā lín in-ūi góa ê miâ beh hō͘ chèng lâng òan-hūn; to̍k-to̍k thun-lún kàu lō͘-bé ê, i beh tit-tio̍h kiù.

(BCL) 也恁因為我的名欲互眾人怨恨。獨獨吞到路尾的，伊欲得著救。」

14

(THR) . Chóng-sī lín khòaⁿ-kìⁿ hit ê chân-hāi khó-ò͘ⁿ ê khiā tī i m̄ eng-kai khiā ê só͘-chāi (tha̍k ê lâng tio̍h hiáu-ngō͘), hit sî tī Iû-thài ê tio̍h cháu-khì soaⁿ-nı̍h;

(BCL) 「總是恁看見彼個殘害可惡的，徛佇伊呣應該徛的所在（讀的人著曉悟）。彼時，佇猶太的，著走去山裡；

15

(THR) . tī chhù-téng ê bo̍h-tit jı̍p-khì chhù-lāi the̍h sím-mı̍h;

(BCL) 佇厝頂的，莫得入去厝內提甚麼；

16

(THR) . tī hn̂g-nı̍h ê bo̍h-tit tò-lâi hiahN i ê saⁿ.

(BCL) 佇園裡的，莫得倒來　伊的衫。

17

(THR) . Tng hiah ê jı̍t ū sin-īn kap hō͘ eⁿ-á chia̍h lin ê hū-jîn-lâng ū chai-ē!

(BCL) 當許個日，有娠孕及互嬰仔食奶的婦仁人有災禍！

18

(THR) . Lín tio̍h kî-tó bián-tit tang-thiⁿ sî tú-tio̍h chit ê sū.

(BCL) 恁著祈禱，免得冬天時抵著此個事。

19

(THR) . In-ūi hiah ê jı̍t beh ū hōan-lān, chiū-sī tùi Siōng-tè chhòng-chō sè-kan ê khí-thâu, kàu chit tia̍p bē ū án-ni, āu-lâi iā bô.

(BCL) 因為許個日欲有患難，就是對上帝創造世間的起頭到此霎，未有按呢，後來也無。

20

(THR) . Nā m̄ sī Chú kiám-chió hiah ê jı̍t, chiū hōan ū jio̍k-thé ê bô chı̍t-ê tit kiù. Chóng-sī ūi-tio̍h kéng ê peh-sìⁿ, chiū-sī I só͘ kéng ê, ê iân-kò͘, I ū kiám-chió hiah ê jı̍t.

(BCL) 若呣是主減少許個日，就凡有肉體的，無一個得救；總是為著揀的百姓，就是伊所揀者的緣故，伊有減少許個日。

21

(THR) . Hit sî nā ū lâng kā lín kóng, Ki-tok tī chia, á-sī kóng, Tī hia, bo̍h-tit sìn.

(BCL) 彼時若有人給恁講：『基督佇遮』，抑是講：『佇遐』，莫得信！

22

(THR) . In-ūi beh ū ké Ki-tok ké sian-ti khí-lâi, kiâⁿ sîn-jiah kap tiāu-thâu; beh sī ōe, liân kéng ê peh-sìⁿ, iā bê-he̍k in.

(BCL) 因為欲有假基督、假先知起來，行神蹟及兆頭，欲是會，連揀的百姓也迷惑。

23

(THR) . Chóng-sī lín tio̍h kín-sīn; góa í-keng tāi-seng lóng kā lín kóng.

(BCL) 總是恁著謹慎。我已經代先攏給恁講。」

24

(THR) . Tng hiah ê jı̍t, hit ê hōan-lān ê liáu-āu, jı̍t beh o͘-àm, ge̍h bô chhut i ê kng,

(BCL) 「當許個日，彼個患難的了後，日欲黑暗，月無出伊的光，

25

(THR) . chhiⁿ tùi thiⁿ ka-la̍uh, tī thiⁿ-nı̍h ê siōng beh tín-tāng.

(BCL) 星對天磕落，佇天裡的象欲振動。

26

(THR) . Hit sî beh khòaⁿ-kìⁿ Jîn-chú ēng tōa kôan-lêng kap êng-kng, tī hûn-tiong lîm-kàu.

(BCL) 彼時，欲看見人子用大權能及榮光，佇雲中臨到。

27

(THR) . Hit sî I beh chhe I ê thiⁿ-sài tùi sì-hng chū-chı̍p I só͘ kéng ê peh-sìⁿ, tùi tōe-ke̍k kàu thiⁿ-piⁿ.

(BCL) 彼時伊欲差伊的天使，對四方，聚集伊所揀的百姓，對地極到天邊。」

28

(THR) . Lín tio̍h o̍h bû-hoa-kó chhiū chit ê phì-jū; tng ki nńg hio̍h hoat ê sî, lín chiū chai hē-thiⁿ kūn lah.

(BCL) 「恁著學無花果樹此個譬喻：當枝軟葉發的時，恁就知夏天近啦。

29

(THR) . Án-ni lín khòaⁿ chiah ê sū, tio̍h chai sī kūn, kàu mn̂g-kháu lah.

(BCL) 按呢，恁看諸個事，著知是近，到門口啦。

30

(THR) . Góa sı̍t-chāi kā lín kóng, Chit sè-tāi iáu-bē kè-khì, kàu chiah ê tāi-chì lóng chiâⁿ.

(BCL) 我實在給恁講，此世代猶未過去，到諸個代誌攏成。

31

(THR) . Thiⁿ tōe beh hòe-bô, góa ê ōe bōe hòe-bô.

(BCL) 天地欲廢無，我的話廢無。」

32

(THR) . Nā-sī lūn hit jı̍t hit sî lâng m̄ chai, tī thiⁿ-nı̍h ê thiⁿ-sài iā m̄ chai. Kiáⁿ iā m̄ chai, to̍k-to̍k Pē chai i.

(BCL) 「若是論彼日，彼時，人呣知，佇天裡的天使也呣知，子也呣知，獨獨父知伊。

33

(THR) . Tio̍h kín-sīn kéng-séng lâi kî-tó, in-ūi lín m̄ chai hit ê kî sī tī sím-mı̍h sî.

(BCL) 著謹慎，警醒來祈禱，因為恁呣知彼個期是佇甚麼時。

34

(THR) . Sī chhin-chhiūⁿ chı̍t lâng lī-khui i ê ke, khì chhut-gōa, chiong kôan kau-tāi i chiah ê lô͘-po̍k, ū phài kang hō͘ ta̍k lâng chòe, koh hoan-hù kò͘-mn̂g ê tio̍h tiuⁿ-tî.

(BCL) 是親像一人離開伊的家，去出外，將權交代伊諸個奴僕，有派工互逐人做，閣吩咐顧門者著張持。

35

(THR) . Só͘-í lín tio̍h tiuⁿ-tî, in-ūi lín m̄ chai lín ê Chú sím-mı̍h sî beh lâi, he̍k-sī jı̍t-àm, he̍k-sī pòaⁿ-mî, he̍k-sī koe thî, he̍k-sī thiⁿ-kng chá;

(BCL) 所以，恁著張持；因為恁呣知恁的主甚麼時欲來，或是日暗，或是半暝，或是雞啼，或是天光早；

36

(THR) . kiaⁿ-liáu I hut-jiân lâi tú-tio̍h lín teh khùn.

(BCL) 驚了伊忽然來，抵著恁睏。

37

(THR) . Góa só͘ kā lín kóng ê, iā kā chèng lâng kóng, Tio̍h tiuⁿ-tî.

(BCL) 我所給恁講的，也給眾人講：著張持！」

Bible Color Mark

• 台語漢字羅馬本
• 巴克禮全羅