詩篇 第 119 章

1

(THR) Só͘ kiâⁿ ôan-chôan, chun-thàn Iâ-hô-hoa lu̍t-hoat ê, Chit-hō lâng ū hok-khì.

(BCL) 所行完全、遵趁耶和華律法者，此號人有福氣！

2

(THR) Chun-siú I kan-chèng ê ōe, Choan-sim chhē I--ê, chit-hō lâng ū hok-khì.

(BCL) 遵守伊干證的話，專心尋伊者，此號人有福氣！

3

(THR) In bô chòe put-gī ê sū; In chun-thàn I ê tō-lō͘.

(BCL) 無做不義的事，遵趁伊的道路。

4

(THR) Lí bat chiong Lí kà-sī ê ōe hoan-hù góan; Sī ài góan un-khûn chun-siú.

(BCL) 你曾將你教示的話吩咐阮，是愛阮殷勤遵守。

5

(THR) Gōan góa ê chhu-hiòng tiāⁿ-tio̍h, Lâi siú Lí ê lu̍t-lē.

(BCL) 願我的趨向定著，來守你的律例。

6

(THR) Góa tùi-tiōng Lí it-chhè ê kài-bēng, Chiū put-tì kiàn-siàu.

(BCL) 我對重你一切的誡命，就不致見誚。

7

(THR) Góa ha̍k-sı̍p Lí kong-gī ê phòaⁿ-tòan, Chiū beh ēng chèng-tı̍t ê sim kám-siā Lí.

(BCL) 我學習你公義的判斷，就欲用正直的心感謝你。

8

(THR) Góa beh siú Lí ê lu̍t-lē; Kiû Lí m̄-thang it-chīn pàng-sak góa.

(BCL) 我欲守你的律例；求你呣通一盡放拺我！

9

(THR) Siàu-liân lâng tio̍h ēng sím-mı̍h lâi chheng-khì i ê só͘-kiâⁿ? Sī tio̍h chiàu Lí ê ōe lâi sòe-jī kiâⁿ.

(BCL) 少年人著用甚麼來清氣伊的所行？是著照你的話來細膩行！

10

(THR) Góa choan-sim chhē Lí; Kiû Lí m̄-thang hō͘ góa bê-lō͘ lī-khui Lí ê kài-bēng.

(BCL) 我專心尋你；求你呣通互我迷路離開你的誡命。

11

(THR) Góa chiong Lí ê giân-gú khǹg tī góa ê sim-lāi, Bián-tit góa tek-chōe Lí.

(BCL) 我將你的言語囥佇我的心內，免得我得罪你。

12

(THR) Iâ-hô-hoa ah, Lí sī eng-kai siū o-ló--ê; Kiû Lí chiong Lí ê lu̍t-lē kà-sī góa.

(BCL) 耶和華啊，你是應該受謳咾者！求你將你的律例教示我！

13

(THR) Lí só͘ kóng it-chhè ê phòaⁿ-sû, Góa ēng chhùi-tûn pò-iông--i.

(BCL) 你所講一切的判詞我用嘴唇報揚伊。

14

(THR) Góa hoaⁿ-hí Lí kan-chèng ê lō͘, Chhin-chhiūⁿ hoaⁿ-hí it-chhè ê châi-bu̍t.

(BCL) 我歡喜你干證的路，親像歡喜一切的財物。

15

(THR) Góa beh chēng-chēng siūⁿ Lí kà-sī ê ōe, Ia̍h beh chù-tiōng Lí ê tō-lō͘.

(BCL) 我欲靜靜想你教示的話，亦欲注重你的道路。

16

(THR) Góa beh tī Lí ê lu̍t-lē-tiong ka-kī khòai-lo̍k, Góa bô bōe-kì-tit Lí ê ōe.

(BCL) 我欲佇你的律例中家己快樂；我無記得你的話。

17

(THR) Kiû Lí ēng tōa-un khóan-thāi Lí ê lô͘-po̍k, hō͘ góa tit-tio̍h o̍ah; Góa chiū beh siú Lí ê ōe.

(BCL) 求你用大恩款待你的奴僕，互我得著活，我就欲守你的話。

18

(THR) Kiû Lí khui góa ê ba̍k-chiu, Hō͘ góa khòaⁿ-chhut Lí lu̍t-hoat-tiong ê kî-biāu.

(BCL) 求你開我的目睭，互我看出你律法中的奇妙。

19

(THR) Góa tī tōe-chiūⁿ sī chòe kià-kha--ê; Kiû Lí m̄-thang tùi góa ún-ba̍t Lí ê kài-bēng.

(BCL) 我佇地上是做寄腳者；求你呣通對我隱密你的誡命！

20

(THR) Góa ê sim piak-lı̍h, In-ūi sî-siông chhiat-chhiat him-bō͘ Lí ê phòaⁿ-sû.

(BCL) 我的心爆裂，因為時常切切欣慕你的判詞。

21

(THR) Lí chek-pī kiau-ngō͘ siū chiù-chó͘ ê lâng, Chiū-sī bê-lō͘ lī-khui Lí ê kài-bēng ê lâng.

(BCL) 你責備驕傲受咒詛的人，就是迷路離開你的誡命的人。

22

(THR) Kiû Lí kā góa tû--khì lêng-jio̍k kap khòaⁿ-khin, In-ūi góa siú Lí kan-chèng ê ōe.

(BCL) 求你給我除去凌辱及看輕，因為我守你干證的話。

23

(THR) Kùi-cho̍k chē-teh, lām-sám gī-lūn góa; Nā-sī Lí ê lô͘-po̍k chēng-chēng siūⁿ Lí ê lu̍t-lē.

(BCL) 貴族坐濫糝議論我，若是你的奴僕靜靜想你的律例。

24

(THR) Lí kan-chèng ê ōe sī góa só͘ hoaⁿ-hí--ê, Sī góa ê bô͘-sū.

(BCL) 你干證的話是我所歡喜的，是我的謀士。

25

(THR) Góa ê sìⁿ-miā kha̍h-tiâu tī thô͘-hún, Kiû Lí, chiàu Lí ê ōe, chín-kiù góa o̍ah.

(BCL) 我的生命敆住佇土粉；求你照你的話拯救我活！

26

(THR) Góa kóng-khí góa só͘ kiâⁿ ê lō͘, Lí ìn góa; Kiû Lí chiong Lí ê lu̍t-lē kà-sī góa.

(BCL) 我講起我所行的路，你應我；求你將你的律例教示我！

27

(THR) Kiû Lí hō͘ góa bêng-pe̍k Lí kà-sī ê lō͘, Góa chiū chēng-chēng siūⁿ Lí ê kî-sū.

(BCL) 求你互我明白你教示的路，我就靜靜想你的奇事。

28

(THR) Góa ê sim-sîn in-ūi iu-khó͘ lâi siau-iûⁿ; Kiû Lí, chiàu Lí ê ōe, hō͘ góa ióng-kiāⁿ.

(BCL) 我的心神因為憂苦來消溶；求你照你的話互我勇健！

29

(THR) Kiû Lí hō͘ góa lī-khui kan-chà ê lō͘, Chiong Lí ê lu̍t-hoat un-sù góa.

(BCL) 求你互我離開奸詐的路，將你的律法恩賜我！

30

(THR) Góa ū kéng sìn-sı̍t ê lō͘, Chiong Lí ê phòaⁿ-sû hē tī góa ê bīn-chêng.

(BCL) 我有揀信實的路，將你的判詞下佇我的面前。

31

(THR) Góa lôan-bō͘ Lí kan-chèng ê ōe; Iâ-hô-hoa ah, kiû Lí m̄-thang hō͘ góa kiàn-siàu.

(BCL) 我戀慕你干證的話；耶和華啊，求你呣通互我見誚！

32

(THR) Lí khui-khoah góa ê sim ê sî, Góa chiū cháu tī Lí kài-bēng ê lō͘.

(BCL) 你開闊我的心的時，我就走佇你誡命的路。

33

(THR) Iâ-hô-hoa ah, kiû Lí chiong Lí lu̍t-lē ê lō͘ chí-sī góa; Góa beh thiat-tí chun-siú.

(BCL) 耶和華啊，求你將你律例的路指示我，我欲徹底遵守！

34

(THR) Kiû Lí hō͘ góa tì-hūi, góa chiū siú Lí ê lu̍t-hoat; Koh beh choan-sim chip-siú.

(BCL) 求你互我智慧，我就守你的律法，閣欲專心執守。

35

(THR) Kiû Lí hō͘ góa kiâⁿ Lí kài-bēng ê lō͘, In-ūi chit ê lō͘ sī góa só͘ hoaⁿ-hí ê.

(BCL) 求你互我行你誡命的路，因為此個路是我所歡喜的。

36

(THR) Kiû Lí hō͘ góa ê sim ǹg Lí kan-chèng ê ōe, Bô ǹg put-gī ê chîⁿ-châi.

(BCL) 求你互我的心向你干證的話，無向不義的錢財。

37

(THR) Kiû Lí hō͘ góa ê ba̍k-chiu o̍at-cháu, bô khòaⁿ hu-ké; Koh hō͘ góa tī Lí ê lō͘-tiong lâi o̍ah.

(BCL) 求你互我的目睭越走無看虛假，閣互我佇你的路中來活。

38

(THR) Lí ê lô͘-po̍k kèng-ùi Lí, Kiû Lí ūi i kian-kò͘ Lí ê ōe.

(BCL) 你的奴僕敬畏你，求你為伊堅固你的話！

39

(THR) Kiû Lí hō͘ góa só͘ kiaⁿ ê lêng-jio̍k lī-khui góa; In-ūi Lí ê phòaⁿ-sû sī hó.

(BCL) 求你互我所驚的凌辱離開我，因為你的判詞是好。

40

(THR) Góa him-bō͘ Lí kà-sī ê ōe; Kiû Lí, tī Lí ê kong-gī, hō͘ góa lâi o̍ah.

(BCL) 我欣慕你教示的話；求你佇你的公義互我來活！

41

(THR) Iâ-hô-hoa ah, gōan Lí chiàu Lí ê ōe, Hō͘ Lí ê chû-ài, chiū-sī Lí ê kiù-un, lîm-kàu góa.

(BCL) 耶和華啊，願你照你的話，互你的慈愛，就是你的救恩，臨到我，

42

(THR) Góa chiū ū ōe thang ìn hit ê lêng-jio̍k góa--ê; In-ūi góa óa-khò Lí ê ōe.

(BCL) 我就有話通應彼個凌辱我者，因為我倚靠你的話。

43

(THR) Kiû Lí hō͘ chin-lí ê ōe bô it-chīn lī-khui góa ê chhùi; In-ūi góa ǹg-bāng Lí ê phòaⁿ-tòan.

(BCL) 求你互真理的話無一盡離開我的嘴，因為我向望你的判斷。

44

(THR) Góa beh siông-siông siú Lí ê lu̍t-hoat, Tı̍t-kàu éng-óan.

(BCL) 我欲常常守你的律法，直到永遠。

45

(THR) Góa beh kiâⁿ tī khoan-khoah ê só͘-chāi, In-ūi góa ū káng-kiù Lí kà-sī ê ōe.

(BCL) 我欲行佇寬闊的所在，因為我有講究你教示的話。

46

(THR) Góa ia̍h beh tī kun-ông ê bīn-chêng káng-lūn Lí kan-chèng ê ōe, Ia̍h bô tì-kàu kiàn-siàu.

(BCL) 我亦欲佇君王的面前講論你干證的話，亦無致到見誚。

47

(THR) Góa beh tī Lí ê kài-bēng-tiong ka-kī khòai-lo̍k; Chiah ê kài-bēng pêng-sò͘ sī góa só͘ thiàⁿ-sioh--ê.

(BCL) 我欲佇你的誡命中家己快樂；諸個誡命平素是我所疼惜的。

48

(THR) Góa thiàⁿ-sioh Lí ê kài-bēng, góa beh tùi i kia̍h-khí chhiú; Lí ê lu̍t-lē góa ia̍h beh chēng-chēng siūⁿ i.

(BCL) 我疼惜你的誡命，我欲對伊抬起手；你的律例我亦欲靜靜想伊。

49

(THR) Kiû Lí kì-tit tùi Lí ê lô͘-po̍k só͘ èng-ún ê ōe, In-ūi Lí bat hō͘ góa ū ǹg-bāng.

(BCL) 求你記得對你的奴僕所應允的話，因為你曾互我有向望。

50

(THR) Lí ê ōe chiong góa kiù-o̍ah, Góa tī hōan-lān-tiong tùi che tit-tio̍h an-ùi.

(BCL) 你的話將我救活；我佇患難中，對這得著安慰。

51

(THR) Kiau-ngō͘ ê lâng chīn-chāi bú-bān góa; Chóng-sī góa bē-bat phian-lī Lí ê lu̍t-hoat.

(BCL) 驕傲的人盡在侮慢我，總是我未曾偏離你的律法。

52

(THR) Iâ-hô-hoa ah, góa kì-liām Lí tùi chá í-lâi ê phòaⁿ-sû, Chiū ka-kī tit-tio̍h an-ùi.

(BCL) 耶和華啊，我記念你對早以來的判詞，就家己得著安慰。

53

(THR) Góa in-ūi khì-sak Lí ê lu̍t-hoat ê pháiⁿ-lâng, Chiū tōa siū-khì, chhin-chhiūⁿ hé to̍h.

(BCL) 我因為棄拺你的律法的歹人，就大受氣，親像火。

54

(THR) Góa tī kià-kha ê chhù, Pêng-sî ēng Lí ê lu̍t-lē chòe si-koa.

(BCL) 我佇寄腳的厝，平時用你的律例做詩歌。

55

(THR) Iâ-hô-hoa ah, góa mî-kan kì-liām Lí ê miâ, Siú Lí ê lu̍t-hoat.

(BCL) 耶和華啊，我暝間記念你的名，守你的律法。

56

(THR) Góa tit-tio̍h án-ni, Sī in-ūi góa siú Lí kà-sī ê ōe.

(BCL) 我得著按呢，是因為我守你教示的話。

57

(THR) Iâ-hô-hoa sī góa ê ki-gia̍p, Góa bat kóng, Góa beh siú Lí ê ōe.

(BCL) 耶和華是我的基業；我曾講：我欲守你的話。

58

(THR) Góa bat choan-sim kiû Lí ê un, Gōan Lí chiàu Lí ê ōe lîn-bín góa.

(BCL) 我曾專心求你的恩；願你照你的話憐憫我！

59

(THR) Góa chhim-chhim siūⁿ góa só͘ kiâⁿ ê lō͘, Chiū o̍at-tńg kha ǹg Lí kan-chèng ê ōe.

(BCL) 我深深想我所行的路，就越轉腳向你干證的話。

60

(THR) Góa siú Lí ê kài-bēng, Kóaⁿ-kín bô iân-chhiân.

(BCL) 我守你的誡命，趕緊無延延。

61

(THR) Pháiⁿ-lâng ê soh pa̍k-tîⁿ góa; Chóng-sī góa bô bōe-kì-tit Lí ê lu̍t-hoat.

(BCL) 歹人的索縛纏我，總是我無記得你的律法。

62

(THR) Góa in-ūi Lí kong-gī ê phòaⁿ-tòan, Pòaⁿ-mî beh khí-lâi kám-siā Lí.

(BCL) 我因為你公義的判斷，半暝欲起來感謝你。

63

(THR) Kìⁿ-nā kèng-ùi Lí, kap siú Lí ê kà-sī ê lâng, Góa kap in chòe-phōaⁿ.

(BCL) 見若敬畏你，及守你的教示的人，我及做伴。

64

(THR) Iâ-hô-hoa ah, Lí chû-ài piàn-móa tōe-bīn; Kiû Lí chiong Lí ê lu̍t-lē kà-sī góa.

(BCL) 耶和華啊，你的慈愛遍滿地面；求你將你的律例教示我！

65

(THR) Iâ-hô-hoa ah, Lí bat hó khóan-thāi Lí ê lô͘-po̍k, Sī chiàu Lí só͘ kóng ê ōe.

(BCL) 耶和華啊，你曾好款待你的奴僕，是照你所講的話。

66

(THR) Kiû Lí chiong hó ê chhang-miâ kap tì-sek, kà-sī góa; In-ūi góa sìn Lí ê kài-bēng.

(BCL) 求你將好的聰明及智識教示我，因為我信你的誡命。

67

(THR) Góa bē siū-khó͘ í-chêng, ū kiâⁿ bê-lō͘; Chóng-sī góa taⁿ siú Lí ê ōe.

(BCL) 我未受苦以前有行迷路，總是我今守你的話。

68

(THR) Lí sī hó, só͘-kiâⁿ ia̍h sī hó; Kiû Lí chiong Lí ê lu̍t-lē kà-sī góa.

(BCL) 你是好，所行亦是好；求你將你的律例教示我！

69

(THR) Kiau-ngō͘ ê lâng chō-chok bô-iáⁿ ōe, kong-kek góa; Chóng-sī góa beh choan-sim siú Lí ê kà-sī.

(BCL) 驕傲的人造作無影話攻擊我，總是我欲專心守你的教示。

70

(THR) In ê sim tūn, chhin-chhiūⁿ iû pau-ba̍t; Chóng-sī góa hoaⁿ-hí Lí ê lu̍t-hoat.

(BCL) 的心鈍親像油包密，總是我歡喜你的律法。

71

(THR) Góa ū siū-khó͘, sī chòe góa ê lī-ek; In-ūi beh hō͘ góa ha̍k-sı̍p Lí ê lu̍t-lē.

(BCL) 我有受苦是做我的利益，因為欲互我學習你的律例。

72

(THR) Lí só͘ kóng ê lu̍t-hoat sī chòe góa ê lī-ek; Iâⁿ-kè chheng-bān ê kim-gûn.

(BCL) 你所講的律法是做我的利益，贏過千萬個金銀。

73

(THR) Lí ê chhiú chhòng-chō góa, chhiâⁿ-tî góa; Kiû Lí hō͘ góa tì-hūi, thang ha̍k-sı̍p Lí ê kài-bēng.

(BCL) 你的手創造我，成持我；求你互我智慧，通學習你的誡命！

74

(THR) Kèng-ùi Lí ê lâng khòaⁿ-kìⁿ góa chiū beh hoaⁿ-hí; In-ūi tī Lí ê ōe, góa ū ǹg-bāng.

(BCL) 敬畏你的人看見我就欲歡喜，因為佇你的話我有向望。

75

(THR) Iâ-hô-hoa ah, góa chai Lí ê phòaⁿ-tòan sī kong-gī; Lí hō͘ góa siū-khó͘ sī tùi tī sìn-sı̍t.

(BCL) 耶和華啊，我知你的判斷是公義；你互我受苦是對佇信實。

76

(THR) Kiû Lí ēng Lí ê chû-ài an-ùi góa; Chiàu Lí tùi Lí ê lô͘-po̍k só͘ kóng ê ōe.

(BCL) 求你用你的慈愛安慰我，照你對你的奴僕所講的話。

77

(THR) Gōan Lí ê chû-pi lîm-kàu góa, hō͘ góa o̍ah; In-ūi Lí ê lu̍t-hoat sī góa só͘ hoaⁿ-hí--ê.

(BCL) 願你的慈悲臨到我，互我活，因為你的律法是我所歡喜的。

78

(THR) Gōan kiau-ngō͘ ê lâng siū kiàn-siàu, in-ūi in bô lí-iû óng-khut góa; Chóng-sī góa beh chēng-chēng siūⁿ Lí ê kà-sī.

(BCL) 願驕傲的人受見誚，因為無理由枉屈我；總是我欲靜靜想你的教示。

79

(THR) Gōan kèng-ùi Lí ê lâng kui-ǹg góa; In chiū chai Lí kan-chèng ê ōe.

(BCL) 願敬畏你的人歸向我，就知你干證的話。

80

(THR) Gōan góa ê sim ôan-chôan siú Lí ê lu̍t-lē, Hō͘ góa put-tì kiàn-siàu.

(BCL) 願我的心完全守你的律例，互我不致見誚。

81

(THR) Góa ê sim-sîn him-bō͘ Lí ê kiù-un kàu hūn--khì; Chóng-sī tī Lí ê ōe, góa ū ǹg-bāng.

(BCL) 我的心神欣慕你的救恩到昏去，總是佇你的話我有向望。

82

(THR) Góa in-ūi ǹg-bāng Lí ê ōe, ba̍k-chiu hoe, Kóng, Lí sím-mı̍h sî beh an-ùi góa?

(BCL) 我因為向望你的話目睭花，講：你甚麼時欲安慰我？

83

(THR) In-ūi góa chhin-chhiūⁿ tī hé-hun-tiong ê phê-tē; Chóng-sī góa bô bōe-kì-tit Lí ê lu̍t-lē.

(BCL) 因為我親像佇火薰中的皮袋，總是我無記得你的律例。

84

(THR) Lí ê lô͘-po̍k ê jı̍t-chí ū jōa-chōe ah? Lí beh tī-sî sím-phòaⁿ khún-pek góa ê lâng.

(BCL) 你的奴僕的日子有偌多啊？你欲底時審判窘迫我的人？

85

(THR) Kiau-ngō͘ ê lâng, chiū-sī bô thàn Lí ê lu̍t-hoat--ê, Ku̍t hām-khiⁿ, beh hāi góa.

(BCL) 驕傲的人就是無趁你的律法者，掘陷坑欲害我。

86

(THR) Lí ê kài-bēng it-chīn sêng-sı̍t; in bô in-toaⁿ khún-pek góa; Kiû Lí pang-chān góa.

(BCL) 你的誡命一盡誠實；無因端窘迫我，求你幫助我。

87

(THR) In hiám-hiám bia̍t-bô góa tī sè-kan; Chóng-sī góa bô pàng-sak Lí ê kà-sī.

(BCL) 險險滅無我佇世間，總是我無放拺你的教示。

88

(THR) Kiû Lí chiàu Lí ê chû-ài hō͘ góa o̍ah; Góa chiū beh siú Lí ê chhùi kan-chèng ê ōe.

(BCL) 求你照你的慈愛互我活，我就欲守你的嘴干證的話。

89

(THR) Iâ-hô-hoa ah, Lí ê ōe an-tiāⁿ tī thiⁿ--nih, Tı̍t-kàu éng-óan.

(BCL) 耶和華啊，你的話安定佇天裡，直到永遠。

90

(THR) Lí ê sêng-sı̍t chûn kàu bān-tāi; Lí kiàn-lı̍p tōe, tōe chiū tn̂g-tn̂g tī--teh.

(BCL) 你的誠實存到萬代；你建立地，地就長長佇。

91

(THR) Chiàu Lí ê tēng-lē, in kàu-taⁿ iáu tī--teh; In-ūi bān-mı̍h lóng sī Lí ê chhe-ēng.

(BCL) 照你的定例，到今猶佇，因為萬物攏是你的差用，

92

(THR) Góa nā m̄-sī hoaⁿ-hí Lí ê lu̍t-hoat, Chiū chá-chá tī góa ê khó͘-lān-tiong bia̍t-bô lah.

(BCL) 我若呣是歡喜你的律法，就早早佇我的苦難中滅無啦！

93

(THR) Góa éng-éng bô bōe-kì-tit Lí ê kà-sī; In-ūi Lí ēng che hō͘ góa o̍ah.

(BCL) 我永永無記得你的教示，因為你用這互我活。

94

(THR) Góa sī Lí-ê, kiû Lí kiù góa; In-ūi góa chhē Lí ê kà-sī.

(BCL) 我是你的，求你救我，因為我尋你的教示。

95

(THR) Pháiⁿ-lâng tng-tán góa, beh bia̍t-bô góa, Chóng-sī góa beh káng-kiù Lí kan-chèng ê ōe.

(BCL) 歹人當等我，欲滅無我，總是我欲講究你干證的話。

96

(THR) Góa khòaⁿ só͘-ū ê ôan-chôan, lóng sī iú-hān; To̍k-to̍k Lí ê bēng-lēng ke̍k-kî khui-khoah.

(BCL) 我看所有的完全攏是有限，獨獨你的命令極其開闊。

97

(THR) Góa thiàⁿ-sioh Lí ê lu̍t-hoat kàu cháiⁿ-iūⁿ ah! Góa thong-jı̍t chēng-chēng siūⁿ.

(BCL) 我疼惜你的律法到怎樣啊！我通日靜靜想。

98

(THR) Lí ê kài-bēng siông-siông kap góa tī--teh, Hō͘ góa pí góa ê tùi-te̍k khah ū tì-hūi.

(BCL) 你的誡命常常及我佇，互我比我的對敵卡有智慧。

99

(THR) Góa pí góa lóng-chóng ê sian-siⁿ khah thong-ta̍t; In-ūi góa chēng-chēng siūⁿ Lí kan-chèng ê ōe.

(BCL) 我比我攏總的先生卡通達，因為我靜靜想你干證的話。

100

(THR) Góa pí lāu-lâng khah bêng-pe̍k, In-ūi góa siú Lí ê kà-sī.

(BCL) 我比老人卡明白，因為我守你的教示。

101

(THR) Góa kìm góa ê kha, it-chhè ê pháiⁿ-lō͘ bô kiâⁿ; Hō͘ góa thang siú Lí ê ōe.

(BCL) 我禁我的腳一切的歹路無行，互我通守你的話。

102

(THR) Góa bô phian-lī Lí ê phòaⁿ-tòan; In-ūi Lí ū kà-sī góa.

(BCL) 我無偏離你的判斷，因為你有教示我。

103

(THR) Lí ê ōe tī góa ê chiūⁿ-kiuⁿ kàu jōa tiⁿ! Tī góa ê chhùi, pí bı̍t khah-tiⁿ.

(BCL) 你的話佇我的上　到偌甜，佇我的嘴比蜜卡甜！

104

(THR) Góa tùi Lí ê kà-sī tit-tio̍h bêng-pe̍k; Só͘-í góa òan-hūn it-chhè ê siâ-lō͘.

(BCL) 我對你的教示得著明白，所以我怨恨一切的邪路。

105

(THR) Lí ê ōe chòe góa kha-chêng ê teng, Chòe góa lō͘-chiūⁿ ê kng.

(BCL) 你的話做我腳前的燈，做我路上的光。

106

(THR) Lí kong-gī ê phòaⁿ-tòan, góa bat chiù-chōa beh chun-siú; Góa koat-tòan án-ni kiâⁿ.

(BCL) 你公義的判斷，我曾咒誓欲遵守，我決斷按呢行。

107

(THR) Góa siū-khó͘ kàu-ke̍k; Iâ-hô-hoa ah, kiû Lí chiàu Lí ê ōe hō͘ góa o̍ah.

(BCL) 我受苦到極；耶和華啊，求你照你的話互我活！

108

(THR) Iâ-hô-hoa ah, kiû Lí kàm-la̍p góa ê chhùi só͘ hoaⁿ-hí hiàn ê o-ló, Koh chiong Lí ê phòaⁿ-sû kà-sī góa.

(BCL) 耶和華啊，求你鑒納我的嘴所歡喜獻的謳咾，閣將你的判詞教示我！

109

(THR) Góa ê sìⁿ-miā siông-siông tú-tio̍h gûi-hiám; Iáu-kú góa bô bōe-kì-tit Lí ê lu̍t-hoat.

(BCL) 我的生命常常抵著危險，猶久我無記得你的律法。

110

(THR) Pháiⁿ-lâng siat lô-bāng beh hāi góa; Chóng-sī góa bô phian-lī Lí ê kà-sī.

(BCL) 歹人設羅網欲害我，總是我無偏離你的教示。

111

(THR) Góa chiong Lí kan-chèng ê ōe, chòe éng-óan ê ki-gia̍p; In-ūi che sī góa sim-lāi só͘ hoaⁿ-hí--ê.

(BCL) 我將你干證的話做永遠的基業，因為這是我心內所歡喜的。

112

(THR) Góa hō͘ góa ê sim choan ǹg Lí ê lu̍t-lē; Éng-óan chun-thàn, tı̍t-kàu lō͘-bé.

(BCL) 我互我的心專向你的律例，永遠遵趁，直到路尾。

113

(THR) Nn̄g-iūⁿ sim ê lâng sī góa só͘ thòng-hūn; To̍k-to̍k Lí ê lu̍t-hoat sī góa só͘ thiàⁿ-sioh.

(BCL) 二樣心的人是我所痛恨；獨獨你的律法是我所疼惜。

114

(THR) Lí sī góa siám-bih ê só͘-chāi, koh sī góa ê tîn-pâi; Góa tī Lí ê ōe ū ǹg-bāng.

(BCL) 你是我閃匿的所在，閣是我的盾牌；我佇你的話有向望。

115

(THR) Chòe-pháiⁿ ê lâng ah, lín tio̍h lī-khui góa; Hō͘ góa thang siú góa ê Siōng-tè ê kài-bēng.

(BCL) 做歹的人啊，恁著離開我！互我通守我的上帝的誡命。

116

(THR) Kiû Lí chiàu Lí ê ōe hû-chhî góa, hō͘ góa o̍ah; Ia̍h bô hō͘ góa in-ūi só͘ ǹg-bāng--ê lâi kiàn-siàu.

(BCL) 求你照你的話扶持我，互我活，亦無互我因為所向望的來見誚。

117

(THR) Kiû Lí hû-chhî góa, góa chiū tit-kiù; Góa beh siông-siông tùi-tiōng Lí ê lu̍t-lē.

(BCL) 求你扶持我，我就得救，我欲常常對重你的律例。

118

(THR) Kìⁿ-nā kiâⁿ chha-lō͘, lī-khui Lí ê lu̍t-lē ê lâng, Lí khòaⁿ-khin in; In-ūi in ê khúi-chà sī hu-ké.

(BCL) 見若行差路離開你的律例的人，你看輕；因為的詭詐是虛假。

119

(THR) Sè-kan ê pháiⁿ-lâng, Lí lóng kā in tû--khì, chhin-chhiūⁿ che-tái; In-ūi án-ni, góa thiàⁿ-sioh Lí kan-chèng ê ōe.

(BCL) 世間的歹人，你攏給除去，親像渣滓；因為按呢我疼惜你干證的話。

120

(THR) Góa in-ūi kiaⁿ-ùi Lí, góa ê bah chiū chhoah; Lí ê phòaⁿ-tòan ia̍h hō͘ góa kiaⁿ-hiâⁿ.

(BCL) 我因為驚畏你，我的肉就惙；你的判斷亦互我驚惶。

121

(THR) Góa péng-kong kiâⁿ-gī; Kiû Lí m̄-thang chiong góa pàng hō͘ ap-chè góa ê lâng.

(BCL) 我秉公行義，求你呣通將我放互壓制我的人！

122

(THR) Kiû Lí pó-jīn Lí ê lô͘-po̍k, thang tit-tio̍h hó kéng-gū; Bo̍h-tit hō͘ kiau-ngō͘ ê lâng ap-chè góa.

(BCL) 求你保認你的奴僕，通得著好境遇，莫得互驕傲的人壓制我！

123

(THR) Góa in-ūi ǹg-bāng Lí ê kiù-un, kap Lí kong-gī ê ōe, Tì-kàu ba̍k-chiu hoe.

(BCL) 我因為向望你的救恩，及你公義的話致到目睭花。

124

(THR) Kiû Lí chiàu Lí ê chû-ài khóan-thāi Lí ê lô͘-po̍k; Chiong Lí ê lu̍t-lē kà-sī góa.

(BCL) 求你照你的慈愛款待你的奴僕，將你的律例教示我。

125

(THR) Góa sī Lí ê lô͘-po̍k, kiû Lí hō͘ góa tì-hūi; Hō͘ góa ōe chai Lí kan-chèng ê ōe.

(BCL) 我是你的奴僕，求你互我智慧，互我會知你干證的話。

126

(THR) Hiān-kim tng sī Iâ-hô-hoa kiâⁿ tāi-chì ê sî; In-ūi lâng hòe-bô Lí ê lu̍t-hoat.

(BCL) 現今當是耶和華行代誌的時，因為人廢無你的律法。

127

(THR) Só͘-í góa thiàⁿ-sioh Lí ê kài-bēng, Iâⁿ-kè kim, ia̍h iâⁿ-kè hó-kim.

(BCL) 所以，我疼惜你的誡命贏過金，亦贏過好金。

128

(THR) Só͘-í Lí it-chhè ê kà-sī, bān-sū, góa lóng lia̍h-chòe chèng-tı̍t; Koh góa òan-hūn it-chhè ê siâ-lō͘.

(BCL) 所以你一切的教示，萬事我攏掠做正直；閣我怨恨一切的邪路。

129

(THR) Lí kan-chèng ê ōe sī kî-biāu; Só͘-í góa ê sim kín-sīn chip-siú.

(BCL) 你干證的話是奇妙，所以我的心謹慎執守。

130

(THR) Lí ê ōe chı̍t-ē khui-thiah, chiū hoat-chhut kng, Hō͘ gōng-lâng thong-ta̍t.

(BCL) 你的話一下開拆就發出光，互戇人通達。

131

(THR) Góa khui-chhùi tı̍t-tı̍t chhóan; In-ūi góa chhiat-chhiat him-bō͘ Lí ê kài-bēng.

(BCL) 我開嘴直直喘，因為我切切欣慕你的誡命。

132

(THR) Kiû Lí o̍at-tńg ǹg góa, lîn-bín góa; Chhin-chhiūⁿ Lí pêng-siông khóan-thāi hiah ê kèng-ài Lí ê miâ ê lâng.

(BCL) 求你越轉向我，憐憫我，親像你平常款待許個敬愛你的名的人。

133

(THR) Kiû Lí ēng Lí ê ōe hō͘ góa ê kha-pō͘ ún-tàng; Bo̍h iông-ún sím-mı̍h chōe-ok kóan-hat góa.

(BCL) 求你用你的話互我的腳步穩當，莫容允甚麼罪惡管轄我。

134

(THR) Kiû Lí kiù-sio̍k góa, thoat-lī lâng ê ap-chè, Góa chiū beh siú Lí ê kà-sī.

(BCL) 求你救贖我脫離人的壓制，我就欲守你的教示。

135

(THR) Gōan Lí hō͘ Lí ê bīn ê kng chiò Lí ê lô͘-po̍k; Koh chiong Lí ê lu̍t-lē kà-sī góa.

(BCL) 願你互你的面的光照你的奴僕，閣將你的律例教示我。

136

(THR) Góa ê ba̍k-sái chhin-chhiūⁿ khoe-chúi teh lâu; In-ūi in bô siú Lí ê lu̍t-hoat.

(BCL) 我的目屎親像溪水流，因為無守你的律法。

137

(THR) Iâ-hô-hoa, Lí sī kong-gī-ê; Lí ê phòaⁿ-tòan ia̍h sī chèng-tı̍t--ê.

(BCL) 耶和華，你是公義的；你的判斷亦是正直的！

138

(THR) Lí só͘ bēng-lēng kan-chèng ê ōe, sī chiàu kong-gī, Ke̍k-kî sêng-sı̍t.

(BCL) 你所命令干證的話是照公義極其誠實。

139

(THR) Góa ê sim jia̍t, chhin-chhiūⁿ hé sio-bia̍t góa; In-ūi góa ê tùi-te̍k bōe-kì-tit Lí ê ōe.

(BCL) 我的心熱，親像火燒滅我，因為我的對敵記得你的話。

140

(THR) Lí ê ōe thòan-liān kàu chin cheng; Só͘-í Lí ê lô͘-po̍k chin ì-ài.

(BCL) 你的話鍛煉到真精，所以你的奴僕真意愛。

141

(THR) Góa pi-bî, hō͘ lâng khòaⁿ-khin, Chóng-sī góa bô bōe-kì-tit Lí ê kà-sī.

(BCL) 我卑微，互人看輕，總是我無記得你的教示。

142

(THR) Lí ê kong-gī sī éng-óan ê kong-gī; Lí ê lu̍t-hoat sī chin-sı̍t.

(BCL) 你的公義是永遠的公義；你的律法是真實。

143

(THR) Góa tú-tio̍h hōan-lān iu-khó͘; Chóng-sī Lí ê kài-bēng sī góa só͘ hoaⁿ-hí--ê.

(BCL) 我抵著患難憂苦，總是你的誡命是我所歡喜的。

144

(THR) Lí kan-chèng ê ōe éng-óan sī kong-gī; Kiû Lí hō͘ góa tì-hūi, góa chiū ōe o̍ah.

(BCL) 你干證的話永遠是公義；求你互我智慧，我就會活。

145

(THR) Iâ-hô-hoa ah, góa choan-sim kiû-kiò Lí, kiû Lí ìn góa; Góa beh kín-sīn siú Lí ê lu̍t-lē.

(BCL) 耶和華啊，我專心求叫你；求你應我，我欲謹慎守你的律例。

146

(THR) Góa tùi Lí kiû-kiò, kiû Lí kiù góa; Góa chiū beh siú Lí kan-chèng ê ōe.

(BCL) 我對你求叫，求你救我！我就欲守你干證的話。

147

(THR) Góa thàn thiⁿ bē kng kiû-kiò Lí; Tī Lí ê ōe góa ū ǹg-bāng.

(BCL) 我趁天未光求叫你；佇你的話我有向望。

148

(THR) Mî--sî, kiⁿ iáu-bē chhim, góa ê ba̍k-chiu í-keng nih-khui; In-ūi beh chēng-chēng siūⁿ Lí ê ōe.

(BCL) 暝時更猶未深我的目睭已經　開，因為欲靜靜想你的話。

149

(THR) Kiû Lí chiàu Lí ê chû-ài, thiaⁿ góa ê siaⁿ; Iâ-hô-hoa ah, kiû Lí chiong Lí ê phòaⁿ-tòan, hō͘ góa ōe o̍ah.

(BCL) 求你照你的慈愛聽我的聲；耶和華啊，求你將你的判斷互我會活！

150

(THR) Kòan-liān kiâⁿ-pháiⁿ ê lâng pek-óa lâi; In lī-khui Lí ê lu̍t-hoat hn̄g-hn̄g.

(BCL) 慣練行歹的人迫倚來；離開你的律法遠遠。

151

(THR) Iâ-hô-hoa ah, Lí sī kūn-kūn; Lí ê kài-bēng lóng sī chin-sı̍t.

(BCL) 耶和華啊，你是近近；你的誡命攏是真實！

152

(THR) Góa káng-kiù Lí kan-chèng ê ōe, chá-chá í-keng chai, Sī Lí lı̍p-tiāⁿ kàu éng-óan--ê.

(BCL) 我講究你干證的話，早早已經知是你立定到永遠的。

153

(THR) Kiû Lí khòaⁿ-kò͘ góa ê khó͘-lān, lâi khan-kiù góa; In-ūi góa bô bōe-kì-tit Lí ê lu̍t-hoat.

(BCL) 求你看顧我的苦難，來牽救我，因為我無記得你的律法。

154

(THR) Kiû Lí kā góa sin-oan, kiù-sio̍k góa; Chiàu Lí ê ōe hō͘ góa o̍ah.

(BCL) 求你給我伸冤，救贖我，照你的話互我活。

155

(THR) Kiù-un lī-khui pháiⁿ-lâng hn̄g-hn̄g; In-ūi in bô chhē Lí ê lu̍t-lē.

(BCL) 救恩離開歹人遠遠，因為無尋你的律例。

156

(THR) Iâ-hô-hoa ah, Lí ê chû-pi sī tōa; Kiû Lí chiàu Lí ê phòaⁿ-tòan hō͘ góa o̍ah.

(BCL) 耶和華啊，你的慈悲是大；求你照你的判斷互我活。

157

(THR) Khún-pek góa ê, tí-te̍k góa ê, chin-chōe, Chóng-sī góa bô phian-lī Lí kan-chèng ê ōe.

(BCL) 窘迫我的，抵敵我的，真多，總是我無偏離你干證的話。

158

(THR) Góa khòaⁿ-kìⁿ kan-ok ê lâng, chiū chin iàm-ò͘ⁿ; In-ūi in bô siú Lí ê ōe.

(BCL) 我看見奸惡的人就真厭惡，因為無守你的話。

159

(THR) Lí khòaⁿ góa cháiⁿ-iūⁿ thiàⁿ-sioh Lí ê kà-sī; Iâ-hô-hoa ah, kiû Lí chiàu Lí ê chû-ài hō͘ góa o̍ah.

(BCL) 你看我怎樣疼惜你的教示！耶和華啊，求你照你的慈愛互我活！

160

(THR) Lí ê ōe ê chóng-kun-thâu sī chin-sı̍t; Lí it-chhè kong-gī ê phòaⁿ-tòan sī éng-óan tī-teh.

(BCL) 你的話的總根頭是真實；你一切公義的判斷是永遠佇。

161

(THR) Kùi-cho̍k bô in-toaⁿ khún-pek góa; Chóng-sī góa ê sim kiaⁿ-ùi Lí ê ōe.

(BCL) 貴族無因端窘迫我，總是我的心驚畏你的話。

162

(THR) Góa hoaⁿ-hí Lí ê ōe, Chhin-chhiūⁿ lâng tit-tio̍h chōe-chōe thâi-iâⁿ ê mı̍h.

(BCL) 我歡喜你的話，親像人得著多多贏的物。

163

(THR) Pe̍h-chha̍t-ōe sī góa só͘ thòng-hūn, só͘ iàm-chiān--ê; Lí ê lu̍t-hoat sī góa só͘ thiàⁿ-sioh--ê.

(BCL) 白賊話是我所痛恨所厭賤的；你的律法是我所疼惜的。

164

(THR) Góa in-ūi Lí kong-gī ê phòaⁿ-tòan, Ta̍k-jı̍t chhit-pái o-ló Lí.

(BCL) 我因為你公義的判斷逐日七擺謳咾你。

165

(THR) Thiàⁿ-sioh Lí ê lu̍t-hoat ê lâng ū tōa pêng-an, Bô chı̍t-hāng ōe tîⁿ-pòaⁿ in ê kha.

(BCL) 疼惜你的律法的人有大平安，無一項會纏絆的腳。

166

(THR) Iâ-hô-hoa ah, góa ū teh ǹg-bāng Lí ê kiù-un, Ū kiâⁿ Lí ê kài-bēng.

(BCL) 耶和華啊，我有向望你的救恩，有行你的誡命。

167

(THR) Góa ê sim ū siú Lí kan-chèng ê ōe, chiah ê ōe, góa chīn-chāi ì-ài.

(BCL) 我的心有守你干證的話；諸個話我盡在意愛。

168

(THR) Góa ū siú Lí ê kà-sī, kap Lí kan-chèng ê ōe; In-ūi góa it-chhè só͘ kiâⁿ--ê, lóng tī Lí ê bīn-chêng.

(BCL) 我有守你的教示及你干證的話，因為我一切所行的攏佇你的面前。

169

(THR) Iâ-hô-hoa ah, gōan góa kiû-kiò ê siaⁿ thàu-kàu Lí ê bīn-chêng; Kiû Lí chiàu Lí ê ōe, siúⁿ-sù góa tì-hūi.

(BCL) 耶和華啊，願我求叫的聲透到你的面前，求你照你的話賞賜我智慧。

170

(THR) Gōan góa khún-kiû ê ōe kàu Lí ê bīn-chêng; Kiû Lí chiàu Lí ê ōe khan-kiù góa.

(BCL) 願我懇求的話到你的面前，求你照你的話牽救我。

171

(THR) Gōan góa ê chhùi-tûn hoat-chhut o-ló ê ōe, In-ūi Lí chiong Lí ê lu̍t-lē kà-sī góa.

(BCL) 願我的嘴唇發出謳咾的話，因為你將你的律例教示我。

172

(THR) Gōan góa ê chı̍h chhiùⁿ-koa o-ló Lí ê ōe; In-ūi Lí it-chhè ê kài-bēng lóng sī kong-gī.

(BCL) 願我的舌唱歌謳咾你的話，因為你一切的誡命攏是公義。

173

(THR) Gōan Lí chhun-chhiú pang-chān góa; In-ūi góa ū kéng Lí ê kà-sī.

(BCL) 願你伸手幫助我，因為我有揀你的教示。

174

(THR) Iâ-hô-hoa ah, góa chhiat-chhiat him-bō͘ Lí ê kiù-un; Lí ê lu̍t-hoat ia̍h sī góa só͘ hoaⁿ-hí--ê.

(BCL) 耶和華啊，我切切欣慕你的救恩！你的律法亦是我所歡喜的。

175

(THR) Gōan góa o̍ah--teh, góa ê sîn-hûn chiū beh o-ló Lí; Gōan Lí ê phòaⁿ-tòan pang-chān góa.

(BCL) 願我活，我的神魂就欲謳咾你！願你的判斷幫助我！

176

(THR) Góa bê-lō͘ chhin-chhiūⁿ phah-m̄-kìⁿ ê iûⁿ; kiû Lí chhē Lí ê lô͘-po̍k; In-ūi góa bô bōe-kì-tit Lí ê kài-bēng.

(BCL) 我迷路親像拍呣見的羊，求你尋你的奴僕，因為我無記得你的誡命。

Bible Color Mark

• 台語漢字羅馬本
• 巴克禮全羅