撒迦利亞 第 3 章

1

(THR) I koh hō͘ góa khòaⁿ-kìⁿ chè-si-thâu Iok-su-a khiā tī Iâ-hô-hoa sù-chiá ê bīn-chêng, Sat-tàn ia̍h khiā tī i ê chiàⁿ-pêng, chòe i ê tùi-te̍k.

(BCL) 伊閣互我看見：祭司頭約書亞徛佇耶和華使者的面前；撒但亦徛佇伊的正旁，做伊的對敵。

2

(THR) Iâ-hô-hoa tùi Sat-tàn kóng, Sat-tàn ah, Iâ-hô-hoa chek-pī lí, chiū-sī kéng-sóan Iâ-lō͘-sat-léng ê Iâ-hô-hoa chek-pī lí; che kiám-m̄-sī tùi hé-tiong pu̍ih--chhut-lâi ê chı̍t tè chhâ mah?

(BCL) 耶和華對撒但講：「撒但啊，耶和華責備你！就是揀選耶路撒冷的耶和華責備你！這豈呣是對火中拔出來的一塊柴嗎？」

3

(THR) Iok-su-a chhēng ù-òe ê saⁿ, khiā tī sù-chiá ê bīn-chêng.

(BCL) 約書亞穿污穢的衫徛佇使者的面前。

4

(THR) I ìn khiā tī i ê bīn-chêng-ê kóng, Lín tio̍h thǹg i ù-òe ê saⁿ. Koh tùi i kóng, Khòaⁿ ah, Góa hō͘ lí thoat-lī lí ê chōe-ok, beh hō͘ lí chhēng súi ê saⁿ.

(BCL) 伊應徛佇伊的面前的講：「恁著褪伊污穢的衫」；閣對伊講：「看啊，我互你脫離你的罪惡，欲互你穿娞的衫。」

5

(THR) Góa koh kóng, Ēng súi ê bō tì tī i ê thâu-khak; in chiū ēng súi ê bō tì tī i ê thâu-khak, kā i chhēng-saⁿ; Iâ-hô-hoa ê sù-chiá khiā tī piⁿ-á.

(BCL) 我閣講：「用娞的帽戴佇伊的頭殼。」就用娞的帽戴佇伊的頭殼，給伊穿衫，耶和華的使者徛佇邊仔。

6

(THR) Iâ-hô-hoa ê sù-chiá kéng-kài Iok-su-a kóng,

(BCL) 耶和華的使者警戒約書亞講：

7

(THR) Bān-kun ê Iâ-hô-hoa án-ni kóng, Lí nā kiâⁿ Góa ê lō͘, siú Góa só͘ kau-thok lí--ê, lí chiū thang kóan-lí Góa ê ke, kò͘-siú Góa ê īⁿ; Góa ia̍h beh hō͘ lí tī chiah-ê khiā-teh ê lâng tiong-kan ū chhut-jı̍p ê lō͘.

(BCL) 「萬軍的耶和華按呢講：你若行我的路，守我所交託你的，你就通管理我的家，顧守我的院；我亦欲互你佇諸個徛的人中間有出入的路。

8

(THR) Chè-si-thâu Iok-su-a ah, lí kap chē tī lí ê bīn-chêng ê tâng-phōaⁿ lóng tio̍h thiaⁿ; in sī chòe tiāu-thâu ê lâng; khòaⁿ ah, Góa beh hō͘ Góa ê lô͘-po̍k chheng-chòe Chhiū-ki--ê lâi.

(BCL) 祭司頭約書亞啊，你及坐佇你的面前的同伴攏著聽。（是做兆頭的人。）看啊，我欲互我的奴僕稱做樹枝者來。

9

(THR) Khòaⁿ ah, Góa só͘ hē tī Iok-su-a bīn-chêng ê chio̍h, tī chı̍t tè chio̍h ū chhit lúi ba̍k-chiu; bān-kun ê Iâ-hô-hoa kóng, Khòaⁿ ah, Góa beh tiau-khek só͘ tiau-khek--ê, ia̍h beh tī chı̍t-jı̍t ê tiong-kan tû-khì chit ê tōe-hng ê chōe-ok.

(BCL) 看啊，我所下佇約書亞面前的石，佇一塊石有七蕊目睭。萬軍的耶和華講：看啊，我欲雕刻所雕刻者，亦欲佇一日的中間除去此個地方的罪惡。

10

(THR) Tng hit-jı̍t, lín ta̍k-lâng beh chhiáⁿ chhù-piⁿ lâi kàu phû-tô-chhiū-ē, kap bû-hoa-kó chhiū-ē; che sī bān-kun ê Iâ-hô-hoa kóng--ê.

(BCL) 當彼日，恁逐人欲請厝邊來到葡萄樹下，及無花果樹下。這是萬軍的耶和華講的。」

Bible Color Mark

• 台語漢字羅馬本
• 巴克禮全羅