撒迦利亞 第 13 章

1

(THR) Tng hit-jı̍t beh ūi-tio̍h Tāi-pı̍t ê ke kap Iâ-lō͘-sat-léng khiā-khí ê peh-sìⁿ khui chı̍t ê chúi-chôaⁿ, sóe-tû chōe-ok kap lâ-sâm.

(BCL) 「當彼日，欲為著大衛的家及耶路撒冷徛起的百姓開一個水泉，洗除罪惡及垃墋。」

2

(THR) Bān-kun ê Iâ-hô-hoa kóng, Tng hit-jı̍t, Góa beh tùi chit ê tōe-hng tû-khì ngó͘-siōng ê miâ, bô koh hō͘ lâng kì-liām; iā beh hō͘ sian-ti kap ù-òe ê sîn lī-khui chit só͘-chāi.

(BCL) 萬軍的耶和華講：「當彼日，我欲對此個地方除去偶像的名，無閣互人紀念；也欲互先知及污穢的神離開此所在。

3

(THR) Nā ū lâng chhàm-gú, siⁿ i ê pē-bú beh kā i kóng, Lí bōe tit-tio̍h o̍ah, in-ūi lí thok Iâ-hô-hoa ê miâ kóng pe̍h-chha̍t; siⁿ i ê pē-bú, tī i chhàm-gú ê sî, beh chiong i chha̍k-thàu.

(BCL) 若有人讖語，生伊的父母欲給伊講：『你得著活，因為你託耶和華的名講白賊。』生伊的父母佇伊讖語的時，欲將伊鑿透。

4

(THR) Hit-jı̍t hiah ê sian-ti, ta̍k-ê tī in chhàm-gú ê sî, beh ūi-tio̍h in ê īⁿ-siōng lâi kiàn-siàu, bô koh chhēng ū mn̂g ê saⁿ lâi phiàn lâng;

(BCL) 彼日，許個先知逐個佇讖語的時欲為著的異象來見誚，無閣穿有毛的衫來騙人。

5

(THR) i beh kóng, Góa m̄-sī sian-ti, góa sī choh-sit lâng; góa tùi sòe-hàn chiū chòe lâng ê lô͘-po̍k.

(BCL) 伊欲講：『我呣是先知，我是作穡人；我對細漢就做人的奴僕。』

6

(THR) Ū lâng beh mn̄g i kóng, Lí nn̄g chhiú ê tiong-kan sī sím-mı̍h siong ah? I beh ìn kóng, Che sī góa tī pêng-iú ê ke-tiong só͘ siū ê siong.

(BCL) 有人欲問伊講：『你二手的中間是甚麼傷啊？』伊欲應講：『這是我佇朋友的家中所受的傷。』」

7

(THR) Bān-kun ê Iâ-hô-hoa kóng, To-kiàm ah, tio̍h khí-lâi kong-kek Góa ê bo̍k-chiá, iā kong-kek hit-ê kap Góa chòe tâng-phōaⁿ ê lâng; phah bo̍k-chiá, iûⁿ-kûn chiū sì-sòaⁿ; hiah-ê bî-sòe--ê, Góa beh o̍at-tńg chhiú kàu tī in.

(BCL) 萬軍的耶和華講：刀劍啊，著起來，攻擊我的牧者也攻擊彼個及我做同伴的人。拍牧者，羊群就四散；許個微細者，我欲越轉手到佇。

8

(THR) Iâ-hô-hoa kóng, Chit ê chôan-tōe ê lâng, nn̄g-hūn beh siū chián-tû lâi sí; chı̍t-hūn beh lâu--teh.

(BCL) 耶和華講：此個全地的人，二份欲受剪除來死，一份欲留。

9

(THR) Góa beh hō͘ chit-ê saⁿ-hūn-chı̍t keng-kè hé, thòan-liān in chhin-chhiūⁿ thòan-liān gûn, chhì-liān in chhin-chhiūⁿ chhì-liān kim; in beh kiû-kiò Góa ê miâ, Góa beh ìn in; Góa beh kóng, Che sī Góa ê peh-sìⁿ; in iā beh kóng, Iâ-hô-hoa sī góa ê Siōng-tè.

(BCL) 我欲互此個三份一經過火，鍛煉，親像鍛煉銀；試煉，親像試煉金。欲求叫我的名，我欲應。我欲講：這是我的百姓。也欲講：耶和華是我的上帝。

Bible Color Mark

• 台語漢字羅馬本
• 巴克禮全羅