詩篇 第 11 章

1

(THR) Tāi-pı̍t ê si, kau hō͘ Ga̍k-koaⁿ.1) Góa sī óa-khò Iâ-hô-hoa; Lín siáⁿ-sū tùi góa ê sîn-hûn kóng, Lí tio̍h chhin-chhiūⁿ chiáu, pe--khì lín ê soaⁿ.

(BCL) 〔大衛的詩，交互樂官。〕我是倚靠耶和華；恁啥事對我的神魂講：你著親像鳥飛去恁的山。

2

(THR) Khòaⁿ ah, pháiⁿ-lâng tiuⁿ keng, An in ê chìⁿ tī keng-hiân, Beh àm-chīⁿ siā sim-lāi chèng-tı̍t ê lâng.

(BCL) 看啊，歹人張弓，安的箭佇弓弦，欲暗靜射心內正直的人。

3

(THR) Tōe-ki nā tó-hōai, Gī-lâng iáu ōe chòe sím-mı̍h?

(BCL) 地基若倒壞，義人猶會做甚麼？

4

(THR) Iâ-hô-hoa tī I ê sèng-tiān, Iâ-hô-hoa ê pó-chō tī thiⁿ--nih; I ê ba̍k-chiu teh khòaⁿ, I ê ba̍k-chiu kàm-chhat sè-kan-lâng.

(BCL) 耶和華佇伊的聖殿；耶和華的寶座佇天裡；伊的目睭看，伊的目睭鑑察世間人。

5

(THR) Iâ-hô-hoa chhì-giām gī-lâng, to̍k-to̍k pháiⁿ-lâng kap ài kiông-pō--ê, I ê sim òan-hūn i.

(BCL) 耶和華試驗義人；獨獨歹人及愛強暴者，伊的心怨恨伊。

6

(THR) I beh chiong lô-bāng pha tī pháiⁿ-lâng ê sin-chiūⁿ; Ū hé-iām, jiû-n̂g, kap jia̍t-jia̍t ê hong, chòe in poe-tiong ê hūn-gia̍h.

(BCL) 伊欲將羅網拋佇歹人的身上；有火焰、硫磺，及熱熱的風，做杯中的份額。

7

(THR) In-ūi Iâ-hô-hoa sī kong-gī; I hoaⁿ-hí kong-gī, Chèng-tı̍t ê lâng beh kìⁿ-tio̍h I ê bīn.

(BCL) 因為耶和華是公義，伊歡喜公義；正直的人欲見著伊的面。

Bible Color Mark

• 台語漢字羅馬本
• 巴克禮全羅