撒迦利亞 第 7 章

1

(THR) Tāi-lī-o͘ ông sì-nî káu-ge̍h, chiū-sī Ki-su-liû ge̍h, chhoe sì, Iâ-hô-hoa ê ōe lîm-kàu Sat-ka-lī-a.

(BCL) 大利烏王四年九月，就是基斯流月初四，耶和華的話臨到撒迦利亞。

2

(THR) Hit-sî Pek-te̍k-lī lâng í-keng chhe Sa-lī-sek kap Lī-kian-bí-le̍k kap tè in ê lâng khì kiû-un tī Iâ-hô-hoa,

(BCL) 彼時伯特利人已經差沙利色及利堅米勒，及隨的人去求恩佇耶和華，

3

(THR) iā mn̄g bān-kun ê Iâ-hô-hoa tiān-lāi ê chè-si í-kı̍p sian-ti kóng, Góa le̍k-nî í-lâi tī gō͘-ge̍h-kan thî-khàu ka-kī hun-piat, taⁿ iáu-kú tio̍h án-ni kiâⁿ mah?

(BCL) 也問萬軍的耶和華殿內的祭司以及先知講：「我歷年以來，佇五月間啼哭家己分別，今猶久著按呢行嗎？」

4

(THR) Bān-kun ê Iâ-hô-hoa ê ōe lîm-kàu góa kóng,

(BCL) 萬軍的耶和華的話臨到我講：

5

(THR) Lí tio̍h kā chit só͘-chāi ê chèng peh-sìⁿ kap chè-si kóng, Lín chhit-cha̍p nî kú, tī gō͘-ge̍h chhit-ge̍h kìm-chia̍h pi-ai kiám-sī ūi-tio̍h Góa, ūi-tio̍h Góa, kìm-chia̍h mah?

(BCL) 「你著給此所在的眾百姓及祭司，講：『恁七十年久，佇五月、七月禁食悲哀豈是為著我，為著我禁食嗎？

6

(THR) Lín he̍k-sī chia̍h he̍k-sī lim, kiám m̄-sī lín teh-chia̍h, lín teh-lim mah?

(BCL) 恁或是食或是飲，豈呣是恁食，恁飲嗎？

7

(THR) Tng Iâ-lō͘-sat-léng kap sì-ûi ê siâⁿ ū khiā-khí ê peh-sìⁿ koh hong-sēng, lâm-hng kap pîⁿ-iûⁿ ū lâng khiā-khí ê sî, Iâ-hô-hoa thok-tiōng chêng ê sian-ti só͘ soan-thôan ê ōe, lín kiám-m̄-tio̍h thiaⁿ mah?

(BCL) 當耶路撒冷及四圍的城有徛起的百姓閣豐盛，南方及平洋有人徛起的時，耶和華託仗前的先知所宣傳的話，恁豈呣著聽嗎？』」

8

(THR) Iâ-hô-hoa ê ōe koh lîm-kàu Sat-ka-lī-a kóng, Bān-kun ê Iâ-hô-hoa bat án-ni kóng,

(BCL) 耶和華的話閣臨到撒迦利亞講：

9

(THR) Tio̍h chiàu chin-sı̍t ê kong-pêng lâi sím-phòaⁿ, tāi-ke ēng chû-ài lîn-bín lâi saⁿ khóan-thāi;

(BCL) 「萬軍的耶和華曾按呢講：『著照真實的公平來審判，大家用慈愛憐憫來相款待。

10

(THR) m̄-thang khi-hū kóaⁿ-hū ko͘-jî, chhut-gōa lâng, kap sòng-hiong lâng; m̄-thang sim-lāi kè-bô͘ pháiⁿ-tāi lâi saⁿ-hām-hāi.

(BCL) 呣通欺負寡婦、孤兒、出外人、及喪鄉人。呣通心內計謀歹代來相陷害。』」

11

(THR) Chóng-sī in m̄-khéng thiaⁿ-thàn, o̍at-tńg keng-thâu pōe-ge̍k, that-ba̍t in ê hī-khang tì-kàu bōe thiaⁿ.

(BCL) 總是呣肯聽趁，越轉肩頭悖逆，塞密的耳孔致到聽，

12

(THR) Koh hō͘ in ê sim ngī chhin-chhiūⁿ sōan-chio̍h, bián-tit thiaⁿ lu̍t-hoat, kap bān-kun ê Iâ-hô-hoa ēng I ê Sîn thok chêng ê sian-ti só͘ kóng ê ōe; só͘-í bān-kun ê Iâ-hô-hoa tōa-tōa hoat siū-khì.

(BCL) 閣互的心硬親像鑽石，免得聽律法及萬軍的耶和華用伊的神託前的先知所講的話。所以，萬軍的耶和華大大發受氣。

13

(THR) In-ūi I bat kiò, in m̄-thiaⁿ, án-ni in beh kiò, Góa iā m̄-thiaⁿ; che sī bān-kun ê Iâ-hô-hoa kóng--ê;

(BCL) 因為伊曾叫：「呣聽，按呢欲叫，我也呣聽！這是萬軍的耶和華講的。

14

(THR) nā-sī Góa beh ēng kńg-lê-hong chhe-sòaⁿ in kàu in só͘ m̄-bat ê lia̍t-kok. Án-ni chit ê tōe tī in khì ê liáu-āu pìⁿ-chòe pha-hng, tì-kàu bô lâng óng-lâi keng-kè; in-ūi in hō͘ thang hoaⁿ-hí ê tōe pha-hng lah.

(BCL) 若是我欲用捲螺風吹散到所呣識的列國。按呢，此個地佇去的了後變做拋荒，致到無人往來經過，因為互通歡喜的地拋荒啦。」

Bible Color Mark

• 台語漢字羅馬本
• 巴克禮全羅