撒迦利亞 第 8 章

1

(THR) Bān-kun ê Iâ-hô-hoa ê ōe lîm-kàu kóng,

(BCL) 萬軍的耶和華的話臨到講：

2

(THR) Bān-kun ê Iâ-hô-hoa án-ni kóng, Góa ūi-tio̍h Sek-an ke̍k-kî jia̍t-sim, Góa ūi-tio̍h i jia̍t-sim, hoat-chhut tōa siū-khì.

(BCL) 「萬軍的耶和華按呢講：我為著錫安極其熱心，我為著伊熱心，發出大受氣。

3

(THR) Iâ-hô-hoa án-ni kóng: Góa taⁿ tò--lâi Sek-an, beh tiàm tī Iâ-lō͘-sat-léng ê tiong-kan; Iâ-lō͘-sat-léng beh chheng-chòe Sêng-sı̍t ê siâⁿ; bān-kun ê Iâ-hô-hoa ê soaⁿ beh chheng-chòe Sèng ê soaⁿ.

(BCL) 耶和華按呢講：我今倒來錫安，欲踮佇耶路撒冷的中間。耶路撒冷欲稱做誠實的城，萬軍的耶和華的山欲稱做聖的山。

4

(THR) Bān-kun ê Iâ-hô-hoa án-ni kóng: Chiong-lâi beh ū lāu ê ta-po͘-lâng lāu ê hū-jîn-lâng chē tī Iâ-lō͘-sat-léng khoah ê koe-lō͘, in-ūi nî-lāu ta̍k-ê kia̍h kóaiⁿ-á.

(BCL) 萬軍的耶和華按呢講：將來欲有老的查甫人、老的婦仁人坐佇耶路撒冷闊的街路，因為年老逐個抬柺仔。

5

(THR) Siâⁿ-lāi khoah ê koe-lō͘ beh ū ta-po͘-gín-ná cha-bó͘ gín-ná móa-móa thit-thô tī hit ê koe-lō͘-tiong.

(BCL) 城內闊的街路欲有查甫囝仔、查某囝仔滿滿佇彼個街路中。

6

(THR) Bān-kun ê Iâ-hô-hoa án-ni kóng, Tng-jı̍t só͘ chhun ê peh-sìⁿ khòaⁿ che chòe kî-kòai, Góa kiám iā khòaⁿ chòe kî-kòai mah? Che sī bān-kun ê Iâ-hô-hoa kóng--ê.

(BCL) 萬軍的耶和華按呢講：當日所剩的百姓看這做奇怪，我豈也看做奇怪嗎？這是萬軍的耶和華講的。

7

(THR) Bān-kun ê Iâ-hô-hoa án-ni kóng: Khòaⁿ ah, Góa beh kiù Góa ê peh-sìⁿ tùi jı̍t-chhut ê só͘-chāi iā tùi jı̍t-lo̍h ê só͘-chāi tò--lâi;

(BCL) 萬軍的耶和華按呢講：看啊，我欲救我的百姓對日出的所在也對日落的所在倒來。

8

(THR) Góa beh chhōa in lâi, in beh khiā-khí tī Iâ-lō͘-sat-léng ê tiong-kan; in beh chòe Góa ê peh-sìⁿ, Góa beh chòe in ê Siōng-tè, pîn sêng-sı̍t kap kong-gī.

(BCL) 我欲導來，欲徛起佇耶路撒冷的中間。欲做我的百姓，我欲做的上帝，憑誠實及公義。」

9

(THR) Bān-kun ê Iâ-hô-hoa án-ni kóng: Tng hē bān-kun ê Iâ-hô-hoa ê chhù ê tōe-ki, thang khí tiān-tn̂g, hit-jı̍t sian-ti só͘ kóng ê ōe, hiān-chāi lín thiaⁿ-kìⁿ, taⁿ tio̍h ióng-chòng lín ê chhiú.

(BCL) 萬軍的耶和華按呢講：「當下萬軍的耶和華的厝的地基、通起殿堂，彼日先知所講的話，現在恁聽見，今著勇壯恁的手。

10

(THR) Hit-jı̍t í-chêng lâng bô tit-tio̍h kang-chîⁿ, cheng-siⁿ iā bô tit-tio̍h kang-chîⁿ, koh in-ūi tùi-te̍k ê iân-kò͘, chhut-jı̍p ê lâng bô tit-tio̍h pêng-an; in-ūi Góa hō͘ chèng-lâng saⁿ kong-kek.

(BCL) 彼日以前，人無得著工錢，精牲也無得著工錢；閣因為對敵的緣故，出入的人無得著平安，因為我互眾人相攻擊。

11

(THR) Chóng-sī Góa taⁿ khóan-thāi chiah ê chhun ê peh-sìⁿ bô beh chhin-chhiūⁿ chêng ê jı̍t; che sī bān-kun ê Iâ-hô-hoa kóng--ê.

(BCL) 總是，我今款待諸個剩的百姓無欲親像前的日。這是萬軍的耶和華講的。

12

(THR) In-ūi beh ū pêng-an ê chéng-chí, phû-tô-chhiū beh kiat ké-chí, tōe beh chhut thó͘-sán, thiⁿ beh lo̍h lō͘-chúi; Góa beh hō͘ chiah ê chhun ê peh-sìⁿ sêng-siū chiah-ê it-chhè.

(BCL) 因為欲有平安的種子，葡萄樹欲結果子，地欲出土產，天欲落露水。我欲互諸個剩的百姓承受諸個一切。

13

(THR) Iû-tāi ke kap Í-sek-lia̍t ke ah, chêng tī lia̍t-kok-tiong ín-khí lín lâi chiù-chó͘, án-ni góa beh chín-kiù lín, hō͘ lâng ín-khí lín lâi chiok-hok; lín bo̍h-tit kiaⁿ, lín ê chhiú tio̍h ióng-chòng.

(BCL) 猶大家及以色列家啊，前佇列國中引起恁來咒詛；按呢，我欲拯救恁，互人引起恁來祝福。恁莫得驚，恁的手著勇壯。」

14

(THR) In-ūi bān-kun ê Iâ-hô-hoa án-ni kóng: Lín ê lia̍t-chó͘ jiá Góa ê siū-khì ê sî, Góa siūⁿ beh kàng chai-ē tī lín, iā bô thè-hóe;

(BCL) 因為萬軍的耶和華按呢講：「恁的列祖惹我的受氣的時，我想欲降災禍佇恁，也無退悔。

15

(THR) taⁿ Góa iā án-ni siūⁿ beh si-un hō͘ Iâ-lō͘-sat-léng kap Iû-tāi ke; lín bo̍h-tit kiaⁿ; che sī Iâ-hô-hoa kóng--ê.

(BCL) 今我也按呢想欲施恩互耶路撒冷及猶大家，恁莫得驚。這是耶和華講的。

16

(THR) Lín só͘ eng-kai kiâⁿ-ê sī án-ni: Ta̍k-lâng kap chhù-piⁿ kóng-ōe sêng-sı̍t; tī lín ê siâⁿ-mn̂g kiâⁿ sêng-sı̍t kap hô-pêng ê sím-phòaⁿ;

(BCL) 恁所應該行的是按呢：逐人及厝邊講話誠實，佇恁的城門行誠實及和平的審判。

17

(THR) sim-lāi m̄-thang kè-bô͘ pháiⁿ-tāi, hāi chhù-piⁿ; m̄-thang ài lām-sám chiù-chōa; in-ūi chiah ê sū lóng sī Góa só͘ òan-hūn--ê; che sī Iâ-hô-hoa kóng--ê.

(BCL) 心內呣通計謀歹代害厝邊，呣通愛濫糝咒誓，因為諸個事攏是我所怨恨的。這是耶和華講的。」

18

(THR) Bān-kun ê Iâ-hô-hoa ê ōe lîm-kàu góa kóng,

(BCL) 萬軍的耶和華的話臨到我講：

19

(THR) Bān-kun ê Iâ-hô-hoa án-ni kóng: Sì-ge̍h ê kìm-chia̍h, gō͘-ge̍h ê kìm-chia̍h, chhit-ge̍h ê kìm-chia̍h, cha̍p-ge̍h ê kìm-chia̍h, tī Iû-tāi ke beh chòe hoaⁿ-hí khòai-lo̍k, tek-ì ê choeh-kî; só͘-í lín tio̍h ì-ài sêng-sı̍t kap hô-pêng.

(BCL) 「萬軍的耶和華按呢講：四月的禁食、五月的禁食、七月的禁食、十月的禁食，佇猶大家欲做歡喜快樂得意的節期；所以恁著意愛誠實及和平。」

20

(THR) Bān-kun ê Iâ-hô-hoa án-ni kóng: Chiong-lâi ū lia̍t-kok ê lâng kap chōe-chōe siâⁿ khiā-khí ê peh-sìⁿ beh kàu;

(BCL) 萬軍的耶和華按呢講：「將來有列國的人及多多城徛起的百姓欲到。

21

(THR) khiā-khí chit ê siâⁿ ê peh-sìⁿ beh kàu hit ê siâⁿ, kóng, Lán tio̍h kín-kín khì kiû Iâ-hô-hoa ê un, khì chhē bān-kun ê Iâ-hô-hoa; lūn-kàu góa, góa iā beh khì.

(BCL) 徛起此個城的百姓欲到彼個城，講：『咱著緊緊去求耶和華的恩，去尋萬軍的耶和華；論到我，我也欲去。』

22

(THR) Beh ū chōe-chōe peh-sìⁿ kap kiông-tōa ê kok lâi Iâ-lō͘-sat-léng chhē bān-kun ê Iâ-hô-hoa, kiû Iâ-hô-hoa ê un.

(BCL) 欲有多多百姓及強大的國來耶路撒冷尋萬軍的耶和華，求耶和華的恩。

23

(THR) Bān-kun ê Iâ-hô-hoa án-ni kóng: Tng hiah ê jı̍t tùi lia̍t-kok bān-cho̍k-tiong beh ū cha̍p-lâng khîⁿ chı̍t ê Iû-tāi lâng ê saⁿ-á-ku, khîⁿ i, kóng, Góan beh kap lín saⁿ-kap khì, in-ūi góan thiaⁿ-kìⁿ Siōng-tè kap lín tī-teh.

(BCL) 萬軍的耶和華按呢講：當許個日，對列國萬族中欲有十人擒一個猶大人的衫仔裾，擒伊，講：『阮欲及恁相及去，因為阮聽見上帝及恁佇。』」

Bible Color Mark

• 台語漢字羅馬本
• 巴克禮全羅