詩篇 第 24 章

1

(THR) Tāi-pı̍t ê si.1) Tōe kap kî-tiong só͘ chhiong-móa ê, Sè-kài kap tiàm tī i tiong-kan ê, lóng sio̍k Iâ-hô-hoa.

(BCL) 〔大衛的詩〕地及其中所充滿的，世界及踮佇伊中間的，攏屬耶和華。

2

(THR) I chiong tōe kiàn-lı̍p tī hái ê téng-bīn, An-tì tī tōa-chúi ê téng-bīn.

(BCL) 伊將地建立佇海的頂面，安置佇大水的頂面。

3

(THR) Chī-chūi ōe chiūⁿ Iâ-hô-hoa ê soaⁿ? Chī-chūi ōe khiā tī I sèng ê só͘-chāi?

(BCL) 是誰會上耶和華的山？是誰會徛佇伊聖的所在？

4

(THR) Chiū-sī chhiú chheng-khì, sim chheng-kiat; Chûn-sim bô ǹg hu-ké, chiù-chōa bô khǹg kan-kúi ê lâng.

(BCL) 就是手清氣心清潔、存心無向虛假、咒誓無囥奸詭的人。

5

(THR) Chit-hō lâng beh tit-tio̍h Iâ-hô-hoa sù-hok; Koh tùi kiù i ê Siōng-tè tit-tio̍h gī.

(BCL) 此號人欲得著耶和華賜福，閣對救伊的上帝得著義。

6

(THR) Chiah-ê sī chhē Iâ-hô-hoa ê cho̍k-lūi, Ngá-kok ê Siōng-tè ah, che sī ài kìⁿ Lí ê bīn ê lâng. [Sè-la̍h

(BCL) 諸個是尋耶和華的族類，雅各的上帝啊，這是愛見你的面的人。（細拉）

7

(THR) Siâⁿ-mn̂g ah, kia̍h-khí lín ê thâu; Éng-óan ê mn̂g ah, lín tio̍h siū kú-khí; Êng-kng ê Ông beh jı̍p.

(BCL) 城門啊，抬起恁的頭！永遠的門啊，恁著受舉起！榮光的王欲入！

8

(THR) Hit ê êng-kng ê Ông sī chī-chūi? Chiū-sī tōa khùi-la̍t tōa kôan-lêng ê Iâ-hô-hoa, Tī kau-chiàn ū tōa kôan-lêng ê Iâ-hô-hoa.

(BCL) 彼個榮光的王是是誰？就是大氣力大權能的耶和華，佇交戰有大權能的耶和華！

9

(THR) Siâⁿ-mn̂g ah, kia̍h-khí lín ê thâu, Éng-óan ê mn̂g ah, lín ia̍h tio̍h kia̍h-khí; Êng-kng ê Ông beh jı̍p.

(BCL) 城門啊，抬起恁的頭！永遠的門啊，恁亦著抬起！榮光的王欲入！

10

(THR) Hit ê êng-kng ê Ông sī chī-chūi? Bān-kun ê Iâ-hô-hoa, I sī êng-kng ê Ông. [Sè-la̍h

(BCL) 彼個榮光的王是是誰？萬軍的耶和華，伊是榮光的王！（細拉）

Bible Color Mark

• 台語漢字羅馬本
• 巴克禮全羅