彌迦書 第 6 章

1

(THR) Taⁿ tio̍h thiaⁿ Iâ-hô-hoa só͘ kóng--ê: Khí-lâi, lí tio̍h tī chiah ê soaⁿ ê bīn-chêng piān-lūn, hō͘ chiah ê soaⁿ-niá thiaⁿ-kìⁿ lí ê siaⁿ.

(BCL) 今著聽耶和華所講的！起來，你著佇諸個山的面前辯論，互諸個山嶺聽見你的聲。

2

(THR) Chiah ê soaⁿ kap tōe kian-kò͘ ê kun-ki ah, tio̍h thiaⁿ Iâ-hô-hoa cheng-piān ê ōe; in-ūi Iâ-hô-hoa beh kap I ê peh-sìⁿ cheng-piān, koh beh kap Í-sek-lia̍t pâi chêng-lí.

(BCL) 諸個山及地堅固的根基啊，著聽耶和華爭辯的話！因為耶和華欲及伊的百姓爭辯，閣欲及以色列排情理。

3

(THR) Góa ê peh-sìⁿ ah, Góa bat tùi lí chòe sím-mı̍h? Góa ū sím-mı̍h hō͘ lí ûi-lân? lí thang tùi Góa chí-chhut.

(BCL) 我的百姓啊，我曾對你做甚麼？我有甚麼互你為難？你通對我指出。

4

(THR) Góa bat chhōa lí chhut Ai-kı̍p tōe, kiù-sio̍k lí thoat-lī chòe lô͘-châi ê chhù; chhe Mô͘-se A-lûn Bí-lī-àm tī lí ê bīn-chêng.

(BCL) 我曾導你出埃及地，救贖你脫離做奴才的厝；差摩西、亞倫、米利暗佇你的面前。

5

(THR) Góa ê peh-sìⁿ ah, lín tio̍h kì-tit Mô͘-ap ông Pa-le̍k só͘ kè-bô͘--ê, kap Pí-jíⁿ ê kiáⁿ Pa-lân ìn i ê ōe, tùi Sı̍p-têng kàu Kiat-kah ê sū, thang hō͘ lín chai Iâ-hô-hoa só͘-kiâⁿ ê kong-gī.

(BCL) 我的百姓啊，恁著記得摩押王巴勒所計謀的及比珥的子巴蘭應伊的話，對什亭到吉甲的事，通互恁知耶和華所行的公義。

6

(THR) Góa chiū-kūn Iâ-hô-hoa, kūi-pài chì-kôaiⁿ ê Siōng-tè, tio̍h ēng sím-mı̍h ah? tio̍h ēng sio-chè á-sī móa-nî ê gû-á lâi chiū-kūn I ah?

(BCL) 我就近耶和華，跪拜至高的上帝，著用甚麼啊？著用燒祭抑是滿年的牛仔來就近伊啊？

7

(THR) Iâ-hô-hoa hoaⁿ-hí chheng-chheng chiah ê kang-iûⁿ mah? á-sī bān-bān tiâu-khoe ê iû mah? góa tio̍h ūi ka-kī ê chōe-kòa hiàn góa ê tōa-kiáⁿ mah? ūi-tio̍h góa sim-lāi ê chōe-ok, hiàn góa pún-sin só͘ siⁿ ê mah?

(BCL) 耶和華歡喜千千隻的公羊嗎？抑是萬萬條溪的油嗎？我著為家己的罪過獻我的大子嗎？為著我心內的罪惡獻我本身所生的嗎？

8

(THR) Lâng ah, I bat chí-sī lí sím-mı̍h sī hó; Iâ-hô-hoa ài lí sím-mı̍h? To̍k-to̍k ài lí kiâⁿ kong-gī, sim chûn lîn-bín, khiam-pi kap lí ê Siōng-tè saⁿ-kap kiâⁿ.

(BCL) 人啊，伊曾指示你甚麼是好。耶和華愛你甚麼？獨獨愛你行公義，心存憐憫，謙卑及你的上帝相及行。

9

(THR) Iâ-hô-hoa ê siaⁿ tùi siâⁿ teh kiò, tì-hūi--ê beh kèng-ùi Lí ê miâ, lín tio̍h thiaⁿ kóaiⁿ-á, iā chī-chūi tiāⁿ-tio̍h--i.

(BCL) 耶和華的聲對城叫，智慧者欲敬畏你的名。恁著聽枴仔，也是誰定著伊。

10

(THR) Pháiⁿ-lâng ê ke iáu ū put-gī ê chîⁿ mah? iáu ū khó-ò͘ⁿ ê sòe i-hoat mah?

(BCL) 歹人的家猶有不義的錢嗎？猶有可惡的細伊法嗎？

11

(THR) Góa nā ēng bô kong-tō ê thian-pêng, tē-á-lāi ū ké ê chhìn-thûi, kiám ōe sǹg chòe chheng-khì mah?

(BCL) 我若用無公道的天秤，袋仔內有假的秤錘，豈會算做清氣嗎？

12

(THR) Hiah-ê hó-gia̍h lâng móa-móa kiông-pō, khiā-khí ê peh-sìⁿ kóng pe̍h-chha̍t ōe, in ê chhùi-chı̍h khúi-khiat.

(BCL) 許個好額人滿滿強暴；徛起的百姓講白賊話，的嘴舌詭譎。

13

(THR) Só͘-í Góa phah lí, hō͘ lí siū tāng-siong, in-ūi lí ê chōe hō͘ lí hong-hòe.

(BCL) 所以，我拍你，互你受重傷，因為你的罪互你荒廢。

14

(THR) Lí beh chia̍h, chóng-sī chia̍h bōe pá; lí ê khang-hu beh tī lí lāi-bīn; lí beh poaⁿ-sóa, chóng-sī bōe-ōe an-jiân tòa mı̍h-kiāⁿ khì, lí só͘ tòa-khì--ê, Góa lóng beh kau hō͘ to-kiàm.

(BCL) 你欲食，總是食飽；你的空虛欲佇你內面。你欲搬徙，總是會安然帶物件去；你所帶去者，我攏欲交互刀劍。

15

(THR) Lí beh iā chéng, ia̍h bô thang siu-koah; ta̍h kaⁿ-ná ia̍h bô tit-tio̍h iû thang boah; ta̍h phû-tô ia̍h bô chiú thang lim.

(BCL) 你欲撒種，亦無通收割；踏橄欖，亦無得著油通抹；踏葡萄，亦無酒通飲。

16

(THR) In-ūi lí siú Àm-lī ê lu̍t-hoat, kap A-hap ê ke it-chhè ê só͘ kiâⁿ, sūn-thàn in ê kè-bô͘, tì-kàu Góa hō͘ lí hong-hòe, hō͘ khiā-khí tī-hia ê peh-sìⁿ siū lâng thí-chhiò; lín iā beh tam-tng Góa ê peh-sìⁿ ê lêng-jio̍k.

(BCL) 因為你守暗利的律法，及亞哈的家一切的所行，順趁的計謀；致到我互你荒廢，互徛起佇遐的百姓受人恥笑，恁也欲擔當我的百姓的凌辱。

Bible Color Mark

• 台語漢字羅馬本
• 巴克禮全羅