撒迦利亞 第 4 章

1

(THR) Hit-ê kap góa kóng-ōe ê sù-chiá koh lâi kiò góa chhíⁿ, chhin-chhiūⁿ lâng teh khùn siū kiò-chhíⁿ chı̍t-iūⁿ.

(BCL) 彼個及我講話的使者閣來叫我醒，親像人睏受叫醒一樣。

2

(THR) I kā góa kóng, Lí khòaⁿ-kìⁿ sím-mı̍h? Góa kóng, Góa khòaⁿ-kìⁿ, khòaⁿ ah, ū chı̍t ê teng-tâi, sī kui-ki ēng kim chòe--ê, téng-bīn ū chı̍t-ê iû-kūi, teng-tâi téng ū chhit chóaⁿ teng; téng-bīn ê teng-chóaⁿ, ū chhit-tiâu-kńg;

(BCL) 伊給我講：「你看見甚麼？」我講：「我看見，看啊，有一個燈台，是歸支用金做的，頂面有一個油櫃，燈台頂有七盞燈，頂面的燈盞，有七條管。

3

(THR) koh ū nn̄g-châng ê kaⁿ-ná-chhiū, chı̍t-châng tī iû-kūi ê chiàⁿ-pêng, chı̍t-châng tī iû-kūi ê tò-pêng.

(BCL) 閣有二欉的橄欖樹，一欉佇油櫃的正旁，一欉佇油櫃的倒旁。」

4

(THR) Góa mn̄g kap góa kóng-ōe ê sù-chiá kóng, Góa ê chú ah, chiah-ê sī sím-mı̍h?

(BCL) 我問及我講話的使者講：「我的主啊，諸個是甚麼？」

5

(THR) Kap góa kóng-ōe ê sù-chiá ìn góa kóng, Lí m̄-chai chiah-ê sī sím-mı̍h mah? Góa kóng, Góa ê chú ah, góa m̄-chai.

(BCL) 及我講話的使者應我講：「你呣知諸個是甚麼嗎？」我講：「我的主啊，我呣知。」

6

(THR) I ìn góa kóng, Che sī Iâ-hô-hoa hoan-hù Só͘-lô-pa-pek ê ōe kóng, M̄-sī ēng kôan-sè, m̄-sī ēng lêng-le̍k, chiū-sī ēng Góa ê Sîn; che sī bān-kun ê Iâ-hô-hoa kóng--ê.

(BCL) 伊應我講：「這是耶和華吩咐所羅巴伯的話。講：呣是用權勢，呣是用能力，就是用我的神。這是萬軍的耶和華講的。

7

(THR) Tōa-soaⁿ ah, lí sī sím-mı̍h? tī Só͘-lô-pa-pek ê bīn-chêng, lí beh chiâⁿ-chòe pîⁿ-tōe; i beh hō͘ chhù-kak-thâu ê chio̍h chhut-lâi, koh ū tōa hoaⁿ-hí ê siaⁿ kiò kóng, Un-hūi, un-hūi kui i.

(BCL) 大山啊，你是甚麼？佇所羅巴伯的面前，你欲成做平地。伊欲互厝角頭的石出來，閣有大歡喜的聲叫講：『恩惠，恩惠歸伊！』」

8

(THR) Iâ-hô-hoa ê ōe koh lîm-kàu góa kóng,

(BCL) 耶和華的話閣臨到我講：

9

(THR) Só͘-lô-pa-pek ê chhiú ū hē chit keng tiān ê tōe-ki, i ê chhiú ia̍h beh ôan chit ê kang; lí chiū chai bān-kun ê Iâ-hô-hoa chhe góa kàu lín chia.

(BCL) 「所羅巴伯的手有下此間殿的地基，伊的手亦欲完此個工，你就知萬軍的耶和華差我到恁遮。

10

(THR) Chī-chūi khòaⁿ-khin chit ê sió-khóa sū ê jı̍t ah? Chí(Chit) chhit-ê, sī Iâ-hô-hoa ê ba̍k-chiu, óng-lâi tī chôan-tōe, khòaⁿ-kìⁿ Só͘-lô-pa-pek ê chhiú the̍h chîn-sòaⁿ, chiū hoaⁿ-hí.

(BCL) 是誰看輕此個小可事的日啊？此七個是耶和華的目睭，往來佇全地，看見所羅巴伯的手提繩線就歡喜。」

11

(THR) Góa koh mn̄g i kóng, Chit ê teng-tâi chó-iū nn̄g châng kaⁿ-ná-chhiū sī sím-mı̍h ì-sù?

(BCL) 我閣問伊講：「此個燈台左右二欉橄欖樹是甚麼意思？」

12

(THR) Góa koh mn̄g i kóng, Kaⁿ-ná-chhiū ê nn̄g-ki, tùi nn̄g-tiâu kim ê kńg lâu-chhut kim-iû, sī sím-mı̍h ì-sù?

(BCL) 我閣問伊講：「橄欖樹的二枝對二條金的管流出金油是甚麼意思？」

13

(THR) I ìn góa kóng, Lí m̄-chai chiah-ê sī sím-mı̍h ì-sù mah? Góa kóng, Góa ê chú ah, góa m̄-chai.

(BCL) 伊應我講：「你呣知諸個是甚麼意思嗎？」我講：「我的主啊，我呣知。」

14

(THR) I kóng, Che sī nn̄g ê siū-boah-iû--ê, khiā tī phó͘ thiⁿ-ē ê Chú ê piⁿ-á.

(BCL) 伊講：「這是二個受抹油者徛佇普天下的主的邊仔。」

Bible Color Mark

• 台語漢字羅馬本
• 巴克禮全羅