馬可福音 第 3 章

1

(THR) Iâ-so͘ koh jı̍p hōe-tn̂g; tī hia ū lâng chı̍t chhiú ko͘-tâ ê.

(BCL) 耶穌閣入會堂，佇遐有人一手枯焦的。

2

(THR) . In tng-khòaⁿ I tī an-hioh-jı̍t beh i-tī i á bô; ì-sù ài beh kò I.

(BCL) 當看伊佇安息日欲醫治伊抑無，意思愛欲告伊。

3

(THR) . I chiū kā chhiú ko͘-tâ ê kóng, Khí-lâi, khiā tī tiong-ng.

(BCL) 伊就給手枯焦的講：「起來，徛佇中央。」

4

(THR) . Chiū kā in kóng, An-hioh-jı̍t kiâⁿ hó, kiâⁿ pháiⁿ, kiù sìⁿ-miā, hāi sìⁿ-miā, tá-lo̍h chı̍t hāng sī ha̍p? In chēng-chēng.

(BCL) 就給講：「安息日行好行歹，救生命害生命，叨落一項是合？」靜靜。

5

(THR) . I chiū siū-khì, sì-kòe khòaⁿ in, iu-būn in ê sim ngī, kā hit ê lâng kóng, Chhun lí ê chhiú. I chiū chhun-khì, chhiú chiū hó-hó.

(BCL) 伊就受氣四界看，憂悶的心硬，給彼個人講：「伸你的手！」伊就伸去，手就好好。

6

(THR) . Hoat-lī-sài lâng chhut-khì, chiū sûi-sî kap Hi-lu̍t ê tóng saⁿ-kap kè-bô͘ kong-kek Iâ-so͘, khòaⁿ thang cháiⁿ-iūⁿ bia̍t I.

(BCL) 法利賽人出去，就隨時及希律的黨相及計謀攻擊耶穌看通怎樣滅伊。

7

(THR) . Iâ-so͘ kap I ê ha̍k-seng thè-khì hái-piⁿ, ū kui tōa tīn ê lâng tùi Ka-lī-lī tè I;

(BCL) 耶穌及伊的學生退去海邊，有歸大陣的人對加利利隨伊。

8

(THR) . iā ū tùi Iû-thài, Iâ-lō͘-sat-léng, Í-thó͘-mái. Iok-tàn hô gōa, kap Chhui-lô Se-tùn kéng-lāi kui tōa tīn ê lâng thiaⁿ-kìⁿ I só͘ kiâⁿ hiah-nı̍h tōa ê sū, chiū lâi chiū-kūn I.

(BCL) 也有對猶太、耶路撒冷、以土買、約但河外，及推羅、西頓境內，歸大陣的人聽見伊所行許呢大的事，就來就近伊。

9

(THR) . In-ūi lâng chōe, I chiū kā I ê ha̍k-seng kóng tio̍h pī-pān chûn-á lâi thèng-hāu, bián-tit in oe-khoeh I.

(BCL) 因為人多，伊就給伊的學生講著備辦船仔來聽候，免得挨夾伊。

10

(THR) . In-ūi I bat i-hó chōe-chōe lâng, tì-kàu hōan ū phòa-pīⁿ ê pek-óa, ài beh bong I.

(BCL) 因為伊曾醫好多多人，致到凡有破病的，迫倚愛欲摸伊。

11

(THR) . Hiah ê siâ-sîn chı̍t ē khòaⁿ-kìⁿ I, chiū phak tī I ê bīn-chêng âu-kiò kóng, Lí sī Siōng-tè ê Kiáⁿ.

(BCL) 許個邪神一下看見伊，就仆佇伊的面前，喉叫講：「你是上帝的子。」

12

(THR) . I chia̍p-chia̍p kéng-kài in, bo̍h-tit kā I pò-iông.

(BCL) 伊捷捷警戒，莫得給伊報揚。

13

(THR) . I chiūⁿ soaⁿ, chiàu ka-kī só͘ ài lâi tiàu lâng; in lâi chiū-kūn I.

(BCL) 伊上山，照家己所愛來召人；來就近伊。

14

(THR) . Chiū siat-lı̍p cha̍p-jī lâng, thang kap I siông-siông tī-teh, iā thang chhe in khì soan-thôan tō-lí,

(BCL) 就設立十二人，通及伊常常佇，也通差去宣傳道理，

15

(THR) . koh ū kóaⁿ kúi ê kôan.

(BCL) 閣有趕鬼的權。

16

(THR) . Chiū chheng Se-bûn chòe Pí-tek.

(BCL) 就稱西門做彼得，

17

(THR) . Koh ū Se-pí-thài ê kiáⁿ Ngá-kok, kap Ngá-kok ê hiaⁿ-tī Iok-hān; chit nn̄g lâng I chheng in chòe Pòan-nî-kî, chiū-sī Lûi ê kiáⁿ;

(BCL) 閣有西庇太的子雅各及雅各的兄弟約翰（此二人伊稱做半尼其，就是雷的子），

18

(THR) . koh ū An-tek-lia̍t, Hui-le̍k, Pa-to-lô-mái, Má-thài, To-má, A-le̍k-hui ê kiáⁿ Ngá-kok, koh Ta̍t-thài, kap Ka-ná-nî ê Se-bûn,

(BCL) 閣有安得烈、腓力、巴多羅買、馬太、多馬、亞勒腓的子雅各，閣達太，及加拿尼的西門，

19

(THR) . kap bōe I ê Ka-lio̍k lâng Iû-tāi.

(BCL) 及賣伊的加略人猶大。

20

(THR) . Iâ-so͘ jı̍p chhù. Chèng lâng koh chū-chı̍p, tì-kàu in bōe kò͘-tit chia̍h.

(BCL) 耶穌入厝，眾人閣聚集，致到顧得食。

21

(THR) . I ê chhin-lâng thiaⁿ-kìⁿ, chiū chhut-lâi beh kā I lia̍h-teh; in-ūi kóng, I sī tian-kông.

(BCL) 伊的親人聽見，就出來欲給伊掠，因為講伊是癲狂。

22

(THR) . Tùi Iâ-lō͘-sat-léng lo̍h-lâi ê keng-ha̍k-sū kóng, I sī hō͘ Pia̍t-se-pok hū-sin; koh kóng, I sī óa-khò kúi-ông lâi kóaⁿ kúi.

(BCL) 對耶路撒冷落來的經學講士講：「伊是互別西卜附身」；閣講：「伊是倚靠鬼王來趕鬼。」

23

(THR) . I kiò in lâi, siat phì-jū kā in kóng, Sat-tàn thái-thó ōe kóaⁿ Sat-tàn?

(BCL) 伊叫來，設譬喻給講：「撒旦豈可會趕撒但？

24

(THR) . Kok nā ka-kī cheng-piàⁿ, hit ê kok chiū khiā bōe tiâu.

(BCL) 國若家己爭拚，彼個國就徛住；

25

(THR) . Ke nā ka-kī cheng-piàⁿ, hit ê ke iā khiā bōe tiâu.

(BCL) 家若家己爭拚，彼個家也徛住。

26

(THR) . Sat-tàn nā khí-lâi ka-kī cheng-piàⁿ, i iā khiā bōe tiâu, tek-khak ōe bia̍t.

(BCL) 撒但若起來家己爭拚，伊也徛住，的確會滅。

27

(THR) . Bô lâng ōe jı̍p béng lâng ê chhù lâi kiap i ê ke-hé; tio̍h tāi-seng pa̍k hit ê béng lâng, jiân-āu chiah beh kiap i ê chhù.

(BCL) 無人會入猛人的厝，來劫伊的家伙；著代先縛彼個猛人，然後才欲劫伊的厝。

28

(THR) . Góa sı̍t-chāi kā lín kóng, Kìⁿ-nā sè-kan lâng só͘ hōan ê chōe, kap in só͘ pòng-to̍k it-chhè pòng-to̍k ê ōe, lóng beh sià-bián in;

(BCL) 我實在給恁講，見若世間人所犯的罪及所謗瀆一切謗瀆的話攏欲赦免；

29

(THR) . to̍k-to̍k kìⁿ-nā pòng-to̍k Sèng Sîn ê, éng-óan bô tit-tio̍h sià-bián, chiū-sī hōan-tio̍h éng sè-tāi ê chōe.

(BCL) 獨獨見若謗瀆聖神的，永遠無得著赦免，就是犯著永世代的罪。」

30

(THR) . Che sī in-ūi hiah ê lâng kóng, I hōan-tio̍h siâ-sîn.

(BCL) 這是因為許個人講：「伊患著邪神。」

31

(THR) . I ê lāu-bú kap I ê hiaⁿ-tī lâi khiā tī gōa-bīn, chhe lâng khì kiò I.

(BCL) 伊的老母及伊的兄弟來，徛佇外面，差人去叫伊。

32

(THR) . Ū kui tīn ê lâng ûi I teh chē; ū lâng kā I kóng, Lí khòaⁿ, lí ê lāu-bú kap lí ê hiaⁿ-tī tī gōa-bīn teh chhē lí.

(BCL) 有歸陣的人圍伊坐，有人給伊講：「你看，你的老母及你的兄弟佇外面尋你。」

33

(THR) . I chiū ìn kóng, Sím-mı̍h lâng sī góa ê lāu-bú, góa ê hiaⁿ-tī ah?

(BCL) 伊就應講：「甚麼人是我的老母？我的兄弟啊？」

34

(THR) . Chiū sì-kòe khòaⁿ hiah ê ûi I teh chē ê lâng kóng,

(BCL) 就四界看許個圍伊坐的人，講：「你看，我的老母，及我的兄弟。

35

(THR) . Lí khòaⁿ, góa ê lāu-bú kap góa ê hiaⁿ-tī. In-ūi kìⁿ-nā kiâⁿ Siōng-tè ê chí-ì ê, chiū-sī góa ê hiaⁿ-tī chí-bē kap lāu-bú.

(BCL) 因為見若行上帝的旨意的就是我的兄弟姊妹及老母。」

Bible Color Mark

• 台語漢字羅馬本
• 巴克禮全羅