詩篇 第 86 章

1

(THR) Tāi-pı̍t ê kî-tó.1) Iâ-hô-hoa ah, kiû Lí àⁿ hī-khang thiaⁿ góa; In-ūi góa sī khùn-khó͘ sòng-hiong ê.

(BCL) 〔大衛的祈禱。〕耶和華啊，求你俯耳孔聽我，因為我是困苦喪鄉的。

2

(THR) Kiû Lí pó-chûn góa ê sìⁿ-miā, in-ūi góa sī khiân-sêng ê lâng. Góa ê Siōng-tè ah, Lí ê lô͘-po̍k óa-khò Lí; kiû Lí chín-kiù i.

(BCL) 求你保存我的生命，因為我是虔誠的人。我的上帝啊，你的奴僕倚靠你，求你拯救伊！

3

(THR) Chú ah, kiû Lí lîn-bín góa; In-ūi góa thong-jı̍t kiû-kiò Lí.

(BCL) 主啊，求你憐憫我，因為我通日求叫你。

4

(THR) Chú ah, kiû Lí hō͘ Lí ê lô͘-po̍k sim hoaⁿ-hí; In-ūi góa ēng góa ê sim gióng-bōng Lí.

(BCL) 主啊，求你互你的奴僕心歡喜，因為我用我的心仰望你。

5

(THR) Chú ah, in-ūi Lí sī hó, hoaⁿ-hí sià-bián lâng; Ū hong-sēng ê chû-ài, siúⁿ-sù hōan-nā kiû-kiò Lí ê lâng.

(BCL) 主啊，因為你是好，歡喜赦免人，有豐盛的慈愛賞賜凡若求叫你的人。

6

(THR) Iâ-hô-hoa ah, kiû Lí àⁿ hī-khang thiaⁿ góa ê kî-tó; Àⁿ-lo̍h thiaⁿ góa khún-kiû ê siaⁿ.

(BCL) 耶和華啊，求你俯耳孔聽我的祈禱，俯落聽我懇求的聲。

7

(THR) Tī góa hōan-lān ê jı̍t, beh kiû-kiò Lí; Lí beh ìn góa.

(BCL) 佇我患難的日欲求叫你，你欲應我。

8

(THR) Chú ah, chiah ê siōng-tè ê tiong-kan, bô chı̍t-ê ōe pí-tit Lí; Lí ê só͘ chòe ia̍h bô thang pí-phēng.

(BCL) 主啊，諸個上帝的中間無一個會比得你；你的所做亦無通比並。

9

(THR) Chú ah, Lí só͘ chō ê bān-pang lóng beh lâi phak-pài tī Lí ê bīn-chêng; In ia̍h beh êng-kng Lí ê miâ.

(BCL) 主啊，你所造的萬邦攏欲來仆拜佇你的面前；亦欲榮光你的名。

10

(THR) In-ūi Lí chòe tōa, koh kiâⁿ kî-biāu ê sū; Chí-ū Lí sī Siōng-tè.

(BCL) 因為你做大，閣行奇妙的事；只有你是上帝。

11

(THR) Iâ-hô-hoa ah, kiû Lí chiong Lí ê tō-lō͘ chí-sī góa; góa beh chiàu Lí ê chin-lí lâi kiâⁿ; Hō͘ góa choan-it ê sim kèng-ùi Lí ê miâ.

(BCL) 耶和華啊，求你將你的道路指示我；我欲照你的真理來行；互我專一的心敬畏你的名！

12

(THR) Chú, góa ê Siōng-tè ah, góa beh chôan-sim o-ló Lí; Góa beh êng-kng Lí ê miâ kàu éng-óan.

(BCL) 主──我的上帝啊，我欲全心謳咾你；我欲榮光你的名，到永遠。

13

(THR) In-ūi Lí tùi góa hoat-chhut tōa ê chû-ài, Lí kiù góa ê sìⁿ-miā bián lo̍h ke̍k-chhim ê im-kan.

(BCL) 因為，你對我發出大的慈愛；你救我的生命免落極深的陰間。

14

(THR) Siōng-tè ah, kiau-ngō͘ ê lâng khí-lâi kong-kek góa; Koh ū kiông-pō ê tóng siàu-siūⁿ góa ê sìⁿ-miā; In bô kèng-hōng Lí tī in ê bīn-chêng.

(BCL) 上帝啊，驕傲的人起來攻擊我，閣有強暴的黨數想我的生命，無敬奉你佇的面前。

15

(THR) Chú ah, Lí sī jîn-chû un-tián ê Siōng-tè; Bô khòai-khòai siū-khì, koh ū hong-sēng ê chû-ài kap sêng-sı̍t.

(BCL) 主啊，你是仁慈恩典的上帝，無快快受氣，閣有豐盛的慈愛及誠實。

16

(THR) Kiû Lí o̍at--kè-lâi khòaⁿ góa, khó-lîn góa; Chiong Lí ê khùi-la̍t siúⁿ-sù Lí ê lô͘-po̍k, Kiù Lí ê lú-pī ê kiáⁿ.

(BCL) 求你越過來看我，可憐我，將你的氣力賞賜你的奴僕，救你的女婢的子。

17

(THR) Kiû Lí hián-chhut un-tián góa ê pîn-kù, Hō͘ òan-hūn góa ê lâng khòaⁿ-kìⁿ lâi kiàn-siàu; In-ūi Iâ-hô-hoa Lí pang-chān góa, an-ùi góa.

(BCL) 求你顯出恩典我的憑據，互怨恨我的人看見來見誚，因為耶和華──你幫助我，安慰我。

Bible Color Mark

• 台語漢字羅馬本
• 巴克禮全羅